Nai Vakatekivu 31

Sa kaya ko Jiova vei Jekope me lako tani, a rau sa donuya na watina, 3-16. Sa ra qai dro vukavuni, 17-21. Sa muri koya ko Lepani, a rau sa veileti ko Jekope kei Lepani, 22-44. Erau sa qai veiyalayalati, a sa lesu tale ko Lepani, 45-55.

1A SA rogoca ko koya na nodratou vosa na luve i Lepani ni ratou kaya, Ko Jekope, sa kauta tani na ka kecega nei tamadatou; ia sa vakaiukuukutaki vakaoqo e na ka i tamadatou ga. 2A sa raica na mata i Lepani ko Jekope, ka, raica, sa sega ni golevi koya me vaka eliu.

3A sa kaya vei Jekope ko Jiova, Mo lesu mada ki na nodra vanua na tamamu, kei na wekamu; ia kaʼu na tiko kei iko.

4A sa talaki ko Jekope a sa kacivi Rejeli kei Lia me lako ki na veico ki na nona qele ni manumanu, 5a sa kaya vei rau, Au sa raica koi au na matana na tamamudrau, ni sa sega ni golevi au me vaka eliu; ia ka sa tiko vei au na Kalou i tamaqu: 6ia oi kemudrau, drau sa kila niʼu sa qarava na tamamudrau e na noqu kaukauwa kecega: 7ka sa vakaisini au na tamamudrau, ka veivukiyaka vakatini na kequi voli: a sa sega ga ni laiva na Kalou me vakacacani au: 8kevaka sa kaya vakaoqo, Me kemui voli na kena sa volai vakamatailalai; sa qai vakasucuma walega na manumanu na ka sa volai vakamatailalai: ia kevaka sa kaya vakaoqo, Me kemui voli na kena sa vola koso; sa ra qai vakasucuma walega na manumanu na ka sa vola koso: 9ia sa kauta tani na Kalou na nona manumanu na tamamudrau, ka solia vei au. 10Ia sa yaco e nai tabayabaki sa ra daukunekune kina na manumanu, kaʼu a ta cake e na mataqu, ka kunea e na tadra, ka, raica, na sipi tagane ka rikata na sipi sa vola koso, se volai vakamatailalai, se veivolavolai. 11A sa kaya vei au e na tadra ko koya na agilose ni Kalou, I Jekope: kaʼu a kaya, Raica, koi au. 12A sa kaya, Mo ta cake mada e na matamu, ka raica, na sipi tagane kecega sa rikata na sipi sa vola koso, se volai vakamatailalai, se veivolavolai: niʼu sa kunea na ka kecega sa cakava vei iko ko Lepani: 13oi au na Kalou ni Peceli, ko a lumuta maikina na duru, ko a vosavavakini talega maikina vei au: ia mo qai tu cake, mo lako tani e na vanua o qo, ka lesu ki na nodra vanua na wekamu. 14A rau sa vosa ko Rejeli kei Lia, ka kaya vua, Sa vo tiko li vei keirau e dua na yau, se dua nai votavota, e na vale ni tama i keirau? 15sa sega li ni vaka ko koya, keirau sa kai tani? ni sa volitaki keirau, ka kania vakaotioti na neiraui lavo: 16ia na yau kecega sa kauta tani vua na tama i keirau na Kalou, ko ya na neirau, kei na nedra na luve i keirau: ia o qo, na ka kecega sa kaya vei iko na Kalou, mo kitaka.

17A sa ia ko Jekope, ka vakavodoki iratou na luvena tagane, kei iratou na watina, e na kameli; 18a sa kauta yani na nona manumanu kecega, kei na nona yau kecega sa rawata ko koya, na manumanu sa rawata ko koya, a ya sa rawata mai Petani-erama, ka me lako kivei Aisake na tamana ki na vanua ko Kenani. 19Ia ko Lepani, sa laʼki kotiva na nona sipi: a sa butakoca na matakau nei tamana ko Rejeli. 20Ia sa vaqaseni Lepani na kai Siria ko Jekope, ni sa tawa tukuna vua ni sa dro ko koya. 21A sa dro ko koya, ka kauta na ka kecega sa nona; a sa tu cake, ka lako-kosova na uciwai, a sa goleva na ulu-ni-vanua ko Kiliati.

22Ia e na kenai katolu ni siga sa tukuni vei Lepani, ni sa dro ko Jekope. 23A sa kauta kaya na wekana, a sa muri koya ka bogi vitu; a sa yacovi koya mai na ulu-ni-vanua ko Kiliati. 24A sa lako mai na Kalou vei Lepani na kai Siria e na tadra e na bogi, a sa kaya vua, Mo qarauni iko mo kakua ni vosataka vei Jekope na ka vinaka se na ka ca. 25A sa vauci Jekope ko Lepani. Ia ko Jekope, sa birika na nona vale gatu e na ulu-ni-vanua: kei Lepani kei iratou na wekana, eratou a birika mai na ulu-ni-vanua ko Kiliati.

26A sa kaya vei Jekope ko Lepani, A cava ko sa cakava, ni ko sa vaqaseni au, ka kauta tani na luvequ alewa, me vaka na bobula sa rawai e nai seleiwau? 27a cava ko a dro vuni kina, ka vaqaseni au, ka tawa tukuna vei au, meʼu talai iko rawa e na rereki kei na meke, na lali kei na api; 28a sa sega ni solia kina meʼu reguca na luvequ tagane kei na luvequ alewa? o qo ko sa caka vakalialia: 29e rawarawa me vakacacani kemudou na i ligaqu: ia na Kalou ni tamamudou sa vosa vei au e na bogi e na noa, a sa kaya, Mo qarauni iko mo kakua ni vosataka vei Jekope na ka vinaka se na ka ca. 30Ia o qo sa dodonu ga mo lako, e na vuku ni ko sa gu sara ki na vale i tamamu, ia ka cava ko sa butakoci ira kina na noqu kalou?

31A sa vosa vei Lepani ko Jekope, ka kaya, E na vuku niʼu a rere: ni kaʼu a kaya, De ko kovea sara vei au na luvemu alewa. 32Ia ko koya ko sa kune ira kina na nomu kalou, me kakua ni bula: e na matadratou na wekadatou mo dikeva na ka sa nomu a sa tiko vei au, ka kauta vei iko. Ni sa tawa kila ko Jekope ni ka butakoca ko Rejeli.

33A sa curu ki na vale i Jekope ko Lepani, kei na vale i Lia, kei na nodrau vale na vada; a sa sega ni kunea. A sa curu yani e na vale i Lia, ka laʼki curuma na vale i Rejeli. 34Ia ko Rejeli, ka kauta eliu na matakau, ka vunia e nai yaya ni kameli, ka sa tiko e delana. A sa vakasaqara ka vakaotiotia na vale ko Lepani, a sa tawa kunea. 35A sa kaya ko koya vei tamana, Me kakua ni ca vua na noqu turaga niʼu sa sega ni tu cake rawa e matamu; ni sa tauvi au nai valavala vakaalewa. A sa vakasaqara ko koya, a sa tawa kunea na matakau.

36A sa cudru mai ko Jekope, ka veileti kei Lepani: a sa vosa vei Lepani ko Jekope, ka kaya, A cava na noqu caka cala, a cava na noqui valavala ca, ni ko sa vakasavi au mai? 37ni ko sa dike-dikeva vakaotioti na noqui yaya, sa dua beka na ka sai yaya ni nomu vale ko sa kunea? mo viritu mada e matadratou na wekamu, kei na wekaqu, me ra lewa vei kedaru. 38A yabaki e ruasagavulu o qo kaʼu sa tiko kei iko; a nomu sipi alewa kei na nomu koti alewa sa sega ni lutudole, kei na sipi tagane ni nomu qele ni sipi kaʼu sa tawa kania: 39a ka sa dresulaki kaʼu a sega ni kauta vei iko; au a sauma koi au; o a tarogi au kina, se butakoci e na siga se na bogi. 40Au sa vakaoqo, sa kani au na katakata e na siga, kei na liliwa e na bogi; a sa yali ki mataqu na moce. 41Au a yabaki ruasagavulu vakaoqo e nomu vale; au a qaravi iko ka yabaki e tinikava e na vuku ni luvemu alewa e le rua, ka ono na yabaki e na vuku ni nomu manumanu: ia ko a vukica vakatini na kequi voli. 42Kevaka sa tawa tiko kei au na Kalou ni noqu qase, na Kalou i Eparaama, ko koya sa rerevaka talega ko Aisake, ko sa qai vakatalai au lala yani ga. Sa kunea na noqu rarawa na Kalou, kei na oca ni ligaqu, ka vunauci iko e na bogi e na noa.

43A sa vosa vei Jekope ko Lepani, ka kaya, Sa luvequ alewa ko iratou na alewa, ka sa luvequ tagane ko iratou na goneatagane, sa noqu manumanu talega na manumanu, ka sa noqu na ka kecega ko sa raica: ia na cava meʼu qai kitaka edaidai vei rau na luvequ alewa o qo, se vei ira na luvedra era sa vakaluveataka? 44ia o qo, daru ia mada, daru veiyalayalati koi kedaru; me dua kina vei kedaru na ka e tukuna.

45A sa taura e dua na vatu ko Jekope, ka vakaduria me duru. 46A sa kaya ko Jekope vei ira na wekana, Dou tomika mai na vatu; a ra sa kauta na vatu, ka cakava na suva: a ra sa kana maikea mai na dela ni suva. 47A sa vakayacana ko Lepani ko Yikari-saetuca: ia ko Jekope sa vakayacana ko Kaleti.

48A sa kaya ko Lepani, Na suva o qo sa tukuna vei kedaru edaidai. O koya o qo sa kacivi kina na yacana ko Kaleti [Na suva sa tukuna]; 49kei Misipa [Nai vakarairai]; ni sa kaya ko koya, Me vaka-raici kedaru ko Jiova, ni daru sa dui tiko tani: 50kevaka ko sa vakararawataki rau na luvequ alewa, se ko taura e so me watimu mei kuri ni luvequ alewa, sa sega na tamata ga vei kedaru, raica, na Kalou sa na kilai vei kedaru. 51Sa kaya talega vei Jekope ko Lepani, Raica na suva o qo, ka raica na duru, kaʼu sa viria e na vukudaru; 52sai tukutuku na suva o qo, ka sai tukutuku na duru, niʼu na sega ni sivia na suva o qo me lako vei iko, ni ko na sega ni sivia talega na suva o qo kei na duru o qo me lako mai vei au, e na ca: 53a Kalou i Eparaama, kei na kalou i Neori, na kalou ni tamadrau, me ra lewa vei kedaru mada. A sa vosavavakini ko Jekope e na vuku i koya sa rerevaka ko Aisake na tamana.

54Sa qai vakacabora nai madrali ko Jekope mai na ulu-ni-vanua, a sa kacivi iratou na wekana me kana: a ra sa kana, ka moce e na bogi e na ulu-ni-vanua. 55A sa sou e na sabogibogi ko Lepani, a sa reguca na luvena tagane kei na luvena alewa, a sa vosavakalougatataki ira: a sa lako ko Lepani, ka lesu ki na nona yasana.

Currently Selected:

Nai Vakatekivu 31: FIJ1864

Highlight

Copy