Marcos 12

Ginkompara ni Jesus ro mga Pinuno it mga Judio sa mga Manog-agsa nga Nagpatay ku Unga ku Tag-ana it Ubasan

(Mat 21:33-46; Luc 20:9-19)

1Pagkatapos, may ginsugid kanda si Jesus nga paanggid nga istorya. Sinana, “May isaeang ka tawo nga may taeamnan ag gintamnan nana ra it ubas. Ana ra nga ginpakuraean ag nagpaobra imaw it pueugaan it ubas ag tore para sa bantay. Ginpaagsahan dayon nana ro ana ngara nga ubasan ag tapos nagpanaw imaw it mabuhay sa maeayo nga lugar. 2Tag tigpueu-pu eon it ubas, ginsugo nana ro isaea sa anang ulipon nga mag-adto sa mga manog-agsa agod bue-on ro anang hueay sa tubas. 3Pero pag-abot idto ku ulipon hay pinuko imaw ku mga manog-agsa ag binakoe ag pinauli nga owa it dinaea. 4Ngani pinaadto eon man idto ku tag-ana ro anang sambilog pa gid nga ulipon. Pag-abot idto ku ulipon ngato hay binunaean imaw sa ueo ag ginpakahuy-an ku ratong mga manog-agsa. 5Pinaadto eon man ku tag-ana ro anang sambilog pa gid nga ulipon. Pag-abot idto ku ulipon hay ginpatay imaw ku mga manog-agsa. Bisan makaraya ro natabo, ginpaadto pa gihapon ku tag-ana ro iba pa nana nga mga ulipon. Ag makarato man kanda ro gin-obra. Ginbakoe ro iba kanda ag ro iba hay ginpamatay man ku mga manog-agsa. 6Sa kaulihanan gid, sambilog lang ro anang puyding paadtunon sa anang ubasan. Rato hay ro ana nga palangga nga unga nga eaki. Ginsugo ra nana idto ay sinana sa anang isip, ‘Unga ko eon ron. Anda't-a ron nga tahaon.’ 7Pero pagkakita ku mga manog-agsa nga nagapaeangop ro unga ku tag-ana it ubasan hay nagkaeasugot sanda. Hambae nanda, ‘Hara ro manunubli ku ubasan ngara. Patyon ta imaw agod aton eon dayon ro anang paeanublion ngara.’ 8Ngani, pag-abot nana, anda imaw nga pinuko ag pinatay, ag pinilak ro anang eawas sa guwa it ubasan.”

9Nagpangutana dayon si Jesus sa mga tawo, “Hay alinon ku tag-ana ro mga manog-agsa ngato? Pang-adtunan na sanda ag pamatyon ag paagsahan sa iba ro ubasan. 10Owa baea kamo kabasa ku Sagrado nga Kasueatan nga:

‘Ro bato nga ginbilang nga owa it pueos ku mga panday

hay imaw pa gali ro pinakaimportanti nga bato sa pundasyon it bilding.

11 Ro Dyos ro nagplano nga matabo ron, ag makangawa-ngawa gid ron katon.’ ” # 12:10-11 Salmo 118:22-23.

12Ginadakop kunta ku mga pinuno it mga Judio si Jesus ay nakatagumpaaw sanda nga sanda ro ginapatamaan nana sa ratong paanggid nga istorya. Pero owa nanda pagpadayuna ay nahadlok man sanda sa mga tawo nga apin kay Jesus, ngani naghalin lang sanda.

Gindakop-dakop nanda si Jesus Parti sa Pagbayad it Buhis sa Emperador

(Mat 22:15-22; Luc 20:20-26)

13Ngani ro mga pinuno ngato hay nagpadaea it mga Pariseo ag mga kaapin ni Herodes#12:13 Bisan bukon it Judio si Herodes hay ginbutang imaw nga hari it mga Judio ku gobyerno it Roma. Ngani imaw ag ro anang mga kaapin hay pabor gid ku pagbayad it buhis sa Roma. agod magdakop-dakop kay Jesus sa istorya, ay basi may anang ikahambae nga magamit nanda kuntra kana. 14Nagpaeapit sanda kana ag naghambae, “Maestro, sayod namon nga matuod ro tanan nimong ginahambae. Owa ka man it ginasanto, ag imo nga ginaturo kon ano ro kamatuuran parti sa husto nga daean it pagpangabuhi nga gusto it Dyos, bisan mageain ma't-a ro buot it nagapamati. Mangutana kunta kami kimo. Eapas baea sa Kasuguan natong mga Judio kon magbayad kita it buhis#12:14 Raya hay pareho it sedula nga dapat bayran it kada eaki nga sa husto nga idad. sa Emperador it Roma o bukon? Dapat baea kita nga magbayad o indi?”#12:14 Ro Emperador hay idto nagaistar sa syudad it Roma sa nasyon it Italya. Imaw ro pinuno it Italya pati ku tanan nga nasyon nga ginsakop it mga Romano.

15Pero sayod gid ni Jesus nga nagapakuno-kuno eang sanda, ngani naghambae imaw, “Ham-an it ginadakop-dakop ninyo ako? Ambi ngani it sang denaryo#12:15 Sang denaryo ro kantidad it buhis ngato. ay tan-awon ko.” 16Gintaw-an nanda imaw it sang denaryo. Nagpangutana rayon imaw kanda, “Anyo nga itsura ag ngaean ro iya sa kwarta ngara?”

“Ana ku Emperador,” sabat nanda. 17Ginhambae sanda ni Jesus, “Kon mawron hay taw-an sa Emperador ro para sa Emperador, ag taw-an ma't-a sa Dyos ro para sa Dyos.”#12:17 Sa relihiyon it mga Romano, ro mga Emperador hay nagaako nga mga diyos sanda nga dapat simbahon ku mga tawo. Ro buot hambaeon ni Jesus hay tama nga magbayad it buhis pero indi dapat pagsimbahon it tawo ro Emperador ay ro Dyos eang ro dapat simbahon. Hangawa sanda sa sabat ni Jesus.

Gindakop-dakop nanda si Jesus Hanungod sa Pagkabanhaw

(Mat 22:23-33; Luc 20:27-40)

18Pagkatapos, may mga *Saduceo nga nag-adto kay Jesus agod mangutana. Ro mga Saduceo hay owa nagapati nga may pagkabanhaw. Naghambae sanda kay Jesus, 19“Maestro, ginsueat ni Moises nga kon may eaki nga may igmanghod nga eaki nga asawahon, ag kon mamatay ra pero owa sanda it unga nga mag-asawa hay dapat asawahon ku igmanghod nga eaki ngato ro baeo ku namatay. Ro andang panganay nga unga nga eaki hay bilangon dayon nga unga't-a ku ratong namatay.#12:19 Deut 25:5-6. Ginsugtan ro makaraya agod ro linahi ku eaki hay indi maduea. 20Makaraya aki ho. May pito anay kuno kato nga ka magmaeanghod nga puro eaki. Nag-asawa ro kamagueangan ag namatay, pero owa sanda it unga ku ana nga asawa. 21Gin-asawa it pangaywa ro anang baeo. Namatay man ratong pangaywa ag owa man sanda it unga. Ngani gin-asawa man ku pangatlo ro baeo ag namatay man ro eaki pareho ku anang mga magueang. 22Imaw nga imaw hasta sa ikapito. Nagkaeamatay sandang pito nga owa it inaywanan nga unga. Ku ulihi, namatay man ro bayi. 23Hay ano, sin-o sa pitong ka magmaeanghod ro anang mangin asawa sa pagkabanhaw ay nangin asawa nana sanda tanan?”

24-25Nagsabat si Jesus, “Saea gid-a kamo tungod nga kon mabanhaw eon ro mga patay hay pareho eon sanda it mga anghel sa eangit nga owa nagaaeasawa. Owa kamo kaeubot kon ano ro ginsueat sa Sagrado nga Kasueatan, ag owa man kamo kasayod kon mauno kagamhanan ro Dyos. 26Ag hanungod sa pagkabanhaw it mga patay, owa baea kamo kabasa ku ginsueat ni Moises parti sa ginhambae it Dyos kana tag gintan-aw nana ro kahoy-kahoy nga nagadabdab. Ginhambae ku Dyos, ‘Ako ro Dyos nga ginasinimba nanday *Abraham, Isaac ag Jacob.’#12:26 Exo 3:6. 27Ro mga patay hay owa nagasimba sa Dyos kundi ro mga buhi't-a.#12:27 Ro buot hambaeon kara hay buhi ro espirito nandang tatlo idto sa eangit bisan patay eon ro andang eawas iya sa kalibutan. Ngani nagapamatuod ra nga mabanhaw gid ro mga nagkaeamatay eon. Saea gid ro inyong pagkaeubot parti sa pagkabanhaw.”

Ro Pinakaimportanti sa Tanan hay ro Paghigugma sa Dyos ag sa Isigkatawo

(Mat 22:34-40)

28May isaeang ka maestro it Kasuguan nga nakabati ku pagbais nanday Jesus ag ku mga *Saduceo, ag hasaksihan nana nga mayad gid ro pagsabat ni Jesus kanda. Nagpaeapit imaw kay Jesus ag nagpangutana kon ano nga sugo sa Kasuguan ro pinakaimportanti sa tanan.

29Nagsabat si Jesus, “Ro pinakaimportanti hay raya: ‘Pamati kamong mga Judio! Ro Ginuo nga atong Dyos hay sambilog eang. 30Higugmaa ro Ginuo nga imong Dyos sa bug-os nimong tagipusuon, sa bug-os nimong kabubut-on, sa bug-os nimong paino-ino ag sa bug-os nimong kusog.’#12:29-30 Deut 6:4-5. 31Ro ikaywa nga pinakaimportanti nga kasuguan hay raya: ‘Higugmaa ro imong isigkatawo pareho ku imong paghigugma sa imong kaugalingon.’#12:31 Lev 19:18b. Owa eon it kasuguan nga mas eabaw pa sa rayang daywa.”

32Nagsabat ro maestro it Kasuguan, “Tama gid ron, Sir. Tama gid ro imong hambae nga ro Dyos gid lang ro Ginuo, ag owa eon it iba pa nga Dyos kundi imaw eang.#12:32 Deut 4:35; Isa 45:21. 33Ag tama man nga dapat gid nga higugmaon naton ro Dyos sa bug-os natong tagipusuon, sa bug-os natong paino-ino ag sa bug-os natong kusog. Ag kasayod man ako nga dapat naton nga palanggaon ro atong isigkatawo pareho ku pagpalangga naton sa atong kaugalingon. Mas importanti ro pagtuman sa rayang daywang ka kasuguan kaysa sa pagsunog it sapat bilang haead sa Dyos, ag sa pagtao it iba pang mga haead.”#12:33 Hos 6:6.

34Nagpati si Jesus sa kaaeam ku maestro dahil sa kamayad ku anang sabat. Ginhambae ra nana, “Madali ka lang ikatapoe sa mga sinakpan it Dyos.”

Umpisa kato hay owa eon it nagpangahas nga magpueopangutana kay Jesus.

Si Jesus hay Bukon Eang it Isaea sa mga Inapo ni David Kundi Ana Man nga Ginuo

(Mat 22:41-46; Luc 20:41-44)

35Samtang idto pa si Jesus sa Templo hay nagturo imaw sa mga tawo. Naghambae imaw kanda, “Ginahambae ku mga maestro it Kasuguan nga ro Maneueuwas nga ginpromisa it Dyos hay isaea eang sa mga inapo ni David. Paalin ron matabo? 36Si David mismo nga ginagamhan ku Espirito Santo ro nagsueat,

‘Ro Ginuong Dyos hay naghambae sa akon nga Ginuo:

Pungko iya sa akon nga tuo ag maghari ka kaibahan nakon hasta nga hiobra ko nga tueungtungan ku imong siki ro imong mga kaaway.’ # 12:36 Salmo 110:1. Basaha ro pagpaathag kara sa footnote sa Mat 22:44.

37Gintawag mismo ni David nga ‘Ginuo’ ro Maneueuwas. Hay paalin imaw mangin isaea eang sa mga inapo ni David?” Ag ro kaabo-abo nga mga tawo nga nagapamati kay Jesus hay nalipay gid sa anang ginaturo.

Ginpaandaman ni Jesus ro mga Tawo Parti sa Pagkaipokrito ku mga Maestro it Kasuguan

(Mat 23:1-36; Luc 11:37-54, 20:45-47)

38Sa anang pagturo hay naghambae man imaw sa mga tawo, “Mag-andam gid kamo sa mga maestro it Kasuguan. Naila sanda magpinamasyar nga nakasuksuk it mahaba ag magarbo nga eambong, ag magpaila-ila sa kadagayaan ag naila man sanda nga pagsinaluduhan it mga tawo. 39Kon sa mga sinagoga ag sa mga handaan hay naila man sanda nga magpungko sa mga pungkuan nga para sa mga dungganon nga mga tawo. 40Andang ginahuthot ro mga pagkabutang ku mga baeo nga bayi hasta maubos ag mangin mga pobre sanda. Ginapakita-kita man ku mga maestro ngara it Kasuguan ro andang pagpangamuyo it maeawig. Mas grabi ro andang pina nga batunon halin sa Dyos dahil sa anda ngarang mga buhat.”

Gindayaw ni Jesus Ro Haead it Pobreng Baeo nga Bayi

(Luc 21:1-4)

41Maangan-angan, tag idto pa sa *lagwirta it Templo si Jesus, nagpungko imaw sa tungod it mga ginabutangan it kwarta nga ginahaead sa Dyos. Ginapinamantaw nana ro mga tawo nga nagahueog ku andang haead. Abo nga mga manggaranon ro naghueog it abo nga kwarta sa bueutangan. 42Tapos, may pobreng baeo nga bayi nga naghueog it daywang ka pinakamanaba it kantidad nga sinsilyo.

43Pagkakita kara ni Jesus hay gintawag nana ro anang mga sumueunod ag ginhambae, “Matuod rang ginahambae kinyo nga mas abo ro ginhueog ku ruyong pobre nga baeo kaysa sa ginhueog ku tanan nga mga manggaranon ngaron, 44ay ro ginhueog nanda hay tag kaisot eang nga parti ku sobra ku andang manggad. Pero bisan pobre ro baeo ngaron hay gintao nana tanan ro anang kwarta bisan rato eon ro katapusan nanang kwarta.”

Currently Selected:

Marcos 12: akl

Highlight

Copy