Marcos 9
9
1Naghambae pa gid si Jesus, “Matuod rang ginahambae kinyo nga may iba iya kinyo nga indi gid mamatay hasta indi nanda makita ro gahom it Dyos sa anang paghari sa anang mga sinakpan.”#9:1 Hambae ku iba, raya hay napatungod sa pag-abot ku Espirito Santo ku Kaadlawan it *Pentecostes ag sa mga sari-saring milagro nga mabasa naton sa Mga Binuhatan.
Nag-iba ro Itsura ni Jesus
(Mat 17:1-8; Luc 9:28-36)
2Pagkataliwan it an-om nga adlaw, gindaea ni Jesus sanday Pedro, Juan ag Santiago ag nagsaka sanda sa mataas nga bukid nga sanda-sanda eang. Tag idto eon sanda hay hasaksihan ku tatlo nga nag-iba ro itsura ni Jesus. 3Ro anang eambong hay nangin kaputi-puti ag kasilaw-silaw. Indi matupungan ro kaputi it bisan anong klasing pagkula iya sa kalibutan. 4Ag gulpi eang dayon nga hakita ku tatlo ngato sanday Moises ag si Propeta Elias nga nagapakighambae kay Jesus. 5Naghambae dayon si Pedro kay Jesus, “Maestro, mayad ngani ay iya kami. Mayad siguro maobra kami it tatlong ka payag. Sambilog para kimo, sambilog para kay Moises ag sambilog man para kay Elias.” 6Matsa owa sa paino-ino ni Pedro ro ana ngatong ginhambae, ay hinadlukan sanda it duro.
7Gintabunan dayon ro tatlo it daeaura. Ag may limog nga naghambae halin sa daeaura, “Daya ro akong palangga nga unga. Pamati kamo kana it mayad.” 8Gulpi eang dayon nga naduea sanday Moises ag Propeta Elias. Nagtan-aw sanday Pedro sa palibot pero owa eon sanda it ibang hakita kundi si Jesus eang.
9Tag nagapapanaog eon sanda sa bukid hay ginbilinan sanda ni Jesus nga indi magsugid bisan kanyo ku anda ngatong hakita hasta indi pa mabanhaw imaw nga Unga it Tawo.
10Ginhipsan gid nanda sa iba ro andang hakita hasta nga nabanhaw imaw, pero tag owa pa ron natabo hay nagpinalitik man sanda it ueo, ag gin-inistoryahan nandang tatlo kon ano ro buot hambaeon ni Jesus it pagkabanhaw. 11Ginpangutana dayon nanda si Jesus, “Ham-an it ginahambae ku mga maestro it Kasuguan nga dapat anay magbalik ro propeta kato anay nga si Elias bago mag-abot ro Maneueuwas nga ginpromisa it Dyos?”#9:11 Mal 4:5.
12,13Ginsabat sanda ni Jesus, “Tama ro andang ginahambae ngaron. Hauna gid man si Propeta Elias agod papahaumon nana ro mga tawo sa pag-abot ku Maneueuwas. Pero ginahambae ko kinyo nga nag-abot eon ngani si Propeta Elias ag gin-obra it mga tawo ro andang maeain nga gustong obrahon kana pareho sa ginsueat sa Sagrado nga Kasueatan. Pero may sambilog pa gid nga pangutana nga kon ham-an it ginsueat it mga propeta nga ako nga Unga it Tawo hay dapat nga pagapasakitan ag indi pagkilan-on?”
Ginpamayad ni Jesus ro Sangka Unga nga Ginsudlan it Maeain nga Espirito
(Mat 17:14-21; Luc 9:37-43a)
14Pagkapanaog ni Jesus ag ku anang tatlong ka sumueunod halin sa bukid, hakita nanda ro iba nana nga mga sumueunod nga ginapalibutan it kaabo nga mga tawo. May una man nga mga maestro it Kasuguan nga nagapakigbais sa mga sumueunod. 15Hangawa gid ro mga tawo pagkakita nanda nga nagapaeangop si Jesus, ag nagdaeaeagan sanda sa pagsueang-sueang kana. 16Ginpangutana sanda ni Jesus, “Ano ro inyong ginabaisan ngaron ay?”
17Nagsabat ro sambilog sa mga tawo idto, “Maestro, gindaea ko ro akong unga kimo ay ginsudlan imaw it maeain nga espirito ag ginpaapa imaw kara. 18Kon ginaatake ngani imaw it maeain nga espirito hay ginapusdak imaw, nagabuea ro anang ba-ba, nagapagot imaw, ag nagapaeamakod. Ginpangabay ko ro imong mga sumueunod nga subueon nanda ro maeain nga espirito pero owa sanda it mahuman.”
19Nagsabat si Jesus, “Abi gid-a ro mga tawo ngara makaron. Owa pa't-a gihapon kamo nagatuo kakon! Hasta hin-uno pa baea ako mag-iba kinyo bago kamo magtuo kakon? Hasta hin-uno pa't-a ako magtiniis kinyo? Daeha ro unga iya kakon.”
20Gindaea dayon nanda ro unga kay Jesus. Pagkakita ku maeain nga espirito kay Jesus, ginpawaeas nana ro unga. Natumba ra ag nagligid-ligid ag nagbuea. 21Ginpangutana ni Jesus ro tatay ku unga, “Kan-o pa imaw nagamakaraya?”
Nagsabat ro tatay, “Halin pa ku maisot imaw. 22Pilang beses eon nga gin-itsa imaw ku maeain nga espirito sa kaeayo ag sa tubi agod mamatay. Maeuoy ka kamon. Buligi man kami kon mahimo mo.”
23Nagsabat si Jesus, “Ham-an it gapangutana ka kon mahimo nakon? Owa gid it imposible kon nagatuo ka.”
24Nagsabat ro tatay, “Nagatuo ako pero bukon it hugot. Buligi ako nga magtuo it hugot.”
25Pagkapan-o ni Jesus nga mas kaabo pa gid nga mga tawo ro nagdaeaeagan paadto kanda hay ginsugo nana ro maeain nga espirito, “Maeain nga espirito nga nagapa-apa ag nagapabungoe, magguwa ka sa unga! Ag ayaw eon it balik-balik!”
26Sumiyagit ro maeain nga espirito ag pinawaeas ro unga bago gumuwa. Matsa patay eon kon tan-awon ro unga ngani kaeabanan ku mga tawo hay naghambae, “Ay, patay eo't-a!” 27Pero ginbuytan ni Jesus ro unga sa alima ag ginpabangon ag tumindog ra nga mayad eon.
28Pagkatapos, nag-uli si Jesus sa baeay nga andang ginadayunan. Kat sanda lang ku anang mga sumueunod hay ginpangutana nanda imaw, “Ham-an baea it indi namon masuboe ro maeain nga espirito ngato?”
29Nagsabat si Jesus, “Owa eon it iba nga makasuboe ku mga espirito nga pareho kato kundi pangamuyo.”
Nagsugid it Uman si Jesus Hanungod sa Anang Pag-antos, Kamatayon ag Pagkabanhaw
(Mat 17:22-23; Luc 9:43b-45)
30Naghalin sanday Jesus sa rato nga lugar ag nag-agi sanda sa iba-ibang lugar nga sakop it Galilea. Pero owa ni Jesus igpasayod kon siin imaw gaadto 31agod hitud-an nana ro anang mga sumueunod. Naghambae imaw kanda, “Maabot gid ro oras nga ako nga Unga it Tawo hay traiduron ag itugyan sa mga tawo nga magapapatay kakon. Pero pagkatatlong adlaw hay mabanhaw ako.” 32Owa kaeubot ro mga sumueunod sa mga ginhambae ngato ni Jesus pero natahap man sanda nga magpangutana kana.
Ro Pinakamapainubuson ag Manogserbi sa Tanan hay Imaw ro Pinakaimportanti
(Mat 18:1-5; Luc 9:46-48)
33Nakaabot sanday Jesus sa Capernaum ag pagkasaylo nanda sa baeay nga andang ginadayunan, ginpangutana ni Jesus ro anang mga sumueunod, “Ano ro inyong ginabinaisan kaina sa daean?” 34Pero owa sanda nagsabat ay ro andang ginabinaisan hay kon sin-o gid kanda ro pinakaimportanti.
35Nagpungko dayon si Jesus ag ginpapaeapit nana ro mga sumueunod ag ginhambae, “Kon sin-o ro naila nga imaw ro pinakaimportanti hay dapat imaw ro pinakamapainubuson ag manogserbi sa tanan.”
36Nagtawag dayon si Jesus it sangka unga ag ana ra nga ginpatindog sa atubang ku anang mga sumueunod ag ana ra nga ginhakos. Naghambae dayon si Jesus, 37“Ro bisan sin-o nga nagadipara sa nagatuo kakon nga mapainubuson pareho ku unga ngara hay ako gid-a ro anang ginadipara. Ag ro bisan sin-o nga nagahimo karon kakon hay ana man nga ginahimo ron sa Dyos nga nagpadaea kakon.”
Kon Sin-o ro Owa Nagakuntra kay Jesus hay Kaibahan Nana
(Luc 9:49-50)
38Pagkatapos, naghambae si Juan, “Maestro, nakakita kami it tawo nga nagagamit ku imong ngaean sa pagsuboe it mga demonyo. Ginbawaean 't-a namon imaw ay bukon man abi naton imaw it kaibahan.”
39Pero nagsabat si Jesus, “Ayaw ninyo imaw pagbawaei ay kon minatuod ro anang paggamit sa akong ngaean sa paghimo it milagro, indi man eagi nana ako karon pagpakaeainon. 40Kon sin-o ngani ro owa nagakuntra katon hay kaapin ron naton. 41Matuod rang ginahambae kinyo nga ro bisan sin-o nga magatao kinyo it bisan sangka baso nga tubi tungod sumueunod nakon kamo hay makabaton gid it anang premyo halin sa Dyos.”
Indi Naton Pagtentaron ro Iba nga Magpakasaea ag Sukean Gid Naton ro Tentasyon
(Mat 18:6-9; Luc 17:1-2)
42Naghambae si Jesus, “Mas mayad pa't-a nga higtan ro sangka tawo it mabahoe gid nga galingan nga bato sa anang liog ag itagbong sa eawod kaysa sa masamitan na ro pina it Dyos sa ulihi kon makatentar imaw nga magkasaea ro bisan sambilog eang sa mga mapainubuson ngara nga nagatuo kakon. 43Kon ro imong alima ro nagatueod kimo nga magkasaea, utda ron. Mas mayad pa nga putoe ro imong sangka alima basta may imong kabuhi nga owa it katapusan idto sa eangit kaysa sa kumpleto matuod ro imong alima pero hiadto ka man sa impyerno, kon siin ro kaeayo hay owa it pagkapaeong. #9:43 Ro bersikulo 44 ag 46 (nga pareho it bersikulo 48) hay owa gintapoe sa kaeabanan nga mga daan nga kopya it Sagrado nga Kasueatan sa Griniyego. 45Ag kon ro imong siki ro nagatueod kimo nga magkasaea,#9:45 Halimbawa, ginadaea ka ku imong siki sa mga lugar nga indi mo dapat adtunan. utda ron. Mas mayad pa nga putoe ro imong sangka siki basta may imong kabuhi nga owa it katapusan idto sa eangit kaysa sa kompleto matuod ro imong siki pero mapaimpyerno ka man. 47Ag kon ro imong mata ro nagatueod kimo nga magkasaea,#9:47 Halimbawa, nagatan-aw ka it ginabawae tan-awon. eukda ron. Mas mayad pa nga sambilog lang ro imong mata basta hitapoe ka sa mga sinakpan it Dyos sa eangit kaysa sa kumpleto matuod ro imong mata pero itagbong ka man sa impyerno. 48Idto sa impyerno hay owa it katapusan ro pag-antos ay owa nagakaeamatay ro mga ueod nga nagakaon kimo, ag owa man nagakapaeong ro kaeayo nga nagasunog kimo. 49Ro tanan hay magaagi it grabi nga mga kalisod agod mabuoe ro andang maeain nga batasan. Pareho ra it asin nga nagapreserbar it pagkaon ag pareho man ra it kaeayo nga nagalimpyo.#9:49 Sa Griniyego raya hay “ro tanan hay pagaasinan it kaeayo.” 50Mapuslanon ro asin pero kon maduea eon ro kaaeat karon hay owa eon it mahimo nga hipaaeat pa ron it uman. Ngani tueara ninyo ro manami nga kinaiya it asin para sa kamaeayran ku inyong isigkatawo ag mag-ililiba kamo nga may paghidait.”
Currently Selected:
Marcos 9: akl
Highlight
Share
Copy
Want to have your highlights saved across all your devices? Sign up or sign in
2024 (Active) Wycliffe Bible Translators, Inc.
