Nai Vakatekivu 14

Erai tolu na turaga lelevu, a sa gu ca ko tui Sotoma kei ira na nonai to, a sa bobulataki ko Loti, 1-12. Sa cici muri ira ko Eparama, ka kauti ira tale mai, 13-16. Sa laʼki tavaki Eparama ko Melikiseteki, 18-20. Sa vakasuka rei tui Sotoma na nona ka ko Eparama, 21-24.

1ASA yaco e na gauna i Amirafeli na tui Sainari, ko Arioki na tui Elasari, ko Ketorileomeri na tui Ilami, kei Titali na tui ni veivanua e so; 2eratou a veivaluti ko iratou o qo kei Pira na tui Sotoma, kei Pirisa na tui Komora, kei Sinapa na tui Atima, kei Semeperi na tui Sepoimi, kei tui Pela, ko ya ko Soeri. 3Eratou sa vei-yacovi ko iratou kecega o qo mai na buca mai Sitimi, o ya na Wasawasa tuituina. 4E tinikarua na yabaki a ratou qaravi Ketorileomeri tiko, ia e na kenai katini-katolu ni yabaki eratou bese. 5Ia e na kenai katinikava ni yabaki sa lako mai ko Ketorileomeri, kei iratou na turaga lelevu eratou tiko kaya, a ratou sa mokuti ira na luve i Refei mai Aseteroci Karineimi, kei ira na luve i Susi mai Ami, kei ira na luve i Emimi mai Save-kiriaceimi; 6kei ira na luve i Hori mai na nodra ulu-ni-vanua ko Seira, ka yacovi Eli-perani, a ya sa voleka ki na lekutu. 7A ra sa lesu, ka lako mai ki Eni-misipata, ko ya ko Ketesa, ka mo-kuta na nodra vanua kecega na luve i Amaleki, kei na luve i Amori, era tiko mai Hesesoni-tamari.

8A sa lako yani ko tui Sotoma, kei tui Komora, kei tui Atima, kei tui Sepoimi, kei tui Pela, (a ya ko Soeri); a ra sa laʼki tuvai valu vei ira e na buca mai Sitimi; 9io vei Ketorileomeri na tui Ilami, kei Titali na tui ni veivanua e so, kei Amirafeli na tui Sainari, kei Erioki na tui Elasari; e va na tui e na dua nai taba, ka lima na tui e na dua nai taba. 10A sa vuqa na keli qele dregadregata e na buca mai Sitimi; a rau a dro na tui Sotoma kei Komora, a rau a bale maikina: ia ko ira na vo, era a dro ki na ulu-ni-vanua. 11A ra kauta na yau kecega ni Sotoma kei Komora, kei na kedra kakana kecega, ka lako yani: 12a ra sa kauti Loti, na luve ni tuaka i Eparama, (ni ka tiko ko koya mai Sotoma,) kei na nona yau, ka ra sa lako tani.

13Ia e dua vei ira sa bula, sa lako mai ka tukuna vei Eparama na Iperiu; ni sa tiko ko koya mai na kau e so nei Mamire na luve i Amori, a taci i Esikoli, kei na taci i Aneri: a ratou a veiyalayalati kei Eparama ko iratou o qo. 14Ia ni sa rogoca ko Eparama ni sa kauti vakabobula na wekana, sa vakayaragitaki ira na nona tamata sa vakavulici, o ira era sa sucu e nona vale, e tolu na drau ka tinikawalu, ka vakasava ki Tani: 15a sa wasei ira na nona tamata me lutuki ira e na bogi, a sa mokuti ira, ka vakasavi ira ki Hopa, a ya ki nai mawi mai Tamasiko: 16a sa kauta i tale mai na yau kecega; kei Loti talega na wekana, kei na nona yau, kei ira talega na alewa, kei ira na tamata, sa kauta tale mai ko koya.

17Ia ko tui Sotoma sa laʼki tavaki koya ni sa lesu mai (ni sa mokuti Ketorileomeri oti, kei iratou na turaga eratou a tiko kaya), io sa laʼki tavaka mai na buca mai i Seve, ko ya na nona buca na turaga levu. 18A sa kauta yani na madrai kei na waini ko Melikiseteki na tui Selemi: ia ko koya sa nona bete na Kalou cecere sara. 19A sa vosavakalougatataki koya, ka kaya, Sa kalougata ko Eparama vua na Kalou cecere sara, o koya sai taukei kei lomalagi kei vuravura; 20me vakavinavi-nakataki talega na Kalou cecere sara, o koya sa soli ira na nomu meca ki na ligamu. A sa solia vua nai katini ni ka kecega ko Eparama.

21A sa kaya vei Eparama ko tui Sotoma, Mo soli ira mada mai vei au na tamata, ka kauta na yau me nomu. 22A sa kaya vei tui Sotoma ko Eparama, Au sa laveta oti na ligaqu vei Jiova, na Kalou cecere sara, ko koya sai taukei kei lomalagi kei vuravura, 23meʼu kakua ni kauta e dua na vulovulo se dua na wa ni vava, se dua na ka sa nomu, de ko kaya, Au sa vaka-vutuniyautaki Eparama: 24a ka ga era sa kania na cauravou, kei na nodrai votavota na tamata keitou a lako kaya, ko Aneri, ko Esikoli, kei Mamire; me ratou kauta ga na nodratoui votavota.

Currently Selected:

Nai Vakatekivu 14: FIJ1864

Highlight

Copy