Acts 15

1Alakama na{Jiu} la uo ikaha ma Judea nokae i Antioch. Nakama la aoaꞌo nahakina ana la penei, “Okou ihamakino nakapukapu okou ikaukali nakipukipu Moses. Aoki Keakua mesekonaꞌi okou.” 2Kena Paul laua ma Barnabas ehakauoki ma nakama la. Ia kena nahakina ana la ekini Paul laua ma Barnabas io ma alakama keloku la nokaꞌa i Jerusalem, novasili aꞌe nakama heheaꞌu Jesus la ia ma alakama hamakua keloku hoi.

3Kena nahakina ana la ehaunalia koꞌolua la ikaꞌa valoko Phoenicia laua ma Samaria, nokakala aꞌe nakama keloku la pela nakama enoho pouli la uhakina hamaoni. Ia kena nahakina ana la uhihia lo. 4Keualoko Paul ma nakama Antioch la ukae i Jerusalem, nahakina ana ma nakama heheaꞌu Jesus ia ma nakama hamakua keloku la ehihia noko lia halaoi nakama la. Kena nakama la eme aꞌe nakama Jerusalem la namea Keakua ehuli aꞌe iloko naola lakou la.

5Ia naFarasi iloko nahakina ana la eme aꞌe, “Okou ekau kehamakino nakama enoho pouli la, kena upolopolo aꞌe nakama la ikaukali nakuaa Moses.”

6Kena nakama heheaꞌu Jesus ma nakama hamakua keloku la uꞌuku isesee hakaꞌoko kela naFarasi la nime aꞌe lakou. 7Keualoko nakama la ekakala nahakaꞌoko lakou nooki, Peter umasiꞌe iluna nokakala aꞌe nakama la, “Aukaina. Okou emakino pela Keakua ekini anau imua lo, ikakala kelono kaualeꞌa aia ilono nakama enoho pouli la ihakina. 8Keakua eailoa nakipukipu nakama hakoa. Kama la eau aꞌe Keanana Kapu i nakama enoho pouli la, poi aia niau mai kakou imua la. Kena ihuli aꞌe pela aia ehihai nakama la hoi, 9ia sesapai kakou sokakou oia. Nakama la ehakina Keakua hoi, kena Keakua esolo nahakumanava lakou nomakahua. 10Okou naFarasi sekau kehaꞌike Keakua. Okou ehihai ihapili aꞌe namea emaha iamo nahakina ana sehi{Jiu} la. Ia kakou na{Jiu} ma nakipuna kakou la uselavaa keamo namea emaha la. 11Kakou ehakina pela Kealiꞌi Jesus Christ elolosi hakaualeꞌa kakou ikonaꞌi kakou iola, ihau poi kama la ekonaꞌi nakama enoho pouli la hoi.”

12Kena keonohenua la hakoa unoho semuu, nohalono Barnabas laua ma Paul. Koꞌolua la ekakala aꞌe namea kaualeꞌa ma nahaꞌaku laua ehuli aꞌe i namahi Keakua iloko naꞌina nakama enoho pouli la. 13Keualoko Barnabas laua ma Paul nikakala nooki, James ume aꞌe, 14“Aukaina. Halono mai i anau. Simon Peter ekakala mai kakou pela Keakua elolosi nakama enoho pouli la, kena ihilihili alakama nakama la imea mo onohenua aia. 15Nakakala Peter la ehau poi nakakala kela alakama ehakae nakakala Keakua nikakaa imua,

16‘Imuli, anau meivaꞌai mai,

nohakuu halaoi kehale David kela usina.

Anau meipena muli kehale la i nahaku kela emaseu la oia,

Nohakuu hale la iluna.

17Kena naonohenua meisesee Kealiꞌi,

Ia nakama enoho pouli la meihamalu mai anau.

Anei nikakala Keakua,

kekama kela ehuli mai namenei,

18Poi aia nihakaꞌoko mai imua.’ ”

19Kena James eme aꞌe hoi, “Anau sehihai pela nakama enoho pouli la ihainakaa keo mai nokaukali Keakua. 20Ia penei avale, kakou ekau kekakaa helauniu, ipolopolo aꞌe nakama la. Pela lakou sekau keꞌai naꞌai kela alakama ehoꞌi aꞌe nahakipua la. Keꞌai la esaꞌino. Nakama la sekau keꞌalemaka ailalao alakama. Ia esekau hoi keꞌai namanu emake kekoko la oimoe iloko. 21Na{Jiu} i namakaꞌina hakoa epolopolo kahi nakuaa Moses nei. Kena ipaupau nakakala nei iloko nahale loku lakou, i naaho kapu hakoa.”

Kelauniu la ekae i nahakina ana kela enoho naꞌina emao

22Nakama heheaꞌu Jesus, ma nakama hamakua keloku, ia ma nahakina ana la hakoa ehakaꞌoko ihilihili nikama, io lakou ma Paul laua ma Barnabas nokaꞌa i Antioch. Nakama la ekini Judas Barsabbas laua ma Silas. Koꞌolua la nikama hamakua nahakina ana la, 23kena nakama la ehaunalia koꞌolua la noau aku kelauniu nei,

“Makou nakama heheaꞌu Jesus ia ma nakama hamakua keloku ekakaa kelauniu nei iau aku okou nahakina ana kela enoho i nahenua emao, iloko Antioch, Syria ma Cilicia.

Aukaina.

24“Makou elono pela alakama makou inei ekakala hanapa aku i okou. Ia makou sehaunalia aku nakama la. 25Kena makou hakoa ehakaꞌoko ihilihili nikama io aku lakou ma Paul laua ma Barnabas, nasoa laoi kakou la. 26Nakama nei ehoꞌi naola lakou ikaukali Jesus Christ, Kealiꞌi kakou la. 27Kena makou ehaunalia aku Judas laua ma Silas, ime aku okou nakakala makou ekakaa nei. 28Makou ehakaꞌoko pela Keanana Kapu sehihai okou ihapili namea emaha noamo. Kena okou ekau kekaukali nakipukipu nei oia. 29Seꞌai naꞌai kela alakama ehoꞌi aꞌe nahakipua. Seunu kekoko, ia seꞌai namanu emake, ia kekoko la oimoe iloko. Ia seꞌalemaka ailalao alakama.

Kaualeꞌa pela okou ikuu ikaha ma nakipukipu la.

Kena ia.”

30Nakama la uo ikaha ma Jerusalem, kena io nokae i Antioch, kena ime aꞌe nakama keloku la iꞌuku hakoa, kena iau aꞌe kelauniu la. 31Keualoko nahakina ana la epau kelauniu la, nakama la uhihia nakakala hapulupulu la. 32Silas laua ma Judas nikama hakae nakakala Keakua hoi. Kena koꞌolua la ekakala kahi aꞌe nahakina ana la ihapulupulu nakama la. 33-34Kena kela aho, nahakina ana la ehakapu Judas laua ma Silas inoho laoi, kena ihaunalia koꞌolua la ivaꞌai muli i nakama keloku i Jerusalem.*f10* 35Ia Paul laua ma Barnabas oinoho i Antioch isuꞌui ma nahakina ana la nokaukaꞌu keonohenua, kena iaoaꞌo nakama la nakakala Kealiꞌi.

Paul laua ma Barnabas uvaea

36Kela heaho Paul eme aꞌe ia Barnabas, “Imua, kaua nio nokaukaꞌu nakakala Kealiꞌi iloko namakaꞌina komaꞌi. Kena kakou ekau kevaꞌai muli i namakaꞌina la hakoa nomaka nahakina ana la, imakino kaua pela naola lakou eme pehe.” 37Barnabas ehihai iko John Mark io lakou hoi. 38Ia John Mark ukiaꞌi koꞌolua la i Pamphylia, seo lakou. Kena Paul eꞌila pela sekonu keko kama la. 39Kena Paul laua ma Barnabas uhakauoki novae solaua. Kena Barnabas eko Mark nohulo laua i Cyprus. 40Ia Paul ekini Silas ihaele maia. Kena nahakina ana iloko Antioch eloku aꞌe Keakua ilolosi hakaualeꞌa koꞌolua la. 41Kena koꞌolua la uo valoko Syria ma Cilicia nohapulupulu nahakina ana la.

Currently Selected:

Acts 15: ojv

Highlight

Copy