Yoane 21
21
Aleyo Yesu jyo Leyiyanak Hattarik
1Ihalu italeyehi Yesu ahwan honyi jyo leyiyanak ihari Tiberia, itahutak inyi ahwan honyi ihwa ana. 2Owon nya Simone Petro bwo Tomaso aturoti, bwo Natanaele olo Kana otto Galilea iko lonyirok arrihai hulo Sebedeyo bwo omuk leyiyanak honyi arrihai. 3Ojo Simone Petro jihosi, Alo ni iyafok. Ette isi itarraŋ ojori, Efwo daŋ. Ette isi ati dahina itwa togol ette fwatan iyafohori. Ayafohoi isi arwe daŋ ati obeŋi isi inefuni obo.
4Ati inya afaŋ amotye owotya Yesu ilotifor hari, ati obeŋi leyiyanak oheruni jo Yesu lya. 5Ojo Yesu jihosi, Illarak hoŋ, ?obeŋi omuk aham jihatai? Itarraŋi isi jihonyi jo, Obeŋi. 6Ette inyi ati jaran jihosi, Ibironia aboy hatai iŋati iŋet ono atogol bwo inyurana adi itai. Ette isi ati ibironia bwo fe obeŋi isi oremehini ipihuna aboy hosi itwa togol nyo olwaji aham arryai. 7Attati leyiyanani ol omuno Yesu jaran jyo Petro ojo, Hobu lya. Itaniŋu Simone Petro jo, Hobu lya, ette iduhuna aboŋojin ette iyyafana nyo obeŋ agamis jihonyi ette luhina itwa hari. 8Bwo leyiyanak hul omuk ette fwanna ta atogol hul ipihotye aboy an ifut iko aham nyo obeŋ nya olotifor alama.
9Alouni isi totwa togol, igonyuni isi eema owulo ilotifor. Owoni bwo fe omuk aham bwo emunio ihide honyi. 10Ojo Yesu jihosi, Iyaŋuniete aham omuk hun hetehata tai inefuna. 11Ette Simone Petro leten ipihuna aboy ilotifor an ifut iko aham hun olwaji esiha abotye iko atomwana miet hohunihoi. Ati olwaji dwadi bu aham hunia obeŋ aboy ofuto. 12Iloŋo Yesu isi ojo, Ifwanna eŋiyo. Obeŋ obo olo leyiyanak iŋere ifiyo inyi jo, ?Ŋai iye? Nyo omijani isi jo Hobu alya. 13Ette Yesu leten iduhuna emune ette isyo jihosi iko aham. 14Enyyahi ana etahunihi an italeyehiniere Yesu ahwan honyi jyo leyiyanak ihalu ibuhuna honyi to ye.
Itaŋiye Akyoro Hoŋ
15Atuhi isi aŋiyo, ifiyo Yesu Simone Petro ojo, Simone, lonyi Yoane, ?imuno iye ani agalik erre huna? Ojo Petro jihonyi, Afe, Hobu, imijak iye jo amuno ni iye. Ojo Yesu jihonyi, Itaŋiye akyoro hoŋ. 16Inyyak Yesu ifiyo inyi etarrihi ojo, Simone lonyi Yoane, ?imuno iye ani? Itarraŋ inyi ojo, Afe Hobu, imijak iye jo amuno ni iye. Ojo Yesu, Irrirryai akyoro hoŋ. 17Ifiyo Yesu inyi etahunihi ojo, Simone lonyi Yoane, ?imuno iye ani ahode? Ijiriŋa nya Petro ta efi etahunihi an ifiyo Yesu inyi ojo, ?Imuno iye ani ahode? Attati inyi itarraŋ ojo, Leittok imijak iye erre daŋ bwo fe imijak iye jo amuno ni iye. Ojo Yesu, Itaŋiye akyoro hoŋ. 18Eramak ni iye ahode ahode, inya hera iye ahito iyyafata nya iye aboŋo hoi bwo idahari jyo amaji an iwak iye. Ati al imarwak iye irryomok adi iye ahas hoi jyo lobo al ifitak adi aboŋo jihoi ette iyaro iye jyo amaji an ibeŋ iye iwak leten. 19Ojo inyi ana itahutaniere naye ono Petro an itahubuyo adi Hollum. Ihalu ojo inyi jihonyi, Ijifatye ani.
Leyiyanani ol Omuno Yesu
20Ette Petro yito bwo igonyu leyiyanani ol omuno Yesu arasa ijifatyo. Inyi leyiyanani linya oco’to jyo Yesu to loŋiyere bwo ifiyo ojo, ?Hobu ŋai adi itinyyaŋak iye? 21Igonyu Petro inyi ette jaran jyo Yesu, ?Hobu ara bwo olo? 22Ojo Yesu jihonyi, Kuyya anyimu ni jo oŋida inyi arasa many attuniere ni, ?ara ati inyi jihoi anyo? Ijifatye ani. 23Tania isarrahi ekyana jyo illarak jo oŋida leyiyanani alya obeŋ oye. Ati obeŋ Yesu ojo, Obeŋ adi inyi oye, ati ojo inyi, Kuyya anyimu ni jo arasa inyi many attuniere ni, ?ara ati inyi jihoi anyo?
24Inyi leyiyanani olo al itahutak’to etamijani jyo erre huna bwo igyorok isi, ette hohoi mijana jo arai etamijanita honyi ahode.
25Ati owoni erre omuk arryai hunya ihanio Yesu. Hara dwo igyoroni isi daŋ egigilo ni dwadi bu afau daŋ obeŋ oremik ’tubuna abuhi hun igyororik.
Currently Selected:
Yoane 21: LOT1969
Highlight
Share
Copy
Want to have your highlights saved across all your devices? Sign up or sign in
This text was originally published by the British and Foreign Bible Society in 1969.
