Luka 18

Narryamara ono Nolobiloŋi iko Aŋotoni Hirre

1Attati Yesu iramana isi narryamara an itahutak’to isi jo oŋida isi odulori amojo bwo fe obeŋi itabani. 2Ojo inyi, Owon nya lobo aŋotoni hirre ol obeŋ abaŋ Hollum bwo fe obeŋ abaŋ aati. 3Bwo fe owon nya nobo nolobiloŋ ŋotte dia on odulo’to adaha jihonyi on ojo, Inienok ani amyotononi hoŋ. 4Iha aŋotoni hirre ahosyere do, ati lihalu ojo inyi ta ahwan honyi ojo, Abeŋ bu ni abaŋ Hollum bwo fe abeŋ ni abaŋ laati, 5ati ittigemyo ani aŋotte ana, tania enienok adi ni inyi ŋadi inyi ittigemyo ani fur. 6Bwo Hobu ette jaran jo, Itaniŋyete erre hun ikyana laŋotoni al enyobyo’to. 7?Obeŋ adi Hollum inienu onyimot honyi hul oyyoi jihonyi ta afanni iko ta attari? Bwo fe odihu inyi isi fur. 8Eramak ni itai jo inienu adi inyi isi kwak. ?Ati al ottu Lonyi tulo ottu adi inyi nyurana neruk lifau?

Narryamara ono Afariseitanani iko Amojoni Musuru

9Iramak nya bwo fe inyi narryamara ana jyo lomuk laati hul ojori’to jo elibo isi ati omyanai isi omuk. 10Ofwoi aati arrihai imojori litwa haji imojit eneittok. Ara lobo olo Farisei bwo lobo amojoni musuru. 11Owotya Afariseitanani ette mojo ta ahwan honyi ojo, Hollum ajo ni humo nyo abeŋ ni ara ihwa aati omuk, hul arai’to ahahorok gurusi wati, emumunak, asomok, bwo fe ihwa amojoni musuru olo. 12Aferuta ni enyyahita arrihai te esabit abotye. Esyoryo ni aŋaco etattomonita huno erre daŋ hun owoni’to jihoŋ. 13Ati lamojoni musuru owotya alamarai ol obeŋ ibonno ahide ette naŋ asuhe honyi bwo ojo, Hollum omehinie jihoŋ, ani leyyani. 14Eramak ni itai, olo atulo olo ihaŋ honyi al alibo agalik lodwo lobotye. Nyo lya al itahabworo’to ahwan honyi itiloririji adi, bwo lya ol omyana’to ahwan honyi itahabuhini adi.

Amuno Yesu Aduri

Mt 19:13-15; Mk 10:13-16

15Iyaŋunie isi jyo Yesu aduri hun odihara’to jo oŋida inyi ottir isi. Ati ninya igonyuni leyiyanak honyi ana, itihi isi aduri hotobyaŋahi ofwoi jyo Yesu. 16Attati Yesu iloŋo isi ojo, Obusana aduri ofwonni jihoŋ, hetihoto isi nyo ara Hollum a Hobu hosi. 17Ahode eramak ni itai jo lya ol obeŋ’to iruk Hollum irari a Hobu honyi ihwa iruhori eito ol odiha’to obeŋ adi inyi ojiŋak ilobye Hollum.

Abarani al Awak’to Nesu

Mt 19:16-30; Mk 10:17-31

18Bwo ottu lobo eleittok ette ifiyo Yesu ojo, Hettiyanani ol oyyu, ?ehanio adi ni aŋai inyuraniere nesu on osyo fur? 19Attati Yesu itarraŋ jihonyi ojo, ?Nyo iloŋo iye ani ol oyijo? Obeŋ obo atulo oyyu arari fe Hollum hama. 20Imijak iye efahita, “Hehanio nerre somon, hettoho, hehoholyo, hegesem, bwo fe itahabuye monyohoi iko honyohoi.” 21Bwo eleittok alya ette jaran, Efaha ni erre hunia daŋ hara ni ahito many iko ahana. 22Ninya itaniŋu Yesu nerre hunia ojo inyi jihonyi ojo, Owon ariŋ abotye an ipwak iye. Ilo itinyyaŋak erre hoi daŋ bwo aharak agurusi jyo alocaŋak bwo iwon adi iye iko ebariti hoi lidou, bwo ihalu waŋ, ijifatye ani 23Litaniŋu inyi erre hunia ette inyi jiriŋa bebe nyo abara inyi. 24Tania igonyu Yesu ejiriŋa honyi ette jaran, Ogol bebe jyo hul owoni iko ebariti ijiŋaniere ilobye Hollum. 25Ogol bebe jyo abarani ijiŋaniere ilobye Hollum agalik ajiŋana konnikonni ittulit libira. 26Attati hya hul itaniŋuni’to inyi jaran, ?Ŋai ’tadi al italahuni? 27Attati Yesu jaran jihosi, Erre daŋ hun agalihini’to aati oremik Hollum ihanio. 28Bwo Petro ette jaran jo, Ebusak hohoi erre hohoi daŋ ette jifatyo iye. 29Tania ojo Yesu jihosi, Ahode ajo ni jihatai, atulo ol obusak’to ahaŋ honyi iko ŋorwoi honyi, illarak honyi, esyok honyi, kuyya bu aduri honyi ta namuno lobye Hollum, 30ifwotu adi inyi erre arryai jyo afau ana bwo fe lihalu ifwotu adi inyi nesu on osyo fur.

Ekiluna Yesu Naye Honyi Enyyahi Etahunihi

Mt 20:17-19; Mk 10:32-34

31To obo oloŋ iyaru Yesu leyiyanak honyi hulo ’tomon harrihai aŋati ette jaran jihosi, Imijyete, efwo hohoi Yerusalem, bwo ihanie adi jyo Lonyi tulo nerre daŋ hunya igyoroni leyak sayyo. 32Nyo isyori adi inyi jyo paganohyen bwo osuhotyerek adi isi inyi ette ittigemyo inyi on orroho bwo fe omitai adi isi lihomom honyi. 33Abahye adi isi inyi ette ’tohoro inyi, ati ihalu oŋitek hunihoi ibuhu adi inyi. 34Obeŋi nya bu leyiyanak honyi itaniŋuni nerre huna nyo idimani nekyana ania jihosi bwo obeŋi isi omijani isi.

Esyarana Yesu Amijo jyo Oloŋodo

Mt 20:29-34; Mk 10:46-52

35Ninya ilyaha Yesu imiji Yeriko bwo itoŋo obo oloŋodo iger ikoi al ififiyo’to aati ta alwahyo. 36Itaniŋu inyi eluluŋ wati adahai te ekoi ette inyi ifiyo isi ojo, ?Anyo eram? 37Ojori isi, Yesu olo Nasaret alya al adaha’to te ekoi. 38Ette inyi iloŋo bebe ojo, Yesu Lonyi Davide, omehinie jihoŋ. 39Bwo fe hul adahai’to ahosyere ette iramana inyi hotodwai, ati arasa inyi illilloŋo agalik ojo, Lonyi Davide omehinie jihoŋ. 40Owotya Yesu ette ifahina isi ojo, Iyaŋuniete inyi jihoŋ. Ottu inyi ette Yesu ifiyo inyi ojo, 41?Anyo iwak iye oŋida ani ehanio jihoi? Ojo oloŋodo, Hobu, awak ni mijo, 42Ojo Yesu jihonyi ojo, Ijara oŋite hoi homijyehe. Itaŋida neruk hoi iye. 43Teyya kokwak omijo inyi ette jifaro Yesu bwo itahabuyo Hollum. Bwo fe laati daŋ hul igonyuni’to erre hunia itahabuye Hollum.

Currently Selected:

Luka 18: LOT1969

Highlight

Copy