A Cakacaka 4

Erau sa biu ko Petero kei Joni ki na vale ni veivesu, 1-4. E na sabogibogi erau sa lewai, a sa tukuni Jisu ko Petero, 5-22. Era sa masu na lewe ni soro kecega, a ra sa vakasinaiti e na Yalo Tabu, a sa kaukauwa na vunau; a ra sa veilomani sara na tamata lotu, 23-37.

1IA ni rau sa vosa tiko vei ira na tamata, sa cici mai vei rau ko ira na bete, kei na turaga ni vale ni soro, kei ira nai tokani i Satoki, 2ni ra sa cudru ni rau sa vakavulici ira na tamata, ka vunautaka na tu cake tale mai na mate e na vuku i Jisu. 3A ra sa tauri rau, ka biuta ki na vale ni veivesu me sabogibogi mada mai; ni sa qai yakavi.

4Ia ka lewe vuqa era sa rogoca na vosa, era sa vakabauta; ia na nodrai wiliwili na tagane sa lima beka na udolu.

5Ia e na sabogibogi, era sa soqoni vata mai Jerusalemi ko ira na nodra turaga, kei ira na qase, kei ira na vu-ni-vola, 6kei Anasi na bete levu, kei Kaiafa, kei Joni, kei Alekisadro, kei ira kecega na mataqali ni bete levu. 7Ia ni ra sa vakaturi rau e na kedra maliwa, era sa taroga, A kaukauwa cava, se na yaca i cei, drau sa cakava kina na ka o qo? 8Sa qai sinai ko Petero e na Yalo Tabu, a sa kaya vei ira, Oi kemudou na nodra turaga na tamata, kei na nodra qase na Isireli, 9kevaka keirau sa tarogi e na siga edaidai e na cakacaka vinaka vua na tamata lokiloki, se na vuku ni cava sa qai bula kina; 10mo dou kila kecega, kei ira kecega na Isireli, ni sa yaca i Jisu Karisito na kai Nasareci, o koya dou a vakota ki na kauveilatai, o koya sa vakatura cake tale ko na Kalou mai na mate, io, e na vukuna ga sa tu kina eke ko koya o qo e na matamudou ka sa bula vinaka. 11O qo na vatu dou a cata sara koi kemudou na matai ni vale, ko ya sa yaco mei teteki e na tutu ni vale. 12A sa sega na bula e na vukuna e dua tani: ni sa sega sara e dua tale na yaca e ruku i lomalagi sa soli kivei ira na tamata, me da bula rawa mai kina.

13Ia ni ra sa raica na nodrau doudou ko Petero kei Joni, ni ra sa kila talega erau sa tawa vuku so, se rau turaga, era sa kidacala kina; a ra sa qai vakasami rau, ni ratou a dautiko vata kei Jisu. 14Ia ni ra sa raica na tamata ka vakabulai mai, ni sa wavu tu vata kei rau, era sa sega ni vakatitiqataka rawa. 15Ia ni ra sa vakatalai rau tani me rau lako tani e na vale ni veibose, era sa qai bose vakai ira, 16ka kaya, A cava me da kitaka vei rau na tamata o qo? ni sa kila ko ira kecega sa tiko e Jerusalemi, ni sa dua na caka-mana rogo erau sa cakava; ia eda sa sega ni vakatitiqataka rawa. 17Ia de tukuni vakalevu vei ira na tamata, me da kaya ga, me rau cudruvi sara kevaka erau vakavuvuli tale vua e dua na tamata e na yaca o qo. 18A ra sa kacivi rau, a ra sa vakarota vei rau me rau kakua sara ni vosai se vakavuvuli e na yaca i Jisu.

19Sa qai vosa ko Petero kei Joni, a rau sa kaya vei ira, E dodonu se segai e na mata ni Kalou me keirau vakarorogo vei kemudou ka kakua vua na Kalou, mo dou lewa ga mai: 20ni sa dredre vei keirau me kakua ni tukuna na veika keirau a raica ka rogoca. 21Ia ni ra sai sega ni kunea e dua na ka me rau cudruvi kina, era sai vosa vakacudrucudruya tale vei rau, a ra sai qai laivi rau me rau lako, e im vukudra na tamata: ni ra sa vakarokorokotaka na Kalou ko ira kecega e na vuku ni ka sa qai caka. 22Ni sa vasagavulu ka mani vakacaca na nona yabaki, o koya na tamata sa caka vua na caka-mana o qo ka bula kina.

23Ia ni rau sa vakatalai tani, erau sai lako vei ira na nodraui tokani, ka tukuna na ka kecega era a vosataka vei rau ko ira na bete levu kei ira na qase. 24Ia ni ra sa rogoca, era sa lomavata ka tabalaka cake na domodra vua na Kalou, ka kaya, Turaga, o iko na Kalou, o a buli lomalagi, kei vuravura, kei na waitui, kei na ka kecega sa tu kina: 25e na gusu i Tavita na nomu tamata ko a kaya, Sa daucudru na veimatanitu e na vuku ni cava, ka sa vakananuma na ka walega ko ira na lewe ni veivanua? 26era sa tuvai valu na tui kei vuravura, a ra sa soqoni vata ko ira na turaga me ra veivala kei Jiova, kei na nona Karisito. 27Ni sa dina era sa soqoni vata me ra veivala kaya na Luvemu yalosavasava ko Jisu, o koya ko a lumuta, (oi rau ko Eroti kei Ponitio Pilato, kei ira na veimatanitu, kei ira na veiyavusa ni Isireli,) 28me ra kitaka kecega na ka ko a lesia eliu me caka, me vaka na nomu kaukauwa kei na nomui naki. 29Ia o qo, Turaga, mo raica na nodra vosa vakacudrucudruya; ka solia kivei ira na nomui talatala, me ra doudou vakalevu ni ra tukuna na nomu vosa, 30ni ko sa dodoka tiko na ligamu me ia na veivakabulai, me caka talega nai vakatakilakila e so kei na ka e veivakidacalataki, e na yaca ni Luvemu yalosavasava ko Jisu.

31Ia ni ra sa masu oti, sa vakayavalati na vale era sa soqoni vata kina; a ra sa dui vakasinaiti kecega e na Yalo Tabu, a ra sa doudou kina ni ra sa tukuna na vosa ni Kalou.

32Ia ko ira na lewe vuqa era sai vakabauta, era sa lomavata ka yalovata; a sa sega e dua e kaya me nona duaduaga na ka sai tu vua; a ra sa taukena vata na nonai yau yadua. 33A sa levu na nodratou kaukauwa nai apositolo, ni ratou sa tukuna ni sai tu cake tale mai na Turaga ko Jisu: a sa vinakati vakalevu ko ira kecega. 34Ni sa sega e dua vei ira sa dravudravua; o ira kecega sa taukena na vanua se na veivale, era sa volitaka, a ra sai kauta nai voli ni ka era sai volitaka, 35a ra sa virikotora ki na yavadratou nai apositolo: a sai vota yadua vei ira kecega me vaka na nodra dui dravudravua.

36O Josese talega, o koya eratou sa vaka-toka ko iratou nai apositolo me Parinapa, (ai kenai balebale, A gone ni vakacegu,) a luve i Levi, a kai Kipiro, 37o koya sa taukena e dua na tiki-ni-vanua, sa volitaka, a sa kauta na kenai voli, ka virikotora ki na yavadratou nai apositolo.

Currently Selected:

A Cakacaka 4: FIJ1864

Highlight

Copy