Ai Vola I Isaia, na Parofita 63
63
Sa gumatua na Mesaia tei ira na nona meca, 1-6. Sa qai vakananuma na yalololoma ni Kalou vei ira na nona tamata eliu, kei na nodra dautalaidredre rua, 7-14. Sa qai ia na masu e na vukudra na vo era vakabauta tiko, 15-19.
1O CEI o qo sa lako tu mai Itomi? ka sa vakaisulu damudamu tu mai Posira? o koya o qo sa vakaiukuuku na nonai sulu, ka sa lako vakaturaga tu mai e na nona kaukauwa levu?
Sai au ko vosa dodonu, ko kaukauwa ni ia na veivakabulai.
2A cava sa damudamu kina na nomui sulu, ia na nomui tutuvi, a cava sa vaka na nona kina sa sikaraka nai keli-ni-waini?
3Nai keli-ni-waini kaʼu sa sikaraka vakai au ga, ia vei ira na veimataqali sa sega e dua me keirau lewe rua kaya: ia kaʼu na sikaraka ga e na noqu cudru, ka butuka e na noqu cudru katakata; ia na kedra dra sa kureitaki mai ki na noqui sulu, na noqui tutuvi talega kaʼu a lomoca sara kina. 4Niʼu a sa nakita na siga ni veisaumi, ia na nodra yabaki kaʼu sa Vakabula, sa qai yaco. 5Ia kaʼu a vakarai tu ka sa sega e dua nai vukevuke; kaʼu a kurabui tu, ka sa sega e dua sa tokona mai; sa qai ia na ligaqu dina e na vukuqu na veivakabulai, ia na noqu cudru katakata, o qori sa tokoni au. 6Ia kaʼu sa butuki ira na veimataqali e na noqu cudru, kaʼu sa cakavi ira me mateni e na noqu cudru katakata, kaʼu sa vakadavea sobu na kedra dra ki na qele.
7A YALOLOLOMA levu i Jiova kaʼu na vakananuma, ia na vakavinavinaka vei Jiova, me vaka na ka kecega sa vakayacora vei keimami ko Jiova; kei na nona yalovinaka levu ki na mataqali nei Isireli, a ya sa vakayacora vei ira; me vaka na nona loloma levu, ka vaka na kena levu ni nona yalololoma.
8Ni ka kaya ko koya, E dina era sa noqu tamata, era sa luveda era na sega ni lasu: a sa yaco ko koya me nodrai Vakabula: 9e na nodra rarawa kecega sa rarawa kina ko koya, ia na agilose sa tiko e matana sa dauvakabulai ira: ni sa loloma ko koya, ka yalodauvosota, sa dauvakabulai ira kina ko koya; a sa laveti ira cake, ka kauti ira e na veisiga kece eliu: 10ia ko ira, era talaidredre ga, ka vakararawataka na nona Yalo Tabu; a sa vuki kina me nodra meca; sa veivala kei ira ko koya.
11A ra sa qai nanuma na veisiga eliu, na nei Mosese kei ira na nona tamata, a ra kaya, Sa evei ko koya ka kauti ira cake mai na waitui, kei iratou nai vakatawa ni nona sipi? sa evei ko koya ka solia ki lomadra na nona Yalo Tabu? 12ka kauti ira e na liga i matau i Mosese, kei na ligana vakaturaga; ka wasea na wai e matadra, me cakava na yacana me rogo ka tawa mudu? 13ka tuberi ira yani e na wasa titobu, me vaka na ose mai na veikau, ka ra sa sega ni toqi? 14Me vaka na manumanu sa lako sobu ki na buca, sa vakacegui ira vakakina na Yalo i Jiova: sa vakakina na nomu tuberi ira na nomu tamata, mo cakava kina na yacamu mo vakarokorokotaki.
15Mo rai sobu mai lomalagi, ka vakaraica mai na nomui tikotiko tabu ka vakaiukuuku: sa evei na nomu lomakatakata, kei na nomu kaukauwa? na yavavala ni ketemu kei na nomu yalololoma vei au, sa kinoci beka mai? 16ni sai iko na tamai keimami; ia ko Eparaama sa lecavi keimami, o Isireli talega sa sega ni kilai keimami; sai iko Jiova, na tamai keimami, na neimami Vakabula; sa mailiu sara na yacamu: 17a cava ko sa vakasesei keimami tani kina, Jiova, mai na nomu sala, ka vakaukauwataka na yalo i keimami me kakua ni rerevaki iko? Mo lesu mai e na vukudra na nomu tamata, na veimataqali era nomui votavota: 18sa bogi vica ga sa ra taukena ko ira na nomu tamata tabu; ia na neimami meca era sa buturaka sobu na nomu vale tabu: 19sa mailiu koi keimami; ia ko sa sega ni nodra turaga; sa sega ni ra vakatokai e na yacamu.
Currently Selected:
Ai Vola I Isaia, na Parofita 63: FIJ1864
Highlight
Share
Copy
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
