Matiusu 25

O hiketero ma ade-ade ma titi o moholehe yangimoi hokokia manga hidiai

1De o Yesusu ka wadotokohi abe ma titi kiani o nyawa ka ihikaika yomahidiaioka angamoi ko hohiorikua ai gahe muruonoka abe woboali. De o hiketero ma ade-ade moioli woade-ade wato, “Abe ma oraha Ma Jou wahikoano ai nyawaika de gea ka idadi tohiketero hokonaa. De naga o moholehe yangimoi abe yoigo yaniiki o gogilaka ma rame-rame moi. De ma rame-rame itigioka ho ona yangimoi o futuoka de yoiki ato iwibuhuku una woila-ilaka la ka idadi yomakiniiki de de una ma rame-rameika. Angamoi hokogea to ngone nanga biaha o gogilaka ma hiaturu la yomakiniiki de una woila-ilaka. De o moholehe yangimoi gea ona homoi-homoi yao-ao manga hilo amomoi. 2De abe ona yangimoiino de naga yamotoa abe yososawaro ho yomahidiaioka ma titi manga hilo, masara naga manga hou yamotoali abe yobodo ho ko iwa manga hidiai. 3De abe yamotoa yobodo ona gea ko iwa manga hilo ma minya la ihidogo nako iowahoka. 4Masara nako ona yamotoa yososawaro ona gea yomahidiaioka angamoi yomagao manga hilo ma minya. 5De ona mata-mata iwidodamaa una woila-ilaka masara una wokapaanga woboaino, ho ona yangimoi yomakokiiduoka de yakokiookoka.”

6“De ipaha o futu gorona adonoka de naga abe yopoa-poaka ato, ‘Abeika! Una ga abe woila-ilaka, una woboaka! Ho ngini mata-mata niaino la hibuhuku!’ De manga demoino gea yatumomiki ona o moholehe yangimoi. 7Ho ona mata-mata yomomikino de yomulaenge yodiai manga hilo. 8De ona yamotoa abe yobodo de ko iwa manga hidiai yomagahoko manga dodiawoika ato, ‘Ngomi mia minya ko iwedonokaua angamoi ka ma bukuokahi, ho mimagahoko nia minya la ka idadi mia hilo mihiwangoli.’ 9Masara manga dodiawo yopaluhu ato, ‘Mia dodiawo, mimahilooa, masara to ngomi mia minya naa ko inakokiwedonokaua ho done ahao to ngomioo mia hilo ka ihonenge de ko idadiuali ngomi wiwibuhuku una woila-ilaka. Ho koaho irahai ngini inimotoa niloiki onangika abe naga yotobafuku-fukunu o minya la nimaija.’”

10“De ona yamotoa abe ko iwa manga hidiai yosoboka la ato yomaija manga minya. De ona yoikoka de una woila-ilaka woboaino, ho ona yamotoa abe yomahidiaioka yosobo yomakiniiki de de una o gogilaka ma rame-rameika. De ona yowohama ma rame-rame ma ngiika de ahao ipaha ma ngorana akusioka.”

11“De ahao bootino de manga dodiawo o moholehe yamotoa gea yoboa ma ngoranino ho yomaokoino ma poretoka de yopoa-poaka ato, ‘Mia baluhu, ma ngorana naa nomibelenga la ka idadi miwohama!’ 12Masara una wopaluhu wato, ‘Ko idadiua tinibelenga, angamoi ngini gea duru ko tinihiorikua!’”

13De ai ade-ade gea wabooto de o Yesusu wotemo wato, “De hokogea tohiketero la ahi ade-adeino gea de tinihitiari la ngini ka ihikaika nimahidiaioka, angamoi ngini duru ko nihiorikua ahi gahe muruonoka eko o takoro muruono de Ngohi toboali.”

O hiketero abe ma titi o duduhunu yaruange manga tagongo

Lukasa 19:11-27

14De o Yesusu ka wadotokohi iwinii-niikika wato ona kiani yomahidiaioka abe ma oraha Una woboali. Ho o hiketero ma ade-ade moioli woade-ade wato, “De naga womatengo de ai tiwi-tiwioka abe wato wosobo wotagi-tagi o tonaka moiikali. De ko wosobouahi de watoomuino ai duduhunu yaruange de wahikokodoku o tiwi onangika de wahitagongo wato, ‘Abe ma oraha ngohi ko ihiwa de ngini kiani nihiaturu to ngohi ahi tiwi.’ 15De ahao ai tiwi wahikodoku abe hokokia imakiniiki de to ona manga hiakunu homoi-homoiika. Ho ai duduhunu womatengoika una wihidoaka o popoje motoa abe ma popoje homoi-homoiika aoma-omangiye de o gurasi. De ai duduhunu moiikali wihidoaka o popoje hinooto abe ma dola o gurasi, de ahao ai duduhunu ma hangeoka de wihidoaka o popoje moi dika abe aomangiye de o gurasi. De wahikokodoku ibooto ai tiwi gea de ka wosobo wotagi-tagi.”

16“De ka de una wosobo de ai duduhunu wohira-hira abe wamake o popoje motoa ai dutuino, una gea womulaenge wapake ma tiwi gea hokokia la ahao ka idadi wamake ma hasili genangino hiadono ahao ma tiwi idogoli abe ahao wohigilio ai dutuika. De igoungu ko itedekanuahi de ma popoje motoa gea idadi o popoje ngimoi!”

17“De hokogenangoo ma duduhunu abe wamake o gurasi o popoje hinooto ai dutuino, abe unangoo wohiaturu itiai la ma utumu wolingiri. De unangoo ko itedekanuahi de ma popoje hinooto gea idogoli abe idadi o popoje iata abe aoma-omangiye de o gurasi.”

18“Masara nako ma duduhunu ma baha abe wamake o gurasi o popoje moi dika ai dutuino, una gea ko wapakeua la ma utumu wolingiri ma ka woiki de wohibaiti dika moi o guhu o tonakuku, de genanguku wagogono ai dutu ai tiwi la wato done o nyawa iwidohiki de ma tiwi ihihanga.”

19“De ma dekana ipahaikaka de ahao manga dutu woboali ai dodagioka de waino. De woboainoka de ai duduhunu yaruange gea wahokino unangino de wahuloko la yoade-ade abe hokokia ma utumu yamake de to una ai tiwino. 20De ai duduhunu wohira-hira abe wamake o gurasi o popoje motoa ai dutuino womahingahu wato, ‘Ahi baluhu, ma dihiraino de nohihidoaka ngohino ani tiwi o popoje motoa. De gea tapake de ma utumu tamake o popoje motoali, ho naa tonihigilio tonihidoaka ngonaika ani tiwi o gurasi o popoje ngimoi.’ 21De ai dutu woihene ai demoika gea de duru widosanangi ai duduhunika ho wato, ‘Ani tagongo gea ngona duru nao irahai, de ngohi tosanangi abe ka idadi toningaku ngonaika ma titi ani karajaangino. De ngohi ma dihiraino de tonihitagongo abe hatoli ma hohutulu dika ahi tiwino, de gea nodiai duru irahai. Ho naa utuohi iwoe ka idadi tonihitagongo ngonaika. De ka idadi ngona de ngohi homakutuono hohirame-rame to ngone nanga utumu de hogogarago ma titi genangino!’”

22“De ahao ai duduhunu abe wamake o gurasi o popoje hinooto woboa unangino de womahingahu wato, ‘Ahi baluhu, ma dihiraino de nohihidoaka ngohino ani tiwi o popoje hinooto. De gea tapake de ma utumu tamake o popoje hinootoli, ho naa tonihigilio tonihidoaka ngonaika ani tiwi o gurasi o popoje iata.’ 23De ai dutu woihene ai demoika gea de duru wosanangi ho wato, ‘Ani tagongo gea ngona duru nao irahai, de ngohi tosanangi abe ka idadi toningaku ngonaika ma titi ani karajaangino. De ngohi ma dihiraino de tonihitagongo abe hatoli ma hohutulu dika ahi tiwino, de gea nodiai duru irahai. Ho naa utuohi iwoe ka idadi tonihitagongo ngonaika. De ka idadi ngona de ngohi homakutuono hohirame-rame to ngone nanga utumu de hogogarago ma titi genangino!’”

24-25“De ahao ai duduhunu abe wamake o gurasi o popoje moi dika woboaino de womulaenge womademo wato, ‘Ahi baluhu, ngohi toigo tomahingahu ahi datoro. Angamoi ani gurasi gea nohihidoakino o popoje moi, ka genangohi dika tonihigilio ngonaika. De gea ko tapakeua de ma utumu ko tamakeua genangino angamoi ngohi tonihioriki to ngona ani hininga abe ma ngoe naribuutu o nyawaika de duru noigo nahulo-huloko onangika. Abe ngaro o redi moioka de ko ngonaua nodatomo masara ka naribuutu la o nyawa genangoka inihidoaka ngonaika utu ma gugutuku ma hasilino. De ngaro ko ngonaua nokarajaanga o redioka masara naribuutu o nyawaika la ma utumu ngona namake to ona manga redino gea. De mangale ma titi ani hininga hokogea hiadono ngohi tagogono dika ani tiwi o tonakuku angamoi tohawana tato done ani tiwi ihihanga de nohingamo ngohino.’”

26“De ai dutu woihene ai demoika gea de duru ko wisanangiua ho wipaluhu wato, ‘Duru ani datoro gea itorou! De boteua ani magawe ko iwa to ngohi ahi karajaangika! Ho ngona naa nohitaere ngohino nato tatobaribuutu o nyawaika, e? De ngona nato bote o nyawa manga gugutuku ma hasili de tomahitongohioka dika, de abe ko tokarajaangua gea taribuutu la o nyawa ihihidoaka to ona manga hasilino gea. Ho naa done sarakia hiadono noelu-eluku? 27De ngaro ahi hininga ngona nataoko duru ko itiaiua de hiadono nohimodongo, masara ko idadiua nomahipongono genangino. Angamoi nako igoungu nohimodongo ngohino gea tanu ka idadi ahi tiwi nohingohama o tiwi ma tau ma gogogonika gea la ka idadi ma dogo ma hohutulu tamake ahi tiwino. Masara ngona duru ko kia-kiaua nodiai de abe tonihidoaka ngonaika!’”

28“De ahao ai dutu gea wotemo ai duduhunu womatengoikali wato, ‘Nagoraka unangino ahi tiwi o gurasi o popoje moi gea de nihidoaka unangikali abe naga ma popoje ngimoi unangoka. 29Angamoi onagona dika abe o tagongo moi tahidoakoka de gea manga tagongo yao irahai hiadono yamake ma utumu genangino abe ihihiutumu ngohino, onangika gea ka utuohi ilamoko ma utumu tohidogo. Masara nako o nyawa abe tahitagongoka moi onangika ma gea yao ko irahaiua hiadono ko kia-kiaua ma utumu yamake genangino, gea ma titi ngohioo ko tamakeua ma utumu onangino. Ho mangale ma titi ko tamakeua ma utumu onangoka, gea ahao tagoraka onangino ma tagongo abe ihira-hira tahidoakoka. Abe ngaro ma hohutulu dika manga tagongo, ma gea tagoraka onangino.’”

30“‘De abe ma titi naa una ahi duduhunu abe ko kia-kiaua iwidaene de ai tagongo ka parahaja dika, ngini niwiaoika de niwiumo ai hohowono ma ngiika abe duru kohamofufutu genangoka. Abe onagona dika genangoka ahao yopoa-poaka ma amokiye de manga ingiri ka ihikaika ihidokagoli ma titi manga odiri ko apoaua.’” De hokogea o Yesusu ai hiketero ma ade-ade abe wadotoko iwinii-niikika. De hokogea wahingahu la wahigaro onangika wato ona ka ihikaika yao irahai manga tagongo Unangoka de aino ka hiadono Una woboali.

O Yesusu wadotoko ma titi ahao Una watailako de wauru-urusu o nyawa mata-mataika

31De o Yesusu wohigila-gilahi ai bobaluhu iwinii-niikika abe ma titi hokokia ahao idadi nako o dunia ma bobaha adonoka. De Una wahingahu onangika wato, “De dokena nanga himangika de ahao Ngohi o Nyawa ma Ngofaka toboali de gea Ngohi naga de ahi kuahaka de ahi medebini ma dararono duru ilamoko. De ma oraha toboali gea de naga ahi momalaekata mata-mata ihikokiniiki. De ahao gea Ngohi togogeruku ahi pareta ma kadera ma hohailoaka la genangoka de tatailako o nyawa mata-mataika manga wowango homoi-homoiika.”

32“De ahao o dunia ma amokika yokokiboaino o nyawa mata-mata abe o dutu homoi-homoiino de yomatoomuino to Ngohi ahi himangoka. De yatoomuinoka de ahao Ngohi tatailako ona homoi-homoiika la ahi dailakoino de tahikatingaka la idadi manga doomu hinooto. De gea tahikatingaka imaketero abe hoka womatengo wotobagoana o domba de o kabingi de una wahikatingaka ma kabingi ma dombaka de aino la naga ma domba iree-ree o duduono moioka de nagali o duduono moi abe o kabingi dika. 33De o nyawa abe tahiromanga onangika to Ngohi ahi domba, ona gea tatoomuino ahi nirakoka. Masara ona abe tahiromanga o kabingi, ona gea ahao yodadi o duduono moi ahi gubadioka.”

34“De gea tahikatingaka ibooto de ahao Ngohi manga Koano ahao tahoko ona ahi nirakoka tato, ‘Niaino la niamake nia hiowa ma hidoaka ahi Babaka de aino, angamoi naa adonoka ma oraha la Ngomi miahikoano to Ngomi mia nyawaika. De nia hiowa ma hidoaka gea duru ma dodihirakahi abe o dunia ko idadiuahi de inihidiaiokau la ngini to Ngomi mia nyawa ahao niamake abe ma oraha minihikoano ngini.’

35‘De ngini tiniahokino la niamake nia hiowa mangale ma dihiraino de Ngohi ihihafini de ngini nihihiolomo. De ma oraha ahi ngomaha yodudungu de ngini nihihiokere Ngohino. De abe ma oraha Ngohi o homoaino toboa nia tauino de ngini nihidafongo. 36De ma oraha abe ahi kiahonanga ikuranga ahi badangoka de ngini nihihidoaka o baju Ngohino. De nagali abe ihigogama de ngini nihilega-lega, de abe Ngohi ihibuioka o bui ma tauoka de ngini niboa nihitu-tutumu.’”

37“De ahao ona ahi nirakoka abe yototiaioka gea, ona yopaluhu Ngohino ato, ‘Masara mia Baluhu, ngomi ko miohiningaua ma oraha abe Ngona inihafini de minihiolomo, eko abe ani ngomaha yodudungu de minihiokere. 38De hokogenangoo duru ko miohiningaua ma oraha abe Ngona o homoaino noboa de ngomi minidafongo mia tauino. De marai ko iwa ma oraha abe Ngona ani kiahonanga ikuranga ani badangoka ho hiadono ngomi o baju minihidoaka Ngonaika. 39De mia Baluhu, ngaro abe inigogama eko inibuioka de ngomi miboa minitutumu, masara genangoo ngomi naa duru ka miakokiwohangoka mia duduhunu hokogea Ngonaika.’”

40“De ahao Ngohi manga Koano tahingahu onangika tato, ‘Masara ma dihiraino de naga ma oraha abe ngini niaduhunoka to Ngohi ahi nyawa-nyawaika ma oraha abe naga manga perelu. De naa tagou-goungu tinihingahu abe nako niaduhunoka to Ngohi ahi nyawaika onagona dika de gea taetongo imaketero hoka ngini nihiduhunoka Ngohi naa. Abe ngaro ahi nyawa abe manga gogere ka itipokouku de onangika niaduhunu, gea imaketero Ngohi naa ma hirete ngini nihiduhunoka!’”

41“De gea totemo ipahaino abe ahi nyawaika de ahao Ngohi tatemoli onangika ahi gubadioka. De hokonaa ahao ahi demo onangika gea, tato, ‘Ngini naa kiani niamake nia hohowono kohadubuho nginika, ho naa ahi himangoka nisoboka la niloiki o uku ma ngootika abe ka ihikaika iwango-wango! Abe ma uku gea ma dodihirainohi de Ma Jou wohidiaiokau la o Ibilihi ma haeke dika de to ena ma momalaekata ma dorou ahao ma hohowono amake genangoka. Masara nginioo kiani inihohowono to ena ma hohowono ma ngiika gea!’

42‘Abe ngini kiani inihohowono angamoi ma dihiraino de Ngohi ihihafini de ngini ko nihihiolomua. De ma oraha ahi ngomaha yodudungu de ngini ko nihihiokerua Ngohino. 43De abe ma oraha Ngohi o homoaino toboa nia tauino de ngini ko nihidafongua. De ma oraha abe ahi kiahonanga ikuranga ahi badangoka de ngini ko nihihidoakua o baju Ngohino. De nagali abe ma oraha ihigogama de abe Ngohi ihibuioka de ngini ko nihitutumua.’”

44“De ona ahi gubadioka ahao yopaluhu Ngohino hokonaa ato, ‘Masara mia Baluhu, duru ko iwa ma oraha abe ngomi minimake ani kangela ma goronaka de ko miniduhunua. Gea ko miohiningaua ma oraha abe Ngona inihafini eko ani ngomaha yodudungu! De ngomioo ko miohiningaua ma oraha abe Ngona o homoaino noboa ngomino eko abe ani kiahonanga ani badangoka ikuranga eko abe inigogama eko abe inibuioka o bui ma tauoka! Ho done sarakia de miniduhunu nako ko minimakeua abe ma oraha Ngona ani kangela ma goronaka?’”

45“De hokogea ona yomademo, masara Ngohi ahao tapaluhu onangika tato, ‘Masara ma dihiraino de naga ma oraha abe ngini nioluku niaduhunu to Ngohi ahi nyawa-nyawaika abe ma oraha ona naga manga perelu. De naa tagou-goungu tinihingahu abe nako niolukoka niaduhunu to Ngohi ahi nyawaika onagona dika de gea taetongo imaketero hoka nginioo niolukoka nihiduhunu Ngohi naa. Abe ngaro ahi nyawa abe manga gogere ka itipokouku de nioluku onangika niaduhunu, gea imaketero Ngohi naa ma hirete niolukoka nihiduhunu!’”

46“De hokogea tatailako de tahikatingaka ibooto o nyawa mata-mataika ma oraha gea de ahao ona ahi gubadioka yokokisoboka manga hohowono ma ngiika la ka hiado-adonika yahohowono genangoka. Masara ahi totiai ma nyawa ona yakokimakeoka o wowango ka hiado-adonika.” De hokogea o Yesusu ai bobaluhu ma demo iwinii-niikika wabooto abe kanganoika ona iwileha Unangika ma titi hokokia ahao idadi nako o dunia ma bobaha itigioka.

Currently Selected:

Matiusu 25: MJDD

Highlight

Copy