Joni 20

Sa lako ki nai bulubulu ko Meri, kei Petero, kei Joni, 1-10. Sa rairai mai ko Jisu vei Meri, 11-18; vei iratou talega na nona tisaipeli, 19-23. Sa vakatitiqa ko Tomasi, a sa qai vakadinata, 24-29. Sa yaga nai tukutuku kei Karisito me da bula kina, 30, 31.

1IA e nai matai ni siga ni wiki sa lako mai ko Meri na kai Makitala e na mataka caca, ni sa butobuto tu, ki nai bulubulu, ka raica ni sa kau tani na vatu mai nai bulubulu. 2Sa qai cici ko koya, ka lako yani vei rau, ko Saimoni Petero kei na tisaipeli kadua, o koya sa lomana ko Jisu, ka kaya vei rau, Era sa kauta tani na Turaga mai nai bulubulu, ia keitou sa sega ni kila na tikina era sa vakotori koya kina.

3Erau sa qai lako yani ko Petero, kei na tisaipeli kadua, a rau sa lako ki nai bulubulu. 4A rau sa cici vata ruarua: a sa sivi Petero na tisaipeli kadua, ka taumada eliu ki nai bulubulu. 5A sa cuva sobu ko koya, ka raica na gatu sa no: ia ka sega ni curu ko koya. 6Sa qai muri mai ko Saimoni Petero, ka curu ki nai bulubulu, ka raica na gatu sa no, 7kei nai sala sa viviraki e na uluna, a sa sega ni no vata kei na gatu, ia ka lobi koto duaduaga e na tikina tani. 8Sa qai curu na tisaipeli kadua talega, o koya sa taumada eliu ki nai bulubulu, a sa raica ko koya, ka vakadinata. 9A rau sa sega ga ni kila nai Vola, ni sa dodonu me tu cake tale mai na mate ko koya. 10Oi rau na tisaipeli erau sa qai lako tani tale ki nodrau.

11Ia ka sa tu ko Meri mai nai bulubulu etautuba, ka tagi: ia ni sa tagi tiko, sa cuva sobu kivaka ki nai bulubulu: 12a sa raica e rua na agilose e nai sulu vulavula, a rau sa tiko, e dua e na uluna, ka dua e na yavana, e na tikina ka koto kina na yago i Jisu. 13A rau sa kaya vua, Yalewa, o sa tagi e na vuku ni cava? Sa kaya vei rau ko koya, E na vuku ni ra sa kauta tani na noqu Turaga, ia kaʼu sa sega ni kila na tikina era sa vakotori koya kina. 14Ni sa qai vosa vakaoqo, sa vuki vakanadaku, ka raici Jisu ni sa tu, a sa sega ni kila ni sai Jisu. 15Sa kaya vua ko Jisu, Yalewa, o sa tagi e na vuku ni cava? o sa vakasaqarai cei? Sa nanuma ko koya ni sai vakatau-ni-were, a sa kaya vua, Kevaka ko a kauti koya tani, saka, tukuna vei au na tikina ko a vakotori koya kina, kaʼu na qai laʼki kauti koya tani. 16Sa kaya vua ko Jisu, Meri! Sa vuki vakanadaku ko koya, ka kaya vua, Raponi! (a kenai balebale, Vakavuvuli.) 17Sa kaya vua ko Jisu, Kakua ni tarai au; niʼu sa bera ni lako cake vei Tamaqu: ia ka lako vei ira na wekaqu, ka kaya vei ira, Au sa lako cake vei koya sa Tamaqu, ka Tamamudou; vei koya sa noqu Kalou, ka nomudou Kalou.

18Sa lako yani ko Meri na kai Makitala, ka tukuna vei iratou na tisaipeli ni ka raica na Turaga, o koya ka vosataka vei koya na veika o qo.

19E na siga ko ya, e nai matai ni siga ni wiki, ni sa yakavi mai, ni sa sogo tu na katuba ni vale eratou sa soqoni vata kina na tisaipeli, e na vuku ni ratou sa rerevaki ira na kai Jutia, sa curu mai ko Jisu ka tu e na kedratou maliwa, ka kaya vei iratou, Dou vakacegu. 20Ia ni sa vosa vakaoqo, sa vakaraitaka vei iratou na ligana kei na sarisarina. A ratou sa qai reki na tisaipeli, ni ratou sa raica na Turaga. 21Sa qai kaya tale vei iratou ko Jisu, Dou vakacegu: me vaka sa talai au mai ko Tamaqu, au sa talai kemudou vaka talega kina. 22Ia ni sa vosa vakaoqo ko koya, sa ceguvi ira, ka kaya, Me curumi kemudou na Yalo Tabu: 23nai valavala ca ni tamata yadua dou sa bokoca, ena bokoci; nai valavala ca ni tamata yadua dou sa tawa sereka, ena tawa sereki.

24A sa dua vei iratou na tinikarua, ko Tomasi, sa vakatokai ko Titimo, sa sega ni tiko vata kei iratou ni ka lako mai ko Jisu: 25o koya sa kaya kina vua ko iratou na tisaipeli tani, Keitou a raica na Turaga. A sa kaya vei iratou ko koya, Kevaka kaʼu na sega ni raica na we ni vako e na ligana, ka daramaka na noqui qaqalo ki na we ni vako, ka daramaka na ligaqu ki na sarisarina, au na sega ni vakadinata.

26Ia ni sa oti na bogi e walu, sa qai tiko tale e loma ni vale ko iratou na nona tisaipeli, o iratou kei Tomasi: sa curu mai ko Jisu, ni sa sogo tu na katuba, ka tu e na kedratou maliwa, ka kaya, Dou vakacegu. 27Sa qai kaya ko koya vei Tomasi, Dodoka mai na nomui qaqalo, ka raica na ligaqu: ia dodoka na ligamu, ka daramaka ki na sarisariqu: ia mo kakua ni vakatitiqa, mo vakadinata ga. 28A sa vosa ko Tomasi, ka kaya vua, Noqu Turaga, ka noqu Kalou! 29Sa kaya vua ko Jisu, E na vuku ni ko sa raici au, Tomasi, o sa vakadinata: sa kalougata ko ira era sa sega ni raica, a ra sa vakadinata.

30A SA vuqa tale na caka-mana sa cakava dina ko Jisu e na matadra na nona tisaipeli, a ra sa sega ni volai e nai vola o qo: 31ia sa volai o qo, mo dou dinata ni sa Karisito ko Jisu, na Luve ni Kalou; ia mo dou rawata na bula e na yacana, ni dou sa vakabauta.

Currently Selected:

Joni 20: FIJ1864

Highlight

Copy