Luka 8

Adaha Aŋorwo iko Yesu

1Ihalu olo Yesu totwa misik ittiyeniere asayyo huno olobye Hollum. Ofwoi leyiyanak ’tomon harrihai ikonyi. 2Bwo fe ofwoi aŋorwo hunya itaŋidaruni jyo ajohin hun orrohoji’to iko eŋwati ikonyi. Owon bwo fe Maria an ifurani Madalena inya ifuha Yesu ajohin hattarik hun orrohoji’to, 3bwo Yoana ŋorwoi Cusa legyamani olo Erode iko Susana bwo fe omuk arryai. Olwahi aŋorwo huna Yesu iko leyiyanak honyi te erre hosi.

Narryamara ono Layani Hinyomo

Mt 13:1-9; Mk 4:1-9

4Ottubanie eluluŋ wati arryai bwo aati to misihi daŋ ette fwatan jyo Yesu attati inyi ikyana jihosi ta arryamara on ojo, 5Olo obo atulo yehina enyomo honyi. Hoyehi inyi ofodoŋonie omuk enyomo likoi bwo aati adak ette ryehina ta nejek hosi bwo fe naheny ette kuba. 6Ofodoŋonie omuk ihiji morwoi bwo isi ette isuruna ette oloŋ itayoho afarawa hosi nyo obeŋi aboro ofuji. 7Ofodoŋonie omuk lihiji hikwa, ette isi isuruna arabotye iko nekwa ette nekwa itabunara isi. 8Okwahinie omuk jyo aboro hun oyiji ette isuruna on oyyu bwo ihalu ette fwanna ŋerihina ema esiha abotye. Hekyana inyi ihwania ette inyi jaran bwo fe ojo, Lya ol owon’to iko ayyaha ijara inyi hetaniŋu.

Awoyo Hiram ono Arryamarita

Mt 13:10-17; Mk 4:10-12

9Attati leyiyanak honyi ifiyo inyi awoyo hiram ono arryamara ana. 10Ojo inyi jihosi, Italeyehi Hollum jihatai nelahode ono olobye honyi ninya idimani ati jyo hul omuk ikyanai jihosi ta arryamara jo al omijye isi obeŋi adi isi igonyuni, bwo fe al itayirye isi obeŋi adi itaniŋuni.

Etaleyehina Yesu Arryamara ono Layani Hinyomo

Mt 13:18-23; Mk 4:13-20

11Ihwania awoyo hiram ono arryamara ana; arai nenyomo ekyana Hollum. 12Nenyomo hutte koi isi aati hul itayirye’to nekyana ette etisyahani ’tuna ette kwararu ekyanita addi to tajya hosi ette isi byaŋan iruk ette ilak italahuno. 13Nenyomo hutto morwoi isi aati hul itayirye’to nekyana ette ifwotuna ta namuno ati obeŋi jihosi nadde, iruhi isi do, ati al attu esusuyo ette isi ipal addi. 14Nenyomo hun ofodoŋonie’to itwa hikwa isi aati hul itayiruni’to ati itabunari ebariti iko ehawwata bwo emuniti huno afau ana isi bwo aŋer hosi obeŋi odori. 15Bwo hun okwahinie liboro hun oyiji, isi aati hul itayirye’to nekyana ette ’tunana itajya hosi hun oyiji bwo fe obeŋi inyobye ette fwanna ŋijuna aŋer ta adihan hosi.

Narryamara ono Allomo

Mk 4:21-25

16Obeŋ obo atulo oswak allomo ette muhonio ta agufa kuyya ihanak iwoyo ijotit, ati oyihak inyi allomo ihide jo oŋida hya hul ojiŋani’to igonyuni afaŋan. 17Onuhani laati omuk erre jo oŋida ihalu inyyahi bwahuna isi. Imuhoni laati erre jo oŋida ihalu inyyahi isi duhuna. 18Ihumata aŋai itaniŋuna tai; nyo lya ol owon iko erre ofonik adi Hollum omuk jihonyi, bwo lya ol obeŋ’to iko erre, iyari adi jihonyi addi dwadi hun omutari hun igigilo inyi jo owoni jihonyi.

Illarak Yesu iko Honyonyi

Mt 12:46-50; Mk 3:31-35

19Attati illarak Yesu iko honyonyi fwanna, ati obeŋi isi oremehini fanyan jihonyi nyo olwaji aati. 20Iramani laati inyi ojori, Honyohoi iko illarak hoi owotyai ilet, owahi isi iye. 21Ati ojo inyi jihosi daŋ, Heyaŋ iko illarak hoŋ hulo. Isi hul itaniŋye’to ekyanita hoŋ bwo fe ihanie.

Etadwayo Yesu Asiŋit

Mt 8:23-27; Mk 4:35-41

22To nobo noloŋ adak Yesu itogol iko leyiyanak honyi, ette jaran jihosi, Efwo aŋati hari tole, attati isi fwatan. 23Hofwoi isi ette inyi jotoro. Bwo asiŋit ette dyoto on obolo bebe bwo fe ifut atogol iko aari ette isi jaran edyo itwa hari. 24Ette isi itaheny inyi ojo, Leittok, leittok, ejo hohoi eye. Odyoto Yesu ette ifahina oyyami iko afolyak folyak hari hotodwahi. Ette asiŋit dwa ette aari ŋettyo dee. 25Ojo inyi jihosi, ?Tani neruk hatai? Bwo isi ette baŋi bwo fe illillihai ette ikikyana ta ahwattek hosi ojori, ?Anyo tulo olo al itadwa’to oyyami iko aari, ette isi dwa?

Etaŋidaryo Yesu Atulo al Isita’to

Mt 8:28-34; Mk 5:1-20

26Attati isi fanyan ifau Gerasa on owon’to ta aŋati abotye ono Galilea. 27Hesuru Yesu ifau, orwaŋanie inyi iko obo atulo olo amiji ania ol owon’to iko ajohin hun itisitaji’to inyi. Ta aŋasi arryai obeŋ inyi iyyafatyo aboŋojin bwo obeŋ inyi amanya ihaji, ati amanya inyi ihiji lumyo. 28Ninya igonyu inyi Yesu, oyyo inyi ette kwahino ifau ihosyere Yesu ette lwaha jihonyi on okwat ojo, Yesu Lonyi Hollum al agalik’to daŋ, ?anyo hiram iwak iye jihoŋ? Amojo ni jihoi hettigemyo ani. 29Nyo ifuha Yesu ajohin hun orrohoji hefwahi jihonyi addi. To oŋitek arryai inefi ajohin inyi bwo dwadi ifitani inyi ta nofi iko aririk ofut inyi isi ette ajohin iyaro inyi litwa mur. 30Ifiyo ati Yesu atulo ojo, ?Ŋai afure hoi? Itarraŋ inyi ojo, Ani Legon, on ojo olwaji ajohin hun ojiŋani’to ihwan honyi. 31Ifiye ati isi Yesu oŋida inyi obeŋ ifuhak isi litwa iwure. 32Ihwania owoni neluluŋ bataha arryai hun oŋiye ihide doŋe attati ajohin lwaha jo oŋida inyi aŋatak isi ijiŋaniere itwa bataha. Bwo iruk Yesu isi hetefwahi. 33Attati ajohin fwan addi totwa tulo ette jiŋana litwajin bataha, bwo eluluŋ bataha ette ŋyoron olotifor, hutu, hutu, hutu, ette kwahino lihari ette dyoro ette ye iko dia.

34Inya igonyuni leyyak eram ana ofuhoi isi ette iramana jyo hutto miji iko hutteger miji daŋ. 35Attati aati fwatan mijo anyo on owon’to dia. Ofwonni isi jyo Yesu ette igonyuna atulo odwo isita’to itoŋo iger hejek Yesu. Iyyafak inyi aboŋojin bwo fe obis egigilo honyi ette isi baŋi. 36Bwo laati hinya igonyuni’to ette iyabana omuk eram ono etaŋidaryo ol osita. 37Tania ikikyanai aati daŋ hutto Gerasa ette fuhara Yesu addi nyo owon nya abaŋi on obolo jihosi, tania adak inyi litogol ette caharu. 38Ifiyo atulo odwo isita’to Yesu lifwatari ikonyi ati ifak Yesu inyi addi ojo, 39Ilo imiji hatai bwo fe iramak laati erre hun obolori’to hun ihanio Hollum jihoi. Alo inyi ette iramana laati hutto misihi daŋ erre hun obolori’to hun ihanio Yesu jihonyi.

Ŋarri Yario iko Aŋotte on Owouno Hoto Honyi

Mt 9:18-26; Mk 5:21-43

40Acaharu Yesu ette laati irraŋuno inyi nyo itilai isi inyi. 41Bwo fe ette obo atulo ’tuna afure honyi Yario. Ara inyi eleittok olo aji imojit. Origoŋ inyi lihomon Yesu ette mojo jihonyi ojo, Waŋ efwo ihaji hoŋ. 42Nyo owon inyi iko ŋarri abotye an ilyaha aye. Arai aŋasi honyi ’tomon harrihai.

Holo Yesu ottidani aati inyi. 43Bwo fe ottu obo aŋotte jihonyi on owouno hoto to hwan honyi ta aŋasi ’tomon harrihai. Otuhok nya inyi agurusi honyi daŋ jyo akimi ati obeŋ inyi oŋida. 44Ottu inyi ihorwoŋ Yesu ette ’tir esidi boŋo attati nooto honyi wotya kokwak. 45Attati Yesu jaran, ?Ŋai ottir aboŋo hoŋ? Ati orisai aati daŋ. Ojo Petro iko hul adahai’to ikonyi ojo, Olwaji laati hul osusularai’to iko hul itittaŋye’to iye. 46Ati ojo Yesu, Ottir dwo obo atulo ani nyo amijak ni itaŋida adwaran hoŋ inyi. 47Inya igonyu aŋotte jo abeŋ inyi aremik dima, ottu inyi an ikikiro ette rigoŋi ihosyere honyi ette iramana jihonyi ihosyere wati daŋ ojo, Attir ni Yesu bwo aŋida ahwan hoŋ. 48Ojo Yesu jihonyi, Hanioŋ, itaŋida neruk hoi iye. Ilo ta nelik taji.

49Hekyana inyi ottu obo to haji Yario ette jaran, Aye ŋarri hoi. Obusak ettiyanani. 50Ati itaniŋu Yesu ette jaran jyo Yario, Hebaŋ, iruho bwo oŋida adi ŋarri hoi. 51Ninya afany inyi ihaji obeŋ inyi iruk obo atulo ijiŋaniere ikonyi arari Petro, Yoane iko Yakobo, bwo fe monye iko honye hito. 52Oyyoi laati dia bwo fe iwuwoŋitai. Ati ojo Yesu jihosi, Heyyoti, nyo obeŋ inyi oye, ojoto joto. 53Ati osuhotyerek isi inyi nyo omijani isi aye dwo inyi. 54Ati inef Yesu aani hito ette jaran, Ŋarri hoŋ, odyotoi. 55Attati oloyiri honyi cohuno ette inyi dyoto kwak. Ifak Yesu isi hesyarahi obo aŋiyo jihonyi. 56Illillihai esyok honyi ati ifak inyi isi hotobyaŋahi iramani obo atulo anyo riŋ an ihanio inyi.

Currently Selected:

Luka 8: LOT1969

Highlight

Copy