Matteyo 18
18
Etarisa Heyiyanak jo Ŋai Adi Eleittok
Mk 9:33-37; Lk 9:46-48
1Ta asaa ania ofwonni leyiyanak jyo Yesu ette ifiyo inyi jo, ?Ŋai adi eleittok ilobye Hollum? 2Iloŋu inyi obo eito on odiha ette ititoŋonia inyi ihiji hosi 3ette jaran, Ahode eramak ni itai jo al ibyaŋata tai iloitoti irari ihwa aduri hun odihara’to, ibyaŋata adi itai ifwotuna olobye ono Hollum. 4Tania lya al itamuta’to ahwan honyi ihwa eito ana ara adi inyi eleittok ilobye Hollum.
5Lya al ifwotu’to eito ihwa ana ta afure hoŋ, ifwotu inyi ani luŋa. 6Ati lya al itipalyo’to eito an iruk’to jihoŋ, osiru ifitani amorwo on obolo imurut honyi ette bironia inyi ihari.
Eema on Obeŋ’to Odunya
Mk 9:42-48; Lk 17:1-2
7Orroho bebe jyo afau nyo olwaji etipalita. Ofwonni adi etipalita ahode ati orroho bebe jyo atulo al iyaŋuno’to isi. 8Kuyya itipala aani hoi kuyya bu eju hoi iye liyyata, oŋutoi isi ette biroro addi. Oyyu jihoi ijiŋaniere lisu al irrohoja kuyya bu al iŋura agalik ibironi iye iko ahas arrihai kuyya ejek arrihai lihima on obeŋ’to odunya. 9Kuyya itipala onyek hoi iye liyyata, ogolutu inyi ette biroro addi. Oyyu jihoi ijiŋaniere lisu iko onyek abotye agalik ibironi iye ihima iko oŋite arrihai.
Narryamara ono Aker on Olito’to
Lk 15:3-7
10Ihumata ’rirrya ŋadi itai imyanati eito on odiha’to ihwa ana nyo eramak ni itai jo igonyuni anjelohyen hosi omom Monyoŋ ette dou. 11Nyo ottu Lonyi tulo italahuniere hul olitohini’to. 12?Igigiloti tai anyo? Kuyya owon atulo iko akyoro esiha abotye ati olito abotye, ?obeŋ adi inyi idyaharo atomwana hottoŋwan hohottoŋwan idoŋe ette leten ’tittifyaru aker ol olito’to? 13Ahode eramak ni itai jo, al onyurak inyi omuno adi inyi aker lya agalik akyoro huno atomwana hottoŋwan hohottoŋwan hun obeŋi’to olitohini. 14Tania obeŋ Monyatai ette dou awak obo eito on odiha’to oye.
Illa Hoi al Iyyau’to
Lk 17:3
15Kuyya iyyau illa hoi jihoi ilo itahutak eyyau honyi jihonyi hama. Kuyya iruk inyi ekyanita hoi, irrehu iye inyi. 16Al obeŋ inyi itayiru nekyana hoi iloŋo etamijanani abotye kuyya bu arrihai itabisaniere eram hatai ania. 17Kuyya iha inyi isi, iramak eklesya. Kuyya iha inyi itaniŋuna eklesya ijara inyi hetetoŋoi ihwa apagano jihatai kuyya bu ihwa lamojoni musuru. 18Eramak ni itai ahode, erre daŋ hun ifitana tai ta afau, ifitanie adi bwo fe isi idou. Erre daŋ hun ihohina tai ta afau, ohohinie adi bwo fe idou. 19Enyyak ni iramana itai ahode jo, al omojoi laati arrihai arabotye to obo ariŋ an awahi isi isyo adi Monyoŋ ette dou ariŋ nya jihosi. 20Nyo al ottubanie laati arrihai kuyya bu hunihoi ta afure hoŋ awon ni ihiji hosi.
21Ottu Petro ifiyere inyi ojo, Hobu, ?oŋida ani amehitta jyo illaŋ enyyahita omukaja al iyyauta inyi jihoŋ? ?Kuyya bu enyyahita hattarik? 22Ojo Yesu jihonyi jo, Ajo ni jihoi, obeŋ ara enyyahita hattarik hama, ati atomwana hattarik hahattarik.
Narryamara ono Apit ol Orroho’to
23Ara olobye ette dou ihwa hobu obo al awak’to itabisana ahorosi huno apiti honyi. 24Ahosyere iyaŋunie jihonyi atulo ol ohuru nya arobia alif arrihai. 25Ati obeŋi agurusi jihonyi idumari tania ifak eleittok itinyyaŋaniere atulo alya iko ŋorwoi honyi bwo aduri honyi iko erre honyi daŋ idumari ahorosi hunia. 26Origoŋ apit alya ihosyere leittok ette lolya ojo, Omehinie jihoŋ, aduma adi ni ahorosi daŋ. 27Omehino ataji leittok ette inyi hohina atulo alya attati busana ahorosi honyi. 28Attati apit alya leten ette rwaŋanio iko obo al igyamatye’to ikonyi ol ohuru nya jihonyi arobia ’tomon. Inef inyi lya amurut ette jaran, Odumai arobia hoŋ. 29Ette inyi rigoŋi ihosyere honyi ette lolya jihonyi ojo, Omehinie jihoŋ, aduma adi ni. 30Ati iha inyi ette itifitana inyi ibabus many odumari adi inyi ahorosi daŋ. 31Ijiriŋai bebe apiti hul omuk ninya itaniŋuni isi eram ania, ette isi fwatan iramaniere jyo eleittok. 32Tania iloŋo eleittok apit alya jihonyi ette jaran, Iye apit olorroho bebe. Ninya ilolyari iye jihoŋ abusak nya ni ahorosi hoi daŋ. 33?Obeŋ oyyu jihoi imehiniere jyo obo apit al igyamati’to ikoye ihwa inya amehiniere ni jihoi? 34Iloŋojita eleittok honyi bebe ette isyarana inyi jyo polis ibahyere inyi many odumari adi inyi ahorosi honyi daŋ. 35Ihanio adi Monyoŋ ihwo nya jihatai ababo al ibyaŋata tai ibusana illarak hatai ta atajya hatai ahode.
Currently Selected:
Matteyo 18: LOT1969
Highlight
Share
Copy
Want to have your highlights saved across all your devices? Sign up or sign in
This text was originally published by the British and Foreign Bible Society in 1969.
