Ehanita 3
3
Aŋidari ono Oloŋura
1Adahatye nya Petro iko Yoane ihaji imojit eneittok imojori ta asaa hunihoi otto otoryai nyo inyi asaa ono amojo. 2Owon nya obo atulo ol oŋura many t’esiuniere. Oŋitek daŋ iyaŋutai isi inyi ihaji imojit eneittok jyo ekat an ifurani Ilaman, ifiyere agurusi jyo hul ojinani’to dia. 3Igonyu inyi Petro iko Yoane hul ojori ojiŋani ihaji imojit eneittok ette inyi ifiyo isi to obo esyoryo. 4Ette Petro iko Yoane yadari jihonyi ette jaran, Ikemijye jihohoi. 5Otte inyi mijo jihosi ta neyihina ifwotuniere obo ariŋ jihosi. 6Ojo Petro jihonyi, Obeŋi omuk agurusi jihoŋ ati ariŋ on owon’to jihoŋ esyarak adi ni jihoi. Ta afure Yesu olo Nasaret, tadahai. 7Ette Petro inef inyi ta aani iŋet ette itadet ahide. Teyya kwak ette ellohi hejek honyi golon. 8Bwo ollwa inyi ahide ette wotya ette itteryo adaha. Teyya ojiŋari isi ikonyi ihaji imojit eneittok. Olluta inyi ’luta ta adaha honyi itahabuyere Hollum. 9Igonyuni aati daŋ inyi adaha bwo arasa itahuyo Hollum, 10omijani isi jo inyi alya lemimojoni al itoŋotyo’to ikat an ifurani Ilaman, ette isi illilliha bebe ta naŋidari hwan honyi.
Ettittoyo ono Petro Ihaji Imojit Eneittok
11Henef inyi Petro iko Yoane, ette aati daŋ hinya illillihai’to bebe ŋyoron jihosi ihiloŋoni an anya’to eloŋoni ono Solomone. 12Ligonyu Petro nellilliha hosi ette jaran jihosi ojo, Itai laati hulo Israele, ?nyo illillihati tai jyo atulo olo? ?Nyo iyadarata tai jihohoi? ?Ijatta tai ta nadwaran hohoi kuyya bu ta ayiji hohoi adaha atulo olo? 13Hollum olo Abramo iko Isako bwo Yakobo, Hollum olo hohonyok hohoi, inyi alya al itahabu’to apit honyi Yesu, inya isyatta tai jyo Pilato, ittata tai ihara dwadi awak Pilato hohina inyi. 14Ihara nya itai lya ol olibo’to bwo fe obis, ittata igula ta attohoni oŋida ohohini jihatai. 15Bwo ittohoro tai Hobu olo nesu. Ati itubuhu Hollum inyi to ye. Tania era hohoi ahetamijanak honyi. 16Ta neruk ifure honyi itaŋidari atulo olo ihwa igonyuna tai bwo fe imijana. Ahode ahode, ara ta neruk jyo Yesu an isyarak aŋidari jyo atulo olo ihomomite hatai daŋ.
17Ihwania illarak amijak ni jo ihaniete tai on orroho jyo Yesu ta abyaŋan mijana ihwa ihanie eleittaha hatai. 18Ati itahutak nya Hollum te ekyanita huno eyak sayyo jo ittigemye adi lonyimoto honyi. Ihwania itasiruni egyerita. 19Tania iloitoto atajya hatai bwo irwejata jo oŋida eyyata hatai ifufusunie addi ette Hollum isyarana jihatai egigilita aŋejuho. 20Bwo ifahu adi inyi Kristo linya onyimoni jihatai al anya Yesu, 21el itoŋo’to lidou many ottubari asaa an ihuhumierek erre hutta fau. Ihwa ikyana nya Hollum te etuhe huno eyak sayyo hul olibori’to. 22Ojo nya Mose, “Itadetu adi Hollum Hobu eyani sayyo t’ehiji illarak hatai ihwa inya itadetuniere inyi ani. Bwo oŋida itaniŋyete tai daŋ erre hun iramak inyi jihatai. 23Ottohori adi aati daŋ addi hul obeŋi’to itaniŋye jyo eyani sayyo alya.” 24Eyak sayyo hinya ikyanai’to, to oŋitek huno Samwele iko huttehalu honyi, iramye nya isi daŋ oŋitek huna. 25Itai laati hul itaniŋuna’to bwo fe irutana ecorit inya ocorok Hollum jyo hohonyok hatai, iramak nya inyi ahosyere jyo Abramo jo, “To woyo hoi itajahinie adi aati daŋ hutta fau.” 26Onyimu Hollum apit#3:26 apitInyi Yesu Kristo. honyi ette ifahina inyi jihatai ahosyere itirwejere itai daŋ t’eyyata hatai ittata tai nyurana amuno.
Currently Selected:
Ehanita 3: LOT1969
Highlight
Share
Copy
Want to have your highlights saved across all your devices? Sign up or sign in
This text was originally published by the British and Foreign Bible Society in 1969.
