Matteyo 20

Legyamak Mana

1Ara olobye ono Hollum ihwa lamonye haŋ al iwwanyu ta amotye hanyik beryen iloŋori egyamak igyamari imana honyi. 2Ocorok inyi arobia abotye jihosi ababo te egyama ono oloŋ obotye, ette inyi ifahina isi igyamari. 3Ta asaa hottoŋwan addaddaharo inyi ette igonyuna omuk laati hul itoŋoi isuk asai. 4Ojo inyi jihosi, Itai bwo fe, ifwatta imana hoŋ igyamari bwo aduma adi ni itai on oyyu. Ette isi fwatan. 5Ta afanni iko ta asaa hunihoi olo inyi ihaniere ihwo nya. 6Ta asaa miet olo inyi bwo fe nyurana omuk owotyai asai. Ojo inyi johosi, ?Nyo itoŋoti tai dini ta afanni daŋ asai? 7Itarraŋi isi ojori, Obeŋ tulo iloŋo hohoi igyamari. Ette inyi jaran jihosi, Ifwatta igyamati imana hoŋ. 8Ta akikai ojo lamonye mana jyo etigyamani ojo, Iloŋu legyamak bwo odumai isi arobia hosi bwo fe itterye jyo huttehalu many jyo huttohosyere. 9Ifwotuni hya hul itterye egyama ta asaa miet arobia ababo. 10Al ofwonni hul igyamai’to ta amotye igigiloi isi jo efwotu adi isi arobia hun agalihini hodwo ifwotuni hya. Ati ifwotuni isi bwo fe arobia ababo. 11Al ifwotuni isi arobia omyanai isi lamonye haŋ, 12ette jaran jihonyi, Igyamai dwo hya hul ofwonni’to ehalu ta asaa abotye hama, ati itarrijohi iye isi ikohoi hul egyama ta afanni daŋ iholoŋ on onok’to. 13Itarraŋ inyi jyo obo olosi ojo, Illa, abeŋ ni ehanio on orroho jihoi. ?Ibeŋ dwo so ho iye iruk igyamari ta arobia abotye? 14Iyaro onohoi bwo ilo. Awak ni isyo jyo huttehalu ihwa esyo ni jihoi. 15?Abeŋ so ni aremik ihanio erre hoŋ ihwa awak ni? ?Ihain iye nyo ayyu ni? 16Tania huttehalu ofwoi adi ahosyere, bwo fe huttohosyere ofwonni adi ihalu.

Ekiluna Yesu Naye Honyi Enyyahi Etahunihi

Mk 10:32-34; Lk 18:31-34

17To obo oloŋ hofwoi isi Yerusalem, ette Yesu wotya iko leyiyanak honyi ’tomon harrihai aŋati ette jaran jihosi ojo, 18Imijyete, efwo hohoi Yerusalem bwo fe isyarani adi Lonyi tulo jyo ehumak eleittaha iko legyorok bwo fe oŋoti adi isi naye jihonyi. 19Isyori adi isi inyi jyo paganohyen osuhotyerek inyi ette bahyo inyi ette sihonia inyi, ati ihalu oŋitek hunihoi ibuhu adi inyi.

Awahan Yoane iko Yakobo Ratan Eleittaha

Mk 10:35-45

20Ofwonni ŋorwoi Sebedeyo iko lonyirok honyi jyo Yesu ette rigoŋi ette mojo jihonyi. 21Ojo Yesu jihonyi, ?Iwak iye anyo? Attati inyi jaran, Ijara lonyirok hoŋ hulo arrihai itoŋoi lilobye hoi, abotye ihani iŋet hoi bwo obo ihani ihorroŋ hoi. 22Ati itarraŋ Yesu ojo, Ibyaŋata tai imijana anyo ifiyete tai. ?Iremehina tai mata ta akos#20:22 akosIkyana Yesu ta adyaha iko naye honyi. an amatari adi ni? Ojori isi jihonyi, Eremik hohoi. 23Ojo inyi jihosi, Ahode, imatati adi itai ta akos an amatari ni ati abeŋ ni aremik isyo jihatai itoŋori oŋyatai hoŋ iko arraŋai hoŋ. Ati ihuhumak Hollum amaji ania to hya hul onyimu inyi. 24Ninya itaniŋuni leyiyanak honyi hulo ’tomon eram ana, ette isi iloŋojita jyo lonyirok Sebedeyo hulya. 25Tania ette Yesu iloŋuna isi jihonyi ette jaran, Imijana tai jo ilettohorik hobwok hulo paganohyen aati hosi, bwo fe eleittaha hosi ittigemye isi. 26Obeŋ ara ihwo nya jihatai. Al awak obo alatai ’tuna ratan eleittok, ijara hetera do ehegyamani hatai; 27bwo fe al awak’to ratan ahobu hatai, ijara hetera do apit hatai. 28Ihwa ottu Lonyi tulo, obeŋ inyi ottu jyo oŋida laati igyamai jihonyi ati ottu inyi igyamari jyo aati bwo fe isyo inyi nesu honyi idumari ta aati arryai.

Esyarana Yesu Amijo jyo Laŋodok arrihai

Mk 10:46-52; Lk 18:35-43

29Idyaharai isi amiji Yeriko attati eluluŋ wati arryai ijifaro inyi. 30Itaniŋuni aŋodok arrihai hul itoŋoi iger ikoi ojo Yesu ol olo, ette isi illilloŋo ojori, Hobu, Lonyi Davide, omehinie jihohoi. 31Itadwaye laati isi ette iramana isi hotodwahi ati arasai isi illilloŋo bebe ojori, Hobu, Lonyi Davide, omehinie jihohoi. 32Owotya Yesu ette iloŋuna isi jihonyi ette jaran, ?Iwahata tai ani ehanio anyo jihatai? 33Itarraŋi isi jihonyi jo, Hobu, itaŋidara oŋite hohoi. 34Omehino Yesu ette ’tir oŋite hosi. Teyya teyya omijye isi ette ijifaro inyi.

Currently Selected:

Matteyo 20: LOT1969

Highlight

Copy