Nai Vakatekivu 34

Sa vaqaseni Taina ko Sikemi, ka vakamamasu me watina, 1-12. Sa kaya ko ira na luve i Jekope me ra cilivi na kai Sikemi, 13-17. Sa vinakata ko ira, 18-24. Sa mokuta na koro koi rau na luve i Jekope, 25-31.

1Ia ko Taina na luvena alewa ko Lia, ko koya ka vakasucuma vei Jekope, sa lako voli yani me raici ira na gonealewa ni vanua ko ya: 2a sa kunea ko Sikemi na luve i Emori na luve i Evi, na turaga ni vanua ko ya, a sa kauta, ka koto kaya, ka vaqasena. 3A sa kabiti Taina na luve i Jekope na yalona, a sa lomani koya na gonealewa, ka vosa vakayalololoma vua na gonealewa. 4A sa vosa vei Emori na tamana ko Sikemi, ka kaya, Mo rawata vei au na gonealewa o qo me watiqu. 5A sa rogoca ko Jekope ni ka vaqaseni Taina na luvena ko koya: a ra sa tiko na luvena tagane kei na manumanu mai na veico; a sa tiko lo ko Jekope ka me ra yaco mai.

6A sa lako yani vei Jekope ko Emori na tama i Sikemi, me veivosaki kaya. 7A ra sa lako mai na veico na luve i Jekope ni ra rogoca: a ra a rarawa na tamata, a ra sa cudru vakalevu, ka ni sa kitaka na ka vakalialia vei Isireli ko koya, ni sa kotora na luve i Jekope; a ka sa tawa dodonu me caka.

8A sa veivosaki kei ira ko Emori, ka kaya, Sa gutu na nomuni gonealewa na yalona na luvequ; au masuti kemuni mo ni musuka vua me watina: 9ia me da veimusuki wati, mo ni musuka na nomuni gonealewa vei keimami, ka kauta na neimami gonealewa vei kemuni: 10ia mo ni tiko kei keimami: ka sa koto e mata-muni na vanua; mo ni tiko ka veivoli kina, kai taukei kina. 11A sa kaya ko Sikemi vua na tama ni gonealewa kei ira na ganena, Meʼu kune loloma mada e na mata-muni, ia na ka kemuni sa cavuta kaʼu na solia: 12me ka levu sara na yau kei nai soli kemuni na cavuta vei au, ia kaʼu na solia me vaka na ka kemuni na cavuta vei au: ia mo ni musuka ga na gonealewa me watiqu.

13Ia ko ira na luve i Jekope, era sa vosa vakailasu kivei Sikemi kei Emori na tamana, ni ra sa vosa, e na vuku ni sa vaqaseni Taina na ganedra: 14a ra sa kaya vei rau, E dredre ni keitou cakava na ka a qo, ka me musuka na gane i keitou ki na tamata sa tawa cilivi; ni sa ka e rogo ca vei keitou; 15e na ka ga o qo keitou na rogoci kemudrau: Kevaka kemuni na vakataki keitou, ka me cili na nomuni tagane kecega; 16keitou na qai musuka na neitou gonealewa vei kemudou, ka kauta na nomudou gonealewa vei keitou, keitou na tiko talega kei kemudou, ia eda na tamata vata ga: 17ia kevaka kemudou na tawa rogoci keitou, mo dou cili; keitou na qai kauti koya na neitou gonealewa, ka lako.

18A sa vinakata na nodra vosa ko Emori, kei Sikemi na luve i Emori. 19A sa sega ni berabera na cauravou me kitaka na ka ko ya, ka ni sa rekitaki koya na luve i Jekope: a sa tamata yalovakaturaga vei ira kecega e na mataqali i tamana. 20A sa lako ko Emori kei Sikemi na luvena ki na nodrau matamata-ni-koro, ka vosa vei ira na lewe ni nodrau koro, ka kaya, 21O ira na tamata o qo era tiko malua ga kei keda; me ra tiko ga e na vanua, ka veivoli kina; ka raica, sa levu na vanua me rauti ira; me da kauta mada na nodra gonealewa me watida, me da musuka talega na noda gonealewa vei ira: 22e na ka o qo ga era na rogoci keda na tamata, me tiko kei keda, me da tamata vata, me cili na tagane kecega vei keda, me vaka era sa cilivi: 23ena tawa noda li na nodra manumanu, kei na nodra yau, kei na nodra karavau kece? me da vakarorogo ga vei ira, era na qai tiko kei keda. 24A sa vakarorogo vei Emori kei Sikemi na luvena ko ira kecega era curu yani e na nona matamata-ni-koro; a sa cili kecega na tagane, io ko ira kecega era curu yani e na nona matamata-ni-koro.

25Ia e na kenai katolu ni siga, ni ra sa rara, erau sa taura yadua na nonai seleiwan e lewe rua vei ira na luve i Jekope, ko Simioni kei Levi, na gane i Taina, a rau sa lako vakadoudou ki na koro, ka vakamatei ira kecega na tagane. 26A rau sa vakamatei Emori kei Sikemi na luvena e na bati ni seleiwan, ka kauti Taina yani mai na vale i Sikemi, ka curu yani. 27Era sa mai ciciva na moku ko ira na luve i Jekope, ka tokitaka na yau ni koro, e na vuku ni ra sa vaqasena na ganedra: 28era sa kauta na nodra sipi, kei na nodra karavau, kei na nodra asa, kei na ka sa tiko e na koro, kei na ka sa tiko mai na were; 29kei na nodra yau kecega, kei na nodra gone kecega, kei na nodra alewa, era kauta vakabobula, se tokitaka, io, na ka kecega sa tiko e na vale.

30A sa kaya ko Jekope kivei Simioni kei Levi, Drau sa vakararawataki au, ni drau sa vakaboicataki au vei ira na lewe ni vanua, e na kedra maliwa na kai Kenani kei na lewe ni Veikoro lalai: ia koi au, na lewe lailai, a ra na soqoni vata vei au, ka vakamatei au; ia kaʼu na rusa koi au, kei na noqu mataqali. 31A rau sa kaya, E vinaka li ni kitaka ko koya na gane i keirau me vaka sa alewa dauyatagane?

Currently Selected:

Nai Vakatekivu 34: FIJ1864

Highlight

Copy