Luke 18

Eloku kahi

1Kena iko Jesus ime aꞌe kakala hulihuli nei noaoaꞌo nakama kaukali aia la iseꞌalo keloku kahi Keakua.

2“Kela hekama ehakonukonu nakama kemakaꞌina aia la. Kama la semakaꞌu Keakua, ia sehakekele kehakaꞌoko alakama. 3Kela hekaukuaha hine enoho iloko kemakaꞌina la hoi. Kehine la ehaele kahi nomaka kama hakonukonu la nousu aꞌe, ‘Hakonukonu kekama kela ehakauꞌaa manau la.’

4“Keaho ma keaho kama hakonukonu la sehihai ikonaꞌi kaukuaha la. Ia kela aho kama la ekakala soia, ‘Anau semakaꞌu Keakua. Ia anau sehakekele kehakaꞌoko alakama. 5Ia kaukuaha nei eusu kahi mai anau. Kena anau mekonaꞌi kehine nei, aoki kama nei mehamai kahi anau, kena nakino anau mekahi kama nei.’ ”

6Ko Kealiꞌi ime aꞌe, “Niaina kama hakonukonu la esala, okou ihakaꞌoko nakipukipu aia la. 7Keakua ekini nakama aia la. Ia nakama la ekani kahi aꞌe Keakua keaho ma keaho, kepo ma kepo. Kena kama la selavaa kenase kekonaꞌi aꞌe nakama aia la. 8Anau eme aku okou pela Keakua mevave kekonaꞌi nakama aia la.

“{Kama ekipu kama} meivaꞌai mai muli. Ea? Kama la melave nakama iloko kemaalama nei kela ehakina i aia?”

KeFarasi ia ma kekama haisala eloku aꞌe Keakua

9Kena Jesus eme aꞌe kakala hulihuli nei i nakama kela ehakaꞌoko pela lakou ekonu kahi, ia ehanaꞌino alakama.

10“Koꞌolua nakama eo noloku iloko hale kapu, kela heFarasi ia ma hekama aoao na{kakisi}. 11KeFarasi la ekuu soia, kena iloku aꞌe penei, ‘Keakua, anau hamaha aku aꞌoe pela anau sehau poi alakama. Anau seailalao, anau sehailavaꞌa alakama, ia anau sehai huli ma nahine. Anau sesaꞌino poi kekama aoao na{kakisi} la. 12Anau hasese hiꞌai saualoko iloko kelakapu hokahi. Ia anau ehoꞌi aku kana hasehui namea anau eko la.’

13“Ia kama aoao na{kakisi} la ekuu imao, enapa haeꞌo. Keualoko kama la eloku, kama la seꞌila iluna kevaelani. Emeia kama la epopoꞌu hakahaka aia, kena ime aꞌe, ‘Keakua, haialoha mai anau. Anau hekama haisala haeꞌo.’

14“Anau eme aku okou, keualoko kama aoao na{kakisi} la uvaꞌai i hale aia, kama la ekonu i namaisu Keakua. Ia keFarasi la esekonu i namaisu Keakua. Pena hekama ehakanaka soia ihananiu, kela kama meikuu kama na nomoulalo. Ia pena hekama ekuu soia nomoulalo, kela kama mesapai kama na ihananiu.”

Jesus hihai nakamaliꞌi io aꞌe aia

(Mat 19.13-15; Mrk 10.13-16)

15Alakama eau aꞌe nakamaliꞌi soliꞌi lakou la ia Jesus, pela aia mehapili nalima aia iluna nakamaliꞌi la. Ia nakama kaukali la uꞌike keonohenua la io aꞌe, kena ihai aꞌe nakama la. 16Kena iko Jesus ianaa aꞌe nakamaliꞌi la io aꞌe aia, kena ime aꞌe nakama kaukali aia la, “Kiaꞌi nakamaliꞌi na io mai anau. Okou isepui nakamaliꞌi na. Maikinimea kenoholana Keakua heꞌina nakamaliꞌi na. 17Anau eme aku kehamaoni. Kamaliꞌi nei ehakina kenoholana Keakua. Ia poi hekama sehakina i kenoholana Keakua pela hoi, kama la meselavaa kekae keꞌina la.”

Kevasili kama haiheaꞌu

(Mat 19.16-30; Mrk 10.17-31)

18Kela hekama hamakua evasili aꞌe Jesus, “Rabai, aꞌoe hekama kaualeꞌa. Anau mekaualeꞌa pehe iko keola eola kahi?”

19Kena Jesus ume aꞌe kama la, “Aiea aꞌoe eme mai manau ekaualeꞌa naea? Keakua soia ekaualeꞌa. 20Aꞌoe makino nakuaa nei, ‘seꞌavana huli, sekaa kama, seailalao, sekakala nukulaoi. Hamaha kamana aꞌoe ia ma kina aꞌoe.’ ”

21Kena iko kama hamakua la ime aꞌe, “Amaka mai keualoko anau nisoliliꞌi la, anau ekauhano kekaukali nakuaa la hakoa.”

22Jesus elono nakakala kama la, kena ime aꞌe, “Kena kelaa hemea hokahi aꞌoe ikau kekaukali. Ko naheheaꞌu aꞌoe, kena au aꞌe namela i alakama isui. Kena uvavae aꞌe namoni la i nakama haaloha. Ia kena aꞌoe meiko namea kaualeꞌa i kevaelani. Kena aꞌoe uhamai nokaukali mai anau.” 23Ia keualoko kama la nilono nakakala Jesus la, kama la ukipuaina lo, maikinimea kama la hekama haimoni haeꞌo.

24Jesus uꞌike pela kama la ukipuaina haeꞌo, kena ime aꞌe “Mehainakaa haeꞌo nakama haimoni kekae kenoholana Keakua. 25Ia mehainakaa {kamelo} keulu iloko kelua kelina kela ekui pamalo. Ia hainakaa haeꞌo nakama haimoni la kekae kenoholana Keakua.”

26Keualoko nakama la nilono pela nakama haimoni la meselavaa kekae kenoholana Keakua, nakama la evasili aꞌe, “Kena oai kekama amekae na?”

27Ko Jesus ime aꞌe, “Kela ehainakaa kekama, ia ehainahie Keakua.”

28Kena Peter eme aꞌe, “Makou ukiaꞌi namea makou la hakoa, kena makou ukaukali aꞌoe.”

29Ko Jesus ime aꞌe nakama la, “Anau eme aku kehamaoni. Poi hekama ekiaꞌi kehale aia, keꞌavana aia, nakaina aia, namakua aia, ia ma nakamaliꞌi aia, ikaukali nakipukipu kenoholana Keakua, 30Keakua mehoꞌi aꞌe kama la, elaꞌa iluna ma namea aia ukiaꞌi i kemaalama nei. Kena kama la meiola naualoko hamau i kelaa maalama.”

Jesus ukakala kanamake hoi

(Mat 20.17-19; Mrk 10.32-34)

31Kena Jesus ehakaꞌi sehui ma lua nakama kaukali la ikaha ma keonohenua la, kena ime aꞌe nakama la solakou, “Halono. Nakama hakae nakakala Keakua la nikakaa aku kipukipu keola {kama ekipu kama}. Ia keualoko kakou ekae Jerusalem, name la hakoa meihuli mai nohamaoni. 32Nakama hamakua la meau aꞌe kama la i nakama enoho pouli ikokousua kama la, ia ihai haeꞌo kia kama la, ia isasavale kama la. 33Nakama la melili kia kama la, kena ikaa kama la nomake. Ia keaho kanahakolu, kama la meimasiꞌe ikaha ma kemake.”

34Ia nakama kaukali la usemakino nakakala Jesus la. Mai kehakaꞌoko nakakala la ehunaa lia, ia kena nakama la useailoa hea Jesus eme aꞌe lakou.

Jesus ekonaꞌi kama alemaka eseni

(Mat 20.29-34; Mrk 10.46-52)

35Keualoko Jesus usaika aꞌe kemakaꞌina Jericho, kela hekama alemaka seni enoho kevahi keala noainonoa namoni. 36Kama la elono keonohenua eo valoko keala. Kena iko kama la ivasili aꞌe, “Oai nakama la?”

37Ko alakama ime aꞌe kama la, “Jesus, kekama Nazareth la uhamai.”

38Kena kama alemaka seni la eanaa aꞌe, “Jesus, kemopuna kekuꞌu David, aloha mai anau.”

39Ia nakama kela uo vamua keukulana la ehai aꞌe kama la inoho semuu. Ia kama la eanaa aꞌe hamaloa ma, “Kemopuna kekuꞌu David, aloha mai anau.”

40Ko Jesus ihamau nome aꞌe nakama la ihakaꞌi aꞌe kama alemaka seni la. Keualoko kama la nihaele aꞌe, ko Jesus ivasili aꞌe kama la, 41“Hea aꞌoe hihai anau ikonaꞌi aꞌoe na?”

Ko kama la ime aꞌe, “Kealiꞌi, anau hihai iꞌike.”

42Ko Jesus ime aꞌe kama la, “Kena ike. Aꞌoe ukaualeꞌa, maikinimea aꞌoe ehakina.”

43Vahola oia, kama la uꞌike. Kena iko kama la ikaukali Jesus, kena ihamaha Keakua. Ia keualoko nakama la hakoa eꞌike kama la ukaualeꞌa, kena nakama la uhamaha Keakua hoi.

Currently Selected:

Luke 18: ojv

Highlight

Copy