Luke 6

Sa vunauci ira na Farisi ko Jisu ni ra sa tawa kila nai balebale ni siga ni vakacecegu, 1-11. Sa lesi iratou na tinikarua, ka vakavulici iratou, 13-49.

1A SA yaco e nai matai ni siga ni vakacecegu sa muria nai karua ni siga ni solevu, sa lako ko koya e loma ni veiwere ni sila; a ra sa vetia na veisola ni sila na nona tisaipeli, ka kania, a ra sa qilia e na ligadra. 2Ia ka so vei ira na Farisi sa kaya vei ira, A cava dou sa kitaka kina na ka e sega ni tara me caka e na siga ni vakacecegu? 3A sa vosa ko Jisu, ka kaya vei ira, Dou sa sega beka ni wilika na ka o qori, a ka sa kitaka ko Tavita, ni sa viakana, o koya kei ira sa tiko vata kaya: 4Ni sa curu ko koya ki na vale ni Kalou, ka taura ka kania na madrai dauraici, ka solia talega vei ira era sa tiko vata kaya: o qori sa sega ni tara me kani, vei ira duaduaga na bete? 5A sa kaya ko koya vei ira, Sa Turaga talega ni siga ni vakacecegu na Luve ni tamata.

6A sa yaco e na dua tani tale na siga ni vakacecegu, sa curu ko koya ki na vale ni lotu, ka vakatavuvuli: a sa tiko kina e dua na tamata sa malai na ligana i matau. 7A ra sa vakaraici koya ko ira na vu-ni-vola kei ira na Farisi, se na ia na veivakabulai e na siga ni vakacecegu, se segai; a ya me ra kunea na ka me beitaki koya kina. 8Ia ka sa kila na nodra nanuma ko koya, ka kaya vua na tamata sa malai na ligana, Tu cake, ka wavu tu e na kedra maliwa. A sa tu cake ko koya, ka wavu tu. 9Sa qai kaya vei ira ko Jisu, Au na tarogi kemudou e na dua na ka: Sa tara beka me cakava na ka vinaka e na siga ni vakacecegu, se na ka ca? me ia na veivakabulai, se na veivakamatei? 10Ia ni sa rai vakavolivolita vei ira kecega ko koya, sa kaya vua na tamata, Dodoka mai na ligamu. A sa kitaka vakakina: a sa vakabulai na ligana, a sa vaka na kenai kadua. 11A ra sa sinai e na cudru; a ra sa veivosaki vakai ira, se cava me ra kitaka vei Jisu.

12A sa yaco e na gauna ko ya, sa lako ko koya ki na ulu-ni-vanua me masu, a sa masu tiko ki na Kalou e na bogi ka sigavaka.

13Ia ni sa siga mai, sa kacivi ira na nona tisaipeli: a sa digitaki iratou e lewe tinikarua maivei ira, a sa vakatokai iratou mei apositolo: 14O Saimoni, (o koya sa vakayacana talega ko koya mei Petero,) kei Adriu na tacina, o Jemesi kei Joni, o Filipo kei Paricolomiu, 15o Maciu kei Tomasi, o Jemesi na luve i Alifio, kei Saimoni sa vakatokai Na gumatua, 16o Juta na taci i Jemesi, kei Juta Isikarioti, o koya sa solia yani.

17A sa lako vata sobu kei iratou ko koya, ka tu e na buca, kei ira na nona tisaipeli era sa lewe vuqa, kei na tamata era sa lewe vuqa sara mai Jutia taucoko kei Jerusalemi, kei na baravi kei Teiri kei Saitoni, era sa lako mai me ra rogoci koya, me ra vakabulai talega mai na nodra mate; 18kei ira talega sa vakacacani ira na yalo tawa-savasava e so; a ra sa vakabulai. 19A ra sa vakatovolea kecega na lewe vuqa me ra tarai koya: ni sa lako tani maivei koya na kaukauwa mana, ka vakabulai ira kecega.

20A sa ta cake na matana vei ira na nona tisaipeli, ka kaya, Dou sa kalougata na dravudravua; ni sa nomudou na matanitu ni Kalou. 21Dou sa kalougata, koi kemudou sa viakana edaidai: ni dou na vakamamautaki. Dou sa kalougata, koi kemudou sa tagi edaidai: ni dou na dredre. 22Dou sa kalougata ni sa cati kemudou ko ira na tamata, ni ra sa wasei kemudou tani talega vei ira, ka vakasewasewani kemudou, ka vakarogorogocataka na yacamu-dou, e na vukuna na Luve ni tamata. 23Dou reki e na siga ko ya, ka rika e na marau: ni sa levu, raica, na kenai sau vei kemudou mai lomalagi: ni ra sa kitaka vakakina ko ira na nodra qase vei ira na parofita. 24Ia dou na ca, koi kemudou sa vutuniyau! ni dou sa qai rawata ga na nomudou vakacegu. 25Dou na ca, koi kemudou sa mamau! ni dou na viakana. Dou na ca, koi kemudou sa dredre edaidai! ni dou na rarawa ka tagi. 26Dou na ca, ni sa vosavakavinakataki kemudou na tamata kecega! ni ra sa kitaka vakakina ko ira na nodra qase vei ira na parofita vakailasu. 27Ia kaʼu sa kaya vei kemudou sa rogoca, Lomani ira na nomudou meca, caka vinaka vei ira sa cati kemudou, 28vosa vinaka vei ira sa rukaki kemudou, ka masulaki ira sa vakalialiai kemudou. 29Kevaka e dua sa sabica na balumu e dua, golea talega vua nai kadua: ka kakua ni bureitaka na nomui curucuru vei koya sa kauta tani na nomu kote. 30Ia mo solia vei ira kecega sa mai kerekere vei iko; ka kakua ni taroga tale na nomu veika vei koya sa kauta tani. 31Ia me vaka dou sa vinakata me ra kitaka vei kemudou na tamata, dou kitaka talega vakakina vei ira. 32Ia kevaka dou lomani ira sa lomani kemudou, o cei me vakavinavinaka vei kemudou? ia ko ira na tamatai valavala ca era sa lomani ira sa mai loloma vei ira. 33Ia kevaka dou sa caka vinaka vei ira ga sa caka vinaka vei kemudou, o cei me vakavinavinaka vei kemudou? ni sa cakacaka vakakina ko ira na tamatai valavala ca. 34Ia kevaka dou sa solia-me-tauri vei ira ga dou sa vakanuinui me rawata tale maikina, o cei me vakavinavinaka vei kemudou? ni sa solia-me-tauri ko ira talega na tamatai valavala ca vei ira na tamatai valavala ca, me ra rawata tale maikina na ka e tautauvata. 35Ia mo dou lomani ira na nomudou meca, ka caka vinaka, ka soli-me-tauri ni dou sa tawa nakita me rawata tale e dua na ka; ena levu kina na kenai sau vei kemudou, ia dou na luve i Koya sa cecere sara: ni sa lomasoli ko koya vei ira era sa tawa vakavinavinaka ka valavala ca. 36O koya mo dou qai yalololoma, me vaka sa yalololoma na Tamamudou.

37Ia dou kakua ni daulelewa, dou na qai sega ni lewai: dou kakua ni dauveibeitaki, dou na qai sega ni beitaki: dou kakua ni daucudruva na tamata, dou na qai sega ni cudruvi: 38dou ia nai solisoli, ka na soli kina vei kemudou; nai vakarau vinaka, ka tabaki sobu, ka kuretaki vata, ka vua bale, era na solia na tamata ki na lomase-remudou. Ia nai vakarau dou sa vakarautaka, ena vakarautaki tale vei kemudou.

39A sa tarogi ira ko koya e na vosa vakatautauvata e dua: E rawata beka na mataboko me tubera na mataboko? erau na sega beka ni lutu ruarua ki na keli? 40Sa sega na tisaipeli me uasivi vua na nonai vakavuvuli: ia ko koya yadua sa yaco me vinaka sara, erau na tautauvata kei na nonai vakavuvuli.

41Ia ka vakaevei ni ko sa raica na malamala e na mata ni wekamu, ka ko sa sega ni nanuma na kau sa tu e matamu? 42Se ko na kaya vakaevei vua na wekamu, Na wekaqu, laiva meʼu vutia tani mada na malamala sa tu e matamu, ia ko sa sega ni kunea na kau sa tu e matamu? A dauveivakaisini, mo cavuta mada eliu na kau mai na matamu, ia ko na qai raica vinaka me vutia na malamala sa tu e na mata ni wekamu.

43Ni sa sega na kau vinaka me vuataka na vua ca; se na kau ca me vuataka na vua vinaka. 44Ni sa kilai na kau kecega e na vuana. Ni sa sega ni veti na lolo mai na wa-vakavotona, se veti na vua-ni-vaini mai na wa-gadrogadro. 45A tamata vinaka sa kauta mai na ka vinaka mai na lololo vinaka ni lomana: kei na tamata ca sa kauta mai na ka ca mai na lololo ca ni lomana: ni sa vosataka na gusu na ka sa oso vakalevu kina na loma.

46Ia ka vakaevei ni dou sa vakatokai au me Turaga, Turaga, ka sega ni cakava na ka kaʼu sa kaya? 47O koya yadua sa lako mai vei au, ka rogoca na noqu vosa, ka cakava, au na vakatakila vei kemudou na tamata erau sa tautauvata kaya: 48Erau sa tautauvata kei na tamata sa tara e dua na vale, a sa kelivaka titobu, ka tauyavutaka e na dela ni vatu: ia ni sa yaco na waluvu, sa coka vakaukauwa na vale ko ya na dobui, a sa sega ni yavalata rawa: ni sa tauyavutaki e na dela ni vatu. 49Ia ko koya sa rogoca ka sega ni cakava, erau sa tautauvata kei na tamata sa tara e dua na vale e na dela ni soso, ka sega na kena yavu; a sa coka vakaukauwa na dobui, a sa bale sara kina; ia na ka levu na kena rusa na vale koya.

Currently Selected:

Luke 6: FIJ1864

Highlight

Copy