Maruku O Maruku ai buku ma hitararono
O Maruku ai buku ma hitararono
Una wotuli-tulihi: O Yohanese Maruku
O Maruku ai buku ma dumutu: O Roma ma nyawaika
Ma oraha wotulihi: O taongo 57-63
Ma buku ma titi abe ka enangohi ikurutiye: O Maruku woigo la o nyawa ihioriki abe o Yesusu womahidadi hoka o gilaongo eko o huhuloko womatengo la ka idadi waleleani o nyawaika.
Ma hitararono utuoli: Abe imaketero hoka o Matiusu wohitulihuku o Yesusu ai wowango ma ade-ade, o Maruku unangoo wotulihi o buku moi ma titi o Yesusu ai wowango ma ade-ade. Masara nako o Maruku de o Matiusu, ona manga wowango hatoli imakohowono. Abe hihioriki o Matiusu una ka ihikaika winii-niiki o Yesusu abe una womatengo ona yangimoi de yahinootoino. Masara nako o Maruku una ko waniikua to ona gea manga doomu, ho done sarakia ka idadi wotulihi ma titi o Yesusu ai wowango ma ade-ade? De gea ma titi o Maruku woihene o Peturusu ai ade-ade ma demoino, ho ma buku naa ma dolaka de naga ma ade-ade abe o Peturusu wongano-nganono ma titi o Yesusu, de gea wohiaturu la o Maruku wohitulihuku gea mata-mata. De abe o Maruku naa, una gea ai ade-ade hamake o Hidingoto ma bukuoka, angamoi una ma dihiraino de waniiki o Paulusu de o Baranabasa manga dodagioka la watobaduhunu onangika. De una ai romanga hinooto, abe una iwihiromanga o Yohanese Maruku. Ho ai ade-ade ka idadi hamake o Hidingoto ma bukuoka de ma pasala ngimoi de hangeoka de nagali iwifetongo ma pasala ngimoi de motoaka.
De nagali abe imakohowono o Matiusu ai buku de ma buku naa. Abe o Matiusu woigo la ai demoino de hohioriki abe o Yesusu Una o Yahudioka manga Koano. Masara o Maruku ai bukuino naa de woigo la ngone hohioriki abe o Yesusu womahidadi hoka o gilaongo eko o huhuloko womatengo. Abe ma buku ma demoka de ka ihikaika hamake abe hokokia o Yesusu watobaduhunu de watobaleleani o nyawaika. De ngaro naga o nyawa abe yopopanyakeuku eko yakitokata eko ona ko o Yahudi ma nyawaua eko o huha ma nyawa, masara ona mata-mataika o Yesusu wakokiduhunu de wahigaro ma totiaiika.
O Maruku ai buku ma titi ma hiaturu
Ma Jou ai Huhuloko o Yesusu womulaenge waleleani o nyawaika 1:1-13
1:1-8 O Yohanese Wotobaohi-ohiki una woboa la wahingahu-ngahu Ma Jou ai Demo-demo
1:9-11 O Yohanese wiohiki o Yesusika
1:12-13 O Yesusu iwitaili o Ibilihi
Ma Jou ai Huhuloko waleleani o Galilea ma tonakoka 1:14—6:6
1:14-20 O Yesusu wahokino iwinii-niiki yaruata
1:21-28 O Yesusu wodotoko o dodotoko ma tauoka o Kapenaumu ma kapongoka de genangoka naga womatengo iwikitokata
1:29-34 O Simono ngoi toroa o Yesusu womihitogumu
1:35-39 O Yesusu o kapo-kapongo utuikali woiki la onangoo wadotoko
1:40-45 Naga womatengo iwipado unangoo o Yesusu wihitogumu
2:1-12 Wolugu-lugu iwiao o Yesusika
2:13-17 O Lewi unangoo winiiki o Yesusu
2:18-20 O Yesusika iwileha ma titi yopuaha
2:21-22 O hirahi ma dodotoko de Ma Jou ai Demo-demo ma dodotoko ko idadiua de hohikasapuru
2:23-28 O Hiaini ma wange
3:1-6 Ai giama iheluku o Yesusu wihitogumu o Hiaini ma wangeoka
3:7-12 O nyawa duru ko manga ngoe o Yesusu wahitogumu manga popanyakeino
3:13-19 O Yesusu wahoko o nauru yangimoi de yahinooto la ka ihikaika iwinii-niiki
3:20-30 O Yesusu de o Ibilihi ma haeke
3:31-35 O Yesusu ngoi meme de ai doo-dodoto
4:1-20 O Yesusu ai hiketero ma ade-ade abe womatengo o bibiti wohibarihi
4:21-25 O posi ma hiketero
4:26-34 O nyawa manga datomo ma hiketero
4:35-41 O rato o Yesusu wohitogumu
5:1-20 Iwikokitokata o arukoka o Yesusu widuhunu
5:21-43 O Yairusu ngoi ora mohonenge de momatengoli mokangela
6:1-6 O Nasarete ma nyawa iwioluku o Yesusu
Ma Jou ai Huhuloko wosobo woiki o tonaka utuika 6:6—9:1
6:6-13 O Yesusu wahidingoto ona iwitobanii-niiki la yahingahu-ngahu
6:14-29 O Yohanese Wotobaohi-ohiki iwitoma
6:30-44 O nyawa yosana o Yesusu wahiolomo
6:45-56 O Yesusu wotagi-tagi o akere ma ngooto ma lokuino
7:1-23 O Yahudi ma nyawa manga hirahi de manga bohono agorakiye
7:24-30 Momatengo ko o Yahudi ma nyawaua de o Yesusu womiduhunu
7:31-37 Womatengo womou de o Yesusu wihitogumu
8:1-10 Utuoli o nyawa yosana de o Yesusu wahiolomo
8:11-21 Nihidodiai o Farisi ma nyawa de o Herodese ai nyawa
8:22-26 Womatengo worafioka de o Yesusu wihitogumu la ka idadi womahioriki
8:27-30 O Yesusu ko womahingahuahi abe Una o Mesia Ma Jou ai Behehongo
8:31—9:1 O Yesusu wahingahu abe ahao kiani iwihikangela de iwitoma
Ma Jou ai Huhuloko ai dodagi o Yerusaleeme ma kotaika
Abe o Galilea ma tonakokahi wotagi-tagi 9:2-50
9:2-13 O Yesusu womahimatoko ai dararono
9:14-29 O ngofaka iwikokitokata de o Yesusu widuhunu hiadono ai tokata wohititoko
9:30-32 O Yesusu wahingahu ma titi ai honenge
9:33-37 Ka onagonahi de duru yokurutiye?
9:38-40 Womatengo o tokata wohitito-titoko o nyawaino
9:41-50 O nyawa utu yaduhunu Ma Jou ai nyawaika, masara utuoli yahiatara to Una ai nyawaika
Ma Jou ai Huhuloko ai dodagi o Yerusaleeme ma kotaika
Abe o Perea de o Yudea ma tonakoka wotagi-tagi 10:1-52
10:1-12 O Yesusu wadotoko o nyawa ma titi manga ngolu-ngolukino
10:13-16 O Yesusu o ngofa-ngofaka wagahoko ma owa Ma Jouino
10:17-31 Womatengo wokaya-kaya de woboa o Yesusino
10:32-34 O Yesusu wahingahu iwinii-niikika ma titi ahao iwihohonenge
10:35-45 O Yakobusu de o Yohanese manga gogahoko
10:46-52 O Yeriko ma nyawa womatengo worafioka de o Yesusu widuhunu
Ma Jou ai Huhuloko o Yerusaleemoka 11:1—13:37
11:1-11 O Yesusu wowohama o Yerusaleeme ma kotaika
11:12-14 O gogilioro ma gota abe ko iwa ma hofoko
11:15-19 Ma Jou ai Tauino o Yesusu waduhu ona yotobafuku-fukunu
11:20-26 O gogilioro ma gota ihonengoka
11:27-33 O Yahudi ma nyawa manga hohidimono ko iwingakua abe o Yesusu Ma Jouoka de wauku woboa
12:1-12 O angguru ma redi ma hiketero
12:13-17 O Yesusu iwileha ma titi o pajaka ma tiwi
12:18-27 O Yesusu iwileha ma titi o momomiki
12:28-34 Ma Jou ai Pareta abe duru ikurutiye
12:35-40 O Yesusu o nyawaika wadotoko ma titi ona yotobadoto-dotoko o Musa ai Pareta manga dodotoko de manga sade
12:41-44 Momatengo o huha ma nyawa ami hidoaka
13:1-23 O Yesusu wahingahu iwinii-niikika abe o kangela ahao idadi
13:24-37 O Nyawa ma Ngofaka muruonoka de ahao woboali
Ma Jou ai Huhuloko iwitoma de ipaha ahao womomikoli 14:1—16:8
14:1-11 Itigioka ma oraha o Yesusu iwitoma
14:12-26 O Totilakuru ma rame-rame ma inomo yomakokutuono yolomo
14:27-31 O Yesusu wahingahu iwinii-niikika abe ona ahao iwikokiporete
14:32-42 O Yesusu womaniata o Gesemani ma ngioka
14:43-52 O Yesusu iwitaokoka
14:53-65 O Yahudi ma nyawa manga hohidimono abe yotobauru-urusu o nyawa gea o Yesusu wahimanga
14:66-72 O Peturusu womahipongono abe o Yesusika wioluku
15:1-15 O Pilatusika iwiao o Yesusu
15:16-20 O Roma ma tentara iwimia-mia o Yesusu
15:21-41 O Yesusu iwihidapakuika o gota isosalioaika
15:42-47 O Yesusu ai honenge iwikelengaika o aruku ma goronaka
16:1-8 O Yesusu ai momomiki ma ade-ade
Ma Hidogo o Maruku ai Bukuika 16:9-20
16:9-11 O Yesusu womahimatoko o ngo Maria Madalenaika
16:12-13 O Yesusu womahimatokoli yahinootoika
16:14-18 O Yesusu wahibehehongo iwinii-niikika
16:19-20 O Yesusu wogoraka daku o Horogaiye
Currently Selected:
Maruku O Maruku ai buku ma hitararono: MJDD
Highlight
Share
Copy
Want to have your highlights saved across all your devices? Sign up or sign in
Gereja Firman Allah, Yayasan Misi Masyarakat di Pedalaman