Lukasa 7
7
Abe ma titi o Roma ma tentara manga haeke womatengo ai ngongaku
Matiusu 8:5-13; Yohanese 4:46-53
1De o Yesusu ai dodotoko ma demo wabooto o nyawaika abe o tonaka ma dolaka gea de ahao Una wogilio o Kapenaumu ma kapongika. 2De genangoka naga o Roma ma tentara manga haeke womatengo abe to una ai gilaongo duru iwigogama de ngade-ngade wohonenge ma titi ai panyake gea. De ma tentara manga haeke duru widora ai gilaongika gea. 3Ho abe una woihene ma titi o Yesusu naga woboainoka ma kotaka gea de wahidingoto o Yahudi ma nyawa manga hohidimono yamuruono naga o Yesusika. De gea wahidingoto la wato ona yadofanga o Yesusika to una ai gogahoko ma demo, abe una duru woigo la o Yesusu woboaino de wihitogumu ai gilaongo gea.
4De ona ma hohidimono iwibuhukika o Yesusika de duru yogaho-gahoko Unangika ato, “O Roma ma tentara manga haeke abe womagahoko ani duduhunu, to una ai hininga duru irahai ho ngomi miato itiai Ngona niduhunu unangika. 5Angamoi una gea duru wonadora ngone o Yahudi ma nyawa, de hongoli ma titi to una ai hiaturu de ai duduhunu hiadono to ngone nanga dodotoko ma tau ihigoko mia kotaka.” Hokogea manga gogahoko ma demo Unangika.
6De o Yesusu woihene manga demoino de wohimoteke ho Una wosobo yomakiniiki de ma hohidimono gea abe manga dumutu o Roma ma tentara ai tauika. De ngade-ngade yomahiadonika ma tauika de o Roma manga haeke gea wahidingotoli ai dodiawo yamuruono naga la onangoli iwibuhuku o Yesusika. De onangoo yadofanga to una ai demo o Yesusika ato, “Ahi Baluhu, ngaro ufa de nogila-gila nowohamino ahi tauino, angamoi nako ngohi naa de Ngona de ka Ngonahi ani horomati de ani gogere duru ikokurutiye. Ho tanu ko itiaiua la Ngona nowohama ahi tauino, angamoi ngohi naa ka o nyawa biaha dika. 7De ngaro toboa de tonitutumu masara tamao ko itiaiua angamoi Ngona gea ka nokurutiyeholi. Ma koaho nenangoka dika de nohuloko ma panyakeika de duru tohioriki de tonganono abe ahi duduhunu doka wotogumoka.”
8De ahao ona ka yogila-gila yadofanga manga haeke ai demo o Yesusika ato, “Angamoi ngohi duru tohioriki abe Ngona naga de ani kuahaka la ka nohuloko dika de idadioka. Abe gea tohioriki mangale ma titi ngohi naga togogere o tentara manga kuahaka abe ka onangohi yokokurutiye nako de ngohi. De nagali to ngohi ahi kuaha abe o tentara ma nyawaika ahi timiuku, de abe tahuloko onangika gea kiani duru yaniiki ahi huhuloko ma demoika. Ho nako ngohi tahuloko tato, ‘Nisobo!’ ona gea yosoboka, eko nako ngohi tahuloko tato, ‘Niaino!’ de gea ona yoboainoka. Eko nako ahi tauoka de tahuloko ahi gogilaongika abe hokonaa de hokonaa yokarajaanga, gea yodiaioka. Ho gea ngohi ka idadi tohioriki abe nako Ngona nohuloko dika ma panyakeika abe imanoa ahi gilaongo ai badangoka, gea ahao kiani wotogumoka.” Hokogea o Roma ma tentara manga haeke ai demo abe ai dodiawo yadofanga o Yesusika.
9Ka de o Yesusu woihene ma demo gea de duru woheranga ma titi una gea ai ngongaku. De Una womadogilioro o nyawa yowoe-woeika de wotemo onangika wato, “Naa tagou-goungu tinihingahu abe nako o Roma ma nyawa naa ai ngongaku de o Isiraele ma nyawa manga ngongaku, masara ka to unangohi iputurungu ai ngongaku. De abe naa ahi dekanino o Isiraele ma tonakoka ma ko tamakeuahi abe o nyawa manga ngongaku iputurungu abe imaketero hoka o homoaino ma nyawa naa to una ai ngongaku!” 10De ipaha abe ma oraha o Roma ma tentara manga haeke ai dodiawo yogilio de yowohamika ai tauika de iwimake abe ma gilaongo gea wotogumoka ai panyakeino.
O Yesusu wihimomiki o ngo bao ami ngofaka o goduuru
11De abe o Yesusu wihitogumoka ma gilaongo gea de ko itedekanuahi de Una de abe iwinii-niiki ona yomakiniiki yoiki o Naini ma kapongika, de naga o nyawa duru ko manga ngoe yomakiniiki de ona. 12De abe yomahitigino o kapongo gea ma dadaduhu ma ngoranoka de yamake o nyawa manga ngoe yohupu ma kapongino de yao o goduuru womatengo ai honenge, de manga dumutu la iwilungunu abe manga lungunu ma ngioka. De ma goduuru wohone-honengoka gea o ngo bao ami ngofaka ka womatengo dika, de o nyawa manga ngoe ma kapongino gea yomakiniiki de ngoi meme gea. 13Ho ka de o Yesusu womimake o ngo bao gea de ai hiningaka duru iwilufungu de o dora ma hiokoo ho woiki munangika de womitemo wato, “Ibootohi noari.” 14De ahao Una wogila-gila de wasoika manga momokuika abe ma honenge naga yakelenga to ena ma lokuoka. De ona abe yomaketeligoraka ma honenge ma momoku gea yomatogumoka ho ko yoagurokaua. De o Yesusu witemo wohone-honengika wato, “Goduuru, ngonaika tonihuloko la nomomikiye!” 15De hokogea dika de una wohone-honenge womomiki ai honengino de wogogeruku ma momokuoka de womulaenge wotemo-temo onangika. De ahao o Yesusu womitemo ngoi memeika wato, “Ani ngofaka naa wowangokali ho tihigilio ngonaika.”
16De ona mata-mata genangoka duru yokokihawanoka de ona iwihigogiriiri Ma Jouika ato, “Ma Jou ai kuaha de ai duduhunu duru o wange naa dika de itagi ngoneuku to Una ai nyawauku!” De utu iwihigiriiri ato, “O wange naa Ma Jou wihidingotoka ai uru ma dodofanga nanga hidogoronaino naa, de una duru de ai kuahaka!” 17De ma ade-ade abe hokokia o Yesusu wodiai onangoka o nyawa yomaketeade-ade hiadono imahora-hora o Yahudi ma nyawa manga tonaka mata-mataika de o tonaka utuikaoo yomakoketemo ma titi to Una ai kuaha.
O Yesusu wahitararono o nyawaika ma titi o Yohanese ai wowango
Matiusu 11:2-19
18De ipahainoli de ona abe iwitobaniiki o Yohanese Wotobaohi-ohikika onangoo yoihene ma titi o Yesusu ai datoro, de ona iwihingahu o Yohanesika mata-mata abe o Yesusu wodiai. De ma ade-ade gea o Yohanese woihene ho wahokino yahinooto abe iwinii-niikino. 19De wahokino de wahibehehongo wato, “Ngini kiani niloiki niwitutumu o Yesusu de niwileha Unangika niato, ‘Sarakia, Ngona naa nagou-goungu to ngomi mia Behehongo abe ma dodihiraino de Ma Jou womihibehehongoka? Eko koaho womatengoli ngomi wiwilingiri abe Una wodadi mia Behehongo Ma Jouino?’”
20De hokogea wahibehehongo de ona yahinooto yosoboka iwitutumu o Yesusika. De ona yotemo Unangika ato, “O Yohanese Wotobaohi-ohiki womihibehehongo wato ngomi miboa minitutumu de minileha Ngonaika. De hokonaa to una ai leleha, wato, ‘Sarakia, Ngona naa nagou-goungu to ngomi mia Behehongo abe ma dodihiraino de Ma Jou womihibehehongoka? Eko koaho womatengoli ngomi wiwilingiri abe Una wodadi mia Behehongo Ma Jouino?’ Hokogea to una ai leleha Ngonaika.”
21De duru ma oraha gea abe ona yahinooto yoboaino de nagali genangoka o nyawa manga ngoe abe manga kokangela irupa-rupa. De ona yahinooto manga himangoka de o Yesusu wahitogumu o nyawa manga popanyakeino, de abe yakokitokata ona gea manga tokata wahikokititoko, de abe yorafi-rafi onangoo wahitogumu la ka idadi yomahioriki.
22De ahao o Yesusu wotemo ona yahinootoika wato, “Naa ngini ka idadi niwigilio o Yohanesika de niwiade-ade unangika abe hokokia ahi datoro niamakeoka de abe hokokia ahi demo niihenoka. Abe ona yorafi-rafi tahitogumu la yomahioriki. De o nyawa abe yolugu-lugu ona tahitogumu la ka idadi yomaloikoli, de ona yapado-pado manga panyake gea iaikoka ho manga kai itebinokali, de ona yatotopongono manga doihene tohigilio onangika la ka idadi yomahiihenoli. De nagali ngini niamake abe ona yohone-honengoka Ngohi tahimomikoka manga honengino la yowangoli, de o hu-huha ma nyawaika tahingahu-ngahu o Abari ma Rorahai onangika. Ho ahi datoro gea mata-mata niwiade-ade o Yohanesika la gea ka idadi wongano-nganono.”
23“De naa ahi demo moioli niwihingahu unangika niato, ‘De o nyawa abe manga hiningaka ko hinootoua masara gea ma gahumu itagi ka Ngohino dika de ihingaku, ona gea ahao yamake ma hiowa Ma Jouino.’” De hokogea o Yesusu ai babaluhu ma demo onangika la ahao itararono o Yohanesika abe o Yesusu wagou-goungu nanga Duduhunu abe ma dodihiraino de Ma Jou wonahibehehongoka ngoneino. De wotemo ipahaino de o Yohanese iwitobanii-niiki ona yosobo yolio o Yohanesika.
24De ona yahinooto yosoboka de ahao o Yesusu watemo o nyawa yowoe-woeika ma titi o Yohanese Wotobaohi-ohiki gea ai wowango hokokia. De gea wotemo wato, “Sarakia, nako ngini nimafikiri ma titi o Yohanese ai wowangoka ma hidumutu gea niataoko hokokia? Abe ngini nia ngoe ma dihiraino de niloiki o tonaka ma kakaahaika la niwimake de ai demoino niihene. Ho ngini niwimake abe o nyawa hokokia? Bote niwimake abe una ai hininga hinooto eko wolilifanga ho ka ihikaika ai hininga watoturuuru? Koua, una gea hokogenangua ai hininga!”
25“Eko bote niato niwimake womatengo abe ai baju duru ma hohailoa de ma hali? Koua, angamoi o nyawa abe manga baju hokogea yomahinoauku ona gea yogogere o kokoano manga tauoka. Masara nako o Yohanese una womanoa o tonaka ma kakaahaka.”
26“Eko bote ngini utu niato niwimake womatengo Ma Jou ai uru ma dodofanga? De genangino de ngini duru niagoungu, angamoi una wagou-goungu wodadi to Una ai uru ma dodofanga womatengo, masara una gea ka ai uru ma dodofanga biahaua dika. 27Angamoi una gea Ma Jou wiiriki de wihidingoto la wahidiai o nyawa manga hininga la ka idadi ihidafongo Ngohi naa. De Ma Jou ai Demo-demo naa moi abe ma dodihiraino de witemo ai Ngofakika de hiadono atulihukuoka. De ai demo gea ngaro wotemo ai Ngofakika masara ma demo ma hidumutu o Yohanese Wotobaohi-ohikika. Abe ma demo gea itemo ato,
‘Abeika Ngohi ahao tihidingoto womatengo la wototaka ahi Demo-demo o nyawaika. De una gea tihidingoto wohira la to Ngona ani ngekomo wonihidiai, de ahao Ngona nihidoduruika ai poretino.’
De hokogea Ma Jou ai demo ma dihiraino abe wotemo ai Ngofakika ma titi o Yohanese.”
28“De naa tinihingahu nginika abe nako o Yohanese Wotobaohi-ohiki de o nyawa utu mata-mataika abe ma dodihirainohi ka hiadono ma oraha naa, ma ka unangohi wokurutiye Ma Jou ai himangoka. De ngaro ka unangohi wokurutiye ma oraha naa, masara ahao ma oraha Ma Jou wahikoano ai nyawaika de ko imakadaenokaua. Angamoi ma oraha gea de Ma Jou ai nyawa mata-mataika naga de manga hiowa duru ma amoko abe ahao yamake Ma Jouino. Ho ahao dokena nanga himangika de Ma Jou ai nyawa onagona dika abe ngaro manga gogere itipokouku dika, masara ka onangohi yokurutiye nako de o Yohanese Wotobaohi-ohiki!”
29De o Yesusu wogila-gila wotemo wato, “De o nyawa yowoe-woe abe yotoihene o Yohanese ai demoino gea, ona yokokidafongo ai demo. Abe ngaro utu onangino o nyawa abe yotobagaho-gahoko o pajaka ma tiwi de hiadono yatobarusi o nyawaika, ma onangoo ai demo yodafongo de yomangaku abe Ma Jou ai totiai ma ngekomo gea duru itiai. De ona gea abe ai demo yodafongo de o Yohanese waohikoka onangika. 30Masara naga utu abe yotoihene o Yohanese ai demoino de ko yodafongua ho ka yoluku la una waohiki onangika. De ona gea o Farisi manga doomuino ma nyawa de ona abe yotobadoto-dotoko o Musa ai Paretaino abe duru iwioluku o Yohanese ai dodotokika, ho gea onangoo yaoluku Ma Jou ai totiai ma ngekomo.”
31De mangale ma titi o nyawa manga ngoe ko yodafongua o Yohanese ai demo de o Yesusu ai demo enangoo ko yodafongua, ho o Yesusu watemo onangika wato, “Masara ngini naa ka nioluku dika to ngomi mia demo niodafongo. Ho koaho tinihiketero hokokia? 32Marai irahai tinihiketero ngini naa hoka o ngofa-ngofaka o doomu moi abe ona ko yasanangiua manga dodiawoika. De o ngofaka gea yogoo-gogeruku o paharoka la yogoo-gogule genangoka, masara yomaketeloliliara ona de manga dodiawo ho yahigurubungu onangika. De manga gurubungu ma demo ato, ‘Ngomi miato irahai hogoo-gogule hoka o nyawa o gogilaka ma rame-rameoka, ho mia sulingi miawuu-wuwu la homakutuono hohirame-rame de nanga hininga ma garago, masara ngini nia hininga ko igaragoua.’”
“‘De ipahaino de ngomi miato irahai hogoo-gogule hoka o nyawa abe yomatoomuino ma titi manga dutu womatengo wohonengoka ho ngomi minyanyi nanga hininga ma huha ma nyanyianga abe hoka nanga biaha nako o nyawa yohonenge. Masara ti ngini nia hininga niato ufa homaaduru abe hoka nanga hininga ma huha masara koaho hogarago. Ho ngini duru ko niminiikua to ngomi naa mia hininga!’” De gea o Yesusu ai hiketero ibooto de ahao wogila-gila wahitararono onangika wato, “Hokogea o ngofaka o doomu moi gea manga liliara ma demo, de manga hininga gea tato imaketero abe hoka ti nginioli nia hininga abe nihioluku Ngohi naa de abe ngaro o Yohanese Wotobaohi-ohiki ma unangikaoo niwioluku.”
33“Angamoi nako o Yohanese to una ai hininga ma dumutu ko o rame-rameikaua ho una ko wokerua o angguru ma gohaka ma teongo de ma ngoe wopuaha dika ho ko wolo-olomua de ko wokerua. Masara ngini naa nia hiningaka niato ufa o Yohanese ai wowango hokogea ma koaho wogarago dika, de genangino nihititi la niwioluku unangika. De gea hiadono niwitae unangika niato, ‘Una gea iwikokitokata.’”
34“De ahao Ngohioli toboa, abe Ngohi naa o Nyawa ma Ngofaka abe o Horogaka de tauku toboa masara o nyawaino tomaboa. De Ngohi toboaino de ahi datoro imakohowono de to Yohanese ai datoro, angamoi Ngohi tanii-niiki ti ngini nia rame-rameoka de Ngohioo tokere ma ngokere abe ti ngini nia biaha niatobaokere. Masara to Ngohioo ahi datoro ngini ko niodafongua, de hiadono genangino nihititi la nihitaere Ngohino! Abe nia dodaere ma demo Ngohino niato, ‘Abeika Una gea duru wolomo ilamokuku de iwitobadaluku! De ga Una hiadono wadodiawo o howo-howono ma nyawaika! Eii! Ngaro ona abe yotobagahoko o pajaka ma tiwi abe manga hininga duru itorou masara duru yomaketedodiawo ona de Una gea!’ Hokogea ti ngini nia dodaere Ngohino.”
“Ho abeika nimafikirohi. Abe ngaro o Yohanese ai wowango la o rame-rame wadokaowara de ai hininga ma huha naga ma ngoe, masara ngini niwioluku unangika. De barikua Ngohioli abe ahi hininga hatoli igarago de tanii-niiki nia rame-rame, ma gea ngini ka nihiolukoo Ngohino, de ahi demo nginika ko niodafongua!”
35“De ngaro hokogea ti ngini nia hininga la mia demo niaoluku, masara itararonoka abe to Yohanese ai demoka de to Ngohioo ahi demoka de mia demo gea mata-mata de ma sosawaroka. Angamoi o nyawa abe imihigihene to ngomi mia demoino, onangoka ihihofoko de manga wowango ma datoro ma rorahai. De manga datoro ma rorahai gea ihitaana abe ngomi naa mia demo ihititi o sosawaro ma gou-goungino.” Hokogea o Yesusu ai demo onangika.
Momatengo ami dora mohitunguu o Yesusika abe ma oraha mihituagi de o minya ai louuku
36De ipahainoli de o Farisi ma nyawa womatengo ai romanga o Simono, una wiahoko o Yesusu la yomakutuono yolomo o Simono ai tauoka. De o Yesusu wowohama to Simono ai tau ma goronaika de ona yomulaenge yolomo. 37De naga momatengo o ngofeka ma kapongoka gea abe ami wowango ma datoro itotorou, de muna moihene abe ma titi o Yesusu wolomo o Farisi ma nyawa gea ai tauoka. Ho muna gea male de maoino moi o boto ma rorahai abe o hakaruino yodiai de gea ma dola o minya abe ma bounu duru ihailoa. 38Ho muna moboaino de momaokoino o Yesusu ai poretino de moari-ari. De to muna ami koongo irerouku to Una ai louuku hiadono yopehaka ai lou. De ahao muna gea mohiehe ai lou de ami tadauru, de mabounu ai louika, de mihituagi ai louuku de ma minya ma hohailoa gea.
39De ma Farisi ma nyawa o Simono, abe una wiahokino o Yesusu ai tauino, una womatemo doka ai hiningaka wato, “Naa duru itararono abe Una naa ko Ma Jou ai uru ma dodofangua. Angamoi nako hoka wagou-goungu Ma Jou ai uru ma dodofanga womatengo, gea ka idadi womihioriki abe muna gea miso-soika ami wowango hokokia, angamoi to muna ami wowango duru itotorou!”
40Masara o Yesusu wohioriki to Simono ai hininga ma dola ho witemo unangika wato, “Simono, naga moi toigo tonitemo ngonaika.”
De o Simono wopaluhu wato, “Iya, ahi Guru, ka idadi notemo dika.”
41De o Yesusu woade-ade moi unangika o hiketero ma ade-ade, wato, “Naga o nyawa yahinooto abe homoi-homoi de manga nagimoka womatengoika abe wahitobahibau o tiwi o nyawa-nyawaika. De womatengo ai nagimi imakadaene de o nyawa manga karajaanga ma hewa abe yokarajaanga o taongo moi de ma hononga ma dekana. De womatengoli gea ai nagimi imaketero de o nyawa manga karajaanga ma hewa abe o wange moritoaino dika. 42De ona yahinooto gea ko idadiua yaturuuru la manga nagimi yahihanga angamoi manga tiwi duru ko adonikaua. De ahao una abe nengokadauino wahibau o tiwi ona yahinootoika una ka waofi dika manga nagimi wato ngaro ufa dika de yaturuuru. Ho sarakia o Simono, nako ngona nafikiri, ona yahinootoino de ka onagonahi manga dora ilamoko abe unangika waofi-ofi manga nagimi?”
43De o Simono wopaluhu wato, “Nako ngohi, marai una abe to unangohi ai nagimi ilamoko aofioka, una gea ai dora hatoli ilamoko abe wahitobahibauika.”
De o Yesusu wotemo wato, “Genangino de duru nagoungu ani demo.” 44De ahao Una womihimanga ma ngofekaika masara witemo o Simonika wato, “Abeika nafikirohi to muna naa ami datoro kangano. Abe ma oraha towohama ani tauino naa de ngona ko nohihidoakua o akere Ngohino la ahi lou tomaihoro. Masara muna naa ami koongoino de mohipehaka ahi lou, de ami tadauru mapake la gea mohiehe. 45De ngona kangano ko nohibounua Ngohi la ani tabea nohihimatoko Ngohino, masara muna kanganohi abe toboaino de hiadono naa de ko motogu-togumua mabounu ahi louika. 46De kangano ngona ko iwa ani horomati ma dodunguu Ngohino abe ko nohihituagiua de o minya ahi peauku. Masara muna naa mapake o minya abe duru ihohailoa la genangino de mohituagi ahi louuku. 47De ami dora ma datorino gea abe imihitaana ami howo-howono akokiofioka, ho ka idadi ami dora ma amoko itagi Ngohino. De gea igoungu abe ami howono ma dihiraino duru iwoe, angamoi ka idadi hamake abe ma oraha naa de ami dora duru ma amoko ilaku munangoka. Masara o nyawa abe ai howono ko iwoeua de aofioka, una gea ai dora enangoo ko ilamokua.” 48De ahao o Yesusu womitemo munangika wato, “To ngona ani howo-howono takokiofiokau.”
49De ona abe yomakutuono yolomo de de Una yomakoketemo ato, “Abeika naa Una womahitouna dika to Ma Jou ai karajaanga hiadono wato ka idadi waofi o nyawa manga howo-howono! Gea Ma Jou dika abe wakunu o howono waofi!”
50De ahao o Yesusu wotemoli ma ngofekaika gea wato, “To ngona ani ngongaku iniduhunoka ani howo-howonino, ho naa ngona ka idadi nolio dika ani tauika de ani hininga de ma riidoka.”
Currently Selected:
Lukasa 7: MJDD
Highlight
Share
Copy
Want to have your highlights saved across all your devices? Sign up or sign in
Gereja Firman Allah, Yayasan Misi Masyarakat di Pedalaman
