Nonoli 4

Piɛle "ne Zaa, 'wa -kɔmoa Zufonya 'na gbobhlezejilɛ "ku

1Piɛle -nyɛ Zaa "bhaa -ko 'awɔ -namlɛ -zakpɛ bhulɛle- dɛku, "ne bɔbɔnya, "Mebɔbɔlebhudu "me 'na -slojanya -wa -kole "klo -wɛ 'na "cifi, -nyɛ Saduseɛnya "bhaa 'wa yua -lɔ yɔko 'nyiɔ-. 2Kɛle "yitɛ 'lɔbhoa 'awɔ, "naa-, Piɛle -nyɛ Zaa "bhaa sloa 'awɔ 'nyakpa Lagɔweli "ne Zezu 'na gluzɔ -wlo -de.» 3"Ne 'wa yua -lɔ "nyegbea-. Silɔ#4.3 Silɔ: Titiɛ. 'yilɔ- nɛ "bhuɔ za 'wa yua -lɔ -jiɛ "me "pɔ, "ne zle 'na -vinɛ yi -lɔ ze. 4'Nyakpa -wa -foa 'awɔ "yukwli 'na 'glɛme 'na 'kwleyia -kɛle 'awɔ 'dleku. 'Wa yi 'awɔ 'nyakpa 'na -gɛmɛnɛ -wlulu 'umgbu yle (5.000).

5Zaa, -ye -zle 'na -vinɛ -ze -wɛ, "cifia, "yitia "ne -Lɔsloanya -yi -lɔ Zeluzalɛme 'wli "zole -ka. 6Bɔbɔnyɔ "yitɔ Aane, Kayifo, Zaa, Alɛzadle "ne bɔbɔnya "yitia 'na -gligbɛ "ku 'na 'nyakpa 'klekle -ko -me 'awɔ lɔbhɔ. 7"Ne 'wa yua 'awɔ -lɔ Piɛle -nyɛ Zaa "bhaa 'yliku kɔme, "ne 'wa yua 'awɔ -lɔ lo 'yɔbhɔ- nɛɛ: «-ɔ 'nyɛ- bhɔ 'anye 'bhɛloɛ, "ne -nyɔ 'na 'tɔ "me 'a -yamalea bhɔ "ɛ 'gwizinyɔ -wɛ 'a?» 8Zuzu Wlewle 'yiɛ- nɛ Piɛle "ku, "ne 'ɔ yi -lɔ no nɛɛ: «'Anye, Zufonya 'na -gligbɛ "ku 'na "cifia, "ne 'anye "yitia, 9-a -yamalea 'nyɔkpɔ -ɔ "ne 'nɔŋo nɛ -wɛ za, 'a 'yɔbhɔ -lɔ -zeka -anye lo, -gbɔ -see -a "zo- "ne -a yu -yamalea? 10Zaa, 'anye 'klekle -wa 'gli- dɛne, "ne -anye Izlayɛleyua, 'a yibhlele- sɛ -gbɔ Nazalɛte 'na yu Zezu Kli -ye 'a -kole klowa "klo, "ne Lagɔ yu gluzɔ 'wloa- -wɛ, 'ɔnɛɛ 'tɔ "me za "ɛ 'nyɔkpɔ ne -yamale -lɔ, "ne 'ɔ 'nyegbe- lɛ -zeka -dɛne 'anye 'yliku. 11Lagɔbɔgo -bhulɛ 'ɔnɛɛ "kukoweli nɛɛ: 'Tiyi -ye 'anye -bhudusɔbhɔnya 'pɔ- 'kwlɛ "me -wɛ, 'ɛɛ "zo- -da -lɔ -bhudu 'na jijɛtiyi. 12"Ne Piɛle yi -lɔ "kusɔ bhulɛle- nɛɛ: 'Ɔyi -bholo -kpee -noɔ -lɔ 'fuɔnyɔ yɔ. "Naa-, -glɔ ne 'klekle zɔ, Lagɔ "ne -la 'nyɔkpɔ 'na -vinɔ -ɔ "kɛ 'nyakpa 'fuɔ -wɛ lɔbhɔ -sɛ.»

13'Wa -gɛyli -gbɔ Piɛle -nyɛ Zaa "bhaa 'wa kɛ bhulɛ 'wa "ne 'gu "ne 'wa bhulɛ -wa -kɛ 'wayi 'dleku -wɛ 'nasɛ, "ne 'wa -yi sɛ -gbɔ 'wa "ne -suklu -plɛ, "ne 'nyakpa 'na -ye 'dlezɔ -ko foo 'waa -lɔ. "Ne 'ɛ yua -lɔ nyea-. "Ne 'wanɛɛ 'dle yi -lɔ lɔbhɔ 'sibhɔ -gbɔ Zezu 'na gɛlenya 'waa -lɔ. 14"Ne 'wa -gɛ 'awɔ "ɛ 'nyɔkpɔ -ɔ -yamale "ne 'ɔ 'nyegbe- Piɛle -nyɛ Zaa "bhaa yɔko -wɛ 'yli. "Ne 'wa "ne 'awɔ -la -see 'wa "kɛ lɛ -yi. 15"Ne 'wa yi -lɔ no nɛɛ Piɛle -nyɛ Zaa "bhaa 'wa 'wlo gbobhlelebhudu "me zɔ. "Ne 'wa yi -lɔ "ɛ weli -wɛ "ku 'kpɛle-. 16Ŋwɛnɛɛ: «-See -a "kɛ bhɔ "ɛ 'nyakpa ne 'sa 'a? 'Wa 'pɔ- zɛzɛ, "ne Zeluzalɛme 'na 'nyakpa 'klekle -yi sɛ. -A "ne -la 'bhɛle- "ne -a "kɛ 'ɛyi -wɛ "me kpɛle-. 17-Mɔ, -a gbɔ -se "ɛ 'gwizinyɔ -wɛ 'na -yamale -de te -kɛ moɔ- 'klekle ŋwɛne-. -A gua- -se 'wa te -kɛ -la 'nyɔkpɔ bhulɛle- gou Zezu 'na 'tɔ "me .»

18"Ne 'wa yua -lɔ "kusɔ lale-, "ne 'wa yua -lɔ -sɛne bhulɛle- nɛɛ: «'A te -kɛ -la Zezu 'na 'tɔ 'nu 'ylalea- kplokplo, -se 'a te -kɛ -la 'ɔnɛɛ 'tɔ "me sloale-.» 19"Ne Piɛle -nyɛ Zaa "bhaa yua -lɔ bhulɛle- nɛɛ: «-Ɛ 'ŋwinɛle- bhɔ Lagɔ 'yliku "me 'a? -A 'fo 'anye 'yukwli? -Mɔ, Lagɔ -ye -a -na 'fo bhɔ 'yukwli 'a? 'Ayigɛsɛ 'a sɛ lɔbhɔ -ye 'a 'yɔbhɔ -wɛ! 20'A -gɛyli, 'ɛ kɛ -anye 'waa -ye -anyɛɛ 'yli 'ye- 'ylime "ne -ye -anyɛɛ 'yukwli 'no- "me -wɛ za yɛ, -a -ka 'ɛnɛɛ za "ku 'tli.» 21"Ne 'wa yua -lɔ "kusɔ 'guale-, "ne 'wa yua -lɔ 'yitale-. "Naa-, 'wa "ne weli 'na -ɛ "koa gbo 'lua- "ne 'wa "koa "kle 'yea- -wɛ -yle. "Naa- -glɔnya 'kwa 'awɔ Lagɔ 'ŋlu -ɛ -ylɛle 'awɔ lɔbhɔ -wɛ 'na 'ylime. 22"Ɛ 'nyɔkpɔ -ɔ -yamale 'awɔ zɛzɛ sɛ -wɛ -kɛ 'awɔ 'ylobɛ -glo "sɔ "ne -ɛ 'pe- keyi.

'Dlekukɛlenya bhubhɔ Lagɔ

23'Wa "kɛ Piɛle -nyɛ Zaa "bhaa 'yi 'tale- "bhuɔ ne, 'wanɛɛ gɛlenya 'na -zakpɛ 'wa -me -lɔ yle -ka, "ne 'wa yua -lɔ bɔbɔnya "yitia, "ne Zufonya 'na "yitia 'na -ye 'wa -bhulɛloa -wɛ 'na 'de -sɛle.

24'Wa -foa 'yukwli "ne 'wayi 'klekle yi -lɔ 'gɔme Lagɔ bhubɔ- nɛɛ: «"Bhenyɔ, -mɔɔ -no -lɔ "nɔgɔ, dodo, jinyɛ, "ne -ɛ -ko "me 'klekle -wɛ. 25-Eyi, -mɔɔ "zo- -lɔ Zuzu Wlewle "me -neɛ' "kulɔbhɔnyɔ -a 'to Davide weli 'nu, "ne 'ɔ yi -lɔ no nɛɛ:

Zaa, sɔɔbɛɛza -glɔnya "kpa bhɔ soɔ "me 'a?

"Ne 'wa -kɛ bhɔ 'dlepɔsɛ -nyɛnye 'a?

26 Dodo ne "ku 'na -klɔgbɔnya 'nonole- "ku "me,

"ne "cifia yi -lɔ 'wli "zo,

-se 'wa "kɛ Anyinɛnyɔ gbo "me yle -ka me, 'ɔ -nyɛ 'ɔnɛɛ -ye 'ɔ -sɛ lɔbhɔ -wɛ "bhaa.

27'Diɛɛ, 'wa "zole- 'diɛɛ "ɛ 'du ne "me 'wli, Elode "ne 'kamalenyɔ "yitɔ "Pɔse Pilate, 'wa -nyɛ 'lowlinya "ne Izlayɛleyua "bhaa, -se 'wa "kɛ Zezu, -neɛ' "kulɔbhɔnyɔ -ɔ -ko 'wlewle "ne -ye -e -ŋwɛnɛ -wɛ to -nɛme. 28Soɔ 'ye 'wa -no -lɔ -ye -e no nɛ -gbɔ 'wa no "klee 'klekle -neɛ' 'bhɛloɛ "me -wɛ. 29Zaa, Anyinɛnyɔ, -Dɛmeda, 'wolo- -see 'wa no -gbɔ 'wa "kɛ 'anye gbo no -wɛ "ku, -se -e "kɛ -neɛ' "kulɔbhɔnya 'kwɛmetamalea-, 'wa te -kɛ "gu -se 'wa "kɛ -neɛ' weli -glɔnya -sɛle. 30'Glo 'se -neɛ' zɛzɛ -sɔ -wɛ "me, -se 'gwizinya "kɛ yamale-, -se zɛzɛ -li "kɛ 'yli 'wlole, -se -li 'na -ɛ "kɛ 'nyakpa 'nyea- -wɛ "kɛ noɔ-. -Neɛ' "kulɔbhɔyu Zezu -ɔ -ko 'wlewle -wɛ 'na 'tɔ me.»

31'Wa "kɛ bhubhɔ- "bhuɔ ne, "ɛ -bhudu -mee 'wa "zole- 'wli -wɛ yi -lɔ tɛtɛle-, "ne Zuzu Wlewle yua -lɔ "ku 'yiɛ "ne 'wa bhulɛ nɛ Lagɔ 'na weli 'dlekutɛnoɛ "me.

'Dlekukɛlenya "zo 'wanɛɛ -li dɛbhele.

32"Ɛ 'dlekukɛlenya 'na -zakpɛ -wɛ 'na 'dle "ne 'wanɛɛ 'dlepɔsɛ -yle 'awɔ -bholo. 'Nyɔkpɔ "ne no 'awɔ nɛɛ: «-Ɛne, 'neɛ yɛ -lɔ!» -Mɔ, 'wanɛɛ -li 'klekle dɛbhele 'wa "zo nɛ -lɔ. 33"Ne 'bhɛloɛ "yitɛ "me, "ɛ "kɔlepɔnya sɛ nɛ Zezu 'na -gluzɔwlo -de, "ne Lagɔ 'kwliale 'awɔ 'wayi 'klekle -jɔlo "yitɛ "ku. 34'Wayi 'glɛme, -bɛɛ' "ne bɔ nɛ 'nyɔkpɔ kɔ. "Ne -wa -kɛ nɛ 'lɛɛ 'wɔ, 'ɛ -nyɛ -bhudu "bhaa -wɛ, 'wa 'pɛ nɛ 'pɔlo "ku. 'Ɛnɛɛ 'dlasi, 'wa -nɛme nɛ 35"ne 'wa 'je nɛ -lɔ "kɔlepɔnya kɔ, "ne -ɔkɔkokɔko 'na -see 'ɔ "kɛ yle -wɛ, 'wa 'jo nɛ -lɔ kɔ.

36Soɔ 'ye Zozɛfo, -ye "kɔlepɔnya -ziɛle 'awɔ Banabase -wɛ sɛ -me 'awɔ -lɔ. Banabase sɛ zɔ nɛɛ: «-Ɔ "tamalea 'nyakpa 'dleku.» Levi 'na -gligbɛ "ku 'na 'nyɔkpɔ yɔ 'awɔ -lɔ, "ne 'ɔ -noɔ 'awɔ -lɔ 'du -ye 'wa la Siple -wɛ 'na yu yɔ. 37Zozɛfo -kɛ 'awɔ 'lɛɛ -bholo, "ɛ 'lɛɛ -wɛ 'ye 'ɔ 'pɔ- 'awɔ -lɔ 'pɔloku, "ne 'ɔ yi -lɔ 'ɛnɛɛ 'dlasi -wɛ "kɔlepɔnya kɔ 'je.

Currently Selected:

Nonoli 4: btg

Highlight

Copy