A Cakacaka 6

Eratou sa vinakata sara nai apositolo me ratou gumatua e na vunau, a sa dredre kevaka sa vakaogai iratou na veivota ni gau vei ira na dravudravua, 1-4. A ratou sa qai lesia na tamata e so me ratou vota nai yau, sa dua vei iratou ko Sitifeni, 5-7. Era sa cati Sitifeni ko ira e so, ka beitaka vakailasu vei ira na bete, 8-15.

1IA e na gauna ko ya, ni sa lewe vuqa era sa lotu, era sa didi ko ira ka vulagi e na veimatanitu kisau vei ira na Iperiu, ni sa tawa nanumi ko ira na nodra yada e na veivota ni yau e na veisiga. 2Sa qai vakasoqoni ira vata na lewe vuqa sa lotu ko iratou na tinikarua, ka kaya, Sa sega ni dodonu me keitou biuta na vosa ni Kalou, ka qarava nai tutu ni lavo. 3O koya, oi kemudou na veiwekani, mo dou qai vakasaqara vei kemudou e lewe vitu na tamata sa rogorogo vinaka, eratou sinai e na Yalo Tabu kei na vuku, me keitou lesi iratou ki na cakacaka o qo. 4Ia koi keitou, keitou na gumatua sara c na masu, kei na vunautaka na vosa.

5A sa vinaka vei ira kecega na lewe vuqa na vosa o qo: a ra sa digitaki Sitifeni, e dua na tamata sa sinai e na vakabauta kei na Yalo Tabu, kei Filipo, kei Pirokoro, kei Nikanori, kei Timoni, kei Parimina, kei Nikola, a tamata lotu vaka-Jiu mai Anitioki: 6a ra sa vakaturi iratou e na matadratou nai apositolo: ia ni ratou sa masu oti, eratou sa tabaka e na ligadratou. 7A sa gumatua na vosa ni Kalou; a sa vakalevutaki sara na kedrai wiliwili era sa lotu mai Jerusalemi; a sa lewe vuqa talega na bete era sa talairawarawa ki na vakabauta.

8A sa sinai e na vakabauta kei na kaukauwa ko Sitifeni, a sa kitaka e so na ka e veivakidacalataki kei na caka-mana levu e na kedra maliwa na tamata. 9Sa qai tu cake e so mai na nodra vale ni lotu, a yacadra Ko ira na sereki, kei na kai Kirini e so, kei na kai Alekisadria e so, kei ira e so mai Silisia, kei Esia, a ra sa veileti kei Sitifeni.

10A ra sa sega ni qarava rawa na nona vuku kei na yalona sa vosa kina ko koya. 11A ra sa kauta lo mai na tamata e so, era sa kaya, Keitou sa rogoci koya o qo ni sa vosavakacacataki Mosese kei na Kalou. 12A ra sa vakayavalati ira na tamata, kei ira na qase, kei ira na vu-ni-vola, a ra sa cici vakaivalu vua, ka taura, a ra sa kauta vei ira na mataveilewai, 13a ra sa vakatura e so na dauveibeitaki vakailasu, a ratou sa kaya, Sa sega ni mudu na tamata o qo ni sa vosavakacacataka na tikina tabu o qo, kei na vunau: 14ni keitou a rogoca ni sa kaya, Ena vakarusa na tikina o qo ko Jisu o qo na kai Nasareci, ka na vukica me biu nai valavala sa solia vei keda ko Mosese. 15Ia ko ira kecega sa tiko e na vale ni veilewai, ni ra sa vakaraica matua, era sa raica na matana ni sa tautauvata kei na mata ni dua na agilose.

Currently Selected:

A Cakacaka 6: FIJ1864

Highlight

Copy