Malke Welipiɛ
Welipiɛ
Malke sɔɔnyɔ yɔ bhɔ -tia 'a? 'Nyɔkpɔ 'na -ɔ -kwɛle Zezu 'na "kɔlepɔnya yɔ 'awɔ -lɔ. Malke 'pɔ -me 'lelee -lɔ Zaa. 'Ɔ -nyɛ 'ɔ "nɔ Mali "bhaa -ko 'awɔ Zeluzalɛmedu "me (Noli 12.12). Banabase 'na 'nyɔ yɔ -lɔ (Kol 4.10). 'Ɔɔ -kwɛle -lɔ Banabase -nyɛ Pɔle "bhaa Atiɔsedu "me -gwe "ku (Noli 12.25). "Bhle -ce 'ye Lagɔgligbɛ "me 'na 'nyakpa -lebheloa -lɔ -gbɔ 'wa me 'Denaade -glɔ 'klekle -sɛle -ka. 'Wanɛɛ tɛtɛ -glɔku -mee 'wa -me -wɛ, Malke -kwɛloa -lɔ -gweku -se 'ɔ "koa kwɛle- (Noli 13.5-13). -Sɔɔdɛku 'wa -ko me dɛku -wɛ, "ne 'ɔ yua -lɔ yɔko 'bha- "ne 'ɔ yi -lɔ Zeluzalɛmedu "me 'wli zɔzi (Noli 13.5-13). Lɔbhɔ "kɛ "me gwɛlɛ- 'tekeyi ne, Banabase libhi- Malke "ku "ne 'wa yi -lɔ Sipledu "me me (Noli 15.37; 15.37-39).
Lɔbhɔ "kɛ 'lelee "me gwɛlɛ- 'tekeyi ne, -a 'ye- Pɔle -nyɛ Piɛle "bhaa 'na "bɔgo "me 'ylime -gbɔ Malke -kwɛloa -sɔɔdɛku 'wa -ko nɛ Wlɔmodu "me -wɛ (File 24; 2 Timo 4.11; 1 Piɛle 5.13). "Ɛ 'Denaade ne "me, 'ye Malke -bhulɛle -lɔ -anye -gbɔ Zezu, Lagɔ 'na yu yɔ -lɔ. "Ne Zezu -noɔ -me 'lelee -lɔ 'Nyɔkpɔ Yowli -ɔ -yi -anye 'fuɔ -ka "ne 'ɔ yi -anye 'ɔnɛɛ zikpɛ kɔ 'je -se 'ɔ "kɛ 'nyakpa -kwleyia 'fuɔ -wɛ yɔ -lɔ (Malke 10.45).
Malke 'na 'Denaade "ne "me -tlomale 'ɔlua -nɛ 'nasɛ, -mɔ 'ɛ -ko weli 'na -weli -ɛ bhlia 'dle -wɛ "me. Malke 'ci- lɛ 'ɔnɛɛ 'Denaade "ku ne, 'ɔ -bhulɛle 'lelee -anye -gbɔ Zaa Batise 'nyɛ- -lɔ Zezu batɛme. "Ne Zuzu -nyɛnye yu -lɔ "me 'bea- (Malke 1.1-13). 'Ɔ -dli 'ɔnɛɛ 'Denaade 'ci "sɔ "ku "me. Tɛtɛnɛ -wɛ "me (Malke 1.14; 8.26) 'ɔ -bhulɛle -lɔ -anye -ye Zezu -no -glɔnya 'yliku Galiledu "me -wɛ. 'Ɔ -bhulɛ -me 'lelee -gbɔ Zezu -tɔ 'nyakpa -wa "kɔ 'gɛle- -wɛ. Malke nɛɛ Zezu 'bhɛle- 'ɔ "kɛ 'nyakpa Zuzu -nyɛnye keyi -sɛ, "ne -see 'ɔ -yamalea gwizinya "ne -see 'ɔ -sloa -see Lagɔ 'bhɛle- -li "ne -see 'ɔ 'pɔ- zɛzɛ -kwleyi -wɛ.
-Mɔ, "sɔnɛ -wɛ "me (Malke 8.27; 16.20) Malke nɛɛ Zezu "ku- "ne 'ɔ yi -lɔ gluzɔ 'wlo. -Sɔɔdɛku Wlɔmodu "me 'na "slojayu -ɔ -kole Zezu klowa "klo -wɛ 'ye- lɛ Zezu 'na -gɛzɛnɔ 'ylime ne, sɛne 'ye 'ɔ lɛ -lɔ nɛɛ: -Diɛnadiɛ, "ɛ 'nyɔkpɔ ne, Lagɔ 'na yu yɔ nɛ -kɛ 'ce -lɔ 'diɛɛ! (Malke 15.39). Malke nɛɛ: -A 'kɛle- -me 'dleku -gbɔ Lagɔ 'na yu yɔ -lɔ 'diɛɛ.
Malke 'na 'Denaade 'na 'wlisɛledɛ "me 'ye 'ɔ -bhulɛle -lɔ -anye 'cibhɛ 'tekeyi nɛɛ: Zezu "ku- "ne 'ɔ 'wlo- gluzɔ (Malke 16.1-8). Soɔ za, 'ɛnɛɛ 'wlizɔbhiɛledɛ "me "bɔgokɛlenya yi -lɔ no nɛɛ: Zezu "ku- "ne 'ɔ 'wlo- gluzɔ, "ne 'ɔ 'tuɔ- 'ɔyi 'ɔnɛɛ gɛlenya 'ylime, "ne 'ɔ yi -da -lɔ "nɔgɔ "me 'gblɛ.
Currently Selected:
Malke Welipiɛ: btg
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.