Maciu 2
2
Ni sa sucu ko Jisu, sa lako mai cake e so na tamata vuku me ra soro vua; a sa kidroa ko Eroti, kei ira kecega na kai Jerusalemi; a sa vereti Jisu ko Eroti me vakamatea, 1-12. Sa drotaki rau na veitinani ki Ijipita ko Josefa, a sa mokuti ira na gonetagane lalai ko Eroti, 13-18. Sa qai mate ko Eroti, a sa lesu tale ki Jutia ko Josefa kei rau na veitinani, 19-23.
1IA ni sa sucu ko Jisu mai Pecileema e Jutia e na gauna sa tui kina ko Eroti, raica, e so na tamata vuku mai cake era sa lako mai ki Jerusalemi, 2a ra sa kaya, Evei ko koya sa sucu me nodra tui na kai Jutia? ni keitou a raica na nona kalokalo mai cake, a keitou sa lako mai me soro vua. 3Ia ni sa rogoca ko Eroti na tui, sa kidroa, kei Jerusalemi taucoko vata kaya: 4ia ni sa vakasoqoni ira vata kecega na bete levu kei ira na nodra vu-ni-vola na tamata, sa tarogi ira ko koya se na sucu evei ko Karisito. 5A ra sa kaya vua, Mai Pecileema e Jutia: ni sa vola vakaoqo na parofita, 6Ia ko iko Pecileema, e na vanua ko Juta, o sa sega ni lailai sara vei ira na veiyasana e Juta: ni na tubu maivei iko e dua na Turaga, o koya ena lewai ira na noqu tamata na Isireli.
7Ia ko Eroti, ni sa kacivi ira lo na tamata vuku, sa qai taroga matua vei ira na gauna sa rairai kina na kalokalo. 8A sa talai ira ki Pecileema, ka kaya, Dou laʼki vakasaqara matua sara na gone lailai; ia ni dou sa kunea, tukuna mai vei au, meʼu laʼki cuva talega vua koi au. 9Ia ni ra sa rogoca na tui, era sa lako; ka raica, na kalokalo era a raica mai cake, sa liutaki ira, a sa laʼki tu vakadua, ni sa donuya na tikina sa koto kina na gone lailai. 10Ia ni ra sa raica na kalokalo, era sa reki e na reki levu sara. 11Ia ni ra sa curu ki na vale, era sa raica na gone lailai kei Meri na tinana, a ra sa cuva sobu, ka soro vua: ia ni ra sa dolava na nodra kato kamunaga, era sa vakacabora vua e so nai solisoli; a koula, kei na drega me vakamai, kei na mura. 12Ia ni sa vakasala vei ira e na tadra ko na Kalou me ra kakua ni lako tale vei Eroti, era sa lesu tale ki na nodra vanua e na sala tani.
13Ia ni ra sa lako tani, raica, sa rairai mai vei Josefa e na tadra e dua na agilose ni Turaga, ka kaya, Tu cake, mo kauta na gone lailai kei tinana, ka dro ki Ijipita, ka tiko kina ka malua meʼu tukuna mada vei iko; ni na vakasaqara na gone lailai ko Eroti me vakamatea. 14Sa qai tu cake ko koya, ka kauta na gone lailai kei tinana e na bogi, ka lako ki Ijipita: 15a sa tiko kina ka malua me mate mada ko Eroti: me vakayacori kina na vosa ni Turaga a ya sa tukuna na parofita, ka kaya, Au a kaciva na luyequ mai Ijipita.
16Ia ko Eroti, ni sa kunea ni ra a vakaisini koya ko ira na tamata vuku, sa cudru vakalevu kina, a sa talaki yani, me vakamatei ira kecega na gonetagane lalai era sa tiko mai Pecileema, kei na kena yasana kecega, o ira era yabaki rua kei ira era lailai sobu, me vaka na gauna ka taroga matua ko koya vei ira na tamata vuku. 17Sa qai vakayacori na ka sa vosataka ko Yirimia na parofita, ka kaya, 18E dua na domo sa rorogo mai Rama, a qoqolou, kei na tagi, kei na somate levu, sa tagicaki ira na luvena ko Rejeli, a sa sega ni via vakacegui, ni ra sa yali.
19Ia ni sa mate ko Eroti, raica, e dua na agilose ni Turaga sa rairai vei Josefa mai Ijipita e na tadra, 20ka kaya, Tu cake, mo kauta na gone lailai kei tinana, ka lako ki na vanua nei Isireli: ni ra sa mate ko ira sa vakasaqara na gone lailai me ra vakamatea. 21A sa tu cake ko koya, ka kauta na gone lailai kei tinana, a sa lako mai ki na vanua nei Isireli. 22Ia ni sa rogoca ni sa tui mai Jutia ko Arikeleo nai sosomi kei tamana ko Eroti, sa rere ni lako kina: ia ni sa vakasala vua ko na Kalou e na tadra, sa lesu kina ko koya ki na yasayasa vaka-Kalili: 23a sa laʼki tiko vakadua mai na koro na yacana ko Nasareci, a sa vakayacori kina na ka era sa vosataka ko ira na parofita, Ena vakatokai ko koya, E dua sa vaka na kai Nasareci.
Currently Selected:
Maciu 2: FIJ1864
Highlight
Share
Copy
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
