Nai Vakatekivu 29

Sa yaco ki nai keli-wai mai Karana ko Jekope, 1-8. Sa qai lako mai ko Rejeli, a ta vukea ko Jekope, 9-12, ka qai lako ki na vale i Lepani, 13, 14. Sa yalati Rejeli me watina, 15-20. Sa vakaisini Jekope ko Lepani, ka soli Lia vua, 21-26. Sa qaravi Lepani tale me nona ko Rejeli, 28-30. Sa vakasucu ko Lia, 31-35.

1SA qai lako voli yani ko Jekope, ka yacova na nodra vanua na lewe ni vanua mai cake. 2A sa rai yani, ka, raica, sa dua nai keli-wai e na tiki ni vanua ko ya, ka raica, sa tolu na qele ni sipi sa koto voleka kina; ni ra sa dauva-gunuva na qele ni sipi mai nai keli-wai ko ya: a sa sogota na gusu ni keli-wai e dua na vatu levu. 3A sa dausoqoni vata kikea na qele ni sipi kecega: a ra sa dauvaqiqica tani na vatu mai na gusu ni keli-wai, ka vagunuva na sipi, a qai vakasuka tale na vatu ki na kena tikina ki dela ni gusu ni keli-wai. 4A sa kaya vei ira ko Jekope, Dou sa maivei, na wekaqu? A ra sa kaya, Oi keitou mai Karani. 5A sa kaya vei ira, Dou sa kilai Lepani na luve i Neori, se segai? A ra sa kaya, Keitou sa kila. 6A sa kaya vei ira, Sa bula vinaka, se segai? A ra sa kaya, Sa bula vinaka; ka, raica, sa lako tiko mai ko Rejeli na luvena alewa kei na sipi. 7A sa kaya ko koya, Raica, sa siga levu toka, ka sega ni yaco na tiki ni siga me soqoni vata kina na manumanu: dou vagunuva mada na sipi, ka laʼki vakania. 8A ra sa kaya, E dredre, ni sa sega ni soqoni vata kece mada na qele ni sipi, a sa vaqiqici tani na vatu mai na gusu ni keli-wai; keitou qai vagunuva na sipi.

9Ni sa veivosaki tiko kei ira, sa lako mai ko Rejeli kei na sipi nei tamana: ni sa dauvakatawa ko koya. 10Ia ni sa kunei Rejeli ko Jekope, ko koya na luve i Lepani na gane i tinana, kei na sipi nei Lepani na gane i tinana, sa qai toro ko Jekope, ka vaqiqica na vatu mai na gusu ni keli-wai, ka vagunuva na qele ni sipi nei Lepani na gane i tinana. 11A sa reguci Rejeli ko Jekope, ka tabalaka na domona, ka tagi: 12a sa tukuna vei Rejeli ko Jekope ni sa weka i tamana, ka ni sa luve i Repeka: a sa cici ko koya, ka tukuna vei tamana. 13Ia ni sa rogoca ko Lepani nai rogo kei Jekope na luve i ganena, sa qai cici yani me laʼki veitata kaya, a sa mokota, ka reguca, ka kauti koya ki na nona vale. A sa mani tukuna vei Lepani na ka kecega o qori. 14A sa kaya vua ko Lepani, E dina ko sa suiqu ka lewequ. A sa tiko kaya ka dua na vula.

15A sa kaya vei Jekope ko Lepani, E dodonu li mo qaravi au walega e na vuku ni ko sa wekaqu? mo kaya vei au se cava me nomui voli. 16A sa rua na luvena alewa ko Lepani: a yacana ka qase ko Lia, a sa yacana ka gone ko Rejeli: 17sa mata malumalumu ko Lia; ia ko Rejeli, sa yago vinaka, ka rairai vinaka. 18A sa lomani Rejeli ko Jekope; a sa kaya, Au na qaravi iko ka yabaki vitu me noqu ko Rejeli na luvemu sa gone. 19A sa kaya ko Lepani, E vinaka meʼu solia vei iko, ka ca meʼu solia vua e dua na tamata tani: daru tiko mada. 20A sa qarava ko Jekope ka vitu na yabaki me nona ko Rejeli; a sa vaka na bogi vica walega vua e na vuku ni nona loloma vei koya.

21A sa kaya vei Lepani ko Jekope, Mo solia na watiqu, ni sa matata na noqu veisiga, ka meʼu laʼki curu vua. 22A sa va-kasoqoni ira vata ko Lepani na tamata kecega e na yasana ko ya, ka cakava na solevu. 23Ia e na yakavi, sa tauri Lia na luvena, ka kauta vua; a sa curu vua ko koya. 24A sa soli Silipa na nona vada ko Lepani kivei Lia na luvena, me vada. 25Ia e na sabogibogi, raica, sa ko Lia: a sa kaya ko koya vei Lepani, A cava o qo ko sa cakava vei au? au a tawa qaravi iko li me noqu ko Rejeli? a cava ko sa qai vaqaseni au kina? 26A sa kaya ko Lepani, E sega ni daucaka me vakaoqo e na neimami yasana, me soli koya eliu sa gone, ka soli koya emuri sa qase: 27mo vakaotia na kena wiki, keitou na qai soli koya o qo talega vei iko, e na vuku ni cakacaka ko na cakava vei au e na yabaki tale e vitu sa muri mai.

28A sa kitaka vakakina ko Jekope, ka vakaotia na kena wiki: a sa soli Rejeli na luvena ko koya vua me watina. 29A sa soli Pila na nona vada ko Lepani kivei Rejeli na luvena, me nona vada. 30A sa curu talega ko Jekope vei Rejeli, a sa lomani Rejeli ga ka cati Lia, a sa qaravi koya ka vitu tale na yabaki sa muri mai.

31A sa raica ko Jiova ni sa cati ko Lia, a sa cakava me vakasucu rawa: a sa yava ga ko Rejeli. 32A sa kunekune ko Lia, a sa vakasucuma na luvena tagane, a sa vakatoka na yacana ko Rupeni: ni sa kaya, Sa kunea dina ko Jiova na noqu rarawa: o koya o qo ena lomani au na watiqu. 33A sa kunekune tale, ka vakasucuma na goneatagane; a sa kaya, E na vuku ni sa rogoca ko Jiova niʼu a cati, sa solia kina vei au na gone talega o qo: a sa vakatoka na yacana ko Simioni [Sa rogoci]. 34A sa kunekune tale, ka vakasucuma na goneatagane; a sa kaya, Sa na qai vauci vei au o qo na watiqu, e na vuku niʼu sa vakasucuma vua e tolu na luvena tagane: o koya sa vakatokai kina na yacana ko Levi [Sa vauci]. 35A sa kunekune tale, a sa vakasucuma na goneatagane; a sa kaya, Au na qai ia na va-kavinavinaka vei Jiova: o koya sa vakatoka kina na yacana ko Juta [A vakavina-vinaka]; a sa qai cegu ni vakasucu.

Currently Selected:

Nai Vakatekivu 29: FIJ1864

Highlight

Copy