Yoane 10

Arryamara ono Akol Kyoro

1Ahode ahode eramak ni itai ojo, Ol obeŋ’to ojiŋak itwa hidye ta akol hidye ati odok to obo ekoi on obeŋi odohitarik, ara inyi olohoho. 2Ati ol ojiŋu’to ta akol hidye inyi monye hidye. 3Aŋahi adi eyyahani akol jihonyi. Iruhi akyoro eloŋo honyi bwo ahaco inyi akyoro honyi ta afureta hosi ette inyi ’yaharu isi. 4Al irribu inyi nedye honyi totwa, ikyomoro inyi to osyere hosi bwo akyoro ette jifaru inyi nyo omijani isi etuk honyi. 5Obeŋi isi ijifarai atamononi ati ofuhoi isi addi jihonyi nyo obeŋi isi omijani etuk tamononi. 6Iramak Yesu isi arryamara ana ati obeŋi isi itaniŋuni erre hunia.

Yesu Inyi Leyyahani Ol Oyyu

7Ojo Yesu jihosi, Ekyana ni jihatai ahode ahode, ani akol kyoro. 8Hul ofwonni’to ahosyere hoŋ arai ahahalak ati obeŋi akyoro itaniŋye jihosi. 9Ani akol. Ol ojiŋu’to totoloŋ italahuni adi. Ojiŋak ati inyi itwa bwo ojiŋuta addi irumaniere amaji ŋiyo. 10Ottu ahahalani ihoholyere bwo ittohyere iko itarrohojyere. Attu ni jo oŋida isi owoni iko nesu en ifut bwo nemuniti daŋ. 11Ani leyyahani ol oyyu. Isyo leyyahani ol oyyu nesu honyi ta akyoro honyi. 12Ati lemahani ol obeŋ ara aheyyahani ol obeŋ bu ara amonye kyoro igonyu elemye attu bwo inyi idehi akyoro ette fuho attati elemye honyaru bwo fe itisarraru akyoro. 13Ofuho lemahani nyo odumai inyi bwo fe obeŋ bu inyi igigilo ta akyoro. 14Ani leyyahani ol oyyu. Amijak bu ni akyoro hoŋ, bwo fe isi omijani nani. 15Ihwa on omijaniere Monyoŋ nani, bwo fe ni amijak Monyoŋ, esyo bwo fe ni nesu hoŋ ta nakyoro hoŋ. 16Owoni bu omuk akyoro hoŋ huno hobeŋi ottubanie libore ana. Oŋida osuduhanie isi daŋ jihoŋ bwo itayirye adi isi netuk hoŋ, oŋida ara abore abotye iko leyyahani abotye. 17Inyi ana on omunori Monyoŋ ani nyo esyarak ni nesu hoŋ jo oŋida ani enyyak inyyahuna. 18Obeŋ obo ohororo nesu addi jihoŋ. Esyo ni ta awahan hoŋ. Owon adwaran jihoŋ isyoryere bwo inyyahuniere. Efwotu ni adwaran ana jyo Monyoŋ.

19Te ekyanita huna owon abwanya inyyak ihiji wati Yudea. 20Ojori omuk arryai, Isita inyi bwo fe owon iko ajok on orroho’to. ?Nyo itaniŋyete tai jihonyi? 21Hul omuk ojori, Obyaŋara nekyanita huno ajok huna. ?Oremehini ajohin iŋa oŋite aŋodok?

Ihari Yudea Yesu

22Tania owon nya oloŋ ono eyom an ajaharik aji imojit eneittok imiji Yerusalem. 23Ara nya ahameyu. Adaha Yesu idafata haji imojit eneittok. 24Tania ikoloni Yudea daŋ inyi bwo ifiye inyi, ?Many baya iwak iye itawojo hohoi dini? Iramak hohoi kuyya ira iye Kristo. 25Itarraŋ Yesu jihosi ojo, Eramak dwo ni itai bwo ibyaŋata tai iruhoto. Ehanita hun ehanio ni ta afure Monyoŋ itamijaniere ani. 26Ati ibyaŋata tai iruhoto nyo ibyaŋata tai irata akyoro hoŋ. 27Itaniŋye akyoro hoŋ ekyana hoŋ bwo amijak ni isi bwo isi ette ijifuno ani. 28Esyo ni jihosi nesu on osyo’to fur bwo obeŋi adi oyei jyo ’tuŋ. Obeŋ obo atulo ohoru isi to hani hoŋ. 29Monyoŋ al isyarak’to isi jihoŋ ogol inyi agalik daŋ bwo fe obeŋ tulo ohoru isi to hani Monyoŋ. 30Ani iko Monyoŋ era hohoi abotye.

31Inyyahi Yudea huruna amorwoi irwoŋyere inyi. Ojo Yesu jihosi, 32Etahutak ni itai ehanita arryai hun oyiji huno Monyoŋ. ?Ta anani ehani iwahata tai irwoŋyo ani? 33Itarraŋi Yudea jihonyi ojo, Ebeŋ hohoi iye erwoŋyo te ehanita hun oyiji, ati te emorit nyo ira iye atulo ati ijo iye jo, ira iye Hollum. 34Itarraŋ Yesu jihosi, ?Obeŋi igyoroni ifahita hatai, “Ojo Hollum, Irata tai ajohin”? 35Emijak hohoi jo arai nekyanita huno Hollum ahode, bwo iloŋo inyi hya hul ifwotuni ekyanita ajohin. 36Ati onyimu Monye ani ette ifahuna ani ifau. ?Tania aŋai ijatta tai jo amoryo ni al ajo ni jo ani Lonyi Hollum? 37Al abeŋ ni ehanio nehanita huno Monyoŋ, heruhoto ani. 38Ati kuyya ehanio ni isi dwadi ibyaŋata tai ani iruhoto, iruhoto ehanita jo oŋida ifwanna tai mijana bwo fe iduloti etaniŋuta jo, owon Monye itwa hoŋ bwo fe ni itwa Monyoŋ. 39Tania ojori isi enyyak iniafaru inyi ati iris inyi addi to has hosi.

40Ette inyi leten ’laŋan aari Yordano tole jyo amaji inya ibatisyere Yoane ahosyere. Ette inyi itoŋo dia. 41Ofwonni laati arryai jihonyi ette jaran, Obeŋ nya bu nyi Yoane ihan obo etamijani. Ati erre daŋ hunya ikyana inyi ta atulo olo, obisi. 42Teyya ette aati arryai iruk jihonyi.

Currently Selected:

Yoane 10: LOT1969

Highlight

Copy