Lukasa 24

O Yesusu womomiki ai honengino

Matiusu 28:1-10; Maruku 16:1-8; Yohanese 20:1-10

1De o Hiaini ma wange ipahaino de duru o ngoru-ngorumino abe o Gareja ma wangeoka de o ngo-ngofeka gea yoiki ai lungunika de naga yao ma minya de ma muuru gea abe ma futu hinootohi ihidiaiukuoka. 2Masara yomahiadonoka de yamake abe ma dadatoko ma hakaru gea iluluokau ma lungunu ma ngoranoka de aino. 3Ho ona yogila-gila yowohamika, masara ko yamakeua o Yesusu ai honenge. 4De manga hiningaka yolilifangoka, masara ka itodokanino naga o nyawa yahinooto yomaokoino manga datekoka de manga baju duru iareheholi hiadono yahidotararono onangika. 5De ma ngo-ngofeka gea duru yamodongo onangika ho ka yomamotumuku manga himangoka ka hiadono manga himanga yodaharuku dau ma tonakuku. De ma nauru yahinooto yotemo ato, “Adodoa ho ngini niwilingiri womatengo abe wowango-wango naa o hone-honenge ma ngioka? 6Una ko iwiwa naangoka, angamoi iwihimomikoka ai honengino! Abeika nimahohiningahi to Una ai demo ma oraha ngini de Una nagahi o Galilea ma tonakoka. 7Abe Una wato kiani o Nyawa ma Ngofaka iwihidoakohi o howo-howono ma nyawaika la ona iwihidapakuika o gota isosalioaka, de ahao o wange hangeino ipahaino de womomikokali ai honengino. Hokogea Una winitemo ma dihiraino.”

8Ka de yoihene de ona yohininga to Yesusu ai demo abe ma dihiraino wahingahuoka. 9-10De o ngo-ngofeka gea o ngo Maria Madalena, de o ngo Yohana, de o ngo Maria abe o Yakobusu ngoi meme, de nagahi utuoli. De ahao ona ai lungunu yanoaika de yolio la yahingahu mata-mata idadioka abe ai hidingoto ma nyawa yangimoi de yamoiika de abe ona utuikali mata-mataika abe iwitobanii-niiki. 11Masara abe iwinii-niiki ona ka yoluku manga ade-ade ma demo gea de ko yongakua angamoi yataoko ato bote o homoa ma demo dika. 12Masara o Peturusu una womaokoino de wosoboka womapopaata o lungunika. De womahiadono de womaponuku la watutumu doka ma goronaika. De genangoka wamake ka o ngoere ma bela-belaka dika abe o Yesusu ai honenge ma hahawoino. Ho una ka wolio de duru woheranga abe ma titi o kia idadioka.

O Yesusu womahimatoko o ngekomoka

13De ma wange gea dika abe o Yesusu womomiki ai honengino de naga iwinii-niikino yahinooto abe yotagi-tagi o Yerusaleemoka de o kapongo moiika ma romanga o Emausu. Abe ma kapongo gea o kilo ngimoi de moi ma gurutika imakitingaka de o Yerusaleeme. 14De ona yahinooto manga dodagi ma goronaka de yomakoketemo ma titi mata-mata abe idadioka. 15De abe yomakoketemo manga gogiriakahi de o Yesusu Una ma hirete yomakamake de ona ho womahitigino la yomakiniiki manga dodagioka. 16De ona ka idadi iwimake masara ko iwihiorikua angamoi imaketero hoka manga lako atatokohi la ufa iwihioriki gea o Yesusu.

17De o Yesusu wotemo onangika wato, “Nia demo ma titi o kia naa abe nimakoketemo nia dodagi ma goronaka?”

Ka de yoihene ai demo gea de yomatogumoka ho ka yomaokoino dika ma ngekomo ma goronaka. De o Yesusu wamake manga himanga de itararono abe duru yohuha manga hiningaka. 18De womatengo ona yahinootoino abe ai romanga o Keopasa wipaluhu wato, “Ani demoino gea de tataoko abe ko nohiorikuahi hokokia idadi naa ma duruika o Yerusaleemoka. Ho marai Ngona ka nomatengo dika abe ko nohiorikua, angamoi o nyawa mata-mata ihioriki. Abe barikua o dionikino dika ma nyawa ma onangoo ihiorikoka abe idadioka.”

19De o Yesusu wileha wato, “Ho gea o kia idadi?”

De ona yopaluhu ato, “Iya, ma titi abe hokokia idadi womatengoika abe naa ma duru naga o Yerusaleemoka. De Una gea ai romanga o Yesusu, abe Una o Nasarete ma kapongoka ma nyawa. De Una gea Ma Jou ai uru ma dodofanga womatengo, de to Una ai demo duru de ma kuahaka. De nagali abe ka idadi o heheranga ma ngoe wodiaioka. Ho gea itararono ai datoro de ai demoino abe Ma Jou widuhunu Unangika. 20De ipaha de nanga hidemo ma nyawa Ma Jouika manga hohidimono de nagali utu nanga hohidimonino, ona iwihidoaka o Roma ma poparetaika la iwiurusu. De ma bahauku yoputuhu ato kiani o hohonenge ma hohowono iwidaene, ho iwihidapakuika o gota isosalioaka de naa wohonengoka. 21Masara ngomi tanu duru mionganono abe Una gea nanga Mesia abe Ma Jou wonahibehehongo wato wihidingoto la ahao wonaduhunu ngone o Isiraele ma nyawa nanga kangelaino. Masara abe wohonengoka de o wange hange ipahaikaka, ho to ngomi mia nganganono gea marai ko idadiuali! 22De masara kangano miihenino o ade-ade moi abe duru imihiheranga. Abe kangano duru o ngorumino de mia dodiawo o ngo-ngofeka yamuruono naga yoiki yotutumu to Una ai lungunika. 23De yomahiadono ai lungunika ma ko yamakeua to Una ai honenge. De yolioino de yoade-ade abe yamake ai lungunoka o malaekata abe yahingahu onangika ato bari Una gea wowangokali. 24De gea yoihene de ahao mia dodiawo utu yamuruono naga yosoboka yoiki ai lungunika de yomahiadono de yamake duru imaketero abe hoka o ngo-ngofekali manga ade-adeoka, abe ko iwimakeua Una gea. Ho ngomi naa mia hiningaka duru mililifangoka abe done ma titi o kia idadi Unangika!”

25De o Yesusu wotemo onangika wato, “Ngini naa done totokia hiadono nia hininga ko ataokua de abe nia pea itogowini! Angamoi ka ikurangohi niataoko Ma Jou ai Demo-demo mata-mata abe ai uru ma dodofanga ihitulihuku ma titi nanga Mesia abe Una ma dodihiraino de wonahibehehongoka. 26Angamoi nako to ona manga demo ka idadi niataoko, gea ahao itararono nginika abe kiani nanga Mesia iwihikokangelahi. De gea duru imaketero abe hoka kangano nia ade-ade ma demoka niato naa ma duru iwihikokangela Unangika gea o Yerusaleemoka. De ai uru ma dodofanga manga demoino de inahingahuoo abe nanga Mesia iwihikokangela ipaha de ahao ka idadi Ma Jou wihidoaka ai medebini ma dararono Unangika.”

27De ahao o Yesusu wahitararono onangika Ma Jou ai Demo-demoino mata-mata abe ma dodihiraino de ihitulihukuoka ato ahao hokokia kiani idadi Unangika. De gea womulaenge de o Musa ai demo de wagoraka ma demo mata-mata abe iwihidumutu o Mesiaika de wahitararono hokokia ma demo ihingodumoka. De ahao wogila-gila de wagoraka Ma Jou ai uru ma dodofanga utuinoli manga demo de genangoo wahitararono ona yahinootoika la ka idadi ihioriki hokokia kiani idadi Ma Jou ai Mesiaika. Masara gea wahitararono de ko womafetonguahi abe tanu Una gea manga Mesia.

28De gea ma oraha wahitararono de ka yotagi-tagiohi, ho naa ngade-ngade yomahiadonoka manga dumutika abe o Emausu ma kapongika. De o Yesusu tanu ai hininga la ko womatogumuahi ma ka wogila-gilahi dika ai dodagioka. 29Masara ona duru iwihigaro Unangika ato, “Ngomi duru migahoko la naangoka dika nomanoa de de ngomi o futu naa, angamoi naa o bobimaowaka de itigioka ifufutu.” Ho Una womodeke de wowohamika la womanoa onangoka. 30De ipaha ona yogogeruku la yolomo manga mejaka. De ma oraha gea de Una waleino o roti de wohitarimakaseokahi Ma Jouiye de ahao wakokabelaka de wahidoaka onangika. 31De ka de ai datoro gea yamake de manga hininga ma lako ko atatokokaua ho duru itararono iwihioriki Unangika. Masara ka de iwihioriki de Una ka aiaho, ko iwimakeokaua! 32De gea ona yahinooto duru yogarago de yomakoketemo ato, “Una gea o Yesusu! De gea ma titi ho hiadono kangano nanga dodagioka ma oraha wonahitararono Ma Jou ai Demo-demoino de to ngone nanga hininga hoka duru ifae de o garago. De nanga garago gea ma titi o Yesusu Una ma hirete abe wonahitararono ngoneino!”

33De hokogea dika de ona yahinooto yomaokoino de yosoboka yolio o Yerusaleemika. De yomahiadonoka de yoiki yatutumu ona yangimoi de yamoi iwitobanii-niiki o Yesusika de naga utuoli yomatoomuino onangoka. 34Masara ona iwitobanii-niiki yohira yotemo yahinootoika ato, “Nanga Baluhu idodutu wagou-goungu womomikoka ai honengino! Angamoi Una womahimatokoka nanga dodiawo naa o Simonika!” 35De ahao ona yahinootoli yahingahu de yoade-ade onangika mata-mata abe idadi onangika ma oraha yomakoketemo de o Yesusu o ngekomoka, de abe hokokia iwihioriki ma oraha wakokabelaka manga roti.

O Yesusu womahimatoko iwitobanii-niikika

Matiusu 28:16-20; Maruku 16:14-18; Yohanese 20:19-23

36De abe ma oraha ona yahinooto yoade-ade manga gogiriakahi manga dodiawoika de ka itodokanino de o Yesusu naga womaokoino manga hidogoronaka. De Una wotemo onangika wato, “Nia hininga ngaro ka iriidoka!” 37De ona mata-mata yatodokana de duru iwimodongo angamoi manga hiningaka yomafikiri ato Una gea marai o nyawa yohonengoka manga tokata. 38Masara Una wotemo wato, “Adodoa ho nihimodongo? De adodoa ho nia hininga ka hinootohi ma titi Ngohi? 39Abeika nimalega ahi nabo ma dodunguu ahi giamino naa, de ahi louokaoo, la genangino nihioriki de itararono abe igou-goungu Ngohi naa. Niaino nihiso, angamoi nako o tokata ko iwa ma roehe de ma kobongo, masara ka idadi niamake abe Ngohi naa naga de ma enanga!” 40De gea wotemo ibooto de wahimatoko onangika ai giama de ai lou.

41De ngaro hokogea womahimatoko de wahigaro masara manga hininga ka hinootohi ma titi duru yogaragoholi de nagali abe yokokiheranga hiadono yomaleha ato, “Naa done sarakia? Bote Una wagou-goungu womomikoka eko nanga hininga inaeluku?” Ho o Yesusu wotemo wato, “Nginioka naga o inomo?” 42De iwihidoaka Unangika o nawoko ma harongo o dobiki moi. 43De ma nawoko gea wale de waolomo manga hima-himangoka.

44De ahao wotemo wato, “Naa abe idadioka Ngohino duru imaketero dika hoka tinihingahuoka ma dihiraino abe ngone ka homakiniikohi de totobadotoko. Abe ma dihiraino gea tato mata-mata abe ma dekanoka de ihitulihukuoka ma titi Ngohi, gea mata-mata kiani idadi Ngohino. Abe ngaro o Musa ai Paretaka ma demo abe ihidumutu Ngohino, de abe Ma Jou ai uru ma dodofanga manga demoka, de abe ma demo utuino hohiromanga o Higiriiri ma Nyanyianga ma bukuoka de ihidumutu Ngohino, gea ma dihiraino de tinihingahuoka abe ma demo gea mata-mata kiani ihingodumu ahi wowangoino. De ma oraha naa ka idadi nihioriki abe ma demo gea mata-mata ihingodumoka Ngohioka.”

45De ahao Una wafelenga manga hininga la ka idadi ona yataoko itiai Ma Jou ai Demo-demoino. 46De Una wato, “De gea igoungu abe ma dodihiraka atulihukuoka abe Ngohi Ma Jou ai Mesia kiani ahi kangela tohimangohi de tohonengohi de ahao ahi wange hange ipahaino de tomomikokali ahi honengino. 47De ahi abari gea kiani o nyawa yahingahu-ngahu o dunia ma nyawa mata-mataika, de gea yahingahu-ngahu de to Ngohi ahi kuaha. Abe imulaenge o Yerusaleeme ma kotaka naa de imahora-hora o dunia ma amokika. De ma abari gea ma titi abe onagona dika yotoba de yoporete manga howo-howonino, ona gea ahao Ma Jou waofi manga howono gea. 48De ngini naa abe kiani nihitobahingahu-ngahu o nyawa-nyawaika, angamoi abe idadioka Ngohino ngini ma hirete niamakeoka de nia lako hinooto.”

49“De naa nitoihene ahi demoino, angamoi Ngohi ahao tihidingoto nginika Ma Jou o Womaha abe ma dihirainohi de ahi Baba winihibehehongoka. Masara ngini ufa ma kota nianoaika, ma kiani niwidamaa naa o Yerusaleemoka ka hiadono woboa nginiuku de winihiakunu de ma kuaha abe o Horogaka de auku iboa.” Hokogea o Yesusu ai behehongo ma demo iwinii-niikika.

O Yesusu wogoraka daku o Horogaiye

Maruku 16:19; Hidingoto 1:9-11

50De ipahainoli de o Yesusu wao ona abe iwinii-niiki la yohupu ma kotaino gea de yoiki o Betania ma kapongika. De genangoka ai giama wagorakiye de wagahoko ma owa onangika. 51De wahiowa ai gogiriakahi de wanoaika abe iwigoraka daku o Horogaiye. 52De gea yamake abe Una iwigorakiye ho yomahuba-huba o Yesusika. De yomahuba ibooto de yolio o Yerusaleemika, de manga kokihiningaka duru aomangoka de manga garago. 53De gea o wange-wangeiye ona yoiki Ma Jou ai Tauika angamoi duru ka ihikaika iwihigiriiri Ma Jouika genangoka.

Currently Selected:

Lukasa 24: MJDD

Highlight

Copy