Luke 19

Zacchaeus

1Kulana Jesus ukae Jericho, kama la ehaele valoko kemakaꞌina la. 2Vahola, hekama haimoni emale ma Zacchaeus enoho ilaa. Kama la eaoao na{kakisi}. 3Kama la ehaiꞌahi ma iꞌike Jesus. Ia keonohenua la emumui aꞌe kevahi keala. Kena kama la seꞌike, maikinimea aia hekama popoko. 4Kena iko kama la ikele imua keala Jesus ehaele la, noꞌae iluna kelaꞌau ke{fig} ma iꞌike aia kama la.

5Keualoko Jesus ukae keꞌina kelaꞌau la, ko kama la iꞌila iluna noꞌike Zacchaeus, kena ime aꞌe, “Zacchaeus, kuu iho, vave. Keaho nei anau menoho maꞌoe iloko hale aꞌoe la.” 6Vahola oia, Zacchaeus ekuu iho, kena ime aꞌe Jesus pela aia ehihia lo ame Jesus ehaele aꞌe nonoho iloko hale aia la. 7Nakama la hakoa uꞌike koꞌolua la, kena ikamumu, “Jesus menoho ma kama haisala la.”

8Zacchaeus ukuu imua Jesus, kena ime aꞌe, “Kealiꞌi, ila aꞌe. Anau mehoꞌi aꞌe hevahi namea anau la hakoa i nakama haaloha. Poi anau uhailavaꞌa alakama noko namoni lakou, kena anau mevaꞌai muli aꞌe ehaa naualoko namoni anau niko la.”

9Ko Jesus ime aꞌe, “Keaho nei Keakua ekonaꞌi nakama haleaina nei. Maikinimea kama nei ehakina hamaoni poi Abraham la hoi. 10{Kama ekipu kama} ehamai nolave nakama elano, ia ikonaꞌi nakama la iko keola hamaoni.”

Koukolu nakama heheaꞌu

(Mat 25.14-30)

11Jesus uhaele hakapili aꞌe Jerusalem, kena keonohenua la uhakaꞌoko pela Keakua mekapili ihamakua kenoholana aia la. Ia kena Jesus eme aꞌe kelaa kakala hulihuli hoi.

12“Kela hekuꞌu ekanakana noholau i henua emao ime mo kuꞌu henua la hoi, kena ivaꞌai mai muli henua aia la. 13Kena iko kama la ianaa aꞌe sehui nakama heheaꞌu aia la, kena ivavae aꞌe sehui nasimaka namoni nakama la, kena ime aꞌe, ‘Okou heheaꞌu ihapipili aꞌe nimoni iluna, ikae keualoko anau meivaꞌai mai muli.’

14“Ia keonohenua kekuꞌu la eliloko kama la. Kena ihaunalia nakama vamuli kama la nome aꞌe, ‘Makou sehihai kama la ilolosi makou.’

15“Ia kekuꞌu la ume mo kuꞌu i henua aia ehaele la, kena ivaꞌai muli hoi henua aia la. Kena kama la ume aꞌe nakama heheaꞌu la io aꞌe, imakino aia ehia namoni nakama la eko, ihapaa ma namoni aia niau aꞌe la.

16“Ko kama heheaꞌu amaka la ihaele nome aꞌe, ‘Kealiꞌi. Anau eko sehui nasimaka namoni nohapaa aꞌe iluna ma simaka namoni aꞌoe niau mai la.’ 17Ko kekuꞌu la ime aꞌe kama heheaꞌu la, ‘Kenaa. Aꞌoe hekama heheaꞌu kaualeꞌa. Aꞌoe elolosi hamakonu nikamaa mea, kena anau meau aku sehui namakaꞌina ilolosi aꞌoe.’

18“Kena kama hasiaoa ehaele nome aꞌe, ‘Kealiꞌi, anau eko kaulima nasimaka namoni nohapaa aꞌe iluna ma simaka namoni aꞌoe niau mai la.’ 19Kena kekuꞌu la ume aꞌe, ‘Aꞌoe meilolosi kaulima namakaꞌina.’

20“Ko kelaa kama heheaꞌu ihaele nome aꞌe, ‘Kealiꞌi, kenei simaka namoni aꞌoe niau mai la. Anau eko namoni nei nohuu iloko kemepamalo. 21Anau makaꞌu i aꞌoe, maikinimea aꞌoe hekama hamakaꞌu haeꞌo. Aꞌoe eme aꞌe alakama ikoli naꞌai, ia kena aꞌoe ehaele noko naꞌai la.’ 22Ko Kealiꞌi ime aꞌe kama heheaꞌu la, ‘Aꞌoe hekama heheaꞌu saꞌino. Nakakala aꞌoe na ehuli aku pela aꞌoe esala. Aꞌoe emakino pela anau hekama hamakaꞌu. Anau eme aꞌe alakama ikoli naꞌai, ia kena anau ehaele noko naꞌai la. 23Okea aꞌoe sepono namoni anau na iloko ke{bank} isomo, iko anau namoni la ma keꞌoina aꞌoe hapili aꞌe la?’

24“Kena iko kekuꞌu la ime aꞌe nakama kela ekuu valaa, ‘Ko simaka namoni la ikaha ma kama la, kena uau aꞌe kama heheaꞌu kela eko sehui nasimaka namoni.’ 25Kena iko nakama la ime aꞌe, ‘Kealiꞌi, kama la eisi sehui nasimaka namoni.’

26“Kena kekuꞌu la eme aꞌe, ‘Anau eme aku okou. Poi hekama eko namea anau eau aꞌe i aia la, kena anau meihapaa aꞌe alamea hoi. Ia poi hekama seko namea anau eau aꞌe i aia la, kena anau meiko muli namea la hakoa. 27Nakama haihai manava anau sehihai anau ilolosi lakou. Ko mai nakama na, ikaa imake imua namaisu anau.’ ”

28Jesus ekakala nooki, kena ihaele i Jerusalem imua nakama la.

Jesus uhaele aꞌe Jerusalem poi hekuꞌu

(Mat 21.1-11; Mrk 11.1-11; Jhn 12.12-19)

29Keualoko Jesus nisasaika aꞌe namakaꞌina Bethphage laua ma Bethany iluna kemouna emale ma na{Oliv}, ko kama la ihaunalia koꞌolua nakama kaukali aia la imua, 30kena ime aꞌe, “Olua ikaꞌa kemakaꞌina la. Keualoko olua mekae aku kemakaꞌina la, olua melave ke{kolt} esaisai lia, ia sehikama eꞌae iluna kemanu la nokele. Veke kemanu la, kena uhakaꞌi mai. 31Poi hekama evasili aku olua, ‘Olua eveke kemanu na ia,’ olua ume aꞌe kama na pela, ‘Kealiꞌi hihai kemanu nei.’ ”

32Koꞌolua la uo pela nolave ke{kolt} la, ehau poi hea Jesus nikakala aꞌe laua la. 33Ia keualoko koꞌolua la niveke kemanu la, ko kama elolosi kemanu la ime aꞌe koꞌolua la, “Olua eveke ke{kolt} na ia?”

34Kena koꞌolua ime aꞌe, “Kealiꞌi hihai kemanu nei.” 35Kena koꞌolua la ehakaꞌi aꞌe ke{kolt} la ia Jesus. Nakama kaukali la uꞌahu aꞌe napamalo lakou la valuna ke{kolt} la, kena ikonaꞌi Jesus noꞌae iluna. 36Keualoko kama la nikele, keonohenua la eholahola napamalo lakou valoko keala.

37Keualoko Jesus nisasaika aꞌe Jerusalem, kama la uhaele iho ilalo kemouna na{Oliv}. Vahola, keonohenua kela ekaukali kama la eꞌamaka nohamaha Keakua, kela namahi hananiu hakoa lakou niꞌike la, kena iananaa hamaloa,

38“Keakua hakapu kekuꞌu,

Kela ehamai i kemale aia.

Nakama kevaelani enoho laoi.

Hamaha Keakua ialuna.”

39Kena naFarasi iloko keonohenua la ume aꞌe Jesus, “Rabai. Me aku nakama kaukali aꞌoe la iseanana aku pela.”

40Ia Jesus eme aꞌe, “Anau eme aku okou. Poi nakama la seanana mai pela, kena nahaku la meianaa mai solakou.”

Jesus ealoha nakama Jerusalem

41Keualoko Jesus nisasaika aꞌe Jerusalem, kama la eꞌike kemakaꞌina la, kena isali naleimaka aia, 42kena ime aꞌe, “Ame kaualeꞌa pela okou imakino nakipukipu kenoho laoi, ia okou semakino. 43Kena nakama haihai manava okou la meihakiꞌe navahi kemakaꞌina okou la ma nahana lakou nolepo kemakaꞌina okou la. 44Nakama la meikaa okou ia ma nakamaliꞌi kela enoho ma okou. Kena meiseu kemakaꞌina okou la hakoa, pela sehihaku memau iluna kelaa haku. Maikinimea Keakua ehaele aku vahonei nokonaꞌi okou, ia okou semakino.”

Jesus uhaele i hale kapu

(Mat 21.12-17; Mrk 11.15-19; Jhn 2.13-22)

45Kena Jesus uhaele iloko hale kapu nohaise nakama kela esusui valaa, 46kena ime aꞌe nakama la, “Nakakala Keakua nei emau iloko kelauniu kapu ma, ‘Hale kapu anau nei ehakuu ilokuloku nakama hakoa. Ia okou ehuli sia hale nei ime mo hale nakama ailalao.’ ”

47Keaho ma keaho, Jesus eaoaꞌo iloko hale kapu la. Kena namaakua hamakua, nakama polopolo nakuaa, ia ma nakama hamakua na{Jiu} la hihai ikaa kama la. 48Ia nakama la sehiala elave, maikinimea keonohenua la hakoa ehalono hakaualeꞌa kama la.

Currently Selected:

Luke 19: ojv

Highlight

Copy