Mpitsara 3
3
1Ireo firenen-kafa ireo moa no navelan’ny TOMPO haharitra teo amin’ny tany dia mba hizahany toetra ny Israelita rehetra izay tsy mbola nandray anjara tamin’ny ady nahazoana an’i Kanahàna; 2tian’ny Tompo mba hianatra hiady manko ny taranaka vaovao izay tsy mbola nahalala ady. 3Koa ireto avy àry ireo firenen-kafa ireo: ny mponina tamin’ny fanjakana dimin’ny Filistinina, ny Kanahanita rehetra, ny Tsidônianina, ary ny Hivita izay nipetraka tany amin’ny tendrombohitra Libano, manomboka hatreo an-tendrombohitra Bahala-Hermôna ka hatrany Lebô-Hamata. 4Ireo no nizahan’ny TOMPO toetra ny Israelita mba hahafantarany na hankatò ny didy izay nomeny ny razany tamin’ny alalan’i Mosesy izy na tsia. 5Toy izany no nahatonga ny Israelita honina teo anivon’ny Kanahanita sy ny Hetita ary ny Amôrita mbamin’ny Perizita sy ny Hivita ary ny Jebosita. 6Ary naka ny zanakavavin’ireny ho vadiny izy sady nanome ny zanany vavy ho vadin’ny zanakalahin’ireny, ka nanompo ny andriamani-tsiizy nifikirany.
IREO MPITSARA
I Hôtniela
7Ary nanao izay ratsy eo imason’ny TOMPO ny Israelita fa nanadino ny TOMPO Andriamaniny ka nanompo ireo Bahala sy ireo Aserà#3.7 Aserà dia andriamani-bavy kanahanita izay ampiarahin’ny Baiboly matetika koa amin’i Bahala. Amin’ny toeram-pivavahana fanompoan-tsampy dia tsatokazo mariky ny fahavokarana no anehoana azy.. 8Dia nirehi-pahatezerana tamin’ny Israelita ny TOMPO ka nanolotra azy teo an-tanan’i Kosàna-Risehataîma, mpanjakan’i Mezôpôtamia; ary nandritra ny valo taona no nanompoany azy. 9Koa niantso vonjy tamin’ny TOMPO ny Israelita; ary IZY nanangana mpamonjy izay hanafaka ny Israelita, dia i Hôtniela, zanakalahin’i Kenaza izay zandrin’i Kaleba. 10Dia nitoetra tao aminy ny Fanahin’ny TOMPO, ka nitondra ny Israelita izy. Ary niainga hiady i Hôtniela; dia natolotry ny TOMPO teo an-tanany i Kosàna-Risehataîma mpanjakan’i Mezôpôtamia ka resiny. 11Dia nandry fahalemana ny tany nandritra ny efapolo taona; avy eo dia maty i Hôtniela, zanakalahin’i Kenaza.
I Ehoda
12Ary nanao izay ratsy eo imason’ny TOMPO indray ny Israelita. Noho izany dia nampirisihin’ny TOMPO hamely azy i Heglôna, mpanjakan’i Môaba#3.12 Môaba: jereo Gen 19.37 sy nta. Ny fanjakana môabita, izay niorina tamin’ny taonjato faha-13 tal J.K., dia nitatra hatrany Jerikao tamin’ny andron’i Ehoda.. 13Ary i Heglôna nivondrona tamin’ny Hamônita sy ny Hamalekita#3.13 Hamônita: jereo Gen 19.38 sy nta. Hamalekita: jereo Eks 17.8 sy nta. Tamin’ny andron’ireo Mpitsara, dia ny Hamalekita no tena fahavalon’ireo foko israelita (jereo 6.3,33; 7.12; 10.12). ka nandeha nanafika ny Israelita, ary nahazo ny tanàna Jerikao. 14Dia nanompo an’i Heglôna, mpanjakan’i Môaba, ny Israelita nandritra ny 18 taona. 15Niantso vonjy tamin’ny TOMPO ny Israelita ka nanirahany mpamonjy, dia i Ehoda, lehilahy kavia, izay zanak’i Gerà avy amin’ny fokon’i Benjamîna.
Dia nalefan’ny Israelita i Ehoda mba hitondra fanomezana ho an’i Heglôna, mpanjakan’i Môaba. 16Ary nanamboatra sabatra maranitra roa lela i Ehoda, dia sabatra ankevitry ny antsasa-metatra izay nafeniny tao anaty akanjony nanolotra ny feny ankavanana. 17Dia nandeha izy nanatitra fanomezana ho an’i Heglôna izay lehilahy matavibe. 18Ary rehefa vitany ny fanolorana ny fanomezana ho an’i Heglôna, dia lasa izy niara-nody tamin’ireo vahoaka nitondra ny fanomezana. 19Kanjo nony efa tonga teo akaikin’ny tsangambaton-tsampy tao Gilgala#3.19 Gilgala: jereo Jos 4.19 sy nta. i Ehoda, dia niverina ka nilaza tamin’i Heglôna hoe:
–Misy hafatra miafina holazaiko aminao, ry mpanjaka ô.
Dia nandidy ny mpanompony teo ny mpanjaka mba hamela azy mitokana; koa nivoaka ny trano izy rehetra. 20Ny mpanjaka tamin’izay dia nipetraka tao amin’ny efitrano fihatsiatsiahana izay natokana ho azy teo an-tampontrano. Ary nanatona azy i Ehoda ka nanao hoe:
–Misy teny avy amin’Andriamanitra nentiko ho anao.
Dia nitsangana niala teo amin’ny sezany ny mpanjaka. 21Ary nalain’i Ehoda tamin’ny tanany havia ilay sabatra nanolotra ny feny ankavanana, ka natsatony tamin’ny kibon’i Heglôna. 22Difotra mbamin’ny zarany sady voasaron’ny tavin’ity mpanjaka ny lelan-tsabatra, satria tsy notsoahin’i Ehoda teo amin’ny kibony. 23Taorian’izany, rehefa avy nandrindrina sy nanidy ny varavaran’ilay efitrano i Ehoda, dia nivoaka avy teo am-baravarankely. 24Ary nony tafavoaka izy, dia tonga ireo mpanompon’ny mpanjaka izay nahita fa mihidy ny efitrano fihatsiatsiahana; koa noheveriny fa mbola miavela ao ny mpanjaka. 25Niandry teo ivelany izy ireo ambara-pahavelon’ahiahy azy, kinanjo tsy mbola nisy namoha ihany ny varavarana. Dia naka ny fanalahidy ireo ka namoha ny trano, ary indro ny tompony maty mitsitra eo amin’ny tany. 26Fa raha mbola variana tao ireo, dia efa nitsoaka i Ehoda, ka efa tafahoatra ny tsangambaton-tsampy ary nandositra tany Sehirà#3.26 Sehirà: faritra izay toa eo avaratr’i Jerikao no azo ametrahana azy.. 27Vao tonga tany Sehirà izy; dia nitsoka trompetra teny amin’ny faritra be tendrombohitra any Efraîma#3.27 Ny faritra be tendrombohitra any Efraîma dia eo avaratr’i Jerosalema. hamory ny Israelita; avy teo izy dia nitarika ireo Israelita ireo ka niara-nidina taminy avy teny an-tendrombohitra 28sady nanainga azy hoe:
–Manaraha ahy fa efa natolotry ny TOMPO eo an-tanantsika ny Môabita fahavalontsika.
Dia nanaraka an’i Ehoda ireo, ka nandeha nibahana ny toerana fitàna ny ony Jôrdàna, ary tsy nisy Môabita navelany hita na iray aza. 29Tamin’izay andro izay dia Môabita sahabo ho andiany folo no matiny, dia vatan-dehilahy tomady sy mahery fo avokoa; ka tsy nisy afa-nitsoaka ireny na iray aza. 30Tamin’izany andro izany dia nietry teo ambany fahefàn’ny Israelita ny Môabita; ka nandry fahalemana ny tany nandritra ny valopolo taona.
I Samgary
31Ary i Samgary, zanakalahin’i Hanata, no nandimby an’i Ehoda. Nahafaty ny Filistinina eninjato lahy tamin’ny fanindronan’omby#3.31 izay fampiasa handroahana omby, dia tehina nasiana vy maranitra teo an-tendrony. izy, ka nanafaka ny Israelita ihany koa.
Currently Selected:
Mpitsara 3: DIEMDC
Highlight
Share
Copy
Want to have your highlights saved across all your devices? Sign up or sign in
Dikanteny Iombonana Eto Madagasikara © Malagasy Bible Society, 2004.
