Nai Vakatekivu 27

Sa vakaroti Iso ko Aisake, 1-5. Sa vakavulici Jekope ko tinana me vakaisini Aisake, 6-17. Sa kauta na kei Aisake ko Jekope, ka sa lasutaki tamana, ka sa vosavakalougatataki kina, 18-29. Sa qai lako ko Iso, a sa rarama vakalevu ni sa butakoca ko Jekope na vosa me vakalougatataki kina, 30-40. Sa cati Jekope ko Iso, 41. Sa talai tani ko Jekope, 42-46.

1A SA yaco, ni sa qase mai ko Aisake, a sa kabukabu na matana, me tawa rai rawa, sa qai kacivi Iso na luvena sa ulumatua, a sa kaya vua, Na luvequ. A sa kaya vua, Raica, koi au. 2A sa kaya vua ko Aisake, Raica, kaʼu sa qase mai, au sa sega ni kila na siga kaʼu na mate kina: 3ia o qo, mo kauta mada na nomui yaragi, na nomu taga gasau kei na nomu dakai, ka lako yani ki na veikau, ka tobo manumanu vei au; 4ka cakava vei au na kakana kamikamica kaʼu sa vinakata, ka kauta mai vei au meʼu kania; ka me vosavakalougatataki iko na yaloqu, meʼu qai mate. 5Ia ko Repeka sa rogoca ni sa vosa ko Aisake kivei Iso na luvena. A sa lako yani ki na veikau ko Iso me tobo manumanu, ka me kauta mai.

6A sa vosa vei Jekope na luvena ko Repeka, ka kaya, Raica, kaʼu a rogoca ni sa vosa ko tamamu vei Iso na tuakamu, ni sa kaya, 7Mo kauta mai vei au na manumanu sa tobo, ka cakava vei au na kakana kamikamica, meʼu kana kina, ka vosavakalougatataki iko e na mata i Jiova, meʼu qai mate. 8Ia o qo, na luvequ, mo vakarorogo ki domoqu e na ka kaʼu sa vakarota vei iko. 9Mo lako mada ki na qele ni koti, ka kauta maikina vei au e rua na luve ni koti vinaka: ia kaʼu na cakavi rau me kakana kamikamica me kei tamamu, me vaka sa dauvinakata ko koya: 10ia ko na qai kauta vei tamamu, me kania ko koya, ka me vosavakalougatataki iko ni sa bula tiko.

11A sa kaya ko Jekope kivei Repeka na tinana, Raica, ko Iso na tuakaqu, sa tamata vutuvutua, ia koi au, kaʼu sa tamata drulua: 12de yamoci au ko tamaqu, ia kaʼu na qai vaka na dauveivaka-calai vua, kaʼu na vakayacora vei au na cudru, ka sega na kalougata. 13A sa kaya vua ko tinana, Me yacovi au na ka ko na cudruvi kina, na luvequ: mo vakarorogo ga ki domoqu, ka laʼki kauta mai vei au. 14A sa laʼki taura, ka kauta vei tinana: a sa cakava na kakana kamikamica na tinana, me vaka na ka sa dauvinakata ko tamana.

15A sa tara ko Repeka nai sulu vinaka ka tiko kaya e na vale, nei Iso na luvena ko koya sa qase, a sa vakaisulutaki Jekope na luvena sa gone: 16a sa vakaisulu-taka na ligana, kei na tiki ni domona sa drulua, e na kulidrau na luve ni koti: 17a sa solia ki na liga i Jekope na luvena na kakana kamikamica, kei na madrai, ka cokonaka oti ko koya.

18Asa lako vei tamana, ka kaya, I tamaqu. A sa kaya ko koya, Raica, koi au; o cei ko iko, na luvequ? 19A sa kaya vei tamana ko Jekope, Oi au ko Iso na nomu ulumatua; au sa cakava na ka ko a kaya vei au: mo duri mada, mo tiko ka kania na noqu manumanu sa tobo, ka me vosavakalougatataki au na yalomu.

20A sa kaya vei na luvena ko Aisake, E vakaevei ni ko sa kunea vakasauri vakaoqo, na luvequ? A sa kaya, E na vuku ni sa kauta mai ki mataqu ko Jiova na nomu Kalou.

21A sa kaya vei Jekope ko Aisake, Toro mada mai, meʼu yamoci iko, na luvequ, se dina ni sa luvequ ko Iso ko iko, se segai.

22A sa torovi Aisake na tamana ko Jekope; a sa yamoca, a sa kaya, A domona na domo i Jekope, ia na ligana na liga i Iso. 23A sa sega ni kilai koya, e na vuku ni sa vutuvutua na ligana me vaka na liga i Iso na tuakana: a sa vosavakalougatataka.

24A sa kaya, O iko dina na luvequ ko Iso, se segai? A sa kaya, Sai au ga.

25A sa kaya ko koya, Kauta mai vei au, kaʼu na kania na manumanu sa toboka na luvequ, ka me vosavakalougatataki iko na yaloqu. A sa kauta vua, a sa kana: a sa kauta vua na waini, a sa gunu. 26A sa kaya vua ko Aisake na tamana, Toro mada mai, ka reguci au, na luvequ. 27A sa toro, ka reguci koya: a sa boica nai boiboi ni nonai sulu, a sa vosavakalougatataki koya, ka kaya, Raica, nai boiboi kei luvequ sa vaka nai boiboi ni veiwere sa vakalougatataka ko Jiova: 28ia me solia ga vei iko na Kalou na tegu kei lomalagi, kei na uro kei vuravura, ka levu na sila, kei na waini: 29me qaravi iko na veimataqali, ka cuva vei iko na veimatanitu: mo turaga vei ira na wekamu, ia me ra cuva vei iko na luve i tinamu; me cudruvi ko ira era sa cudruvi iko, ka kalougata ko ira era vosavakalougatataki iko.

30A sa yaco, ni sa vosavakalougataki Jekope oti ko Aisake, a sa qai lako tani walega ko Jekope mai na mata i Aisake na tamana, sa qai lako ko Iso na tuakana mai na nona tobo manumanu. 31A sa cakava oti talega ko koya na kakana kamikamica, ka kauta mai vei tamana, a sa kaya vei tamana, Me duri mada na tamaqu, ka kania na manumanu sa toboka na luvena, ka me vosavakalougatataki au na yalomu. 32A sa kaya vua ko Aisake na tamana, O cei ko iko? A sa kaya ko koya, Oi au na luvemu, na nomu ulumatua, ko Iso. 33A sa sautaninini vakalevu sara ko Aisake, ka kaya, Ko cei? sa evei ko koya sa tobo manumanu, ka kauta mai vei au, kaʼu sa kana kece oti kina, ni ko a sega ni yaco mai, ia kaʼu sa vosavakalougatataki koya oti? io, ena kalougata ko koya. 34Ni sa rogoca na vosa i tamana ko Iso, sa tagi vakalevu e na qoqolou rarawa sara, a sa kaya vei tamana, Mo vosavakalougatataki au, io koi au talega, na tamaqu! 35A sa kaya, Sa lako vaqaseqase mai ko tacimu, a sa kauta tani na vosa mo vakalougatataki kina. 36A sa kaya ko Iso, Sa sega beka ni vakayacani ko koya ko Jekope [Qase-qase]? ni sa caka vaqaseqase vei au vakarua o qo: sa kauta tani na noqu ulumatua eliu; ka, raica, sa qai kauta tani o qo na vosa meʼu vakalougatataki kina. A sa kaya, O sa sega beka ni maninitaka e dua na vosa meʼu vakalougatataki kina?

37A sa vosa vei Iso ko Aisake, ka kaya, Raica, kaʼu sa cakavi koya me turaga vei iko, a sa soli ira kecega na wekana me qaravi koya; a sa vakaukauwataki koya e na sila kei na waini: ia na cava meʼu qai cakava vei iko, na luvequ?

38A sa kaya vei tamana ko Iso, Sa dua bau li na nomu vosa veivakalougatataki, na tamaqu? mo mani vosavakalougatataki au, io koi au talega, na tamaqu! A sa tabalaka na domona ko Iso, ka tagi. 39A sa vosa ko Aisake na tamana, a sa kaya vua, Raica, na nomui tikotiko ena yawa mai na uro kei vuravura, kei na tegu kei lomalagi maicake: 40ia ko na bula e na nomui seleiwau, ka qaravi koya na tacimu: ia ena yaco ni ko sa tadede, ko na qai musuka tani na nonai vau mai na domomu.

41A SA cati Jekope ko Iso, e na vuku ni vosa ni veivakalougatataki sa vosavakalougatataki koya kina ko tamana: a sa kaya e lomana ko Iso, Sa voleka na veisiga eda tagicaki tamaqu kina, au na qai vakamatei Jekope na taciqu.

42A sa tukuni vei Repeka na vosa o qo ni nona ulumatua ko Iso. A sa talaki ka kacivi Jekope na luvena sa gone, a sa kaya vua, Raica, ko tuakamu ko Iso, sa vakalecataki koya e na vukumu, ni sa nakita me vakamatei iko: 43ia o qo, mo vakarorogo mada ki domoqu, na luvequ; ka tu cake, mo dro vei Lepani na ganequ mai Karani: 44ka tiko kaya ka bogi vica walega, ka me saumaki tani mada na cudru katakata i tuakamu; 45ka me saumaki tani mada vei iko na cudru i tuakamu, a sa guilecava na ka ko sa cakava vua: au na qai talaki vei iko, ka kauti iko maikea: a cava mo drau yali ruarua kina vei au e na siga e dua?

46A sa kaya vei Aisake ko Repeka, Sa musuki na noqu bula e na vukudra na gonealewa i Eci: kevaka sa veiwatini ko Jekope kei na dua vei ira na gonealewa i Eci, sa vakai ira na gonealewa ni vanua o qo, a cava na kena yaga vei au na noqu bula?

Currently Selected:

Nai Vakatekivu 27: FIJ1864

Highlight

Copy