Nai Vakatekivu 19

E rua na agilose sa lako kivei Loti ki Sotoma, 1-3. A nodrai valavala ca na kai Sotoma, 4-11. Sa vakasalataki ko Loti me dro, 12-14. Sa kauti koya ki nai bili koi rau na agilose, 15-23. Sa vakarusai ko Sotoma kei na veikoro e so, 24-28. A nodraui valavala ca na luve i Loti, 30-38.

1A SA rua na agilose erau a lako ki Sotoma kei na yakavi; a sa tiko mai na matamata-ni-koro mai Sotoma ko Loti: ia ni sa raici rau ko Loti, sa tu cake ka laʼki tavaki rau; a sa vakacuva na matana kivaka ki na qele; 2a sa kaya, Raica, oi kemudrau na noqu turaga, au masuti kemudrau, mo drau lesu mada ka curuma na nona vale na nomudrau tamata, ka moce, ka vuya na yavamudrau; ia drau na sou e na sabogibogi, ka lako yani. A rau a kaya, E segai; keirau na moce e nai saqata ni koro. 3A sa cikevi rau vakalevu; erau sa qai lesu vua, ka curuma na nona vale: a sa caka magiti vei rau, a sa vavia na ka sa tawa vakaleveni, a rau sa kana.

4Ni ratou a sega ni koto, ko ira na lewe ni koro, io ko ira na kai Sotoma, era sa vakavolivolita na vale, na gone kei na qase, io na tamata kecega mai na veiyasana kecega: 5a ra sa kacivi Loti, ka kaya vua, Sa evei na tamata erau a lako mai vei iko e na bogi o qo? mani kauti rau mai kitautuba, me keimami veikilaki kei rau. 6A sa curu yani e na katuba vei ira ko Loti, ka sogota nai sogo ni katuba mai dakuna; 7a sa kaya, Na wekaqu, dou kakua mada ni caka ca: 8raica, sa rua na luvequ alewa erau sa sega ni veikilaki kei na tagane; meʼu kauti rau mada mai kitautuba vei kemudou, ia dou kitaka vei rau na ka e vinaka vei kemudou: ia dou kakua ni kitaka e dua na ka vei rau na tamata o qo; ni rau sa lako mai me vakakina, ki na yaloyalo ni noqu vale. 9A ra sa kaya, Toro yani. Era sa kaya talega, Sa dua na tamata o qo sa mai tiko vulagi bagi, a sa via lewa: keimami na qai kitaki iko vakaca vakalevu ka vakalailai vei rau: a ra a biliraka vakalevu na tamata, io ko Loti, ka laʼki toro ki nai sogo ni katuba me basuraka. 10Ia koi rau na tamata, erau a dodoka na liga-drau, ka yarataki Loti kivei rau ki loma ni vale, ka sogota na katuba. 11A rau sa yaviti ira na tamata era tiko mai na katuba ni vale me ra mataboko, ko ira na lalai kei ira na lelevu; a ra sa oca ni ra vakasaqara na katuba.

12A rau sa kaya na tamata vei Loti, O cei tale na nomu sa tiko eke? a vugomu, se luvemu tagane, se luvemu alewa, kei na nomu ka kecega e na koro o qo, mo kauta tani e na yasana o qo: 13ni keirau na vakarusa na koro o qo, ni sa levu na kedrai tukutuku e na mata i Jiova; a sa talai keirau ko Jiova me vakarusa. 14A sa lako yani ko Loti, ka vosa vei iratou na vugona, eratou veiwatini kei na luvena alewa, a sa kaya, Dou tu cake, dou lako tani e na yasana o qo; ni na vakarusa na koro o qo ko Jiova. A sa vaka ko koya e dua na dau-veivakalialiai vei iratou na vugona.

15Ia ni sa kida na mataka, erau a qai vakusarawataki Loti na agilose, ka kaya, Mo tu cake, mo kauta na watimu, kei rau na luvemu alewa erau tiko eke; de ko rusa e nai valavala ca ni koro. 16Ia ni sa vaka-berabera ko koya, erau a taura na ligana na tamata, kei na liga i watina, kei na liga-drau na luvena alewa; ka ni sa lomana na Kalou: a rau a kauta yani, ka laiva e nai bili ni koro. 17Ia ni rau sa kauti iratou ki nai bili, sa qai kaya e dua vei rau, Dro mada mo bula; kakua ni rai kimuri, mo kakua ni vakacegu e na buca kecega sa volita; dro ki na ulu-ni-vanua, de ko rusa. 18A sa kaya vei rau ko Loti, Me kakua mada, noqu Turaga: 19raica, sa kune loloma e matamu na nomu tamata, ko sa vakalevuya talega na nomu loloma, a ya ko sa cakava vei au ni ko sa vakabulai au; ia e dredre ni kaʼu sa dro ki na ulu-ni-vanua, de tauvi au na ca, kaʼu na mate kina: 20raica, na koro o qo sa voleka meʼu sa dro kina, ia sa lailai wale: meʼu dro mada kina, (e lailai, ne?) ia au na qai bula. 21A sa kaya vua, Raica, kaʼu sa vakarorogo vei iko e na ka o qo tale, niʼu na tawa vukica na koro o qo, ko sa vosataka: 22mo kusarawa, mo dro kina; ni sa sega e dua na ka kaʼu cakava rawa ni ko tawa yaco kina. O koya sa vakayacani kina na koro ko ya ko Soeri [Lailai]. 23Sa cadra na siga ki vuravura ni sa yaco ki Soeri ko Loti.

24Sa qai vakatauca ko Jiova na sulifure kei na ka sa waqa maivei Jiova mai lomalagi, ki na dela i Sotoma kei Komora; 25a sa vukica na veikoro ko ya, kei na buca kecega sa volita, kei ira kecega na lewe ni veikoro, kei na ka sa tubu mai na qele.

26Ia na watina ni sa muria sa rai kimuri, a sa yaco me duru masima.

27A sa sou e na sabogibogi ko Eparaama, ka lako ki na yasana ka tu kina ko koya e na mata i Jiova: 28a sa rai yani vaka ki Sotoma kei Komora, kei na vanua kecega mai na buca sa volita, ka dikeva, ka raica, sa lako cake na kubou ni vanua ko ya me vaka na kubou ni lovo.

29A sa yaco, ni sa vakarusa na veikoro mai na buca na Kalou, sa nanumi Eparaama na Kalou, ka vakatalai Loti mai na loma ni veivakarusai, ni sa vakarusa na veikoro ka tiko kina ko Loti.

30A sa lako cake mai Soeri ko Loti, ka laʼki tiko mai na ulu-ni-vanua, kei rau vata kaya na luvena alewa e lewe rua; ni sa rere ni tiko mai Soeri: a sa tiko e na dua na qara-vatu, ko koya kei rau na luvena alewa. 31A sa kaya na ulumatua vua ka gone, A tamadaru sa qase mai, a sa sega na tagane e na vanua o qo me mai curumi kedaru, me vaka nai valavala ni veivanua kecega: 32daru ia mada, daru vagunuva na tamadaru e na waini, me daru koto kaya, me daru vakaivakawa vua na tamadaru. 33A rau a vagunuva na tamadrau e na waini e na bogi ko ya: a sa curu na ulumatua, ka laʼki koto kaya na tamana; ia sa sega ni kila ko tamana na nona laʼki koto se na nona tu cake. 34Ia e na sabogibogi, sa kaya na ulumatua vua sa gone, Raica, kaʼu a koto kei tamaqu e na bogi e na noa: daru vagunuva e na waini e na bogi o qo talega; ia mo curu vua, mo koto kaya, me daru vakaivakawa vua na tamadaru. 35A rau a vagunuva na tamadrau e na waini e na bogi ko ya talega: a sa tu cake ko koya ka gone, ka laʼki koto kaya; a sa sega ni kila ko tamana na nona laʼki koto se na nona tu cake. 36A rau sa bukete ruarua na gonealewa i Loti vua na tamadrau. 37A sa vakasucuma na luvena tagane ko koya na ulumatua, a sa kaciva na yacana ko Moapi: o koya na tamadra na luve i Moapi era bula e na gauna o qo. 38Ia ko koya ka gone, sa vakasucuma na luvena tagane ko koya talega, a sa kaciva na yacana ko Peni-ami: o koya na tamadra na luve i Amoni era bula e na gauna o qo.

Currently Selected:

Nai Vakatekivu 19: FIJ1864

Highlight

Copy