Marcos 10

Ro Ginturo ni Jesus Hanungod sa Pagbueag it Mag-asawa

(Mat 5:31-32, 19:1-12; Luc 16:18)

1Naghalin sanday Jesus sa Capernaum ag nag-adto sa probinsya it Judea, ag pagkatapos hay nagtabok sa suba it Jordan. Abo eon man nga mga tawo ro nagtueumpok kay Jesus ag gintur-an nana sanda pareho ku permi nana nga ginaobra.

2May idto man nga mga Pariseo nga nagpaeapit kay Jesus ag nagpangutana sanda kana, agod basi may ikaakusar sanda kana sa anang isabat. Sinanda, “Puydi baea nga bueagan ku eaki ro anang asawa?”

3Ginsabat sanda ni Jesus, “Ano ro sugo ni Moises kinyo nga nasueat sa Kasuguan kato pa?”

4Nagsabat sanda, “Ginsugtan ni Moises nga bueagan ku eaki ro anang asawa basta makaobra ro eaki it kasueatan nga nagapamatuod nga ginabueagan nana ro anang asawa.”#10:4 Deut 24:1-4.

5Nagsabat si Jesus, “Ginsueat ni Moises ro sugo ngara ay matig-a gid kamo it ueo. 6Pero ku umpisa gid, ‘gintuga it Dyos ro eaki ag bayi.’#10:6 Gen 1:27 ag 5:2. 7‘Ngani ginaaywanan ku eaki ro anang mga ginikanan ag nagaiba imaw sa anang asawa, 8ag sanda nga daywa hay mangin magkapihak it dughan.’#10:7-8 Gen 2:24. Owa eon sanda ginabilanga nga daywa kundi sambilog lang. 9Ngani indi dapat pagpabueagon it tawo ro ginpaiba it Dyos.”

10Pagkasaylo nanda sa baeay nga andang ginadayunan, ginpangutana si Jesus ku anang mga sumueunod, “Ano ro kahueugan ku imong ginhambae ngato kaina parti sa pagbueag?” 11Nagsabat si Jesus, “Kon may eaki nga magbueag sa anang asawa ag umasawa it iba, imaw hay nagapangawatan. 12Imaw man kon sa bayi, kon magbueag imaw sa anang asawa ag umasawa imaw it uman hay nagapangawatan man imaw.”

Dapat Naton Tuearon ro mga Unga sa Atong Pagtuo kay Kristo

(Mat 19:13-15; Luc 18:15-17)

13Pagkatapos, may mga tawo nga nagdaea ku andang mga unga kay Jesus agod hibuytan ag hibendisyunan nana sanda, ugaling ginpangisgan ku ay Jesus nga mga sumueunod ro mga tawo ngato. 14Naakig si Jesus sa anang mga sumueunod pagkakita nana sa andang gin-obra. Ngani ginhambaean nana sanda, “Pabay-i nga magpaeapit kakon ro mga unga. Ayaw ninyo sanda pagbawaei tungod ro mga pareho kanda ro ginatapoe sa mga sinakpan it Dyos. 15Matuod rang ginahambae kinyo nga ro bisan sin-o nga owa nagapasakop ku anang kabuhi sa paghari it Dyos pareho sa pagpasakop it mga unga hay indi matapoe sa mga sinakpan it Dyos.” 16Pagkatapos hay ginkuekoe nana ro kada unga ag gintungtungan ku anang alima ag ginbendisyunan.

Malisdan ro mga Manggaranon nga Magsunod it Hantop kay Jesus

(Mat 19:16-30; Luc 18:18-30)

17Pagkatapos kato hay nagpanaw eon man sanday Jesus. Pag-abot nanda sa karsada, may tawo nga nagdaeagan paeapit kana ag nageuhod sa anang atubang ag naghambae, “Maestro, mayad ka nga tawo. Ano ro akon nga dapat obrahon agod mabaton ko ro kabuhi nga owa it katapusan?”

18Nagsabat si Jesus, “Ham-an it ginatawag mo ako nga mayad? Owa it ibang mayad kundi ro Dyos eang. 19Pero kon parti ma't-a sa imong pangutana hay raya ro akong sabat. Hasayran mo ro mga kasuguan nga ‘indi ka magpatay, indi ka magpangawatan, indi ka magpanakaw, indi ka magtestigo it pinuril, ayaw pagbue-a ro ana ku iba paagi sa pagpangluko, tahura ro imong mga ginikanan.’ ”#10:19 Exo 20:12-16; Deut 5:16-20.

20Nagsabat ro tawo, “Maestro, ginatuman ko eon ron tanan halin ku bata pa ako hasta makaron.”

21Nakabatyag it pagpalangga si Jesus sa ratong tawo, ag ana ra nga gintueok ag ginhambae, “Sambilog pa gid ro dapat nimong obrahon. Umuli ka ag ibaligya mo ro tanan nimong pagkabutang, ag ipanueupod sa mga pobre ro kabakeanan, ag may imo dayon nga manggad sa eangit. Pagkatapos hay bumalik ka agod mangin sumueunod nakon.”

22Haduhungan ro tawo pagkabati nana ku ginhambae ni Jesus. Tumalikod dayon imaw nga nagakasubo ay kaabo-abo ro anang pagkabutang.

23Gintueok ni Jesus ro anang mga sumueunod ag naghambae, “Malisod sa mga manggaranon nga magpasakop sa paghari it Dyos sa andang tagipusuon.”

24Hangawa gid ro anang mga sumueunod sa anang ginhambae. Ngani naghambae pa gid si Jesus, “Mga unga ko, malisod gid sa tawo nga magpasakop sa paghari it Dyos sa andang tagipusuon. 25Mas maeumo pa sa mabahoe nga sapat pareho it kamelyo nga mageapos sa tuhob it dagom kaysa sa manggaranon nga magpasakop sa paghari it Dyos sa andang tagipusuon.”

26Mas kapin nga hangawa gid it duro ro anang mga sumueunod sa ginhinambae ni Jesus, ngani nagpangutana sanda, “Hay sin-o ea't-a gali kara ro maeuwas?”

27Tinueok sanda ni Jesus ag ginsabat, “Imposible nga maeuwas it tawo ro anang kaugalingon, pero mahimo it Dyos nga euwason ro tawo ay owa it imposible kana.”

28Naghambae si Pedro, “Ginpang-aywanan 't-a pa man namon ro tanan-tanan ag nagsunod kimo.”

29Nagsabat si Jesus, “Matuod rang ginahambae kinyo nga ro bisan sin-o nga mag-ayaw ku anang baeay, o mga igmanghod, o mga ginikanan, o mga unga, o mga ueumhan tungod sa anang pagsunod kakon ag pagwali ku Mayad nga Balita 30hay makabaton it sang gatos nga pilo ku anang gin-aywanan. Samtang iya pa imaw sa kalibutan, pagataw-an imaw it abo nga ilistaran, mga igmanghod, mga nanay, mga unga ag mga ueumhan, ag may ana man nga kabuhi nga owa it katapusan sa paeaabuton. Pero kaibahan man tanan kara ro mga paghingabot hasta nga iya imaw sa kalibutan. 31Abo nga mga haeangdon sa mata it tawo makaron hay mangin kubos sa ulihi, ag abo nga mga kubos sa mata it tawo makaron hay mangin haeangdon sa ulihi.”

Ro ay Jesus nga Ikatlong Beses nga Paghambae Parti sa Anang Kamatayon

(Mat 20:17-19; Luc 18:31-34)

32Pagkatapos kara, nagpadayon sanday Jesus paadto sa Jerusalem. Tag sa daean eon sanda hay nagapanguna gid si Jesus sa anang mga kaibahan. Nangawa gid ro anang mga sumueunod, ag ginakuebaan ro iba pang mga nagsunod kana. Samtang nagapanaw sanda, ginpabueag ni Jesus ro anang doseng ka sumueunod sa mga tawo nga nagsunod kanda ag ginsugiran ku mga matabo kana. 33Naghambae si Jesus, “Pamati anay kamo kakon. Nagapaadto eon kita sa Jerusalem ag pag-abot idto, ako nga Unga it Tawo hay traiduron ag itugyan sa mga pinuno it mga saserdote ag sa mga maestro it Kasuguan. Pagasintinsyahan nanda ako it kamatayon ag itugyan sa mga owa nagatuo sa Dyos. 34Anda ako nga intrimison, pil-an, latiguhon ag patyon. Pero pagkatatlong adlaw hay mabanhaw ako.”

Ro Pinakadungganon hay Dapat nga Magserbi sa Tanan

(Mat 20:20-28)

35Pagkatapos hay nagpaeapit kay Jesus ro mga unga ni Zebedeo nga sanday Santiago ag Juan. Naghambae sanda, “Maestro, may amon kunta nga ginapangabay kimo.”

36Nagsabat si Jesus, “Ano kunta ron ay?”

37Nagsabat sanda, “Obraha kami nga daywa nga mga pinakaimportanti nga mga opisyales kon maghari ka eon nga may indi matupungan nga kadungganan. Sambilog kamon sa imong waea ag sambilog sa imong tuo.”

38Nagsabat si Jesus, “Owa gid 't-a kamo kasayod kon ano ro inyong ginapangayo ngaron. Makatakod baea kamo nga mag-antos parehas nakon? Makatakod baea kamo ku grabi nga kasakit pareho ku akon nga maagyan?”

39“Huo ron, matakuran 't-a namon ron,” sabat nanda.

Naghambae dayon si Jesus, “Matuod nga magaantos ag magaagi gid ma't-a kamo it grabi nga kasakit parehas nakon. 40Pero bukon it ako ro gapili it mga pinakaimportanti nga mga opisyales nga magapungko sa akong waea ag tuo. Gintigana eon ron sa mga magapungko rikaron.”

41Pagkasayod kato ku napueo pa nga ka sumueunod ni Jesus hay naakig gid sanda kanday Santiago ag Juan. 42Ngani ginpatawag dayon sanda tanan ni Jesus ag ginhambaean, “Hasayran ninyo nga sa mga owa nagakilaea sa Dyos, ro andang ginakilaea nga mga manogdumaea hay nagapamintas sa andang mga sinakpan. Ag ro andang mga pinakamataas nga mga pinuno hay kilaea sa andang pagkadominante sa andang mga sinakpan. 43Pero bukon dapat it makaruyon kamo. Ro naila nga mangin dungganon kinyo hay dapat nga mangin inyong manogserbi. 44Ag ro bisan sin-o kinyo nga naila nga mangin pinakadungganon hay dapat nga magserbi sa tanan pareho it ulipon. 45Tungod bisan ngani ako nga Unga it Tawo hay owa nag-adto iya sa kalibutan agod nga serbihan, kundi nga magserbi ag magsakripisyo ku akong kabuhi agod tubson sa pina ku andang mga saea ro abo nga mga tawo.”

Ginmayad ni Jesus ro Bulag nga si Bartimeus

(Mat 20:29-34; Luc 18:35-43)

46Nakaabot eon si Jesus kaibahan ro anang mga sumueunod sa syudad it Jerico. Tag nagapaguwa eon sanda sa syudad ngato, kaabo nga mga tawo ro nagsueunod kanda. May isaeang ka bulag idto nga nagaeumpiga sa binit it daean nga nagapakalimos. Rato hay si Bartimeus nga unga ni Timeus. 47Pagkasayod nana nga nagaagi si Jesus nga tagaNazaret, nagsinggit imaw, “Jesus, apo ni Haring David, maeuoy ka kakon!”

48Abo nga tawo ro nagsinaway kana nga maghipos. Pero imbis nga maghipos imaw hay ginbinaskog pa gid ngani nana ro anang pagsinggit. Hambae nana, “Jesus, apo ni Haring David, maeuoy ka man kakon!”

49Pumundo si Jesus ag ginhambae ro mga tawo, “Paadtuna imaw iya.”

Ngani gintawag nanda ro bulag, “Dapat hay malipay ka ay ginatawag ka ni Jesus. Tindog eon.” 50Tinaplik dayon ni Bartimeus ro anang pangsanib ag tumindog it dali-dali ag pumaeapit kay Jesus.

51Ginpangutana imaw ni Jesus, “Ano ring gusto nga obrahon ko kimo?”

“Maestro, gusto ko nga makakita,” sabat nana.

52Naghambae si Jesus, “Sige, uli eon. Makakita ka eon ay nagsalig ka kakon.” Nakakita eagi si Bartimeus ag nagsinunod dayon imaw kay Jesus sa daean.

Currently Selected:

Marcos 10: akl

Highlight

Copy