Marcos 6
6
Owa Gid Pagtahura si Jesus ku Anang mga Kasimanwa sa Nazaret
(Mat 13:53-58; Luc 4:16-30)
1Naghalin si Jesus ag ro anang mga sumueunod sa anday Jairus nga lugar ag nagbalik sa Nazaret, nga banwa nga ginbahuean ni Jesus. 2PagkaAdlaw it Inogpahuway, si Jesus hay nag-adto sa sinagoga idto ag nagturo. Ro kaabo nga mga tawo nga nagapamati kana hay nanaw-ay 't-a ag sinanda, “Siin man abi imaw mabuoe ku ana kuno nga kaaeam agod makaturo ku mga raya ngara? Ag siin man imaw mabuoe it gahom nga makaobra it mga milagro? 3Karpentero man lang ra imaw nga unga ni Maria. Ag ro anang mga igmanghod kara hay sanday Santiago, Jose, Judas ag Simon. Ag tagariya man lang ro anang mga igmanghod nga bayi.” Ngani nanaw-ay sanda kana.
4Naghambae si Jesus kanda, “Bisan siin nga lugar hay ginapadunggan gid ro propeta pero owa imaw ginapadunggi ku ana mismo nga mga kasimanwa, mga igbata ag pamilya.” 5-6Hangawa gid imaw dahil indi gid ro mga tawo idto magpati kana. Mawron nga owa imaw nag-obra idto it milagro, mageuwas sa pagpamayad sa pilang bilog nga mga masakiton nga anang gintungtungan ku anang mga alima.
Ginpapanaw ni Jesus ro Anang Dose nga ka Sumueunod Agod Magwali ag Magpangmayad
(Mat 10:1-15; Luc 9:1-6)
Pagkatapos, naglinibot si Jesus sa mga kabaryuhan ag nagturo sa mga tawo idto. 7Owa magbuhay, ginpatipon ni Jesus ro dose nana nga ka mga sumueunod ag ginsugo nana sanda nga magpanaw it tig-daywa-daywa, ag gintaw-an nana sanda it otoridad ag gahom nga magsuboe it mga maeain nga espirito.
8Ginbilinan sanda ni Jesus, “Kon magpanaw kamo, ayaw kamo it daea bisan ano kundi baston eang ag ayaw man kamo magbaeon it pagkaon ag kwarta. Ayaw man kamo magdaea it bag. 9Puydi kamo magsuksuk it sandalyas pero ayaw kamo it baeon it ilislan. 10Kon ginabaton kamo sa sangka baeay hay idto eang kamo magdayon hasta nga maghalin eon kamo sa lugar ngaron. 11Kon may hiadtunan kamo nga lugar nga indi magbaton ag indi magpamati kinyo ro mga pumueuyo, aywani sanda. Ag kon maghalin kamo sa lugar ngaron hay pagpaga ro tapu-tapu sa inyong mga siki bilang tanda nga sa mata it Dyos hay pareho sanda it mga tawo nga owa nagakilaea kana.”
12Nagpanaw dayon ro mga sumueunod ag nagwali sa mga tawo nga dapat sanda nga maghinuesoe ag matalikod sa andang mga saea. 13Abo nga mga maeain nga espirito nga nagsueod sa mga tawo ro ginsuboe ku mga sumueunod. Abo man nga mga masakiton ro andang ginhibo it eana ag ginpamayad.
Ro Pagpatay kay Juan nga Manogbawtismo
(Mat 14:1-12; Luc 9:7-9)
14Owa mabuhayi hay habatian ni Haring Herodes#6:14 Si Herodes ngara hay si Herodes Antipas nga unga ni Herodes nga hari tag si Jesus hay eapsag pa eang. Ro ana gid-a nga titulo hay “tetrarcus” nga puepareho it gobernador ugaling sa isip it mga tagaRoma nga ginsueatan ni Marcos, ro anang rangko hay pareho it hari. ro ginaobra ngara ni Jesus, tungod nangin bantog eon gid imaw. May mga nagahambae, “May gahom ron si Jesus nga mag-obra it milagro ay imaw tag si Juan nga Manogbawtismo anay nga nabanhaw.” 15Ginahambae man ku iba, “Tag propeta ron imaw nga si Elias anay nga nabanhaw.” Hambae pa gid ku iba, “Propeta ron imaw pareho ku mga propeta kato anay.” 16Pagkabati ni Herodes ku ginhambae ku mga tawo, naghambae imaw, “Imaw ron tag si Juan anay nga Manogbawtismo nga akon nga ginpapugutan it ueo. Nabanhaw imaw!”
17Naghambae karon si Herodes dahil sa anang gin-obra kato kay Juan. Kato abi hay ana nga ginpadakop si Juan ag ginpapriso, agod sundon ro gusto ni Herodias. Rayang si Herodias hay hipag#6:17 Si Herodias hay bukon eang it hipag ni Herodes kundi ana pa ra nga gumankon ay magmaeanghod sanday Herodes, Felipe ag ro tatay ni Herodias. ni Herodes, nga anang gin-agaw kay Felipe nga anang igmanghod. 18Tungod kara hay ginhambaean ni Juan si Herodes, “Ginabawae ku kasuguan it Dyos ro imong pag-asawa sa asawa ku imong igmanghod.”#6:18 Lev 18:16 ag Lev 20:21. 19Sa ginhambae ngara ni Juan hay gindumtan imaw ni Herodias, ag gusto nana ra nga ipapatay. Pero indi nana ra mahimo 20tungod ginataha ag ginaprotektahan ni Herodes si Juan, ay hasayran nana nga matarong ag balaan nga tawo si Juan. Naila magpamati si Herodes kay Juan, bisan nagalitik gid ro anang ueo sa mga ginahambae nana kara.
21Pero ku ulihi hay nakakita gid si Herodias it tama nga kahigayunan nga matigayon ro anang handom. Tag adlaw kato it pagselebrar ku pagkatawo ni Herodes hay nagpakaon imaw ku anang mga dungganon nga opisyales ku anang palasyo, mga opisyales it kasoldaduhan, ag mga haeangdon ag daeagkong mga pumueuyo it Galilea.
22Sa ruyon nga katipon hay sumueod ro unga nga daeaga ni Herodias ag nagsaot, ag naila gid ro hari ag ro anang mga kaibahan nga nagakaon. Ngani ginpangutana ku hari ro unga ni Herodias, “Ano, Nene, ro imong gusto? Hambaean eang ay bisan ano hay itao ko ron kimo.” 23Ag nanumpa pa gid imaw sa daeaga. Hambae nana, “Bisan ano ro imong pangayuon hay itao ko gid kimo, bisan ro katunga pa ku akon nga ginharian.”
24Nagguwa anay ro daeaga ag nagpangutana sa anang ina, “Nay, ano ro akong pangayuon sa hari?” Nagsabat si Herodias, “Pangayua ro ueo ni Juan nga Manogbawtismo.” 25Nagbalik eagi ro daeaga sa atubang it hari ag naghambae, “Taw-an kakon nga nakabutang sa bandehado ro ueo ni Juan nga Manogbawtismo makaron eagi.”
26Nasubo it duro ro hari pero tungod nakapanumpa eon imaw sa atubang ku anang mga bisita, ngani nahuya imaw nga balibaran ro pangayo ku daeaga. 27Ngani ginsugo eagi ku hari ro anang berdugo nga daehon kana ro ueo ni Juan. Nag-adto ro berdugo sa prisuhan ag ginpugutan it ueo si Juan. 28Pagbalik nana hay daea eon nana ro ueo ni Juan nga Manogbawtismo, nga nakabutang sa bandehado. Gintao nana ra sa daeaga, ag gintao man ra dayon ku daeaga sa anang ina. 29Pagkasayod ku mga sumueunod ni Juan ku natabo, ginbuoe nanda ro eawas ni Juan ag gineubong sa eungib.
Ginpakaon ni Jesus ro Sobrang Limang Libo Paagi sa Anang Gahom
(Mat 14:13-21; Luc 9:10-17; Juan 6:1-14)
30Pagkatapos ku andang panaw hay nagbalik ro mga apostoles kay Jesus. Ginsugid dayon nanda kana ro tanan nandang gin-obra ag ginturo. 31Kaabo-abo nga tawo nga may maabot ag may mapanaw man, ngani owa eon sanday Jesus it oras bisan nga magkaon. Mawron nga naghambae imaw sa anang mga sumueunod, “Mus, maadto kita sa lugar nga owa it kabeayan agod makapahuway-huway kita.”
32Ngani nagsakay sanday Jesus sa baroto ag nag-adto sa lugar nga owa it kabeayan agod sanda-sanda eang idto. 33Tag nagahalin eon sanda hay hakita sanda it abo nga mga tawo, ag hakilaea nanda sanday Jesus. Ag nagdaeaeagan ro mga tawo ngato halin sa tanan nga banwa paadto sa lugar nga ginapaadtunan nanday Jesus, pero hauna sanday Jesus nga nakaabot idto.#6:33 Sa Griniyego, raya hay “hauna pa it abot sanda kanda.” Abo nga nagaisip nga ro kahueugan kara hay hauna pa kanday Jesus nakaabot ro mga tawo pero sa Juan 6:1-5 hay mabasa nga hauna it abot sanday Jesus kaysa sa mga tawo. 34Pagpanaog nanda hay hakita ni Jesus ro kaabo-abo nga mga tawo nga nag-aeabutan.#6:34 Sa Griniyego, “ag pagpanaog nana hay hakita nana ro kaabo-abo nga mga tawo.” Owa ra nagakahueugan nga kat nanaog sanday Jesus sa baroto hay hakita nanda ro mga tawo nga nag-eabutan sa baybay ay suno sa Juan 6:1-5, sanday Jesus hay hauna it abot ag nagsaka sanda sa bukid. Pagpanaog eon nanda sa bukid hay dikato eon nanda hakita ro kaabo-abong tawo nga nagaaeabutan. Naeuoy gid imaw kanda ay pareho sanda it mga karnero nga owa it gabantay. Ngani abo ro ginturo kanda ni Jesus.
35Tag hapon eon nga mayad hay nagpaeapit kay Jesus ro anang mga sumueunod ag naghambae, “Hapon eon nga mayad ag owa pa rikara it kabeayan. 36Mayad siguro nga papanawon eon naton ro mga tawo ngara idto sa mga baeay sa kaumahan ag kabaryuhan agod makabakae sanda it pagkaon.”
37Pero nagsabat si Jesus kanda, “Kamo mismo ro magtao it pagkaon kanda.” Naghambae sanda, “Bisan magbakae pa kita it 200 ka denaryo#6:37 Ro sang denaryo hay sang adlaw nga sweldo it sangka trabahador. nga tinapay hay kueang 't-a sa kaabuon ngara nanda.”
38Ginpangutana sanda ni Jesus, “Pilang bilog ro tinapay una?#6:38 Sa Griniyego raya hay “Pilang bilog ro inyong tinapay.” Pero sa Juan 6:9, masayran naton nga ro tinapay ngato ag isda hay ana it sangka unga. Tan-awa abi ninyo.” Pagbalik nanda hay nagsugid sanda, “Limang ka tinapay gid lang ag daywang ka isda.”
39Ginsugo dayon ni Jesus ro anang mga sumueunod nga patipunon ro mga tawo ag papungkuon it grupo-grupo sa hilamunon. 40Ngani nagpungko ro mga tawo, may mga grupo nga mga tig-singkwenta ka tawo, ag may mga tig-sang gatos man nga ka tawo sa iba pang mga grupo. 41Ginbuoe dayon ni Jesus ro limang ka tinapay ag daywang ka isda. Nagtangda imaw sa eangit ag nagpasaeamat sa Dyos. Ginpihak-pihak na dayon ro mga tinapay ag gintao sa anang mga sumueunod agod ikapanueupod sa mga tawo. Ginhueueay man dayon nana ro daywang ka isda ag ginpapanueupod man sa tanan nga mga tawo. 42Nagkaon sanda tanan hasta nagkaeabusog. 43Pagkatapos, gintipon ku mga sumueunod ro mga habilin nga tinapay ag isda ag nakapuno sanda it dose ka kaing. 44Kon ro mga eaki eang ro huyapon hay mga limang libo ro nakakaon ku adlaw ngaron.
Nagtikang si Jesus sa Ibabaw it Tubi
(Mat 14:22-33; Juan 6:15-21)
45Pagkatapos eagi kara hay ginpasakay ni Jesus sa baroto ro anang mga sumueunod ag ginpauna it tabok paadto sa banwa it Betsaida, ay ginapauli pa nana ro mga tawo. 46Pagkapapanaw nana ku mga tawo hay nagsaka imaw sa bukid idto agod magpangamuyo sa Dyos.
47Tag nagasalikaeom eon, ro baroto hay idto eon sa tunga it dagat#6:47 Ro kaeayo halin sa andang ginhalinan hay mga 5 o 6 nga kilometro (Juan 6:19). ag si Jesus ma't-a hay idto nga isaea sa takas. 48Hakita nana nga ginalisdan ro anang mga sumueunod sa paggaod ay gasubeang sanda sa hangin. Tag aga-aga eon, nagtikang imaw sa ibabaw it tubi paadto kanda. Ginataliwanan kunta nana sanda 49-50ugaling hay hakita nanda tanan imaw nga nagatikang sa ibabaw it tubi, ngani hinadlukan sanda ag nagsilinggit ay eaom nanda hay mueto imaw.
Naghambae eagi kanda si Jesus, “Ayaw kamo it kahadlok. Ako ra.” 51Nagsakay dayon imaw sa baroto ag nagpundo ro hangin. Hangawa gid it duro ro anang mga sumueunod, 52ay bisan hakita nanda kaina ro mabahoe nga milagro nga pagpakaon nana it limang ka tinapay sa sobra sa limang libong ka tawo hay owa pa gid nanda hakilaea kon sin-o gid imaw. Matsa mga dungean gid sanda.
Ginpamayad ni Jesus ro mga Masakiton sa Genesaret
(Mat 14:34-36)
53Nagpadayon sanda it pagtabok ag nakaabot sanda sa lugar it Genesaret, ag idto sanda nagdungka. 54Pagkapanaog nanda sa baroto hay hakilaea eagi it mga tawo si Jesus, 55ngani nagdali-dali sanda it daeagan paadto sa tanan nga kabanwahan sa rato nga lugar, ag ginsugid nanda nga nag-abot imaw. Ag kon hibatian nanda kon siin si Jesus hay ginadaea dayon idto kana ku mga tawo ro andang mga masakiton nga nagaeubog sa andang mga eugban. 56Bisan siin mag-adto si Jesus, sa mga kabanwahan man o mga kabaryuhan, o kaumahan o tindahan hay ginadaea idto ro mga masakiton ag ginabutang nanda kon siin imaw gaagi. Ginapinangabay nanda imaw nga kon puydi hay sugtan nana ro mga masakiton nga tabingon nanda bisan ro gayad eon lang ku ana nga eambong. Ag ro tanan nga nakatabing kato hay nagmaeayad.
Currently Selected:
Marcos 6: akl
Highlight
Share
Copy
Want to have your highlights saved across all your devices? Sign up or sign in
2024 (Active) Wycliffe Bible Translators, Inc.
