2 Tantara 36
36
Ny nanjakàn’i Jôahaza sy i Jôiakima ary i Jôiakîna
(Jereo 2 Mp 23.30–24.17)
1Nalain’ny mponin’i Joda kosa i Jôahaza zanakalahin’i Jôsià ka nataony mpanjaka tao Jerosalema handimby an-drainy. 2Feno 23 taona i Jôahaza fony tonga mpanjaka; ary telo volana ihany no nanjakany tao Jerosalema. 3Teo koa izy no nesorin’i Nekao, mpanjakan’i Ejipta; ary nampandoavin’io Farao io sazy volafotsy sy volamena samy telo taonina ny fanjakan’i Joda. 4Dia i Eliakima rahalahin’i Jôahaza no nataony mpanjaka tamin’i Joda sy i Jerosalema, ary novany anarana hoe Jôiakima; fa i Jôahaza rahalahiny kosa nalain’i Nekao ka nentiny ho any Ejipta#36.4 Jereo Jer 22.11-12..
5Feno 25 taona i Jôiakima#36.5 Jereo Jer 22.18-19; 26.1-6; 35.1-19. fony tonga mpanjaka; ary naharitra 11 taona no nanjakany tao Jerosalema. Nanao izay ratsy eo imason’ny TOMPO Andriamaniny izy. 6Ary i Nebokadnetsara, mpanjakan’i Babilôna, no niakatra namely azy ka namatotra azy tamin’ny gadra varahina mba hitondrany azy ho any Babilôna#36.6 Jereo Jer 25.1-38; 36.1-32; 45.1-15; Dan 1.1-2.. 7Ny fanaka sasany tao an-tranon’ny TOMPO dia nentin’i Nebokadnetsara ho any Babilôna koa ka nataony tao amin’ny lapany tany Babilôna.
8Ny sisa amin’ny tantaran’i Jôiakima ary koa ny fanompoam-tsampy maharikoriko nataony sy ny zavatra hafa rehetra nanjo azy dia voasoratra ao amin’ny Bokin’ireo mpanjakan’i Israely sy i Joda#36.8 Jereo 16.11 sy nta.. Ary i Jôiakîna zanany lahy no nanjaka nandimby azy.
9Feno 18 taona#36.9 18 taona: araka ny 2 Mp 24.8 ary koa ny stf sasany ahitana ny dkt tranainy grika momba ity 2 Tan ity. Nandingana voambolana angamba ilay kôpista teo am-pandikana ka nahatonga ny RM hanao hoe valo taona. i Jôiakîna, fony tonga mpanjaka; ary telo volana sy folo andro ihany no nanjakany tao Jerosalema, sady nanao izay ratsy eo imason’ny TOMPO izy. 10Nony tonga ny lohataona, dia nandefa iraka i Nebokadnetsara ka nitondra an’i Jôiakîna mbamin’ny fanaka sarobidy tao an-tranon’ny TOMPO ho any Babilôna#36.10 Jôiakima... any Babilôna: jereo Jer 22.24-30; 24.1-10; 29.1-2; Ezek 17.12.; dia i Tsedekià#36.10 I Tsedekià dia rahalahin’i Jôiakima, na rahalahin-drain’i Jôiakima: jereo 2 Mp 24.17; jereo koa Jer 37.1; sy Ezek 17.13. rahalahin-drain’i Jôiakîna no nampanjakain’i Nebokadnetsara tamin’i Joda sy i Jerosalema.
Ny nanjakàn’i Tsedekià. Fakana an’i Jerosalema
(Jereo 2 Mp 24.18–25.21; Jer 39.1-10; 52.1-27)
11Feno 21 taona i Tsedekià#36.11 Jereo Jer 27–28. fony tonga mpanjaka; ary naharitra iraika ambin’ny folo taona no nanjakany tao Jerosalema. 12Nanao izay ratsy eo imason’ny TOMPO Andriamaniny izy, ary tsy mba niaiky heloka teo anatrehan’i Jeremià mpaminany, izay nilaza hafatra avy amin’ny TOMPO. 13Nikomiany aza i Nebokadnetsara mpanjaka izay efa nampianiana azy tamin’Andriamanitra#36.13 Jereo Ezek 17.15.. Nanamafy hatoka sy fo izy mba tsy hiverenany amin’ny TOMPO Andriamanitr’i Israely. 14Ny lohandoha-mpisorona sy ny loholom-bahoaka rehetra koa dia naniratsira an’Andriamanitra araka ny fanompoan-tsampy maharikoriko fanaon’ny hafa firenena, ka nandoto ny tempoly izay efa natokan’ny TOMPO ho Azy tao Jerosalema. 15Kanefa ny TOMPO Andriamanitry ny razany dia nangoraka ilay vahoakany sy ilay fonena-masiny, ka nampitondra teny ireo iraka izay nalefany matetika ho any amin’ny olony. 16Saingy nihomehezan’ny vahoaka ireo irak’Andriamanitra sady nozimbazimbainy ny teniny; noesoesoiny ny mpaminaniny mandra-pihatry ny fahatezeran’ny TOMPO taminy ka tsy nisy fanafany intsony. 17Ny mpanjakan’ny Babilônianina no nentin’ny Tompo namely ny vahoakany#36.17 Jereo Jer 21.1-10; 34.1-5. sy namono nahafaty ny miaramilany tamin’ny sabatra hatrany an-tempoliny mihitsy aza, ka tsy nisy olona nangorahan’io mpanjaka io, na tovolahy na tovovavy na ny olon-dehibe na ny antitra; eny, natolotr’Andriamanitra teo an-tanan’i Nebokadnetsara avokoa ny zava-drehetra. 18Nalain’io mpanjaka io ny fanaka rehetra tao an-tranon’Andriamanitra, na ny vaventy na ny madinika, mbamin’ny zava-tsarobidy tao an-tranon’ny TOMPO ary ny zava-tsarobidin’ny mpanjaka sy ireo manampahefana; ka ireny rehetra ireny dia nentiny nankany Babilôna. 19Nodoran’ny Babilônianina koa ny tranon’Andriamanitra, ary noravany ny mandan’i Jerosalema; notselarany afo ny lapa rehetra ary nosimbany ny fanaka sarobidy isan-karazany tao an-tanàna#36.19 Jereo 1 Mp 9.8.. 20Ny olona sisa tsy matin-tsabatra dia nentin’i Nebokadnetsara ho babo tany Babilôna, ka tonga nanompo azy sy ny zanany ireny mandra-piavin’ny fanjakàn’i Persia. 21Izany no nahatanterahan’ny teny nampilazain’ny TOMPO an’i Jeremià hoe: «Ity tany ity dia hilaozana mandritra ny fitopolo taona, mandra-pahatapitra ny fe-potoana tokony hitsaharany mba ho onitry ny andro fitsaharana rehetra izay tsy voatandrina#36.21 Tao Israely, araka ny Lev 25.1-7, dia tokony navela hiala sasatra iray taona isaky ny fito taona ny tany; kanefa tsy notandroina tsara izany lalàna izany. Ity lazaina fa tenin’i Jeremià ity dia fanambàrana ampahany avy amin’ny Lev 26.34-35 sy ampahany avy amin’ny Jer 25.11..»
Navelan’i Kirôsa haorina indray ny tempoly
22Tamin’ny taona voalohany#36.22 Ny and roa farany eto amin’ny 2 Tan dia hita indray any amin’ny fiantombohan’ny bokin’i Hezrà (1.1-3); jereo ny naoty tandrifin’izany. nanjakàn’i Kirôsa, amperôran’i Persia, no tanteraka ny teny nampilazain’ny TOMPO an’i Jeremià mpaminany. Nanaitra fanahy an’i Kirôsa manko tamin’izay ny TOMPO, ka nahatonga azy hampiely an-kabary sy an-tsoratra eran’ny fanjakàny manontolo ireto hafatra ireto: 23«Izao no lazain’i Kirôsa amperôran’i Persia: Ny TOMPO Andriamanitry ny lanitra dia efa nanome ahy ny fanjakana rehetra ambonin’ny tany ary efa nandidy ahy hanorina tempoly ho Azy any Jerosalema, izay ao amin’ny tanin’i Joda. Koa aoka ianareo rehetra izay anisan’ny vahoakan’ny TOMPO mba hiakatra any Jerosalema! Hiaraka aminareo anie ilay TOMPO Andriamanitrareo!»
Currently Selected:
2 Tantara 36: DIEMDC
Highlight
Share
Copy
Want to have your highlights saved across all your devices? Sign up or sign in
Dikanteny Iombonana Eto Madagasikara © Malagasy Bible Society, 2004.
