Matie 18

Lagɔ 'na 'Kamalezikpɛ "me 'na "yitɔ

(Malke 9.33-37; Luke 9.46-48)

1'Ɛ dɛ -wɛ "ku, gɛlenya 'nyiɔ- nɛ Zezu yɔko "ne 'wa 'yɔbhɔ nɛ -lɔ lo nɛɛ: «-Ɔ -noɔ bhɔ "yitɔ yɔ Lagɔ 'na 'Kamalezikpɛ "me?» 2"Ne Zezu yi -lɔ yu bhueyi la-, "ne 'ɔ yu -lɔ -zejilɛ "me 'nyegbea-. 3'Ɔ nɛɛ: «Gbɛklɛklɛ 'ye 'e bhulɛle lɛ 'anye, 'a "mɔ kɔ 'bheliɔ- "ne 'a "mɔ yua ne 'nasɛ -ko ne, 'a -ka -kɛ Lagɔ 'na 'Kamalezikpɛ "me bhɔlɔ-. 4'Nyɔkpɔ 'na -ɔ 'kwlialea 'ɔyi "ku "ne -ɔ "zo- sɛgbɛɛ yu ne, 'ɔɔ -noɔ -lɔ Lagɔ 'na 'Kamalezikpɛ "me 'na "yitɔ yɔ. 5'Nyɔkpɔ 'na -ɔ 'sa- yu 'tee 'neɛ 'tɔ "me sɛgbɛɛ yu ne, -ame, 'nabhɛ 'ye 'ɔ 'sa- -lɔ 'tee.

'A te "nyɛnye no

(Malke 9.42-48; Luke 17.1-2)

6-Ɔ kɛ yua 'glɛme 'na -ɔ -kɛ -ame 'dleku Lagɔ keyi -gla ne, 'ɛ -ŋwɔ "ku -gbɔ 'wa glɔ 'tiyi -zabhuɛ blo "me -se 'wa "kɔ 'wli mla- jinyɛ "me. 7-Mɔ, -glɔ 'na -ɛ gbɔ "ne 'nyinyonoli -zu "ɛ soɔ -wɛ, 'ɛnɛɛ kpilɛkpilɛ yɛ 'ce -lɔ. -Ɛ gbɔ "ne 'nyɔkpɔ no 'nyinyonoli -wɛ yi 'ce lele- 'yiɛ, -mɔ, 'nyɔkpɔ 'na -ye 'ɛ 'bhale "me -wɛ, 'ɔnɛɛ kpilɛkpilɛ yɛ 'ce -lɔ.

8-Neɛ' bho -lalɛce -neɛ' sɔ kɛ -eyi 'nyinyonoli noa- ne, 'di- "ku, -se "pɛ 'kwlɛ "me. -E "kɛ sɔcibhɛ "ne bhocibhɛ kɛle- -se 'e "kɛ Lagɔzikpɛ "me plɛ 'nɛne "ne 'ɛ -zi -e "kɛ sɔ "sɔ -nyɛ bho "sɔ "bhaa kɛle- -se 'wa "kɛ -eyi -kosu 'na -ɛ "ne 'nyimɔ -wɛ "me "pɔ. 9-Neɛ' 'yli kɛ gbɔ "ne -e kɛ 'nyinyonoli no ne, -sɛ "bhle -se "pɛ 'kwlɛ "me. -E kɛ 'yli -bholo kɛle- -se -e "kɛ Lagɔzikpɛ "me plɛ 'nɛne "ne 'ɛ -zi -e "kɛ 'yli "sɔ kɛle- -se 'wa "kɛ -eyi 'kleyeɛ 'na -kosu "me "pɔ.

Zezu 'pɔ- wli -ɔ bhli -wɛ 'na nunɛ

(Luke 15.1-7)

10'A te 'ce yua ne 'ylime 'flale-. "Naa-, 'wanɛɛ "nɔgɔzilia -ko 'ce -godogodo -ame To -ɔ -ko "nɔgɔ "me -wɛ yɔko zɛ! 11["Naa-, 'Nyɔkpɔ Yowli -yi -se 'ɔ "kɛ -wa -bhli 'kwlɛ -wɛ 'fuɔ.]

12-See 'a glole bhɔ welicibhɛ ne 'dle 'a? 'Nyɔkpɔ -bholo -kɛ -lɔ doɔ wlia 'na glo 'umgbu. "Ne 'wanɛɛ 'glɛme 'na -bholo yi -lɔ bhli, "ɛ 'nyɔkpɔ -wɛ -tle doɔ wlia 'na glo -mɔɔnɔ yɛ kogbɔ fɛɛnɔ "ɛ tlo -wɛ "me, "ne 'ɔ yi -lɔ "ɛ -ɔ -bhli -wɛ 'siɛ tɛle- -ka me. 13Gbɛklɛklɛ 'ye 'e bhulɛle lɛ 'anye, 'ɔ "kɔ -yle ne, 'ŋwɛnɛ 'lɔbhɔ "ne 'ɛ zi glo -mɔɔnɔ yɛ kogbɔ fɛɛnɔ -wa "ne -bhli -wɛ nɛ "ku. 14Sɔbhɔ, 'a To -ɔ -ko "nɔgɔ "me -wɛ 'yɔbhɔ -lɔ -gbɔ yua ne 'glɛme 'na -bholo te 'ce 'kwlɛ bhli gou.

-E "nɔwli kɛ -eyi "nyɛnye 'wli -no, -see -e "kɛ bhɔ "zo 'a?

15-E "nɔwli kɛ -eyi "nyɛnye 'wli -no ne, me -se -e "kɔ 'ylime 'ye -se 'anye "sɔ 'a "kɛ bhulɛ, -se -e "kɔ bhulɛle- -gbɔ -ye 'ɔ -no -wɛ "ne 'nɛne, 'ɔ "kɛ -eyi 'yukwli -fo ne, 'e 'ya -lɔ 'e "nɔwli "fuɔ. 16-Mɔ, 'ɔ "mɔ -eyi 'yukwli -fo ne, la 'nyakpa "sɔ "ne ta, -se 'a "kɛ weli 'na -ɛ -ko lɔbhɔ -wɛ bhulɛ 'nyakpa "sɔ "ne ta 'yliku, -se 'wa "kɛ 'ce 'ɛnɛɛ -wayeɛdɛ "zo. 17'Ɔ kɛ -no -gbɔ 'ɔ -koa 'yukwli 'fo gou ne, bhulɛle- Lagɔgligbɛ "me 'na 'nyakpa. 'Ɔ kɛ -no -gbɔ 'ɔ 'bhɔ ne, "lubhu "ku sɛgbɛɛ 'nyɔkpɔ 'na -ɔ "ne lɛ Lagɔ -yi, "ne 'ɔ -ko sɛgbɛɛ -lɛposanyɔ. 'Ylilo- "guɔ 'tekeyi, "naa-, 'nyɔkpɔnyɛnye yɔ -lɔ zɛ.

18Gbɛklɛklɛ 'ye 'e bhulɛle -lɔ 'anye. -Ye 'a -gbɛte klekle dodo ne "ku yi 'ce "nɔgɔ "me 'gbɛteɔ- klekle. -Ye 'a -vulu dodo ne "ku yi 'ce "nɔgɔ "me vuluɔ-.

'A 'bhubhɔle- 'gɔme

19Sɛne 'ye 'e bhulɛle lɛ 'anye nɛɛ: Dodo ne "ku, "sɔ "ne ta kɛ "ku -kole "ne 'wa kɛ -bɛɛ' -zlɛ, -ame To -ɔ -ko "nɔgɔ "me -wɛ yua 'ce kɔ 'je. 20"Naa-, "sɔ "ne ta kɛ 'neɛ 'tɔ "me 'wli "zo-, 'e -ko -moa 'ce 'glɛme.»

"Kulɔbhɔnyɔ -ɔɔ 'tale- "nyɛnye 'yi -wɛ 'na nunɛ

(Luke 17.4)

21"Ne Piɛle yi -lɔ Zezu yɔko 'nyiɔ, "ne 'ɔ yu -lɔ bhulɛle- nɛɛ: «"Bhenyɔ, -ame "nɔwli kɛ -ame "nyɛnye 'wli -no, "ne 'ɔ kɛ -ame -bhubhɔ ne, "ku zɔŋ 'e -na 'tale- bhɔ 'yi a? "Ku gbɔsɔ 'a?» 22Zezu nɛɛ: «'E -na -kɛ no nɛɛ: "Ku gbɔsɔ. -Mɔ, "ku -glo ta yɛ kogbɔ gbɔsɔ "ku gbɔsɔ 'na dɛ 'ye 'e ga -lɔ.»

-Ɔ "ne 'nyɛzedle -kɛ 'na nunɛ

23Lagɔ 'na 'Kamalezikpɛ, -ye 'ɛ 'wlole- ne lɛ: -Klɔgbɔnyɔ -bholo -no -lɔ -gbɔ 'ɔnɛɛ "kulɔbhɔnya "bhaa 'wa "kɛ libhɔ -ye 'ɔ -kwilɛloa "ku -wɛ 'na weli bhulɛ-. 24'Ɛ "kɛ "ku ci ne, 'nyɔkpɔ 'na -ɔ -kɛ ɔnɛɛ 'dlasi -kwleyi 'na 'gɛgbo 'ye 'wa -nɔmo -lɔ. 25-Mɔ, 'ɔ "ne 'tamayɛ -kɛ -se 'ɔ 'cɛ 'beme "zo, "ne 'ɔ yi -lɔ no nɛɛ: 'Ɛ kɛ soɔ -ko ne, 'ɔyi 'nabhɛ, 'ɔnɛɛ 'ŋɔnɔ, 'ɔnɛɛ yua "ne -ye 'ɔ kɛ -kɛ 'klekle "bhaa, 'a "poa 'pɔlo "ku -se 'ɛ "kɛ 'ɔnɛɛ 'gɛgbo 'flee. 26"Ɛ 'nyɔkpɔ ne, -kokomini 'ye 'ɔ 'pɔ- -lɔ "Bhenyɔ 'yliku. 'Ɔ nɛɛ: -Yaya! 'Piɛ "bhle 'dle. -Mɔ, 'e yi 'ɛyi 'klekle 'flee. 27"Ne "bhenyɔ 'nyɛze yu -lɔ 'lɔbhɔ cuu, 'ɔ nɛɛ: 'Ɛ ko soɔ, 'a 'talo- 'yi, -se 'ɔ me, "ne 'ɔ yi -lɔ "ɛ 'gɛgbo 'na gbo 'yi 'tale-.

28"Ɛ 'nyɔkpɔ ne 'wlo- lɛ zɔ ne, 'ɔluyu -nyɔ "bhaa 'wa -no libhɔ "ne -ɔ -kɛ 'ɔnɛɛ 'dlasi 'tekeyi 'na 'gɛgbo "bhaa 'wa yi -lɔ "ku 'sibhɔle-. "Ne 'ɔ yu -lɔ 'sa -gli! "Ne 'ɔ yu -lɔ blo "ku 'sale klekle, 'ɔ nɛɛ: 'Flee- 'na 'gɛgbo. 29"Ɛ 'ɔluyu ne -kokomini 'ye 'ɔ 'pɔ- -lɔ. "Ne 'ɔ yu -lɔ bhubhɔ- nɛɛ: -Yaya, 'Piɛ "bhle 'dle, -mɔ, 'e yi -neɛ' 'gɛgbo 'flee-. 30"Kulɔbhɔnyɔ -sɛ lo, 'ɔ "ne "ku 'ŋunu- gou. "Ne 'ɔ yi -lɔ 'ɔluyu ne -jiɛ "me 'pɔ. 'Ɔ "kɛ -mlɛ "bhle ko, -se 'ɔ "kɛ "ɛ 'gɛgbo -wɛ 'flee-. 31"Kulɔbhɔnya 'na -vinoa 'ye- lɛ "ɛ -ɛ 'ple- -wɛ 'ylime ne, "klo 'wa nyɛne -lɔ "ne 'wa yi -da -lɔ "bhenyɔ 'de -sɛle -ka me. 32"Ne "ɛ "bhenyɔ yi -lɔ "ɛ 'nyɔkpɔ -wɛ la cuu, "ne 'ɔ yu -lɔ bhulɛle- nɛɛ: "Kulɔbhɔnyɔ -gbeyi! -E -bhubhɔ -ame "ne 'e yi -lɔ -neɛ' 'gɛgbo 'klekle 'yi 'tale-. 33Zaa, -see -ame 'e 'pɔ- lɛ -neɛ' 'nyɛzedle -wɛ, -e "ne nɛ bhɔ 'bhɛle- -se -e "kɛ -eluyu -wɛ 'na 'nyɛzedle 'pɔ -me?

34"Ne 'kɛle yi -lɔ "ɛ "bhenyɔ ne 'lɔbhɔ, "ne 'ɔ yi -lɔ "kulɔbhɔnyɔ ne -jiɛ "me 'pɔ -se 'wa "kɔ "bhle 'nyɛze ziɛle-. 'Ɔ "kɛ -mlɛ "bhle ko -se 'ɔ "kɛ "ɛ 'gɛgbo 'klekle 'flee-. 35"Ne Zezu yi -da -lɔ nunɛ 'wli -sɛ -gbɔ nɛɛ: «Soɔ -ame To -ɔ -ko "nɔgɔ "me -wɛ "kɛ -lɔ 'anye "sa, 'a "mɔ 'aluyu 'na "nyɛnye 'yi 'tale- 'dlewɔtɛ "me.»

Currently Selected:

Matie 18: btg

Highlight

Copy