Matteyo 5

Nettiyenita Huno Yesu jyo Laati

1To obo oloŋ igonyu Yesu eluluŋ wati ette inyi dahan idoŋe. Ati ninya hetoŋo inyi dia ofwonni leyiyanak honyi jihonyi. 2Itteryo inyi ittiyenio eluluŋ wati ette jaran:

Emuniti

Lk 6:20-23

3Ijara hul omiji tajya ihosyere Hollum ta abyaŋan yiji hosi hotomunohi, nyo ara Hollum a Hobu#5:3 Hollum a Hobu hosiOjo ana jo, ara olobye ono Hollum ahonosi. hosi.

4Ijara hul atarihai’to hotomunohi, nyo onyurani adi isi etilihyo jyo Hollum.

5Ijara hul anyalami’to hotomunohi, nyo ara adi afau ahonosi.

6Ijara hul ottifyai’to alibori ono Hollum ihwa ottifyai laati hul oniamai’to aŋiyo hotomunohi, nyo itifoŋ adi Hollum isi.

7Ijara hul omehinie tajya hotomunohi, nyo omehino adi Hollum jihosi.

8Ijara hul olibori tajya hotomunohi, nyo igonyuni adi isi Hollum.

9Ijara hul itimorye’to laati hotomunohi, nyo iloŋo adi Hollum isi lonyirok honyi.

10Ijara hul onyurani ettigemita te ejifatyo hosi efahita huno Hollum hotomunohi, nyo ara Hollum a Hobu hosi.

11Omunoti al ipice laati itai, kuyya ittigemye itai, kuyya bu orrosye itai on orroho te eram hoŋ. 12Omunoti bwo fe osuhotyete nyo obolo adi aduma hatai lidou, nyo ittigemye nya isi eyak sayyo ihwo nya.

Amile iko Afaŋan

Mk 9:50; Lk 14:34-35

13Irata tai ihwa amile jyo laati. Al ilik amile, ?aŋai inyyak adi iye eŋolito honyi? Obeŋ inyi oremik itayyu obo ariŋ, tania ibirori adi inyi addi ette laati ’ryeyo inyi.

14Irata tai ihwa afaŋan an afaŋ’to jyo laati. Obeŋ amiji oremik dima al owon inyi ihide doŋe. 15Obeŋ tulo oswak allomo bwo imuhoni ta agufa. Ati oyihak adi inyi allomo ihide jo oŋida inyi afaŋ jyo aati daŋ hul owoni’to ihaji. 16Ijara afaŋan hatai hatafaŋa jyo laati jo oŋida isi igonyuna ehanita hatai hun oyiji’to ette isi itahabuyo Monyatai ol owon’to idou.

Ettiyenio Yesu Eram ono Efahita

17Hegigiloti jo attu ni itapwahyere efahita kuyya bu egyerita huno eyak sayyo. Abeŋ ni attu itapwahyere isi ati attu ni itasiruniere isi. 18Eramak ni itai ahode jo, many iholoŋ an itatturyerek edou iko afau, obeŋ adi obo egyeri kuyya ekyana on omuta’to ono efahita opwak ’tuŋ ati itasiruni adi daŋ. 19Lya ol omesyo efahi abotye dwadi on omuta’to bwo fe ittiyenio inyi laati ihaniere ihwo nya, itafyaha adi Hollum inyi ilobye honyi. Ati lya al ijifatyo’to efahita bwo ittiyenio inyi isi jyo laati, itabolo adi Hollum inyi ilobye honyi. 20Eramak ni itai jo, al obeŋ ayiji hatai agalik ayiji ono legyorok iko Farisei, ibyaŋata adi itai ijiŋana jyo olobye ono Hollum.

Ettiyenio Yesu Eram ono Ajore

Lk 12:57-59

21Itaniŋuna tai jo, ojori nya igyerita beryen jo, “Hettohoro bwo lya ol ottoho’to onyurak adi inyi aŋoco.” 22Ati eramak ni itai jo, lya al iloŋojita’to jyo illanyi onyurak adi aŋoco. Lya ol omoryo’to illanyi onyurak adi aŋoco ono okiko. Lya ol ojo’to jo, iye olosita, onyurak adi inyi aŋoco ono eema on osyo fur. 23Tania kuyya iyaŋuno iye esyoryo hoi iklesya bwo igilu iye jo owon eram hoi iko illa hoi, 24obusak esyoryo hoi. Ilo do itabisaniere eram hoi iko illa hoi, bwo ihalu ocohunie isyaraniere esyoryo hoi iklesya. 25Opulok eram hoi kwak iko arrosoni hoi hedahati tai te ekoi, ŋadi inyi iye iyaro ihosyere aŋotoni hirre, bwo fe isyo adi aŋotoni hirre iye jyo oseŋer ifitaniere ibabus. 26Eramak ni iye ahode jo ibeŋ adi iye ihouno many idumari iye ahorosi daŋ.

Ettiyenio Yesu Eram ono Asomon

27Itaniŋuna tai jo, ojori nya igyerita jo, “Hehaniete erre somon.” 28Ati eramak ni itai jo, atulo ol omijo’to jyo obo aŋotte bwo awak iyyauna ikonyi, iyyau inyi ahode ikonyi te egigilita honyi. 29Kuyya itahutak onyek iŋet hoi iye iyyata, ogolotu inyi itto biroro addi, nyo oyyu kuyya oye aŋati abotye ono ahwan hoi bwo obeŋ adi ahwan daŋ ibironi ihima. 30Kuyya itahutak aani iŋet hoi iye liyyata, oŋotu inyi itto biroro addi, nyo oyyu kuyya oye aŋati abotye ono ahwan hoi bwo obeŋ adi ahwan daŋ ibironi ihima.

Ettiyenio Yesu Eram ono Apyaha

Mt 19:9; Mk 10:11-12; Lk 16:18

31Lya al ifuha’to ŋorwoi honyi ette pyaharo jihonyi, oŋida inyi isyo awaraga an itamijanak’to apyaha honyi iko ŋorwoi. 32Ati eramak ni itai jo, lya al ifuha’to ŋorwoi honyi to obo eram asai bwo obyaŋara ta eram ono asomon, itaroto inyi ŋorwoi honyi. Bwo oroto lya al ayama’to aŋotte an ifuha habi to obo eram asai.

Ettiyenio Yesu Eram ono Ecoriti

33Itaniŋuna tai jo ojori nya igyerita jo, “Hepwahata ecoriti hatai hun icoronia tai ati oŋida itai ihaniete ihwa icoronia tai.” 34Ati eramak ni itai jo, Hecoronia asai. Hettuŋoti te edou nyo ara inyi amaji kurus ono Hollum. 35Hettuŋoti ta afau nyo ara inyi ebalori hejek honyi. Hettuŋoti ta Yerusalem nyo ara inyi amiji ono Hobu ol obolo’to. 36Hettuŋoti ta osi hatai nyo ibyaŋata tai iremehina iloit ofitti abotye on obwor, emoli. 37Al ijatta tai, Afe, oŋida ara inyi Afe ahode. Bwo fe al ijatta tai, Obeŋ, oŋida ara inyi Obeŋ ahode. Hefonihina omuk nekyanita huno olorroho.

Ettiyenio Yesu Eram ono Enienuna

Lk 6:29-30

38Itaniŋuna tai jo, ojori nya igyerita jo, “Odumati onyek ta onyek bwo fe odumati alai ta alai.” 39Ati eramak ni itai jo, Hehara lya al awak’to itarroho itai, ati al anaŋ inyi amahalyo etteŋet isyara bwo fe ebotye. 40Al awak inyi iloŋo iye ilokikoi iyari aboŋo hoi, isyara bwo fe agamis hoi. 41Al orrosok inyi iye iwwahatyere erre honyi many amail abotye, adahati ikonyi amail arrihai. 42Isyatta erre jyo lya ol omojo’to bwo fe heyimoti inyi.

Omunoti Amyorok Hatai

Lk 6:27-28, 32-36

43Itaniŋuna tai jo, ojori nya igyerita, “Omunoti hutto lonyihari hatai bwo fe oliwati amyorok hatai.” 44Ati eramak ni itai jo, Omunoti amyorok hatai bwo fe omojoti to hya hul ittigemye’to itai. 45Nyo te ehanita hunia itahutana tai jo irata tai lonyirok hulo Monyatai ette dou; nyo isyo inyi oloŋ honyi itafaŋyere arrohojak iko ayijok, bwo fe ifak inyi ahide jyo amyosok iko jyo hul oniŋye’to 46Kuyya imunoti tai aati hul omunoi’to itai, ?anyo adi edumit hatai? ?Obeŋi so arrohojak ihanie ihwo nya? 47Al ifonyati tai illarak hatai hama, ?obeŋi so laati daŋ ihanie ihwonya? ?Obeŋi so paganohyen ihanie ihwo nya? 48Tania ihaniete on oyyu ihwa ihanio Monyatai ette dou.

Currently Selected:

Matteyo 5: LOT1969

Highlight

Copy