Yoane 18

Esyarana Yesu Jyo Amyorok

Mt 26:47-56; Mk 14:43-50; Lk 22:47-53

1Ihalu ikyana Yesu ekyanita huna ofwoi inyi iko leyiyanak honyi lifohor lowore Kedro tolya. Owon dia nobo najasyore, ette inyi jiŋana dia iko leyiyanak honyi. 2Omijak fe Yuda, etinyyaŋani, amaji ania nyo adahatye nya Yesu dia iko leyiyanak honyi gagaga. 3Isyori ehumak eleittaha iko Farisei jyo Yuda eluluŋ oseŋer iko legyamak hulo aji imojit eneittok, ette inyi leten dia. Iyarai isi allomohyen iko narwata ojo erremiti. 4Nyo ta amijana Yesu nerre daŋ hun ofwonni adi wanan, teyya ette inyi leten jihosi ette jaran, ?Ŋai al ittifyati tai? 5Itarraŋi isi ojori, Yesu Anasaretanani. Ojo Yesu jihosi, Ani alya. Owon bu Yuda, etinyyaŋani, lihiji hosi. 6Lajo ati Yesu, Ani alya, bwo isi ette iŋiŋad bwo ibatarai ifau. 7Inyyak fe Yesu ifiyo isi ojo, ?Ittifyati tai ŋai? Itarraŋi hya ojori, Yesu Anasaretanani. 8Itarraŋ Yesu, ojo, Ajo dwo bu ni jihatai nani alya. Al ittifyati tai nani, idehina hulo hetefwahi. 9Oŋida itasiruni nodwo hiram ikyana inyi ojo, Aati hinya isyo iye nani abeŋ ni etalitohi obo olosi abotye. 10Owon ati Simone Petro iko nademi on obolo. Osutu inyi ademi to sohobo ette yef lobo lapit olo ehumani ol obolo’to ette isaluna neyyok honyi etteŋet. Anya lapit alya Malko. 11Ojo ati Yesu jyo Petro, Osuhok ademi hoi lisohobo. ?Igigilo iye jo abeŋ adi ni amat akos#18:11 akosIkyana Yesu ta nadyaha iko naye honyi. an isyo Monyoŋ jihoŋ?

Awotya Yesu Ihosyere Ehumani ol Obolo’to

Mt 26:57-58; Mk 14:53-54; Lk 22:54

12Ette eluluŋ oseŋer iko eleittok hosi bwo legyamak hulo Yudea inefuna Yesu, 13ette ifitana, ette rihoro inyi teyya jyo Anas do, nyo inyi hamoni Kaifa, al ara’to ehumani ol obolo’to te eŋa nya. 14Inyi Kaifa alya linya iramak’to Yudea jo oŋida atulo abotye oye ta aati daŋ.

Ehara Petro Yesu

Mt 26:69-70; Mk 14:66-68; Lk 22:55-57

15Ati arasai Simone iko lobo leyiyanani ijifatyo Yesu. Bwo fe omijak ehumani ol obolo’to afure leyiyanani lya. Ojiŋani iny i arabotye iko Yesu lihiloŋoni ehumani. 16Ati arasa Petro ilet. Ojiŋu ati lodwo leyiyanani ol omijak ehumani ol obolo’to inyi ette ikyana jyo nerrirryani ikat, ette itajiŋana Petro. 17Ojo ati nerrirryani ikat jyo Petro, ?Iye bu lobo olo leyiyanak honyi? Itarraŋ inyi, Obeŋ. 18Inahini legyamak iko oseŋer eema ette wotya dia osujai eema, nyo ihacoro bebe. Bwo fe owotya Petro ikosi ol osuja eema.

Nefita Huno Ehumani ol Obolo’to

Mt 26:59-66; Mk 14:55-64; Lk 22:66-71

19Ifiyo fe ehumani ol obolo’to jyo Yesu neram ono leyiyanak honyi iko nettiyenio honyi. 20Itarraŋ Yesu ojo, Ekyana ni jyo aati on oleyo, ettiyenatyo nya ni ihasik imojiti iko ihaji imojit eneittok hun adaharik Yudea daŋ. Abeŋ nya ni ekyana obo ariŋ lit lit. 21?Ifiyo iye jihoŋ nyo? Ifiye hinya itayiruni’to nerre hunya ekyana ni jihosi, omijani fe isi nerre hunya ekyana ni. 22Al ikyana inyi ihwo nya, abotye olo legyamak hul owoni’to dia anaŋ Yesu bwo ojo, ?Itarraŋ iye jyo ehumani ol obolo’to ihwania? 23Ojo Yesu jihonyi, Al ekyana dwo ni on orroho, itahutak nepali hoŋ. Al ekyana dwo ni on oyyu, ?inaŋ ati iye nani nyo? 24Ette Anas ifahina Yesu al ifiti jyo Kaifa ehumani ol obolo’to.

Inyyak Petro Ihara Yesu

Mt 26:71-75; Mk 14:69-72; Lk 22:58-62

25Owon bu Simone Petro dia ol osuja eema. Ojori omuk jihonyi, ?Ira bwo fe iye lobo olo leyiyanak honyi? Iha inyi ojo, Obeŋ. 26Obo olo legyamak ehumani ol obolo’to, atahaŋ ba atulo odwo isalu Petro neyyok honyi, ojo, ?Abeŋ dwo ni egonyu iye lijasyore ikonyi? 27Inyyak Petro risa, ojo, Obeŋ. Ette ahohoro ilok.

Iyarai Yesu Ihosyere Pilato

Mt 27:1-2, 11-14; Mk 15:1-5; Lk 23:1-5

28Ara amotye attati isi rihoro Yesu to haji Kaifa lihaji okuma an anya’to pretoryo. Hobeŋi isi ojiŋani nyo itadwari isi jo al ejiŋak isi ette isi byaŋan enyyak ŋiyo neyom. 29Ojiŋu fe Pilato alet jihosi, bwo ojo, ?Anyo riŋ an irrasana tai atulo olo? 30Itarraŋi isi ojori, ?Obeŋ dwo inyi ara olorroho eyaŋuno dwo hohoi inyi jihoi? 31Ojo ati Pilato jihosi ojo, Iyati inyi, oŋototo neram ta ahwattek hatai. 32Ojori ati Yudea jihonyi, Itihi jihohoi attohyo lobo. Ara ana itasiruniere nekyana Yesu an itahutaniere inyi naye on oyeri adi inyi.

33Inyyak Pilato jiŋana ihaji ette iloŋuna Yesu ette ifiyo inyi ojo, ?Ira iye a Hobu olo Yudea? 34Itarraŋ Yesu ojo, ?Neram ana iye likyana ta natwa hoi hama kuyya lomuk ikyanai jihoi? 35Itarraŋ Pilato ojo, ?Ara ni Ayudetanani? Aati hoi iko ehumak eleittaha, isi iyaunie iye jihoŋ. ?Anyo nyati ihanio iye? 36Itarraŋ Yesu jo, Obeŋ olobye hoŋ ara ono afau ana. Ara dwo nolobye hoŋ ono afau ana dwo mana aati hoŋ arrem jo oŋida obeŋi isyori nani jyo Yudea. Ihwania obeŋ nolobye hoŋ odyoto tene. 37Ojo ati Pilato jihonyi ojo, ?Ira ati iye ahobu? Itarraŋ Yesu ojo, Iye lijo ara ni ahobu. Ta neram ana isiuni nya nani. Attu nya bu ni lifau itamijaniere nelahode. Hul awahi’to daŋ nelahode itayirye nekyanita hoŋ. 38Ojo Pilato jihonyi, ?Nanyo nelahode?

Aŋoco Ye Jyo Yesu

Mt 27:15-31; Mk 15:6-20; Lk 23:13-25

Likyana Pilato ihwania inyyak inyi jiŋuna jyo Yudea ette jaran jihosi ojo, Abeŋ ni anyurak obo eram honyi on orroho. 39Ara emohit hatai ihohiniere atulo abotye te eyom ono Allaŋan Anjelo. ?Iwahata tai ahohi ni jihatai Hobu olo Yudea? 40Inyyahi isi iwuwoŋita daŋ ojori, Hehou olo, ohou ati Baraba. Ati ara Baraba olohoho.

Currently Selected:

Yoane 18: LOT1969

Highlight

Copy