Juan 10

Si Jesus ro Mayad nga Manogbantay it mga Nagatuo Kana

1Nagturo si Jesus sa mga Judio paagi sa rayang paanggid nga istorya. Hambae nana, “Matuod gid rang ginahambae kinyo nga ro owa nagaagi sa pwertahan it toril ku karnero kundi nagatakeas sa kurae, ruyon ngaron hay manakaw ag buyong. 2Pero ro gaagi sa pwertahan hay ro manogbantay gid-a it mga karnero idto. 3Ginabuksan imaw it gabantay sa pwertahan. Ginatawag nana ro ana mismong mga karnero sa andang ngaean ag nagapamati sanda sa anang limog ag gasunod kana paguwa sa toril. 4Pagkapaguwa nana ku tanan nga ana mismo nga mga karnero#10:4 Sa andang lugar, kon amat, sa gabii hay ginatililipon ku mga manogbantay ro andang mga karnero sa sangka maeapad nga toril ag ginabantayan it sambilog eang. Pagkaaga, mansigpaguwa ro mga manogbantay ku anda ma't-a nga mga karnero agod daehon sa pahangeaban. hay gauna imaw ag imaw ro andang ginasundan, tungod kilaea nanda ro limog ku andang manogbantay. 5Pero indi sanda magsunod sa ibang tawo kundi nagapaeagiw sanda ay owa nanda hakilan-i ro ibang limog.” 6Gin-istorya ni Jesus kanda ratong paanggid nga istorya pero owa sanda kaeubot ku buot hambaeon kato.

7Ngani nag-istorya it uman kanda si Jesus. Sinana, “Matuod gid rang ginahambae kinyo nga ako ro pwertahan nga dapat agyan it mga karnero. 8Ro tanan nga hauna kakon nga gapataeang sa mga tawo paagi sa andang saea nga ginaturo hay pareho it mga buyong ag manakaw. Pero owa sanda pagpamatii ku mga karnero. 9Ako ro pwertahan. Kon kakon mag-agi#10:9 Ro buot hambaeon kara ni Jesus hay magsalig ag magtuo kana bilang Maneueuwas. ro mga tawo, sanda hay maeuwas. Mangin pareho sanda it mga karnero nga makaguwa-sueod, ag makakita sanda it maeapad nga pahangeaban. 10Ro manakaw hay nagaadto iya agod magpanakaw, magpatay ag magpangsamad. Pero ako't-a hay nag-adto iya agod taw-an ro mga tawo it minatuod nga kabuhi nga ginapakamaayo it pwerti.”

11Naghambae pa gid si Jesus, “Ako ro mayad nga manogbantay nga nagadipara gid ku akong mga karnero. Ro mayad nga manogbantay hay haom magsakripisyo ku anang kabuhi para sa anang mga karnero. 12Pero ro ginasuhuean eang nga manogbantay hay nagapaeagiw ag ginaaywanan ro mga karnero kon makakita imaw it mabangis nga sapat nga nagapaeangop. Ginaaywanan nana ro mga karnero ay bukon ma't-a abi it ana. Pangeagson dayon ku sapat ro mga karnero agod tabanon, ngani nagapatipeaag sanda tanan. 13Ginaaywanan ku makaruyong manogbantay ro mga karnero ay ginasuhuean man lang imaw, ag owa imaw nahakat kanda.

14“Ako't-a ro mayad nga manogbantay it mga karnero. Kilaea ko gid ro akong mga karnero ag kilaea man nanda ako. 15Ro among pagkililaea hay pareho ku pagkililaea namon ku akong Ama. Ag haom man ako nga magsakripisyo ku akong kabuhi para sa akong mga karnero. 16Ag may akon nga ibang mga karnero nga owa pa hatapoe sa rondayang iya eon sa panong.#10:16 Ro ginapatungdan ni Jesus ku rayang “panong” hay ro mga Judio nga nagatuo eon kana. Ro ginapatungdan ma't-a ku “iba pang mga karnero” hay ro mga bukon it Judio nga magatuo kana sa ulihi. Dapat nga tawgon ko man sanda ag magapamati sanda sa akong limog, ag magatuo kakon. Itapoe dayon sanda sa dati nga panong ag mangin sang panong eon lang sanda tanan ag sambilog eang ro andang manogbantay.

17“Ginahigugma ako it akon nga Ama tungod haom ako nga isakripisyo ro akong kabuhi agod mabaton ko ron it uman. 18Owa it makapatay kakon kon indi ako magsugot pero ako't-a mismo ro gasakripisyo ku akong kabuhi, ay ako ro may kinamatarong nga magsakripisyo karon ag magbaton karon it uman. Ruyon ro sugo kakon it Ama.”

19Pagkabati ku mga manogdumaea it mga Judio sa mga ginhambae ngaron ni Jesus hay owa sanda magkaeasugot parti kana. 20Abo kanda ro nagahambae, “Kaumangon ron imaw ay ginsudlan imaw it demonyo. Ham-an it nagapinamati't-a kamo sa anang ginahinambae karon?”

21Pero ro iba ma't-a hay nagahambae, “Ro ginsudlan 't-a it demonyo hay indi makahambae it makaruyon. Ano ring eaom, makapamayad it bulag ro demonyo ay?”

Ginapatay Kunta si Jesus it mga Judio Dahil Nagpaeubot-eubot Imaw nga Imaw hay Dyos

22Nag-abot eon man ro pagselebrar it mga Judio sa Jerusalem ku Pagtililipon sa Pagdumdum ku *Paghaead ku Templo. Tyempo eon kato it tigeaeamig. 23Si Jesus hay idto man ku ratong Pagtililipon, ag nagatikang-tikang imaw sa sangka parti sa kilid ku *lagwirta it Templo nga ginatawag nga *Portico ni Solomon. 24Pagkakita kana ku mga Judio hay gindueugupan nanda imaw ag ginhambae, “Hasta hin-uno mo pa't-a pahawat-hawaton ro among ginhawa? Prangkaha abi kami kon ikaw gid ro Maneueuwas nga ginpromisa it Dyos.”

25Nagsabat si Jesus, “Ginsugiran ko eon ngani kamo pero indi ma't-a kamo magpati kakon. Ro akong mga ginahimo nga makangawa-ngawa sa ngaean ku akong Ama hay ruyon ro gapakilaea kon sin-o gid matuod ako. 26Pero owa kamo gapati kakon dahil bukon ko kamo it mga karnero. 27Ro akong mga karnero hay nagapamati sa akon nga limog ag kilaea ko sanda, ag nagasunod sanda kakon. 28Ginataw-an ko sanda it kabuhi nga owa it katapusan. Indi gid sanda pagpinahan sa impyerno bisan hin-uno ag owa gid it makaagaw kanda sa akon nga alima. 29Ro mga gintugyan kakon ku Ama hay mahaega gid sa tanan, ag indi nana pagpasugtan nga hiagaw sanda sa anang alima. 30Ako ag ro Dyos Ama hay sambilog eang.”#10:30 Owa ra nagakahueugan nga si Jesus ag ro Ama hay sambilog eang imbis nga daywa kundi katupong imaw it Dyos Ama.

31Pagkabati nanda kara, ro mga Judio hay nagpueueot eon man it bato, ag anda kunta nga eapugon si Jesus hasta mamatay. 32Ngani naghambae imaw kanda, “Abo nga kamaeayran ro ginpaobra kakon ku akon nga Ama ag hakita ron ninyo. Ano sa akong mga gin-obra ngato ro dahilan agod inyo ako nga eapugon it bato?”

33Nagsabat ro mga Judio, “Owa ka namon ginaeapuga dahil sa imong mayad nga gin-obra, kundi dahil sa imong pag-insulto sa Dyos, ay ginatupungan mo't-a imaw bisan tawo ka man lang.”

34Nagsabat si Jesus, “Bukon abi it nasueat sa Sagrado nga Kasueatan nga inyo perming ginabasehan nga ‘Ginhambae ko nga mga dyos kamo’?#10:34 Basaha sa Salmo 82:6. Gintawag sanda it Dyos nga mga dyos dahil mga huwis sanda nga ro basehan dapat ku andang mga ginapapanaog nga sintinsya hay ro Sagrado nga Kasueatan nga gintugyan it Dyos sa mga Judio. 35Sayod kita nga ro Sagrado nga Kasueatan hay puro tama. Ngani kon ‘mga dyos’ ro tawag kato it Dyos sa mga tawo nga gintaw-an nana ku anang mensahi 36hay ano ro inyong kinamatarong nga maghambae nga ginainsulto ko ro Dyos sa akong paghambae nga Unga ako it Dyos, ay ako ro anang ginpili ag ginpadaea iya sa kalibutan? 37Kon owa ako nagaobra it mga makangawa-ngawa nga bagay nga gintugyan kakon ku akong Ama hay ayaw 't-a ugaling ninyo ako pagpatihi. 38Pero dahil nagaobra't-a ako ku mga bagay ngaron, maskin indi kamo magpati sa akong ginahambae, patihi lang ninyo ro mga makangawa-ngawa nakong ginaobra. Ag paagi karon hay masayran ninyo ag maeubtan nga ako ag ro akong Ama hay may maeueot gid nga kaangtanan nga matsa sambilog eang kami.”

39Pagkabati nanda kato hay anda eon man kunta nga dakpon si Jesus, pero matsa pumuslot eang imaw sa andang alima. 40Nagtabok dayon si Jesus sa suba it Jordan ag nagbalik sa lugar kon siin anay nagpangbawtismo si Juan,#10:40 Basaha sa Juan 1:28. ag idto anay imaw nagtenir. 41Abo nga mga tawo ro nag-adto idto kana. Naghinambae sanda, “Owa it mga milagrosong pamatuod nga ginhimo si Juan, pero ro tanan nanang ginsugid parti sa tawo ngara hay matuod gid.” 42Ngani abo idto ro nagtuo kana.

Currently Selected:

Juan 10: akl

Highlight

Copy