Malke 10

Zezu -bhulɛ 'sueplɛweli

(Matie 19.1-9; Luke 16.18)

1Zezu 'bha- lɛ doɔ cuu ne, Zude -glɔ "me 'ye 'ɔ -me -lɔ Zludɛ keyi. "Ne -zakpɛ yu 'lelee -lɔ bli-. "Ne 'ɔ yua -lɔ 'sloa-, -see 'ɔ 'sloa 'yiɛ -wɛ. 2Faliziɛnya 'nyiɔ- Zezu yɔko -se 'wa "kɔ "me 'bea-. "Ne 'wa 'yɔbhɔ -lɔ lo nɛɛ: «'Nyɔkpɔ yi bhɔ 'ɔnɛɛ 'ŋɔnɔ 'na lo -sɛ?» 3"Ne Zezu yua -lɔ lo 'yɔbhɔ nɛɛ: «Gbɛɛ 'na -ye Moyize 'je- 'anye kɔ -wɛ 'pa- bhɔ -lɛ?» 4Ŋwɛnɛɛ: «'Nyɔkpɔ kɛ 'ɔnɛɛ 'ŋɔnɔ 'na lo -sɛ ne, Moyize nɛɛ 'ɔ 'piɔ losɛbɔgɔ keyi -se 'ɔ "kɛ 'ɔnɛɛ lo -sɛ.» 5Zezu nɛɛ: «Moyize kɛ -ɛwɛ kɛle- ne, 'anyɛɛ 'dle 'kɛkɛle -wɛ za 'ɔ 'kɛle- -lɔ. 6-Mɔ, zikpɛ 'na "kucidɛku, Lagɔ 'wlɛ- 'widi -nyɛ 'ŋɔnɔ "bhaa. 7-Ɛwɛza, 'widi "kɛ -lɔ 'ɔ 'to -nyɛ 'ɔ "nɔ "bhaa yɔko 'bha-, "ne 'ŋɔnɔ "bhaa 'wa "kɛ -lɔ -bholo "zo. 8"Ne 'wayi "sɔ "kɛ -lɔ 'nyɔkpɔ -bholo "zo. 'Ɛza, 'wa "ne -la "sɔ -yle, -mɔ, 'nyɔkpɔ -bholo 'wa "zo -lɔ. 9Zaa, -ye Lagɔ "zoa- -bholo -wɛ, 'nyɔkpɔ te -kɛ 'yli "me -seselia.» 10'Wa "kɛ sueme ylɛ ne, gɛlenya 'yɔbhɔ- -lɔ Zezu lo "kusɔ "ɛ weli -wɛ za. 11'Ɔ nɛɛ: «'Widi kɛ 'ŋɔnɔ 'na lo -sɛ "ne 'ɔ kɛ -vinɔ -kwɔ, gbo 'ɔ zlɛ -lɔ, tɛtɛŋɔnɔ 'ye 'ɔ -no -lɔ ylo. 12'Ŋɔnɔ kɛ 'widi 'na lo -sɛ, "ne 'ɔ kɛ -vinɔ -kwɔ, gbo 'ɔ -zlɛ -lɔ.»

Zezu 'pɔ- yua 'ŋu

(Matie 19.13-15; Luke 18.15-17)

13'Nyakpa -nɛme yua Zezu -se 'ɔ "koa 'kwlɛ 'wli 'piɛ, -mɔ, 'ɔnɛɛ gɛlenya "ne "ku 'ŋunu-. 14Zezu 'ye- lɛ "ɛ -ɛwɛ 'ylime ne, 'kɛle 'ye 'ɔ 'pɔ- -lɔ. "Ne 'ɔ yua -lɔ bhulɛle- nɛɛ: «'A 'tale- yua 'yi -se 'wa "kɛ -ame lo yili-, -mɔ, 'a toa 'yliku 'titi, "naa-, -wa -ko sɛgbɛɛ yua -wɛ, 'wa 'bhe- -lɔ Lagɔ 'na 'Kamalezikpɛ. 15Gbɛklɛklɛ 'ye 'e bhulɛle lɛ 'anye: -Ɔ 'kwlialea 'ɔyi "ku Lagɔ 'yli "ku sɛgbɛɛ yu -wɛ, 'ɔɔ "kɛ -lɔ Lagɔ 'na 'Kamalezikpɛ "me bhɔlɔ- -me.» 16"Ne Zezu yi -lɔ yua "ku 'tule-, "ne 'ɔ yua -lɔ sɔ 'wli 'piɛ, "ne 'ɔ yua -lɔ 'ŋu "pɔ.

'Lɛkɛlenyɔ -nyɛ Zezu "bhaa

(Matie 19.16-30; Luke 18.18-30)

17-Sɔɔdɛku Zezu -sɔ "ku -gbɔ 'ɔ "kɛ me -wɛ, 'nyɔkpɔ -bholo -guɔ "ne 'ɔ yi -lɔ Zezu 'dle "me 'sibhɔ, "ne 'ɔ yu -lɔ -kokomini 'dle "me 'pɔle. 'Ɔ nɛɛ: «Sloanyɔ "namanɔ -ye 'e "kɛ bhɔ no "ne 'e "kɛ bhɔ zikpɛ 'na -ɛ -ka "kubhiɛ -wɛ yle 'a?» 18Zezu nɛɛ: «Sɔɔbɛɛza, -e la bhɔ -ame "namanɔ? 'Nyɔkpɔ 'na -ɔ -noɔ "namanɔ yɔ "ne -le dodo ne "ku, 'ɛ "mɔ Lagɔ -bholo -kpee yɔ! 19-E -yi Lagɔ 'na gbagbɛ -ɛ no nɛɛ: Te -kɛ 'nyɔkpɔ 'lɔbhɔ. Te -kɛ gbo zlɛ. Te -kɛ 'wi 'yli. Te -kɛ "fu -eluyu gbo 'wlime "gbli. Te -kɛ yo wlɛ gou. "Zo -e 'to -nyɛ -e "nɔ "bhaa 'plome.» 20"Ɛ 'nyɔkpɔ -wɛ nɛɛ: «Sloanyɔ, 'e -noɔ 'awɔ yu yɔ "ne 'e "zo 'awɔ -lɔ -ɛwɛ 'klekle 'plome.» 21Zezu -wolo "ku, "ne 'ɔ yu -lɔ 'wamale- "ne 'ɔ yu -lɔ bhulɛle- nɛɛ: «'Ɛ -to "bhle -bɛɛ' -bholo 'na -ye -e "ne lɛ -no ne. Me, -se -ye -e -kɛ -wɛ 'pɛ 'pɔlo "ku. -Se 'ɛnɛɛ 'dlasi -wɛ 'je "nyɛzenya kɔ, -se -e "kɛ "nɔgɔ -klɔgbɔ yle. Yi -se 'gɛle- -ame.» 22"Ɛ 'nyɔkpɔ -wɛ "kɛ Zezu 'na weli -wɛ "me 'no "bhuɔ ne, "klo 'ye 'ɔ -nyɛne -lɔ, "ne 'ɔ yi -lɔ me, 'dle 'yiɔ- 'nuɔ. 'Ɔ -kɛ 'awɔ -li 'na 'gbagbo zɛ.

23Zezu -wolo 'ɔnɛɛ gɛlenya -wa -blu -wɛ "ku, "ne 'ɔ yua -lɔ bhulɛle- nɛɛ: «Lɛkɛlenyɔ "kɛ Lagɔ 'na 'Kamalezikpɛ "me plɛ, 'ɛ 'tɛ- "me kpɛnyee!» 24"Ɛ welicibhɛ -wɛ -sɛ gɛlenya geji "ku. Zezu nɛɛ: «'Na 'yuanye, Lagɔ 'na 'Kamalezikpɛ "me 'na plɛplɛɛ 'tɛ- -kɛ "me. 25Samo "kɛ 'mneyi 'na -gwe "me plɛ ne, 'ɛ ne "me 'tɛ-. -Mɔ, -klɔgbɔnyɔ "kɛ Lagɔ 'na 'kamalezipkɛ "me plɛ, 'ɛ 'tɛ- "me "ne 'ɛ -zi "ku.» 26Geji 'bha gɛlenya "ku "yiɛ "ne 'wa 'yɔbhɔyɔbhɔle -lɔ nɛɛ: «Zaa, lɔbhɔ 'na dɛku -ɔ 'cɛ bhɔ 'nu 'po 'a?» 27"Ne Zezu -woloa "ku, 'ɔ nɛɛ: «'Nyakpa 'na dɛku, 'ɛ "ne 'bhɛle-, -mɔ Lagɔ 'na dɛku 'ɛ "ne "me -ŋɛnɛ. "Naa- Lagɔ 'bhɛle- -li 'klekle.» 28"Ne Piɛle yu -lɔ bhulɛle- nɛɛ: «-E -gɛ 'yli Anyinɛnyɔ, -a 'bha- -anyɛɛ -li 'klekle yɔko "ne -a yi -lɔ -eyi gɛle-.» 29Zezu nɛɛ: «Gbɛklɛklɛ 'e bhulɛle lɛ 'anye, 'nyɔkpɔ kɛ -bhudu, "nowlia, "nɔyoa, "nɔ, 'to, yua "ne 'lɛɛ 'neɛ za "ne 'Denaade za 'yi 'tale-, 30"ɛ 'nyɔkpɔ -wɛ, -li 'klekle -ye 'ɔ 'bha- yɔko 'neɛ za -wɛ, 'ɔ 'yi 'ce yle "ne 'ɛ yi 'ce lɔbhɔ 'ple "tɛnye -ye -a -ko -dɛme "me ne. 'Ɔ yi 'ce: -Bhudu, "nowlia, "nɔyoa, "nɔ, yua "ne 'lɛɛ yle 'ɛ -nyɛ 'gbapegbapeɛ "bhaa. 'Ɔ yi 'ce zikpɛ 'na -ɛ "kɛ yi -wɛ "me zikpɛ 'na -ɛ -ka lɛ "kubhiɛ -wɛ yle. 31-Wa -gɛ 'yuku -wɛ 'glɛme 'na -bedia yi 'ce 'be bhiɛle-. "Ne -wa -bhiɛle 'be -wɛ yi 'ce 'yuku 'gɛle-.»

"Ku ta 'ye Zezu bhulɛ -lɔ -gbɔ 'ɔ yi ''ku "ne 'ɔ yi gluzɔ 'wlo

(Matie 20.17-19; Luke 18.31-34)

32Zezu -nyɛ 'ɔnɛɛ gɛlenya "bhaa 'wa me Zeluzalɛme. Zezu -goa 'yuku. 'Ɔnɛɛ gɛlenya geji 'bhoa- "ku "ne -wa -ko -me lɔbhɔ -wɛ gu. Zezu la- 'ɔnɛɛ gɛlenya kogbɔ "sɔ -wɛ "kusɔ, "ne 'ɔ yua -lɔ -ɛ "kɔ yle -wɛ 'na "ku ko -weli bhulɛle-. 33Zezu nɛɛ: «'A 'fo -ame 'yukwli. Zeluzalɛme -a me -kɛ -lɔ. 'Wa yi 'Nyɔkpɔ Yowli bɔbɔnya "yitia "ne -Lɔsloanya kɔ plele-. "Ne 'wa yu 'kwiɛ 'na -jiɛ "me "pɔ, "ne 'wa yu -wa "ne Lagɔ -yi -wɛ kɔ plele-, "ne 'wa yu 'lɔbhɔ-, "ne 'ɔ yi "ku. 34'Wa yu sile-, 'wa yu 'dɔ "klo wale-, "ne 'wa yu 'lɔbhɔ-, "ne 'ɔ yi "ku. 'Yli ta kɛ 'ple- ne, 'ɔ yi gluzɔ 'wlo.»

Zake "ne Zaa 'na zlɛweli

(Matie 20.20-28; Luke 22.25-27)

35Zake "ne Zaa Zebede 'yowlia "sɔ 'nyiɔ- Zezu yɔko. Ŋwɛnɛɛ: Sloanyɔ, -ye -a "kɛ -eyi 'yɔbhɔle -wɛ "nyɛ -kɛ -anye. 36Zezu nɛɛ: «-Ye 'e -na no bhɔ 'anyɛɛ dɛku?» 37Ŋwɛnɛɛ: «-E kɛ -kɛ -neɛ' -klɔgbɔdu "ku 'gli- gbɔ- -se -bholo kɛ -kɛ lilikwlɛ -gbɔsɔ "ku 'gli, -se -bholo kɛ -kɛ kɔpɛ -gbɔsɔ "ku 'gli.» 38Zezu yua -lɔ bhulɛle- nɛɛ: «-Ye 'a zlɛ -wɛ, 'a "ne -yi. 'Leylislɔ -ye 'e "kɛ "me 'nɔmɔle -wɛ, 'a 'yi bhɔ "me 'nɔmɔle -me 'a? Batɛme -ye 'e "kɛ yle -wɛ 'a 'yi bhɔ yle -me 'a?» 39Ŋwɛnɛɛ: «-A 'bhɛle-.» Zezu yua -lɔ bhulɛle- nɛɛ: «-Ɛɛ, 'leylislɔ -ye 'e "kɛ "me 'nɔmɔle -wɛ, 'a 'yi "me 'nɔmɔle -me, batɛme -ye 'e "kɛ yle -wɛ 'a 'yi yle -me. 40-Mɔ 'ɛ kɛ -ɔ "kɛ 'neɛ lilikwlɛ "me gli, "ne -ɔ "kɛ 'neɛ kɔpɛ "me 'gli -wɛ yɔ, 'mɔɔ -noa -kɛ lɔbhɔ -sɛ. Nyɔ 'wɔ za -a To -sɛ lɔbhɔ -wɛ, 'wayi 'ye 'ɔ 'cɛ -lɔ kɔ 'je.» 41Gɛlenya kogbɔ 'na -wawɛ 'no- lɛ "ɛ weli -wɛ "me ne, 'wa 'pɔle- Zake -nyɛ Zaa "bhaa 'kɛle yɔko. 42"Ne Zezu yua -lɔ 'ɔyi yɔko lale- 'klekle, "ne 'ɔ yua -lɔ bhulɛle- nɛɛ: «'A -yi sɛ, -see -ye 'wa la "cifia gbli 'walua 'kwlɛ 'wlime, "ne -see 'nyakpa "yitia 'nɔŋole 'walua "ku. 43'Anye 'glɛme 'ɛ te sɔbhɔ ylɛle- gou. -Mɔ, -ɔ kɛ no -gbɔ 'ɔ "kɛ 'ce "yitɔ "zo 'anye 'glɛme, 'ɔ "zo 'anyɛɛ "kulɔbhɔnyɔ. 44'Anye 'glɛme 'na -ɔ kɛ -no -gbɔ 'ɔ "kɛ 'yuku 'gɛle- ne, 'ɔ "zo 'nyakpa 'klekle 'na 'juyu. 45"Naa-, 'wa "kɛ 'Nyɔkpɔ Yowli "ku 'lɔbhɔ- za 'ɔ "ne zikpɛ "ku -yi. -Mɔ, 'ɔ "kɛ lɔbhɔ- za 'ɔ -yi -lɔ, -se 'ɔ "kɛ 'ɔnɛɛ zikpɛ "me 'bhale- 'nyakpa -kwleyia 'na zeti -za.»

Zezu -yamalea -kpelɔbhɔnyɔ Batime

(Matie 20.29-34; Luke 18.35-43)

46Zezu -nyɛ 'ɔnɛɛ gɛlenya "bhaa -ylɛ Zeliko. -Sɔɔdɛku 'wa -nyɛ -zakpɛ "yitɛ "bhaa 'wa 'wlo nɛ "ɛ 'du "yitɛ -wɛ "me zɔ ne, -kpelɔbhɔnyɔ -bholo -ye 'wa la Batime, Time yowli, 'gli- nɛ -gwe 'yukwli -zɔ "ne 'ɔ zlɛ 'awɔ -lɔ. 47'Ɔ "kɛ 'no -gbɔ Nazalɛte 'na Zezu yi ne, "me 'ye 'ɔ 'kpa- -lɔ. 'Ɔ nɛɛ: «Zezu, Davide yowli, "pɔ 'na 'nyɛzedle.» 48'Nyakpa 'na 'gbagboa 'titu nɛ 'yliku. Ŋwɛnɛɛ: «'see, 'tli -dɛme doɔ "ku!» -Mɔ, 'ɔyi, 'ɔ 'kpa 'awɔ "me kpɛnyee nɛɛ: «Davide yowli, "pɔ 'na 'nyɛzedle!» 49Zezu 'nyegbe-. 'Ɔ nɛɛ: «'A lɔ.» "Ne 'nyakpa yi -lɔ "ɛ -kpelɔbhɔnyɔ -wɛ la-. Ŋwɛnɛɛ: «'Tamale- 'yli "ku, -sɔ "ku, -mɔ, 'ɔ nɛɛ: Yi!»

50"Ɛ -kpelɔbhɔnyɔ -sɔ "ku -vaa, "ne 'ɔ yi -lɔ 'ɔnɛɛ "koti 'kwlɛme 'pɔ-. "Ne 'ɔ yi -lɔ Zezu lo mele-. 51"Ne Zezu yu -lɔ lo 'yɔbhɔ- nɛɛ: «-Neɛ' dɛku -ye 'e -na no bhɔ?» -Kpelɔbhɔnyɔ nɛɛ: «"Bhenyɔ, 'gbɔ -se 'e "kɛ siɛ 'ye!» 52"Ne Zezu yu -lɔ bhulɛle- nɛɛ: «Me! -Neɛ' 'dlekukɛleɛ 'ya -eyi 'fuɔ!» Cuu ne, Batime 'na 'yli yi -lɔ le gbɛklɛklɛ. "Ne 'ɔ yi -lɔ Zezu 'gɛle- -me.

Currently Selected:

Malke 10: btg

Highlight

Copy