Ehanita 15

Ewwaha ono Lefahat Yerusalem

1Ati ofwonni omuk laati to Yudea ette ittiyenio eruhok jojo, Kuyya ibyaŋata tai ifwotuna aŋoto ihwa ojori emohiti hunya isyo Mose jihohoi, ibyaŋata adi itai iremehina italahuno. 2Itaŋalafye Paulo iko Barnaba isi bebe, tania onyimuni eruhok Paulo iko Barnaba bwo omuk lifwarri Yerusalem jyo lefahat iko eleittaha te eram ana. 3Tania ninya ifahini aati hutto iklesya isi, allaŋi isi afau Fenisia iko Samaria iramaniere laati aŋai iloiti paganohyen atajya hosi ette isi itamuno laati bebe. 4Ninya lafanyi isi Yerusalem arraŋuni aati hutto klesya isi iko lefahat iko eleittaha ette isi iramana isi erre daŋ hun ihanio Hollum tesi. 5Ati omuk eruhok ejifak Farisei odyotoi ette jaran, oŋida dwo paganohyen ifwotuni aŋoto bwo fe ijifatye nefahita huno Mose.

6Ottubanie lefahat iko amarwak iwwahari eram ana. 7Iwwahai isi fur ette Petro dyoto ette jaran jihosi, Illarak hoŋ, imijana tai jo onyimu nya Hollum ani tehiji hatai jo oŋida paganohyen itaniŋuni asayyo hun oyiji’to to hutuk hoŋ bwo fe heteruhohi. 8Bwo fe Hollum ol omijak’to atajya wati daŋ ette isyo Oloyiri ol Olibo jihosi te etamijani ihwa inya isyaraniere inyi jihohoi. 9Bwo fe obeŋ alufaji ihiji hosi ikohoi ati italibo inyi atajya hosi ta neruk. 10Ihwania, ?nyo igigiloti tai ikemyere Hollum iryataniere eyeni imutto heyiyanak en ebeŋ hohoi eremik dihuna iko hohonyok hohoi? 11Ati eruk hohoi jo etalahuno hohoi ihwa isi ta amehino ono Yesu Hobu.

12Attati eluluŋ wati dwa liŋ liŋ ette itaniŋyo jyo Barnaba iko Paulo te eramyo hosi etamijanita iko edwariti hunya ihanio Hollum jyo paganohyen tesi. 13Ninya latuhoni isi ekyana ojo Yakobo, Illarak hoŋ, itaniŋyete jihoŋ. 14Iramak nya hohoi Simone jo aŋai ottu nya Hollum inyimuniere paganohyen ta afure honyi. 15Bwo fe ikiluni nya eyak sayyo eram ana ihwa igyoroni ojori,

16“Ihalu acohuno adi ni

Bwo fe aduhok adi ni aji ono Davide an akwaharo’to.

Enyyak adi ni inyi imaji honyi.

17Oŋida aati hul arasai’to ottifyai Hobu

Bwo paganohyen daŋ hul iloŋuni ta afure hoŋ.

18Ikyana Hobu eram ana bwo itahutak inyi erre huna daŋ many beryen.”

19Tania aŋotok ni jihatai jo, helaha hohoi ettigemyo paganohyen hulo hul iloiti’to atajya hosi ajyo Hollum. 20Ati ijara hohoi egyorok jihosi awaraga jo oŋida isi ihari erre huno ajohin iko huno arrijorihyen hosi bwo erre somon, bwo fe acaŋi hun obuni bun, bwo fe oŋida isi ihari nooto. 21Nyo many beryen owotyai aati imisihi daŋ ittittoyere efahita huno Mose bwo fe ihenie nya isi to buk honyi esabiti daŋ ihasik imojiti.

Awaraga Ninya Igyoroi Isi

22Ihalu igigiloi lefahat iko amarwak bwo eklesya daŋ jo oyyu dwo inyimuniere aati omuk ifahiniere isi Antioka iko Paulo bwo Barnaba. Onyimuni isi Sila iko Yuda al ifurani Barsaba, arai nya isi eleittaha. 23Attati isi ifahina laati iko awaraga on ojo: Hohoi eruhok bwo lefahat iko amarwak efonyo hohoi itai bebe, itai illarak hohoi hul irata’to apaganohyen hutto Antioka, Sirya iko Silisia. 24Etaniŋu hohoi jo owoni omuk laati hul ofwoi t’ehiji hohoi ette ittigemyo atajya hatai te ettiyenita hosi ati ebeŋ hohoi efak isi. 25Tania egigilo hohoi dini arabotye inyimuniere omuk laati ifahiniere jihatai iko Paulo bwo Barnaba hul emuno hohoi bebe. 26Bwo isi laati hul arai aŋerejak bebe te ettittoyo hiram ono Hobu hohoi Yesu Kristo dwadi awahi aati isi ’tohoro. 27Tania efak hohoi Yuda iko Sila iramaniere itai ta ahwattek hosi erre huna. 28Nyo itahutak nya Oloyiri ol Olibo hohoi jo oyyu al ebeŋ hohoi ettigemyo itai to omuk efahita agalihini huna hun ogoli’to. 29Oŋida ibyaŋata tai iŋiyete erre hun ihumarik jyo ajohin kuyya bu nooto iko erre hun obuni bun. Hehaniete bwo fe erre somon. Al ifahati tai efahita huna oyyu adi jihatai. Ogoto daŋ.

30Attati ifahina isi Antioka bwo ottubanie isi dia iko aati hutte klesya ette isi ihyanana awaraga ania jihosi. 31Ninya itaniŋuni isi, itamuni ekyanita huna isi bebe. 32Bwo ikyanai Yuda iko Sila ekyanita omuk jihosi itagolyere atajya hosi nyo arai isi aheyak sayyo. 33Ihalu omuk oŋitek ifahini eruhok isi icahari ta nelik tajya jyo mottyarak hosi. 34Ati awak nya Sila itoŋo dia. 35Ati arasai Paulo iko Barnaba Antioka ittiyeniere nekyana ono Hobu iko laati omuk arryai.

Apyaha ono Paulo iko Barnaba

36Ihalu omuk oŋitek ojo Paulo jyo Barnaba, Waŋ, efwo imijuno illarak hohoi hutto misihi hunya ettiyanak hohoi ekyanita huno Hobu. 37Ati awak nya Barnaba iyaro Yoane al anya’to Marko ikosi. 38Ati igigilo Paulo jo obeŋ oyyu iyari inyi nyo obusak nya inyi isi lifau Pamfilia bwo fe ebeŋ nya inyi adaha ikosi ligyamari. 39Attati isi ŋalafa bebe ette pyaha. Iyaro Barnaba Marko ette fwatan Ciporo ta atogol. 40Bwo Paulo onyimu Sila ette fwatan ta amehino ono Hobu bwo fe omojoi nya illarak hosi tesi. 41Attati isi daha ifau Sirya bwo Silisia litagolyere eklesyahyen daŋ.

Currently Selected:

Ehanita 15: LOT1969

Highlight

Copy