2 Tantara 31
31
Ny nandaminan’i Hezekià ny fanompoam-pivavahana
1Nony vita izany rehetra izany, dia niainga nankany amin’ireo tanàna jodeanina ny Israelita tsy an-kanavaka izay teo ka nanamontsamontsana ny tsangambaton-tsampy sy nikapa ny tsatokazo fanajana an’i Aserà ary nandrava ny toeram-panasinana sy alitara fanompoan-tsampy eran’i Joda sy i Benjamîna ary koa tamin’ny foko efraimita sy manasita ambara-paharavany azy rehetra. Taorian’izay dia samy nody ho any amin’ny taniny sy ny tanànany avy izy rehetra.
2Najoron’i Hezekià indray ny antokon’ny mpisorona sy ny levita; ary ankoatra ny fitsinjarana azy araka ny antokony, dia teo koa ny fitsinjarana azy araka ny fanompoany avy. Tao anatin’ireo kianjan’ny tranon’ny TOMPO manko dia nisy mpisorona sy levita nisahana ny sorona dorana manontolo, nisy nisahana ny sorom-pihavanana, ary nisy nisahana ny fanompoam-pivavahana isaorana sy iderana ny Tompo. 3Ny zavatra hatao sorona dorana manontolo dia nomen’ny mpanjaka avy tamin’ny fananany, na ny fanolotra marain-tsy hariva izany na ny fanolotra isan-tsabata sy amin’ny voaloham-bolana ary amin’ny fankalazana hafa, araka ny voasoratra ao amin’ny lalànan’ny TOMPO#31.3 Momba ny sorona, jereo Nom 28–29; momba ny fandraisana anjara ataon’ny mpanjaka, jereo Ezek 45.22-24..
4Ny olona izay nonina tao Jerosalema dia nasain’i Hezekià nanome ny anjaran’ireo mpisorona sy levita mba hifikirany mafy amin’ny fombam-pivavahana naraikitry ny TOMPO. 5Ary nony niely izany teny izany, dia nitondra voaloham-bokatra betsaka ny Israelita: dia vary sy divay, menaka sy tantely mbamin’ny vokatry ny tany isan-karazany; ary ny fahafolon-karena tamin’ny zavatra rehetra dia betsaka koa no nentiny#31.5 And 4-5: jereo Nom 18.12-13.21.. 6Ny mponin’ireo tanànan’i Joda, na Israelita tavaratra na Jodeanina, dia nitondra koa ny fahafolon-karena tamin’ny omby sy ondry aman’osy ary ny fahafolon-karena tamin’ny vokatry ny tany isan-karazany; nentiny avokoa ny zavatra voatokana ho an’ny TOMPO ary navosany nitsitokotoko maro ireny. 7Tamin’ny volana fahatelo no nanombohana nanao izany ary tamin’ny volana fahafito no nahavitana azy#31.7 volana fahatelo: may-jona; volana fahafito: septambra-ôktôbra.. 8Nony tonga hijery ireo zavatra niavosa ireo i Hezekià sy ny manampahefana, dia nisaotra ny TOMPO sy ilay Israely vahoakany.
9Dia nanontanian’i Hezekià ny mpisorona sy ny levita momba ireo zavatra niavosa ireo. 10Ka i Hazarià mpisorombe, anisan’ny taranak’i Tsadôka, no namaly azy hoe:
–Hatramin’ny niandohan’ny fitondran’ny olona ampaham-bokatra an-tranon’ny TOMPO, dia nanana hanin-kahavoky izahay, sady be koa ny ambiny tavela satria ny TOMPO efa nitahy ny vahoakany. Ireo navelanay mivangongo ireo ny ambiny.
11Dia efitrano fitahirizan-javatra no nasain’i Hezekià namboarina tao an-tranon’ny TOMPO; ka rehefa voavoatra izany, 12dia hatrany hatrany no nampidirana ny ampaham-bokatra sy ny fahafolon-karena ary ny zavatra hafa natokana ho an’ny Tompo. Ilay levita atao hoe Kônanià no mpiandraikitra ireny, ary i Simehỳ rahalahiny no mpanampy azy. 13Ny tonian’ireny kosa dia i Jehiela sy i Hazazià, i Nahata sy i Hasahela, i Jeremôta sy i Jôzabada, i Eliela sy i Jismahià ary i Mahata sy i Benaià; teo ambany fifehezan’i Kônanià sy i Simehỳ mirahalahy izy ireo, araka ny didin’i Hezekià mpanjaka sy i Hazarià mpiandraikitra ny tranon’Andriamanitra. 14Ilay levita atao hoe Kôrà, zanakalahin’i Jimnà sady mpiandry ny varavarana atsinanana, no nisahana ny fanati-tsitrapo ho an’Andriamanitra ary nizara ny zavatra navahana ho an’ny TOMPO sy ny zava-masina indrindra. 15Teo ambany fifehezan’i Korà hatrany hatrany kosa ry i Hedena sy i Miniamîna, i Jesoa sy i Semahià ary i Amarià sy i Sekanià izay tany amin’ireo tanànan’ny mpisorona#31.15 tanànan’ny mpisorona (antsoina koa hoe tanàna levitika) jereo Nom 35.1-8; Jos 21.1-42.. Ary adidin’izy enin-dahy ny hizara sakafo ho an’ireo mpiombona asa aminy, na ny lehibe na ny kely, 16isaky ny lehilahy voasoratra hatramin’ny zazalahy feno telo taona no ho miakatra; ankoatra ireo, dia mahazo zavatra manokana isan’andro koa izay mpisorona sy levita rehetra miditra ao an-tranon’ny TOMPO mba hanao fanompoana amin’ny anjara raharahany araka ny antokony avy. 17Ny fanoratana ny mpisorona moa dia natao araka ny fianakaviany avy; fa ny levita kosa, hatramin’ny roapolo taona no ho miakatra, dia nosoratana araka ny anjara raharahany sy araka ny antokony avy. 18Fisoratana nahafaoka ny ankohonany rehetra izany, dia ny vadiny sy ny zanany lahy na vavy ary ny olona rehetra vory ao aminy, rehefa nanao ny fidiovan-tena hatrany hatrany ny besinimaro. 19Ho an’ny mpisorona, taranak’i Aharôna, izay teny amin’ny tany manodidina ny tanànany, dia nisy olona voatonona anarana isan-tanàna mba hanome anjara ny lehilahy rehetra ary koa hanome anjara ny levita rehetra izay voasoratra.
20Toy izany no nataon’i Hezekià manerana an’i Joda; ka nanao izay tsara sy mety izy, dia izay hitsiny teo anatrehan’ny TOMPO Andriamaniny. 21Fony nirotsaka tamin’ny asa rehetra momba ny fanompoana ny tranon’Andriamanitra ary momba ny lalànany sy ny didiny izy, dia nitady an’Andriamanitra tamin’ny fony manontolo; ka izany no nahazoany fanambinana.
Currently Selected:
2 Tantara 31: DIEMDC
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Dikanteny Iombonana Eto Madagasikara © Malagasy Bible Society, 2004.