Marko 16

Ebuhuna ono Yesu

Mt 28:1-10; Lk 24:1-12; Yn 20:1-10

1Ninya allaŋ sabato Maria Madalena bwo fe Salome iko Maria honye Yakobo iyaŋunie neyali on oŋwo’to gir gir, iyalaniere ihwan Yesu. 2Iholoŋ etteri ono nesabit, ninya ara ataŋatye motye afwoi isi, ette fanyan ilume hetek noloŋ idwoŋ. 3Ikikyanarai fe isi ojori, ?Ŋai attadi ibolok jihohoi namorwo to hutuk ilume addi? 4Ati al amijye isi dia ette isi igonyuna namorwo on obolo’to ania ibolohuni. 5Ajiŋani isi ilume ette igonyuna lobo leito horwoŋ al isuga’to oŋyatai. Iyyafak inyi aboŋo on obwor aboŋ bwo fe ohodo. Ette isi baŋi bebe. 6Ojo ati inyi jihosi ojo, Baŋatina abaŋ. Ittifyati tai Yesu Anasaretanani linya isihoni likruce. Ibuhu dwo inyi, labeŋ tene. Imijyete namaji ania oŋole itaferehinierek inyi. 7Ifwatta ati, iramana Petro iko leyiyanak honyi omuk ojo, Yesu likyomoro jihatai Galilea, ittata tai igonyuna inyi teyya ihwa iramak nya inyi itai. 8Ette isi jiŋuna alet kwak ette fuho t’elume nyo ikikiroi isi bwo fe illillihai. Ette isi ilak ikyana jyo obo atulo nyo abaŋi isi.

Aleyo Yesu jyo Maria Madalena

Yn 20:11-18

9Ihwania ihalu ebuhuna Yesu ta amotye beryen ono oloŋ etabotye ono esabit, oleyo inyi ahosyere jyo Maria Madalena. Inyi aŋotte ninya ifuhari inyi ajohin hun orrohoji’to hattarik. 10Alo inyi ette iramana erre huna jyo leyiyanak honyi hul ijiriŋai bwo fe oyyoi. 11Ati dwadi itaniŋuni isi jo isu Yesu bwo fe igonyu dwo Maria inyi, obeŋi isi iruhi.

Aleyo Yesu jyo Leyiyanak Arrihai

Lk 24:13-35

12Ihalu ana inyyak inyi leyo ol olufa jyo laati arrihai ladahai isi ihiji koi otto hidyofo. 13Isi bwo fe ofwoi iramaniere hul omuk, ati obeŋi isi iruhi bwo fe.

Efahina Yesu Leyiyanak Ittiyeniere

Mt 28:16-20; Lk 24:36-49; Yn 20:19-23

14Ihalu oleyo Yesu jyo leyiyanak honyi ’tomon habotye hoŋiye isi. Ette inyi isiŋyo isi ta nabyaŋan hosi iruk iko ta nagolon tajya hosi, nyo obeŋi isi iruhi jyo hul igonyuni’to inyi libuhu inyi to ye. 15Attati inyi jaran jihosi ojo, Ifwatta lifau daŋ ittiyeniete asayyo hun oyiji’to jyo aati daŋ. 16El iruk’to bwo fe ifwotu batisimo italahuni adi, ati ol obeŋ’to iruk, oŋoti aye jihonyi. 17Etamijanita hun owoni adi jyo hul iruhi’to isi huna; ta afure hoŋ ifuhatye adi isi ajohin hun orrohoji’to bwo fe ikyanai adi nekyanita hun olufaji. 18Kuyya inefuni isi amunok kuyya bu amatai neyyeri, obeŋ adi orroho jihosi, bwo fe ottironi adi isi ahas hosi jyo aŋwak ette isi ŋidari.

Acaharu Yesu Idou

Lk 24:50-53

19Latuhok Hobu Yesu nekyana honyi jyo leyiyanak ette inyi dahan lidou bwo fe itoŋo dia oŋyatai ono Hollum. 20Attati isi daha limasik daŋ ittiyeniere bwo fe Hobu iŋiŋarata isi bwo itagolyo nettiyenio hosi ta netamijanita hun ihanio inyi.

Currently Selected:

Marko 16: LOT1969

Highlight

Copy