Luke 1
1
A WASE I. —Sa bolea ko Luke me vola nai tukutuku kei Jisu, 1-4. Sa tukuna ko na agilose ni rau na kunekune na tina i Joni na dauveipapitaiso, kei na gonealewa sa tina i Jisu, 5-38. Sa lako ko Meri vei Ilisapeci, ka vakarokorokotaka na Turaga, 39-56. Sa sucu ko Joni, 57-66. Sa tukuni Jisu kei Joni talega ko Sakaria, 67-79.
1E NA vuku ni sa lewe vuqa era sa bolea me ra vakarautaka nai tukutuku ni veika sa vakadinati deivaki sara vei keda, 2me vaka na ka era sa tukuna vei keda, ko ira era sa raica e na matadra ka sa qarava na vosa, mai nai vakatekivu; 3sa vinaka vei au talega, niʼu a vakatarotaroga matua sara na ka kecega mai nai vakatekivu, meʼu vei-vakadutaitaka e nai vola vei iko, Ciofilo vakaturaga sara, 4mo kila kina na kena dina ni veika ko sa vakatavulici kina.
5E NA gauna sa tui Jutia kina ko Eroti, sa dua na bete ko Sakaria na yacana, e na matabete i Epaia: a sa watina e dua vei ira na luve i Eroni, o Ilisapeci na yacana. 6A rau sa dodonu ruarua e na mata ni Kalou, erau sa muria kecega na vunau kei nai vakaro ni Turaga, ka tawa cala. 7A sa sega na luvedrau, ni sa yava ko Ilisapeci, a rau sa qase ruarua mai.
8A sa yaco, ni sa ia tiko ko koya na cakacaka vakabete e na mata ni Kalou, e na vuku ni nona matabete, 9me vaka nai valavala ni cakacaka vakabete, sa nonai tavi me vakacaudreva na ka boi vinaka, ni sa curu ki na vale-ni-soro ni Turaga. 10Ia ko ira kecega e lewe vuqa na tamata, era sa tu etautuba ka masu ni sa caudre tiko na ka boi vinaka.
11A sa rairai vua e dua na agilose ni Turaga, sa tu e na kenai matau ni cabocabo ni ka boi vinaka. 12Ia ni sa raica ko Sakaria, sa kidroa, a sa lutu na rere vei koya. 13A sa kaya na agilose vei koya, Kakua ni rere, Sakaria; ni sa rogoci na nomu masu; ka na vakasucuma e dua na luvemu-tagane ko Ilisapeci na watimu, ia ko na vakatoka na yacana ko Joni. 14Ia ko na reki ka marau kina; ena lewe vuqa talega era na reki e na vuku ni nona sucu. 15Ni na levu ko koya e na mata ni Turaga, ka na sega ni gunu waini se na yaqona kaukauwa; ena vakasinaiti talega e na Yalo Tabu, mai na kete i tinana. 16Ia ka lewe vuqa vei ira na luve i Isireli ena saumaka mai ko koya ki na Turaga na nodra Kalou. 17Ia ena liutaki koya e na yalo i Ilija kei na nona kaukauwa, me saumaka na lomadra na qase vei ira na gone, kei ira era talaidredre ki na nodra vuku era yalododonu; me vakarautaka na tamata e so me ra qai nona na Turaga.
18A sa kaya vua na agilose ko Sakaria, A cava meʼu kila kina na ka o qo? niʼu sa qase, a sa vuqa na yabaki ni watiqu. 19A sa vosa na agilose, ka kaya vua, Oi au ko Kepirieli, au sa dautu e na mata ni Kalou; ia kaʼu sa talai mai meʼu vosa vei iko, ka tukuna vei iko nai tukutuku vinaka o qo: 20ka raica, ko na galu mai, ka ko na sega ni vosa rawa, me yaco mada na siga ena vakayacori kina na veika o qo, e na vuku ni ko sa sega ni vakadinata na noqu vosa, a ya ena vakayacori ga e na kena gauna.
21A ra sa waraki Sakaria ko ira na tamata, a ra sa kidacala ni sa dede ko koya e na vale ni soro. 22Ia ni sa lako mai ki tautuba ko koya, sa sega ni vosa rawa vei ira: a ra sa qai kila ni ka raica ko koya e dua na raivotu e na vale ni soro; ia sa de-guvacu vei ira ko koya, ka galu tikoga.
23A sa yaco, ni sa oti na veisiga ni nona cakacaka, sa lako tani yani ki na nona vale. 24A sa oti na veisiga ko ya, sa qai kunekune na watina ko Ilisapeci, a sa vuni koya ka vula lima, ka kaya, 25Sa cakacaka vakaoqo vei au na Turaga e na siga sa nakita kina ko koya, me kauta tani na ka kaʼu a rogo ca kina vei ira na tamata.
26Ia, e nai kaono ni vula sa talai na agilose ko Kepirieli mai na Kalou, ki na dua na koro mai Kalili, a yacana ko Nasareci, 27vua e dua na gonealewa sa musu vua na tamata na yacana ko Josefa, e na mataqali i Tavita; ia na yaca ni gonealewa ko Meri. 28A sa lako mai na agilose vei koya, ka kaya, Sa loloma, o iko sa daulomani! me tiko vei iko na Turaga; o sa kalougata vakalevu vei ira na yalewa tani. 29Ia ni sa raica ko koya [na gonealewa], sa kidroa e na nona vosa, a sa vakanananu e lomana se vakaevei nai valavala ni veikidavaki vakaoqo. 30A sa kaya na agilose vei koya, Kakua ni rere, Meri: ni ko sa kune loloma vua na Kalou: 31ka raica, o na kunekune e ketemu, o na vakasucuma talega e dua na gonetagane; ia mo vakatoka na yacana ko JISU. 32Ena levu ko koya, ka na vakatokai na Luve i Koya sa cecere sara; ia na Turaga na Kalou ena solia vua nai tikotiko vakaturaga nei tamana ko Tavita: 33ia ena lewa ko koya na mataqali i Jekope ka tawa mudu; ena sega talega ni oti na nona matanitu.
34Sa qai kaya ko Meri vua na agilose, Ena yaco vakaevei beka na ka o qo, niʼu sa sega ni veikilaki kaya e dua na tagane? 35A sa vosa na agilose, ka kaya vua, Ena lako sobu mai vei iko na Yalo Tabu, ena vakarurugi iko talega na kaukauwa i Koya sa cecere sara: o koya o qo ena vakatokai kina na ka tabu ena sucu mai, me Luve ni Kalou. 36Ka raica, na dauvemu ko Ilisapeci, sa kunekunetaki talega e dua na gonetagane, ni sa qase; a sa kenai kaono o qo ni nona vula, o koya ka vakatokai e yava. 37Ni na sega ni dredre vua na Kalou e dua na ka.
38Sa qai kaya ko Meri, Raica na vada ni Turaga; me yaco ga vei au me vaka na nomu vosa. A sa lako tani na agilose maivei koya.
39A sa ia ko Meri e na gauna ko ya, ka lako vakusarawa ki na vanua vakaulu-ni-vanua, ki na dua na koro ni Jutia; 40a sa curu ki na vale i Sakaria, a sa veikidavaki kei Ilisapeci. 41A sa yaco, ni sa rogoca ko Ilisapeci na vosa ni veikidavaki nei Meri, sa rika e ketena na gone, a sa vakasinaiti ko Ilisapeci e na Yalo Tabu: 42a sa tabalaka cake na domona ko koya, ka kaya, O sa kalougata vakalevu vei ira na yalewa tani, a sa kalougata na vua ni ketemu. 43A sa vakaevei na ka o qo vei au, ni sa lako mai vei au na tinana na noqu Turaga? 44Ka raica, ni sa rorogo e na daligaqu na vosa ni nomu veikidavaki, sa rika e na reki na gone e na ketequ. 45A sa kalougata ko koya sa vakadinata; ni na vakayacori na ka sa tukuni vua maivei koya na Turaga.
46A sa kaya ko Meri,
Sa vakamalua vua na Turaga na yaloqu, 47a sa reki na yaloqu vua na Kalou na noqui Vakabula. 48Ni sa lomana na nona vada ni sa dravudravua: ka raica, mai na gauna o qo ena kaya nai tabatamata kecega niʼu sa kalougata. 49Ni sa cakava na ka levu e so vei au ko Koya sa qaqa; ia sa dokai na yacana. 50A sa tu na nona loloma vei ira sa rerevaki koya, ka yacova nai tabatamata e vuqa. 51Sa kaukauwa na cakacaka ni ligana; sa dui vakasesei ira na qaciqacia ko koya e na vuku ni nanuma ni yalodra. 52Sa vakasivoi ira sobu na kaukauwa mai na veitikotiko, a sa vakatikori ira kicake era kaisi. 53Sa vakamamautaki ira era sa viakana e na veika vinaka; a sa vakatalai ira tani era vutuniyau a ra sa lala tu. 54Sa vukei ira na nona tamata na Isireli, ni sa vakananuma na loloma; 55me vaka na nona vosa vei ira na noda qase, vei Eparaama, kei na nona kawa ka tawa mudu.
56A sa tiko vata kaya ko Meri ka tolu beka na vula, a sa qai lesu ki na nona vale.
57A sa yaco na siga i Ilisapeci me vakasucu kina; a sa vakasucuma ko koya e dua na gonetagane. 58A ra sa rogoca ko ira sa tiko voleka vua, kei ira na dauvena, ni sa lomani koya vakalevu na Turaga; a ra sa reki vata kaya.
59A sa yaco ni ra sa lako mai me ciliva na gone, ni sa walu na nona siga; a ra sa vakayacani koya ko Sakaria, me vaka na yaca i tamana. 60A sa vosa na tinana, ka kaya, Me kakua; ena yacana ga ko Joni. 61A ra sa kaya vua, Sa sega na wekamu sa vakayacani e na yaca o qo. 62A ra sa de-guvacu vei tamana, se cava e vinakata ko koya me yacana. 63A sa vaka ko koya me dua na papa ni volavola, a sa vola, ka kaya, A yacana ko Joni. A ra sa kidacala kecega. 64A sa sereki sara na gusuna kei na yamena, a sa vosa mai, ka vakarokorokotaka na Kalou.
65A sa yaco na rere vei ira kecega era tiko vakavolivoliti ira; a sa tukuni yani na vosa kecega o qo e na vanua taucoko sa vakaulu-ni-vanua mai Jutia. 66Ara sa tura e lomadra ko ira kece era rogoca, a ra sa kaya, Ena vakaevei beka nai valavala ni gone o qo! A sa tiko vata kaya na liga ni Turaga.
67A sa vakasinaiti e na Yalo Tabu ko Sakaria na tamana, a sa parofisai mai, ka kaya, 68Me vakarokorokotaki na Turaga na Kalou nei Isireli; ni sa lako mai vei ira na nona tamata ka vakabulai ira, 69a sa vakatubura vei keda e dua na veivakabulai sa vaka na kaukamea, e na mataqali i Tavita na nona tamata; ( 70me vaka na ka sa tukuna ko koya e na gusudra na nona parofita tabu, era sa bula eliu sara:) 71na veivakabulai mai na noda meca, mai na ligadra kece talega era sa cati keda: 72me vakayacora na yalololoma vei ira na noda qase, me nanuma talega na nona veiyalayalati tabu; 73a vosa bubului sa bubului kina ko koya vei Eparaama na tamada, 74me solia mai vei keda, me da vakabulai mai na ligadra na noda meca, ka qaravi koya ka tawa rere, 75e na yalosavasava kei na caka dodonu e matana, e na veisiga kecega ni noda bula.
76Ia ko iko na gone, ko na vakatokai na parofita i Koya sa cecere sara: ni ko na liu e na mata ni Turaga me caramaka na nona veisala: 77me vakatakila vei ira na nona tamata na ka me ra bula kina, ni sa bokoci na nodrai valavala ca, 78e na vuku ni nona loloma levu na noda Kalou, sa kida mai kina vei keda na rarama maicake, 79me vakararamataki ira era sa tiko e na butobuto kei na yaloyalo ni mate, me tubera na yavada ki na sala ni veivinakati.
80A sa tubu cake na gone, a sa kaukauwa mai na yalona, a sa tiko e loma ni veikau me yaco mada na nona siga me vakaraitaki kina vei ira na Isireli.
Currently Selected:
Luke 1: FIJ1864
Highlight
Share
Copy
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
