Juan 11

Ro Pagkamatay ni Lazarus

1May isaeang ka eaki nga nagamasakit nga si Lazarus ro ngaean. Tagabaryo it Betania sanda ku anang mga igmanghod nga sanday Maria ag Marta. 2Dayang si Maria ro sa ulihi hay gabu-bu it pahumot sa siki ku Ginuo ag ana man dayon rato nga pahiran ku anang buhok. Si Lazarus ngato nga nagamasakit hay igmanghod ni Maria ngara. 3Ngani ginpasugiran dayon nandang daywa ni Marta si Jesus nga, Ginuo, nagamasakit mana ro imong palanggang amigo.

4Pagkasayod kara ni Jesus hay naghambae imaw, “Ro katapusan ku pagmasakit ngara ni Lazarus hay bukon it anang kamatayon kundi agod paagi sa anang kamatayon hay ikapakita ro makangawa-ngawa nga gahom it Dyos, ag ro makangawa-ngawa man nga gahom nakon nga Unga it Dyos.”

5-6Ngani, bisan palangga gid ni Jesus ro magmaeanghod ngara, pagkabati nana nga nagamasakit si Lazarus hay owa eagi imaw mag-adto sa Betania kundi nagpabilin pa't-a imaw it daywang adlaw sa anang ginateniran. 7Pagkatapos hay ginhambae nana ro anang mga sumueunod, “Mus, mabalik kita sa Judea.”

8Nagsabat sanda, “*Rabbi, kan-o eang rato nga ginaplanuhan ka nga eapugon it bato ku mga Judio ag tapos makaron, mabalik ka pa idto?”

9Nagsabat si Jesus, “Bukon abi it sa sang adlaw hay may dose oras nga mahayag? Samtang mahayag pa ro adlaw, makapanaw kita it matawhay. Owa kita gakasandad ay makakita kita it mayad dahil sa kahayag. 10Pero kon sa gabii kita magpinanaw hay basi hinandad kita ay owa eon kita it iwag.”#11:10 Sambilog nga posible nga kahueugan ku halimbawa ngara ni Jesus hay gintaeana eon it Dyos ro oras ku kamatayon ni Jesus ag hasta nga owa pa nag-abot ro oras ngaron hay matsa adlaw pa gihapon ag indi pa imaw hitabing ku anang mga kaaway.

11Pagkatapos nana it hambae ku rayang halimbawa, naghambae pa gid imaw, “Ro atong amigo nga si Lazarus hay nagakatueog, pero adtunan ko imaw agod pukawon.” 12Ngani naghambae ro mga sumueunod ni Jesus, “Mayad ngani, Ginuo, kon hakatueog imaw agod hiulian imaw it dali.” 13Eaom nanda hay gakatueog eang matuod si Lazarus pero ro buot hambaeon ni Jesus hay patay eo't-a ra. 14Ngani ginprangka eon lang sanda ni Jesus, “Patay eo't-a si Lazarus. 15Pero por dahil kinyo hay naila ako nga owa ako idto pagkamatay nana, agod maglig-on pa gid ro inyong pagtuo kakon dahil sa inyong masaksihan. Hay musyon kamo, adtunan ta imaw.” 16Tapos, si Tomas nga Kapid ro anang hayo hay naghambae sa anang mga kaibahan nga mga sumueunod, “Musyon, mamunot kita kay Jesus sa Judea. Maunong kita kana hasta sa kamatayon.”

Banhawon ro Tanan nga Nagatuo kay Jesus ag Taw-an it Kabuhi nga Owa it Katapusan

17Tag maeapit eon sanday Jesus sa Betania hay habalitaan nanda nga ap-at nga adlaw eon gali nga kinaeubong si Lazarus. 18Mga tatlong kilometro man lang ro kaeayo it Betania sa Jerusalem 19ag abo nga mga Judio ro nag-adto sa Betania halin sa Jerusalem agod mag-unong sa kalisod nanday Marta ag Maria, dahil sa pagkamatay ku andang igmanghod nga si Lazarus. 20Pagkabati ni Marta nga paadto si Jesus sa anda, nagpanaw imaw ag gintabo ra, pero si Maria't-a hay nagpaayaw idto sa anda. 21Pag-abot ni Marta hay naghambae imaw kay Jesus, “Ginuo, kon iya ka't-ing kunta hay owa't-a namatay ro akong igmanghod. 22Pero bisan makaruyon ro natabo hay sayod ako nga itao kimo it Dyos bisan ano ro imong pangayuon kana.”

23Ginsabat imaw ni Jesus, “Mabanhaw ro imong igmanghod.”

24Nagsabat si Marta, “Huo ngani, sayod ako nga mabanhaw gid ma't-a imaw sa katapusan nga adlaw kon banhawon eon ro tanan nga mga patay.”

25Tapos hay nagpaathag si Jesus, “Ako ro may gahom nga magbanhaw sa mga patay ag ako ro gatao kanda it kabuhi nga owa it katapusan. Bisan mamatay pa ro nagatuo kakon hay magakabuhi imaw hasta sa owa it katapusan. 26Ag ro tanan nga nagatuo kakon nga may kabuhi ngara nga owa it katapusan hay indi makaagi it kamatayon bisan hasta hin-uno.#11:26 Ro kahueugan kara hay bukon it pagkamatay it eawas kundi pina sa impyerno hasta sa owa it katapusan ag ginatawag man nga “pangaywa nga kamatayon” (basaha sa Pahayag 2:11, 20:6, 14 ag 21:8). Gapati ka karon?”

27Nagsabat si Marta, “Huo, Ginuo, gapati gid ako nga ikaw ro Unga it Dyos, ro Maneueuwas nga ginpromisa it Dyos nga ipadaea iya sa kalibutan.” 28Pagkahambae nana karon, nag-uli imaw ag ginhutikan ro anang igmanghod nga si Maria, “Nag-abot ro Ginuo ag ginausoy ka nana.” 29Pagkabati kara ni Maria hay tumindog eagi imaw ag umadto kay Jesus. 30Owa pa kato nakasueod si Jesus sa baryo it Betania. Idto pa eang imaw sa lugar kon siin imaw gintabo ni Marta. 31Ro mga Judio nga nag-adto sa pag-unong kanday Maria hay nagsueunod man kana pagkakita nanda nga gulpi eang imaw tumindog ag pumanaw. Eaom nanda hay gaadto imaw sa eueubngan agod idto mag-ueahab.

32Pag-abot ni Maria kay Jesus hay nageuhod imaw sa atubang na kara ag naghambae, “Ginuo, kon iya ka't-ing kunta hay owa't-a namatay ro akong igmanghod.” 33Pagkakita ni Jesus nga nagainueahab si Maria, pati man ro ana nga mga kaibahan nga mga Judio hay nagsakit gid ro anang buot ag ginbatyag nana ro andang grabi nga kasubo. 34Ginpangutana dayon nana sanda, “Siin ninyo imaw pageubngan?” Nagsabat sanda, “Musyon, Ginuo, ay ituro namon kimo.” 35Nagtangis si Jesus. 36Ngani naghambae ro mga Judio, “Tan-awa tuo, palangga gid-a nana si Lazarus.” 37Pero ro iba kanda hay naghambae, “Hapamayad na ngani ro bulag. Hay ham-an it owa na hapugngi ro kamatayon ni Lazarus?”

38Nagsakit eon man ro buot ni Jesus tag nagapaadto sanda sa eungib nga gin-eubngan kay Lazarus. Ginsadhan rato it mabahoe nga bato. 39Naghambae dayon si Jesus, “Paligira ninyo ro bato.”

Pero naghambae si Marta nga igmanghod ku namatay, “Ay, ayaw, Ginuo. Sigurado nga gapangilamo eo't-a ron ay ika-4 nga adlaw eon makaron halin ku pageubong.”

40Nagsabat si Jesus, “Bukon abi nga ginhambae ko kimo nga kon gapati ka hay makita mo ro makangawa-ngawa nga gahom it Dyos?”

41Ginpaligid dayon nanda ro sara nga bato. Tapos, nagtangda si Jesus sa eangit ag naghambae, “Ama, saeamat ay ginpamatian mo ako. 42Sayod ako nga ginapamatian mo ako permi, pero ginhambae ko ra agod ro mga tawo ngara nga nagatilindog sa akong palibot hay magapati nga ikaw ro nagpaadto kakon iya.”

43Pagkahambae nana kara hay nagsinggit dayon imaw it mabaskog, “Lazarus, guwa iya!” 44Nagguwa ro dati nga patay nga may budbud nga tinabas ro anang mga alima ag siki, ag putos it tualya ro anang ueo ag uyahon. Naghambae dayon si Jesus sa mga tawo idto, “Bue-a ninyo ro tanan nga nagaputos kana agod makahueag imaw.”

Ro Plano nga Patyon si Jesus

(Mat 26:1-5; Mar 14:1-2; Luc 22:1-2)

45Abo sa mga Judio nga nag-unong kanday Maria ro nagtuo kay Jesus pagkakita nanda ku ana ngatong mga ginhimo. 46Pero ro iba ma't-a kanda hay nag-adto sa mga Pariseo ag ginsugid ro ginhimo ni Jesus. 47Ngani ginpatawag ku mga Pariseo ag ku mga pinuno it mga saserdote ro tanan nandang kaibahan sa *Sanedrin. Hambae nanda, “Matsa owa 't-a it pueos ro atong ginaobra agod nga mapapundo ro haning tawo ngara, ay abo eo't-a nga mga milagrosong pamatuod ro anang ginahimo! 48Kon pabay-an eang naton ra imaw nga magminakaraya, ro tanan nga tawo hay magatuo't-a kana, ag isipon it mga Romano nga nagarebelde kita kanda, ag paadtunan nanda kita it mga soldado ag waskon ro atong Templo, ag dueaon ro atong kahilwayan nga magdumaea ku atong rasa.”

49Pero ro isaea kanda nga si Caifas nga pinakapinuno nga saserdote ku ruyon nga dag-on hay naghambae kanda, “Ay, mga owa gid-a kamo gagamit ku inyong ueo. 50Owa baea kamo kaeubot nga para gid sa inyong kamaeayran nga isakripisyo ro sangka tawo para sa tanan nanang kasimanwa kaysa sa mamatay sanda tanan?” 51Ro ginhambae ngato ni Caifas hay bukon eang it halin sa anang paino-ino kundi, bilang pinakapinuno nga saserdote ku rato nga dag-on, imaw ro gin-gamit it Dyos agod ipahayag nga sa indi magbuhay hay mangin sakripisyo si Jesus para sa anang mga isigkapareho nga Judio. 52Ag ro anang kamatayon hay bukon eang it para sa mga Judio, kundi para man sa tanan nga unga it Dyos nga bukon it Judio nga idto sa sari-saring parti it kalibutan, agod mangin sangka pamilya eang sanda tanan. 53Ngani umpisa ku adlaw ngato, nag-inusoy eon ro mga lider it mga Judio it paagi kon paalin nanda ikapapatay si Jesus. 54Ngani owa eon si Jesus nagpasaga-saga sa Judea kundi nag-adto imaw sa banwa it Efraim nga maeapit sa *disyerto, ag maeayo sa kabanwahan nga may kaabong tawo. Idto imaw nagtenir kaibahan ro anang mga sumueunod.

55Madali lang ro Pagtililipon sa Pagdumdum ku *Pagtaliwan ngani abo nga mga Judio ro nagpanaw paJerusalem halin sa mga kabaryuhan agod tumanon ro kasuguan parti sa phagpakalimpyo bago mag-abot ro Pagtililipon.#11:55 Basaha sa Exo 19:10-15; Num 9:9-14 ag 2 Cron 30:17-18. 56Andang ginainusoy si Jesus ag tag idto eon sanda sa *lagwirta it Templo, nagpaeangutan-an sanda, “Indi't-a siguro imaw mag-adto sa Pagtililipon, no? Ano abi kon kinyo?” 57Ro mga pinuno it mga saserdote ag ro mga Pariseo hay nagsugo sa mga tawo nga sugiran sanda kon may makasayod kon siin si Jesus, agod anda imaw nga ikapadakop.

Currently Selected:

Juan 11: akl

Highlight

Copy