Luka 17
17
Luka 17
1Yaba o re ho barutuwa: Ho ke ke ha etsahala hore dikgopiso di tle; empa ho madimabe eo di tlang ka yena!
2Ho ka bang molemo ho yena ha lelwala le ka fanyehwa molaleng, mme a lahlelwa lewatleng, ho ena le hore a kgopise e mong wa ba banyenyane bana.
3Le itebele: Ekare ha ngwaneno a o sitelwa, o mo kgalemele; mme ha a baka, o mo tshwarele.
4Ekare ha a ka o sitelwa hasupa ka letsatsi, mme a kgutlela ho wena hasupa, a re: Ke bakile; u mo tšoarele.
5Baapostola ba re ho Morena: Ekeletsa tumelo ya rona.
6Morena a re: Hoja le na le tumelo e ka ka hlaku ya mosetareta, le ne le ka re ho sefate sena sa sikane: Fotholwa, o itlhome lewatleng; ’me e lokela ho u mamela.
7Empa ke ofe ho lona ya nang le mohlanka ya lemang, kapa ya alosang, ya tla re hang ha a etswa masimong a re ho yena: ’Eya o dule, o je?
8Mme a ke ke a re ho yena: Lokisa seo ke tla lalla ka sona, o itlame, mme o ntshebeletse, ke be ke je, ke nwe; mme kamora moo o tla ja, wa nwa?
9Na o tla leboha mohlanka eo, kahobane a entse tseo a di laetsweng na? Ha ke soka.
10Ka mokgwa o jwalo le lona, etlare ha le entse tsohle tseo le di laetsweng, le re: Re bahlanka ba se nang thuso;
11Eitse ha a eya Jerusalema, a feta hara Samaria le Galelea.
12Eitse ha a kena motsaneng o mong, a kgahlana le banna ba leshome ba lepera, ba eme hojana.
13Ba phahamisa mantswe, ba re: Jesu, Monghadi, re hauhele!
14Yare ha a ba bona, a re ho bona: Eyang, le itlhahise ho baprista. Ya re ba ntse ba tsamaya, ba ntlafala.
15E mong wa bona, ha a bona hore o fodile, a kgutla, a tlotlisa Modimo ka lentswe le phahameng.
16A itihela fatshe ka sefahleho maotong a hae, a mo leboha; mme e ne e le Mosamaria.
17Jesu a araba, a re: Na ha ho a hlwekiswa ba leshome na? empa ba robong ba kae?
18Ha ho a fumanwa ba kgutletse ho tlotlisa Modimo, haese moditjhaba enwa.
19A re ho yena: Ema, o ikele; tumelo ya hao e o fodisitse.
20Eitse ha a botswa ke Bafarisi, hore na mmuso wa Modimo o tla tla neng, a ba araba, a re: Mmuso wa Modimo ha o tle ka ponahatso;
21Hape ba ke ke ba re: Bonang mona! kapa, bona mane! hobane, bonang, mmuso wa Modimo o hara lona.
22A re ho barutuwa: Ho tla matsatsi ao ka wona le tla lakatsa ho bona le leng la matsatsi a Mora motho, mme le ke ke la le bona.
23Mme ba tla re ho lona: Bonang mona; kapa, bona moo: le se ke la ba sala morao, leha e le ho ba latela.
24Hobane jwaloka lehadima, le hadima ho tloha karolong e nngwe e tlasa lehodimo, le benya ho isa karolong e nngwe tlasa lehodimo; Mora motho le yena o tla ba jwalo mehleng ya hae.
25Empa e ka kgona a utlwiswe bohloko bo boholo pele, mme a lahlwe ke moloko ona.
26Jwalokaha ho bile mehleng ya Noe, ho tla ba jwalo le mehleng ya Mora motho.
27Ba ne ba eja, ba enwa, ba nyala, ba nyadisa, ho fihlela letsatsi leo Nowe a keneng arekeng ka lona, mme morwallo wa tla, wa ba timetsa bohle.
28Ho bile jwalo le mehleng ya Lota; ba ne ba ja, ba enwa, ba reka, ba rekisa, ba lema, ba haha;
29Empa letsatsing leo Lota a tsoileng Sodoma ka lona ho ile ha na mollo le sebabole ho tsoa leholimong, ’me tsa ba timetsa kaofela.
30Ho tla ba jwalo ka letsatsi leo Mora motho a tla senolwa ka lona.
31Ka tsatsi leo, ya tla beng a le hodima ntlo, mme thepa ya hae e le ka tlung, a se ke a theoha ho ya e nka; le ya leng tshimong, le yena a se ke a kgutlela morao.
32Hopolang mosali oa Lota.
33E mong le e mong ya batlang ho pholosa bophelo ba hae, o tla timellwa ke bona; mme e mong le e mong ya lahlehelwang ke bophelo ba hae, o tla bo boloka.
34Ke a le bolella, ka bosiu boo, banna ba babedi ba tla be ba le betheng e le nngwe; e mong o tla nkwa, e mong a tlohelwe.
35Basali ba babeli ba tla be ba sila hammoho; e mong o tla nkwa, e mong a tlohelwe.
36Banna ba babedi ba tla be ba le naheng; e mong o tla nkwa, e mong a tlohelwe.
37Ba araba, ba re ho yena: Ho kae, Morena? A re ho bona: Moo setopo se leng teng, ke moo manong a tla bokana teng.
Currently Selected:
Luka 17: CSOB24
Highlight
Share
Copy
Want to have your highlights saved across all your devices? Sign up or sign in
Contemporary Southern Sotho Bible
Copyright © 2024, by City Bible Foundation ®
Used by permission of City Bible Foundation ® All rights reserved worldwide.
