Luke 24

Zezu 'wlo- gluzɔ

(Matie 28.1-10; Malke 16.1-8; Zaa 20.1-10)

1Dimasi 'na zegbakpɔ -zle zɔ 'ŋwenea -su -lasiklɔ "ne 'kpe -ye 'wa -jijalea 'wli -wɛ, "ne 'wa yi -lɔ -biɛglo "ku me. 2'Wa 'na 'wolo ne, 'tiyi ne -biɛ nuɛ "ku -kesiale. 3'Wa -plɛ "bhle, -mɔ, 'wa "ne Anyinɛnyɔ Zezu 'na gɛzɛ "bhle -ylele. 4'Wa -ko nɛ 'dle -pɔ dɛku "ne 'nyakpa "sɔ, -wa -pla "koti -ɛ -nyimɔ 'yli "klo -wɛ "me, yua -lɔ 'yli "ku 'sibhɔ. 5Nyanɔ 'lɔbhoa nɛ "ne 'wa yi -lɔ 'wli 'gbi. "Ɛ 'nyakpa -wɛ nɛɛ: «Sɔɔbɛɛza 'a 'tɛle bhɔ -yɛyɛnyɔ -glukonya 'glɛme siɛ 'a? 6'Ɔ "ne -dɛne -ko, 'ɔ 'wlo- gluzɔ. 'A 'luɔle- -ye 'ɔ -bhulɛle 'anye -sɔɔdɛku 'ɔ -ko -na nɛ Galile -wɛ "ku. 7Sɛne 'ɔ -gbɔ 'awɔ -lɔ: 'Nyɔkpɔ Yowli yi nyinyonolinonya kɔ 'pleleɔ-. 'Wa yu klowa "klo kole- "ne 'ɔ yi "ku, "ne 'yli ta kɛ 'ple- ne, 'ɔ yi gluzɔ 'wlo.» 8"Ne "ɛ 'ŋwenea ne, yi -lɔ luɔ-. 9'Wa 'bha- -biɛ "ku "ne 'wa yi -lɔ "ɛ 'de 'klekle "kɔlepɔnya 'kogbɔ -bholo -nyɛ gɛlenya "bhaa -sɛle. 10'Ŋwenea -wa -bhulɛ weli ne lɛ: 'Du -ye 'wa la Magedala 'na Mali, Zane "ne Zake 'ɔ "nɔ Mali. 'Ŋwenea 'na -bedia -wa -ko -me 'awɔ 'lɔbhɔ bhulɛ me 'awɔ "ɛ sɛbhele -wɛ "kɔlepɔnya. 11-Mɔ, "kɔlepɔnya 'pɔ 'dle -gbɔ 'ɛ "ne 'diɛɛ yɛ. 'Wa ne 'ɛ 'ŋwenea ne 'dleku -kɛle. 12-Mɔ, 'ɛ -ko sɔbhɔ "ne Piɛle -sɔ "ku, 'ɔ -pa, "ne 'ɔ yi -biɛ "ku me. 'Ɔ -bhle "bhle 'wli siɛ. Lokwi -fu 'ye 'ɔ 'ye- -lɔ 'ylime. Geji 'bhɔ- "ku. "Ne 'ɔ yi -lɔ 'wlizɔ zi.

Zezu 'sibhɔ- 'ɔnɛɛ gɛlenya 'yliku Emayuse 'na -gwe "ku

(Malke 16.12-13)

13-Ɛ zle -bhele -wɛ "me, Zezu 'na gɛlenya "sɔ me 'awɔ 'du -ye 'wa la Emayuse -wɛ "me. 'Gle "sɔ 'ye -e 'sɛ -lɔ -gwe "ku -e kɛ Zeluzalɛme 'bha-. 14'Wa -ko me dɛku, "ne 'wa 'pɔ -lɔ -li 'klekle -ɛ -ylɛle Zeluzalɛme -wɛ 'na 'de. 15'Wa lɛtɛ soɔ 'gɔme, "ne 'wa 'kpɛle nɛ, "ne Zezu 'ɔyigɛsɛ yua -lɔ keyi yle "ne 'wa yi -lɔ 'gɔme 'nɔŋole-. 16-Mɔ gɛlenya "ne Zezu -yibhlele, 'wanɛɛ 'yli 'gbɔ- nɛ "ku zɛ. 17"Ne Zezu yua -lɔ lo 'yɔbhɔ nɛɛ: «Sɔɔ weli 'ye 'a bhulɛ bhɔ?» "Ne 'wa yi -lɔ 'nyegbe-. 'Kwɛme yɔloa-. 18'Wanɛɛ 'glɛme 'na -bholo -ɔ 'pa- Kleopase yu -lɔ bhulɛle- nɛɛ: «-eyi -bholo -kpee, -mɔɔ -ko -lɔ Zeluzalɛme "ne -e "ne -lɔ -ɛ 'ple- "bhle "ɛ 'yli ne "me -yi?» 19"Ne Zezu yua -lɔ lo 'yɔbhɔ nɛɛ: «-Ɛ 'ple bhɔ "bhle 'a?» 'Wa nɛɛ: «-Ɛ -yle Nazalɛte 'na Zezu -wɛ. "Guɔkwɔmenyɔ -ɔ -kɛ nɛ 'bhɛloɛ "ne -nyɔ 'na "mesɛleweli me Lagɔ 'yliku "ne 'nyakpa 'klekle 'yliku. 20-Anyɛɛ bɔbɔnya "yitia, "ne -anyɛɛ "cifia -plo, "ne 'wa yu -lɔ klowa "klo kole- "ne 'ɔ yi -lɔ "ku. 21"Ne -anye, 'ɔyi -a -kɛ nɛ -lɔ 'dleku -gbɔ 'ɔyi "kɛ nɛ -kɛ -lɔ Izlayɛle 'fuɔ. -Mɔ, 'yli ta ne lɛ -see -ɛwɛ 'klekle 'ple-. 22-Tiaa, -anye 'glɛme 'na 'ŋwenea 'na yɛ -sɛ -anye geji "ku: 'Wa -me 'zegbakpɔme -biɛ "ku. 23'Wa "ne "bhle Zezu 'na -gɛzɛ -ylele. 'Wa bhulɛle- -anye nɛɛ, "nɔgɔzilia, -ye 'wa 'ye- 'ylime "ɛ -biɛ -wɛ "ku, -bhulɛloa nɛɛ: Zezu -yɛ 'diɛɛ. 24-Anyɛɛ 'glɛme 'na -bedia -me -biɛ "ku. -See "ɛ 'ŋwenea -gbɔ -wɛ, 'wa -ylele sɔbhɔ. -Mɔ, 'ɔyi 'nabhɛ, 'wa "no "ylime 'ye-.»

25"Ne Zezu yua -lɔ sɛne bhule- nɛɛ: «'Wli "me -ko 'anye foo. "Ne 'dlezɔ -ko 'anye -bhetlii, 'ye "guɔkwɔmenya -bhulɛ 'klekle -wɛ 'a "ne 'dleku -kɛle! 26Zaa, Klise te nɛ bhɔ 'gbape, -se 'ɔ "kɛ nɛ 'ŋlu me?» 27"Ne 'ɔ yi -lɔ Moyize "ku cile-, "ne "guɔkwɔmenya 'klekle 'wɔ. "Ne 'ɔ yua -lɔ -ɛ kɛleɔ- Lagɔbɔgo "me 'ɔnɛɛ za -wɛ zɔ sibhalea- 'tee.

28"Ne 'wa yi -lɔ Emayuse yɔko 'nyiɔ. "Ne 'ɔyi, 'ɔ no sɛgbɛɛ -ɔ me lɛ 'yuku sɛ. 29Gɛlenya nɛɛ: «-A 'ko dɛne -eyi "bhaa. Te "ple. "Naa-, titiɛ -yi. "Ne zle 'ya flale-.» "Ne Zezu yi -lɔ 'wanɛɛ -bhudu "me plɛ "ne 'ɔ yua -lɔ yɔko to-. 30-Sɔɔdɛku 'wa -ko nɛ lilɛ -li -dɛme -wɛ, Zezu yi -lɔ "fɔlɔ "ku 'libhi, "ne 'ɔ 'yi -lɔ 'ŋu 'pɔ, "ne 'ɔ 'yi -lɔ "me 'didile-, "ne 'ɔ yua -lɔ kɔ 'je. 31Cuu ne 'wanɛɛ 'yli yi -lɔ "ku 'vuluɔ-. "Ne 'wa yu -lɔ yibhlele-, -mɔ "ɛ doɔ cuu ne 'ɔ 'zizlɔle-. 32"Ne "ɛ gɛlenya "sɔ ne bhulɛ nɛ -lɔ sɛne: «-Anyɛɛ 'dle "ne si nɛ 'yli -sɔɔdɛku 'ɔ bhulɛle nɛ -anye -gwe "ku -wɛ, "ne 'ɔ sibhale nɛ -anye Lagɔbɔgo "me 'na -ɛ kɛleɔ- "bhle -wɛ zɔ?» 33"Ɛ doɔ cuu ne, 'wa -zi Zeluzalɛme 'wlizɔ. 'Wa 'na me gɛlenya kɔgbɔ -bholo "ne 'walua -wɛ "bhaa 'yɔbhɔ- 'wli. 34'Wayi 'klekle -bhulɛloa sɛne: «'Diɛɛ yɛ -lɔ! Anyinɛnyɔ 'wlo- gluzɔ. "Ne 'ɔ -tua 'ɔyi Simɔ Piɛle 'ylime.» 35"Ne "ɛ gɛlenya "sɔ ne yi -la -see 'ɛ -ylɛle Emayuse 'na -gwe "ku "ne 'wa -yibhlelo -sɔɔdɛku 'ɔ 'didile- "fɔlɔ "me -wɛ.

Zezu -tuɔ 'ɔyi gɛlenya kɔgbɔ -bholo 'ylime

(Matie 28.16-20; Malke 16.14-18; Zaa 20.19-23; Noli 1.6-8)

36Weli -koa nɛ nu cuu "ne Zezu yua -lɔ 'jijeku 'sibhɔ, 'ɔ nɛɛ: «"kuwɛtɛ -ko 'anye 'glɛme.» 37'Wa gu, nyanɔ 'lɔbhoa, 'wa 'pɔ 'dle -gbɔ zuzu -bholo 'wa 'ye 'ylime. 38"Ne Zezu yua -lɔ bhulɛle- nɛɛ: «-Sɔɔ geji 'bha bhɔ 'anye "ku 'a?» "Ne sɔɔbɛɛza 'a 'pɔ bhɔ soɔ 'dle 'a? 39'A 'wolo- 'na kwlɛ -nyɛ 'na bho "bhaa "ku. -Ame yɔ -lɔ. 'A -gɛ 'yli, zuzu "ne ku -nyɛ 'kwɛ "bhaa -kɛ. 'A 'wolo- "ku, -ame 'e -kɛ. 40"Ɛ welicibhɛ -wɛ kɔ, "ne 'ɔ yua -lɔ 'ɔnɛɛ kɔtakpamene "ne bhopopɛ 'ylime tua-. 41-Mɔ 'ŋwɛnɛ za, 'wa "ne -na nɛ 'dleku -kɛle cuu, "ne geji bhoa nɛ "ku 'yiɛ. 'Ɛ za 'ɔ yua -lɔ bhulɛle- nɛɛ: «'A -kɛ bhɔ dɛne lili -bɛɛ' 'a?» 42"Ne gɛlenya yu -lɔ lɛlɛ -zibhi 'na cibhɛ "kɔ 'je. 43Zezu libhi- "ɛ zibhi -wɛ "ku "ne 'ɔ -lu 'wayi 'yliku. 44"Ne Zezu yua -lɔ bhulɛle- nɛɛ: «-sɔɔdɛku 'e -ko -na nɛ 'anye 'glɛme -wɛ 'na weli -ye 'e -bhulɛle nɛ 'anye ne lɛ: -Ye 'wa kɛle- 'klekle 'neɛ za Moyize 'na gbagbɛ "me, "guɔkwɔmenyɔ "ne bhubhɔweli "me "kɛ 'yli 'wlole za yɛ -lɔ.» 45'Wa 'cɛ "me 'no za 'ɔ yi -lɔ 'wanɛɛ 'wugɔŋo "ku vulu-. 46"Ne 'ɔ yua -lɔ bhulɛle- nɛɛ: «-see 'ɛ kɛleɔ- Lagɔbɔgo "me ne lɛ: 'Fuɔnyɔ yi 'awɔ 'ce 'gbape, "ne 'ɔ yi 'awɔ 'ce "ku, "ne 'ɔ yi 'awɔ 'ce gluzɔ 'wlo, 'yli ta kɛ 'awɔ 'ple- ne. 47'Ɔnɛɛ 'tɔ "me 'wa yi 'nyakpa bhulɛle- -se 'wa "kɛ kɔ 'bheliɔ-, -se 'wanɛɛ 'nyinyonoli 'na gbo "kɛ 'yi 'taleɔ- -glɔ 'klekle "ku, 'ɛ 'bhale- Zeluzalɛme.

48'Anye -noɔ -lɔ 'ɛnɛɛ -wayeɛdɛ 'waa. 49"Ne -ame, -nyɔ 'na weli -ye -ame To -plele 'anye kɔ -wɛ, 'e yu 'anye -gwe "ku 'pɔ, -mɔ, 'anye, 'a te -na -kɛ "ɛ 'du ne 'bha-, -se 'a "kɛ 'bhɛloɛ -ɛ 'bhale "nɔgɔ "me yle "bhuɔ.» 50"Ne Zezu yi -lɔ gɛlenya Betani kɔme-. 'Ɔ libhi- lɛ 'sɔ 'wli "ku, 'ŋu 'ye 'ɔ poa- -lɔ. 51-Sɔɔdɛku 'ɔ 'poa nɛ 'ŋu, 'ɔ 'bhoa- yɔko "ne 'ɔ yi -lɔ "nɔgɔ "me 'gblɛ. 52Gɛlenya "kɔ bɔbɔ- "bhuɔ ne, 'wa -zi Zeluzalɛme 'wlizɔ 'ŋwɛnɛ "me. 53Zle 'klekle "me, 'wa -ko 'awɔ "Mebɔbɔlebhudu "me "ne 'wa kwɔ 'awɔ -lɔ Lagɔ 'ŋlu.

Currently Selected:

Luke 24: btg

Highlight

Copy