Joni 18
18
Sa soli Jisu yani ko Juta, a sa seledrutia na daliga i Maliko ko Petero, 1-11. Sa tauri ko Jisu ka tuberi yani vei Anasi kei Kaiafa, a sa cakitaki Jisu ko Petero, 12-27. Sa lewai Jisu ko Pilato, 28-40.
1NI sa vosataka oti na veika o qo ko Jisu, sa lako yani ko koya kei iratou na nona tisaipeli ki tai kadua ni soniwai ko Kitironi, a sa dua kina na were, a sa curu kina ko koya, kei iratou na nona tisaipeli.
2Ia ko Juta, o koya sa soli koya yani, sa kila na tikina: ni sa lako wasoma kina ko Jisu kei iratou na nona tisaipeli. 3Ia ni sa rawata ko Juta na matai valu kei nai talatala e so, maivei ira na bete levu kei ira na Farisi, sa yaco kina, a ra sa taura voli e so na tabucagi kei na cina kei nai yaragi ni valu.
4Ia ni sa kila ko Jisu na ka kecega ena yaco vei koya, sa lako yani, ka kaya vei ira, Dou sa vakasaqarai cei? 5Era sa kaya vua, O Jisu na kai Nasareci. Sa kaya vei ira ko Jisu, Sai au. (A sa tu vata kei ira ko Juta, o koya sa soli koya yani.) 6Ni sa qai kaya vei ira ko koya, Sai au, era sa sukainadaku, ka bale sobu ki na soso.
7Sa qai taroga tale ko koya, Dou sa vakasaqarai cei? A ra sa kaya, O Jisu na kai Nasareci. 8Sa kaya ko Jisu, Au sa tukuna oti vei kemudou ni sai au: ia kevaka dou sa vakasaqarai au, biuti ira o qo me ra lako tani: 9me vakayacori kina na vosa sa tukuna ko koya, Au sa sega ni vakayalia e dua vei iratou ko a solia mai vei au.
10Sa qai ucuna ko Saimoni Petero nai seleiwau sa tu vua, ka yavita kina na tamata ni bete levu, ka seledrutia na daligana i matau. Sa yaca ni tamata ko Maliko. 11Sa qai kaya vei Petero ko Jisu, Daramaka na nomui seleiwau ki na kena taga: a bilo sa solia mai vei au ko Tamaqu, kaʼu na sega beka ni gunuva?
12O ira na matai valu, kei na kena turaga, kei ira na nodrai talatala na kai Jutia, era sa qai tauri Jisu, ka vesuki koya, 13ka ra sa tubera mada eliu vei Anasi; ni sa vugo i Kaiafa, o koya sa bete levu e na yabaki ko ya. 14Ia sai koya o qo ko Kaiafa, o koya sa vakavulici ira na kai Jutia, ni sa yaga me mate e dua na tamata e na vukudra na tamata.
15A rau sa muri Jisu ko Saimoni Petero kei na dua tale na tisaipeli: a sa kilai na tisaipeli ko ya vua na bete levu, a rau sa curu vata kei Jisu ki na vale ni bete levu. 16A sa tu etautuba ko Petero ka voleka ki na katuba. Sa qai curu yani na tisaipeli kadua, o koya sa kilai vua na bete levu, a sa vosa vua na yalewa sa vakatawa na katuba, a sa vakacurumi Petero. 17Sa qai kaya vei Petero na vada sa vakatawa na katuba, O iko talega beka e dua na tisaipeli ni tamata o qo? Sa kaya ko koya, Oi au e segai. 18A sa tu maikina ko ira sa dauveiqaravi kei ira nai talatala, a ra sa vakawaqara oti na buka; ni sa liliwa: a ra sa tatalai; a sa tu vata kei ira ko Petero, ka tatalai.
19Sa qai tarogi Jisu na bete levu e na vukudra na nona tisaipeli, e na nonai vakavuvuli talega. 20Sa kaya vua ko Jisu, Au a vosa votu ki vuravura; au a vakavuvuli tikoga e na vale ni lotu, kei na vale ni soro, era sa daulako kina na kai Jutia; ia kaʼu sa sega ni kaya vuni e dua na ka. 21E na vuku ni cava ko sa tarogi au kina? tarogi ira era sa rogoca, se cava kaʼu a kaya vei ira: raica, era sa kila na ka kaʼu a daukaya.
22Ia ni sa vosa oti vakaoqo ko koya, e dua vei ira nai talatala sa tu voleka, sa sabici Jisu e na ligana, ka kaya, O sa vosa vakacava vakaoqo ki na bete levu? 23Sa kaya vua ko Jisu, Kevaka kaʼu sa vosa vakaca, vakatakila na kena ca: ia kevaka e vinaka, o sa sabici au e na vuku ni cava? 24Ia ko Anasi sa talai koya, ni sa vauci tu, vei Kaiafa na bete levu.
25Ia sa tu ko Saimoni Petero, ka tatalai. Era sa qai kaya vua, Sa dua beka vei iratou na nona tisaipeli ko iko talega? Sa cakitaka ko koya, ka kaya, Oi au e segai. 26E dua vei ira na tamata ni bete levu, a weka i koya sa seledrutia na daligana ko Petero, sa kaya, Au a sega beka ni raici kemudrau vata kaya e na were? 27Sa qai cakitaka tale ko Petero; a sa tagi vakasauri na toa.
28Era sa qai kauti Jisu tani maivei Kaiafa ki na vale ni lewa; a sa mataka caca; ia ko ira era sa sega ni curu ki na vale ni lewa, de ra vakadukadukalitaki, a ya ga me ra kania na solevu ni lako-sivia.
29Sa qai curu yani vei ira ko Pilato, ka kaya, A cava na ka ca dou sa beitaka vua na tamata o qo? 30Era sa vosa ka kaya vua, Kevaka sa sega ni tamata ca ko koya o qo, keitou sa sega ni soli koya yani vei iko. 31Sa qai kaya vei ira ko Pilato, Dou kauti koya, ka lewai koya me vaka na nomudou vunau. O koya sa kaya kina ko ira na kai Jutia vei koya, E sega ni tara vei keimami me vakamatea e dua na tamata: 32me vakayacori kina na vosa ka tukuna ko Jisu, ni sa vakatakila nai valavala ni mate ena mate kina.
33Sa qai curu tale ki na vale ni lewa ko Pilato, ka kacivi Jisu, ka kaya vua, O iko na nodra Tui na kai Jutia, se segai? 34Sa kaya vua ko Jisu, O sa vosataka li na ka o qo vakai iko, se sa tukuni au vakaoqo vei iko e so tani? 35Sa kaya ko Pilato, Oi au beka na kai Jutia? o ira na kai nomu kei ira na bete levu, era sa soli iko mai vei au: a cava ko a cakava? 36Sa kaya ko Jisu, Sa sega ni vakavuravura na noqu matanitu: kevaka sa vakavuravura na noqu matanitu, era na qai vala na noqu tamata, meʼu kakua ni soli yani vei ira na kai Jutia: ia o qo, sa sega ni vu eke ua noqu matanitu. 37Sa qai kaya vua ko Pilato, O iko bagi sa tui? Sa kaya ko Jisu, O sa kaya niʼu sa tui. A ka o qo kaʼu sa sucu mai kina, ia na ka o qo kaʼu sa lako mai kina ki vuravura o qo, meʼu dautukuna na ka dina. O koya yadua sa vakabauta na ka dina, sa rogoca na noqu vosa. 38Sa kaya vua ko Pilato, A cava na ka dina?
Ia ni sa vosa oti vakaoqo, sa curu yani tale vei ira na kai Jutia, ka kaya vei ira, Au sa sega ni kunea vua e dua nai valavala ca: 39ia sa dua na nomudoui valavala, meʼu sereka e dua vei kemudou e na solevu ni lako-sivia: dou sa vinakata kina, se segai, meʼu sereka vei kemudou na nodra Tui na kai Jutia? 40Era sa qai qoqolou kece tale, ka kaya, Me kakua ga na tamata o qo, ko Parapa ga.
Ia na daubutabutako ko Parapa.
Currently Selected:
Joni 18: FIJ1864
Highlight
Share
Copy
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
