Ehanita 10

Nerwe ono Kornelio

1Imiji Cesarea owon nya obo atulo afure honyi Kornelio bwo fe ara inyi akomodal olo blatun Italya. 2Ara inyi atulo al ifut iko amuno, bwo abaŋi nya hutta haŋ honyi ikonyi daŋ Hollum. Isyarak inyi esyorita arryai ta afure Hollum jyo laati bwo fe omojotyo inyi oŋitek daŋ jyo Hollum. 3Obo oloŋ saa hunihoi otto otoryai oleyo anjelo olo Hollum jihonyi bwo ojo, Kornelio. 4Ayadar inyi jihonyi ta abaŋi on obolo ette jaran, ?Hollum, nyo? Ojo anjelo jo, Afanyi emojiti iko esyorita hoi jyo Hollum ette inyi muno. 5Ihwania ifak omuk laati imiji Jopa iyaŋuniere atulo afure honyi Simone al iloŋoi Petro. 6Amanyai inyi iko obo atulo afure honyi Simone al ara ahegyamani ’yoni. Owon nya aji honyi liger hari. 7Ninya latuhunie nekyanita huna, ette anjelo leten bwo Kornelio ette iloŋuna lomuk egyamak honyi arrihai iko obo olo oseŋer ol omuno’to Hollum. 8Ette inyi iramana isi erre hunia daŋ ette ifahina isi Jopa.

9Nya motye lafanyi isi liger miji, olo Petro ihide haji imojori, ara nya saa ’tomon harrihai. 10Oniama inyi ette itila to obo aŋiyo, ati hetila inyi laati lemak irigya inyi, 11ette igonyuna edou labwanya bwo obo ariŋ ihwa amilaya on obolo isuru teyya an ililyefuni ta arukuni honyi aŋwan. 12Itwa honyi owoni amunok iko aheny bwo awoi caŋi arryai. 13Ati ottu obo ekyana jihonyi on ojo, Petro, otte, abaha obo, oŋiye. 14Ati ojo Petro, Hobu, abeŋ ni aŋiyotyo obo acaŋ on odwa’to jihohoi ’tuŋ. 15Ati ottu nekyana jihonyi enyyahi etarrihi on ojo, Erre hun italibo Hollum ittallik iye jaran jo odwari isi. 16Ihanie nya ariŋ ana enyyahita hunihoi ette inyi inyyaharu lidou.

17Ihwania hegigilo Petro ta awoyo hiram ono arigya ana, teyya kwak attati aati hul ifahu Kornelio ittittifyere aji Simone owotyai ikat haŋ. 18Ifiye isi ojori, ?Owon Petro dinia? 19Bwo Petro arasa igigilo ta arigya honyi ette Oloyiri jaran jihonyi, Imijye, ofwonni aati hunihoi hul ottifyai iye. 20Otte, isuro ifonyere isi. Ifwatta ikosi kwak nyo ani efak isi. 21Attati Petro isuruna jyo laati hulya ette jaran jihosi, Ani olo al ittifyati tai. ?Ifwanna tai inyo? 22Ojori isi, Kornelio, komodal olo oseŋer, ifahu hohoi, bwo ara inyi atulo ol oyyu al abaŋ Hollum bwo omunoi aati hulo Yudea daŋ inyi. Ati iramak anjelo inyi oŋida inyi iloŋu iye ilari lihaji honyi bwo itaniŋyo adi inyi ekyanita hoi. 23Tania iloŋu inyi isi iyiryari ihaji honyi.

Nya motye odyoto Petro ette fwatan ikosi bwo omuk eruhok hulo Jopa ofwoi ikosi. 24Nya motye afanyi isi imiji Cesarea. Itila nya Kornelio isi ette ’tubanio amottyarak honyi iko illarak hul iloŋu Kornelio ihaji honyi. 25Ninya lajiŋak Petro, orwaŋanie inyi iko Kornelio ette Kornelio rigoŋi jihonyi ette itahabuyo inyi. 26Ati itadet Petro inyi ahide ette jaran jihonyi, Otte, ara ni atulo ihwo iye. 27Ette isi jiŋara atwa haji bwo harasai ikyana ette nyurana aati arryai dia. 28Ojo Petro jihosi, imijana tai jo odwa jihohoi Yudea irryahari kuyya ibalari iko aati hul arai paganohyen. Ati itahutak Hollum ani ojo oŋida abeŋ ni eloŋ obo atulo jo orroho kuyya bu etafyahajo. 29Tania al iloŋo iye ani attu ni, abeŋ ni eha, bwo efiyo ni iye, ?ta anyo iloŋu iye ani?

30Ojo Kornelio, Ihwania allaŋi oŋitek aŋwan inya amojori ni to saa hunihoi, bwo teyya owotya obo atulo lihosyere hoŋ al iyyafak aboŋo on opipyak. 31Ojo inyi jihoŋ, Kornelio, itaniŋu Hollum namojo hoi bwo ogotyere inyi esyorita hoi ta afure honyi. 32Tania ifak obo imiji Jopa liloŋuniere lobo latulo afure honyi Simone al ifurani bwo fe Petro. Itoŋo inyi ihaji Simone al ara ahegyamani ’yoni. Owon aji honyi iger hari eneittok. 33Tania efak ni aati jihoi kwak bwo imehino nya iye jihohoi ette ’tuna dini. Ettubanio hohoi ihwania ihosyere Hollum itaniŋuniere erre hun ifak Hobu jihoi ikyanari.

Ettiyenio ono Petro

34Itteryo Petro ikyana ette jaran, Ahode egonyu ni jo obeŋ alufaji wati tohosyere Hollum. 35Ati jyo afauhyen daŋ al abaŋ obo inyi bwo odulo ehanio on oyyu ifwotu adi Hollum inyi. 36Imijana bu itai ekyana ninya ifak inyi jyo aati Israele ette ittittoyo asayyo hun oyiji jihosi jo, ottu ihwania nelik tajya ta neruk jyo Yesu Kristo nyo ara inyi Hobu olo aati daŋ. 37Asayyo huna hunya ittittoyerek lifau Yudea daŋ itteryo inyi ifau Galilea al ittittoyo Yoane awoyo hiram ono batisimo honyi. 38Bwo ihalu isyo Hollum Yesu olo Nasaret Oloyiri ol Olibo iko adwaran ette inyi dahatyo imisihi ihaniere ayiji bwo itaŋidaryere hul ifitak ajok nyo irrirrya Hollum inyi. 39Bwo era hohoi ahetamijanak hulo erre daŋ hunya ihanio inyi ifau Yudea bwo fe imiji Yerusalem. Attati isi isihonia inyi ikruce. 40Ihalu oŋitek hunihoi, itubuhu Hollum inyi italeyehiniere jihohoi. 41Obeŋ nya inyi oleyo jyo aati daŋ ati jihohoi hul onyimu Hollum ahetamijanak, bwo lihalu ibuhuna honyi eŋiyo nya hohoi bwo fe emata ikonyi. 42Ati ifak inyi hohoi iramaniere aati bwo fe iko itamijananiere jo inyi fe Yesu alya al ihanak Hollum ahaŋotoni hiram heswok iko layak. 43Bwo fe inyi alya al itamijananierek eyak sayyo daŋ jyo aati ababo jojo, Al iruk’to jihonyi ifwotu adi inyi ahohina ono eyyata ta afure honyi.

44Hekyana Petro neram ana ette Oloyiri ol Olibo isuruna jyo hulya daŋ hinya itaniŋye’to ekyana honyi ania. 45Bwo illillihai eruhok hyodwo ofwonni’to iko Petro nyo isyarani esyoryo ono Oloyiri ol Olibo jyo hya dwadi arai isi apaganohyen. 46Nyo itaniŋuni isi laati hya ikyanai te ekyanita omuk hun olufaji itahabuyere Hollum. Tania ojo Petro, 47?Iyimo obo atulo aari ibatisyere aati hulo hul ifwotuni Oloyiri ol Olibo ihwa efwotu nya hohoi? 48Ette inyi ifahina isi ifwotuniere batisimo ta afure ono Yesu Kristo. Bwo ifiye isi inyi itoŋori ikosi to omuk oŋitek.

Currently Selected:

Ehanita 10: LOT1969

Highlight

Copy