లూకా 12
12
పరిసయ్యూల్ ఖాటు ఆటోనా జోడ్ను (మార్కు 8:14-21)
1ఏత్రమా జనం హాఃరు ఘను హూయిన్‍ ఏక్‍నా ఏక్‍ కుమ్దాలావ్‍తూహుయిన్‍ ర్హవామా, యేసు తేదె ఆమ్‍ బోల్యొ, పరిసయ్యుల్‍నూ ఉఫర్లు పేరాక్హోనూ జోణ్‍నూ ఖాటును ఆటోతి జత్తన్‍ ర్హవో. 2లఫిర్యూతే క్హారు ఖ్హాయూబి బాధర్‍ పడ్‍స్యే కోయిన్తే రసేకోయిని. కీనాబి మాలంనాహూనూ కరి కేత్రు ధబడ్‍రాక్యుతోబి యో మాలంహుసే.
3ఇనటేకె తూమే అంధారమా బోల్లేతే వాత్‍ ఊజాళమా క్హామ్జావస్‍, ఘర్మా ధర్వాజు మూఛిలీన్‍ వాతే బోల్లిదా తోబి యో ఘర్‍నూ ఉఫర్‍ యో వాతే ప్రచార్‍ హూస్యే.
కినా ఢర్నూ
4మారొ దోస్‍థో ఏక్‍ వాత్‍ బోలుకరుస్‍ ఖామ్జో, ఆంగ్‍తన్‍నా మర్రాఖావాళనా దేఖీన్‍ నకో ఢరో; ఇమ్‍ మర్రాకీన్‍ ఖాయిబి కోకర్షేని. 5పణీకీ కీనా దేఖిన్‍ ఢర్నూ కతో అద్మినా మర్రాకీన్‍ నరకంమా నాఖావాళనా దేఖీన్‍ ఢరో. ఇనస్‍ దేఖీన్‍ ఢరో కరి మే తూమారేతి బోలుకరుస్‍.
6బే పైసానా పాఛ్‍ పిస్కీలియే లేఛావస్‍కాహేనా? ఇన్మమాతు ఏక్‍ పిస్కీలినాబి దేవ్‍ బుల్‍స్యేకోయిని.
7తూమారు ముఢ్‍క్యామ కేత్రు ఖేహ్‍ః ఖారుబి గణాయ్‍రూస్‍, ఢరోనకో; ఇనటేకె యో పిస్కీలియేతిబి తూమే స్రేష్టుల్‍ కాహేనా?
అద్మీను ఛియ్యనా ఓప్పిలేవాను
8బుజున్‍బి మే తూమారేతి బోలుకరుస్‍, మన అద్మీయేనా ఖామే కోన్‍ ఒప్పిలేస్‍కి ఇనాబి అద్మీనో ఛీయ్యోబి దేవ్నూ దూతల్‍ను ఖామే యూవ్నాబి ఒప్పిలీస్యే. 9అద్మియేమా హాఃమే మే మాలంకోయిని కరి బోలవాళునా అద్మీనొ ఛీయ్యోబి యూవ్నా దేవ్‍కనా మాలంకొయిని కరి దేవ్ను దూతల్‍నా హాఃమె బోల్‍స్యే.
10అద్మీనో ఛియ్యోనా దూషించవాళనాతోబి క్చమించబడ్‍స్యే, పన్కి పవిత్రాత్మనా దూషించవాళనా మాత్రం క్చమాపణ కోయిని.
11యూవ్నే ప్రార్థనాను జోగో, అధికారుల్‍నా, సబా స్తాలంమా క్హామే తూమ్నా లీన్‍ గయు తేదె తూమే ష్యాత్‍ బోల్నూ, కీమ్‍ బోల్నూ కరి పస్తావో నకో. 12తుమె ష్యాత్‍ బోల్లుకి యో వాతేనా పవిత్రాత్మ తుమ్నా సిఖాఢ్‍స్యే.
బుద్ధి కొయింతె దౌలత్‍వాలో
13యో జనంమతూ ఏక్‍ జణో వుటీన్‍ బోధకుడ్‍, భా ను దౌలాత్‍మా మన బ్హాగ్‍ధాకరీ మార భైన బోల్‍ కరి బోలామా.
14యేసు తూమే మన తీర్పు బోలవాలంతరా, న్హైతొ భాగ్‍ పాఢిన్‍ దేవవాళోంతర మన కోన్‍ మ్హేంద్యు? కరి ఇనేతి బోల్యొ. 15బుజు యో యూవ్నేతి తూమే కీనఫర్‍బి గ్హణు ఆక్హ్‍నకోకరో; అద్మీను జీవ్నూ యో కేత్రు జమా కర్యుతోబి ఇనఫర్‍ ఆధారం కోహూసేని.
తెలివికొయింతె రఫ్యావాలను ఉపమానం
16యో యూవ్నేతీ ఏక్‍ ఉపమానం బోల్యొ; ఏక్‍ మ్హాజీన్‍ వాళోనూ ఖేతర్‍ కేత్రేకీ అసేల్‍ పీకాస్‍. 17తేదె ఇనా వాడీన్‍ నాఖాన జోగో కోపురాని, ఇనటేకె మే ష్యాత్‍ కర్‍నూ కరి ఇనూ దిల్మా సోచీన్‍ తేదె యో ఆమ్‍ కర్షే. 18మారు గోధమ్‍ పోడైన్‍ అనేతి అజు గ్హణు మోటు భంధైస్‍, పీక్యూతే ఖారు ఇనమా నఖైన్‍, తేదె యో ఆమ్‍ బోల్లీదో. 19ఇను జాన్‍తి యోస్‍, మారో జాన్‍ కేత్రాకీ వరఖ్‍ః ఖావనూ రాఛ కమాయో, తూ ఖైన్‍ పీన్‍ సుఖపఢ్‍ కరి బోల్లీస్యే. 20తేదె దేవ్‍, బుద్దుకోయినితె అద్మి ఆజ్‍రాత్‍ తారు జాన్‍ మే మాంగుకరుస్‍; తూ కమాయోతే ఖారు కీనూ పాల్‍ హూస్యే కరి పుఛాయో.
21దేవ్‍తి దౌవ్లత్‍ వాళో నాహూయిన్‍, ఇనా ఖాజే దౌలత్‍నా జమా కర్‍లేవళునూ గతి ఇమ్మస్‍ ర్హాస్యే.
దేవ్నఫర్‍ ఆధార్‍ పఢను
(మత్త 6:25-34)
22యో ఇనా సిష్యుల్‍తి ఆమ్‍ బోల్యొ, ఇనఖాజే తుమారు జాన్‍టెకేబి, సాత్ పేర్సూకీకరి, తుమారు ఆంగ్తాన్నాటేకెతోబి చింతపడొనొకొ; ఖానుతితీబి, జాన్‍ మహాన్‍ కాహేనా? ఆ ఆంగ్తాన్నా హఃయూ లుంగఢా పేర్‍నూ? కరి పస్తావో నకో.
23ధాన్‍తిబి జాన్‍, లుంగఢాతిబి ఆంగ్తాన్‌ మోటు కాహేనా? 24కాంగ్లాదేఖో, యో బింజ్లొనా ఖేతర్‍ నాఖకోయిని వాడకోయిని, యూవ్నా గోధాల్ కోయిని, రైతోబి దేవ్‍ యూవ్నా పాళుకరస్‍. తూమే యో జీన్‍వార్‍తిబి కేత్రేకీ స్రేష్టుల్‍ కాహెనా. 25పస్తాయిన్‍ తూమారు జీవితంనా ఏక్‍ గంటో జాహఃత్‍ కర్‍లేళు కోన్‍బి ఛా? 26ఆ ధర్రాష్యు తూమారు హత్‍ నా హూయుతో అజు పార్లు కామ్‍నా టేకె చుక్కె ష్యాన చిమ్తాక్హాస్‍? 27పూల్‍ కీమ్‍ వధూకరస్‍కీ దేఖో, యోమిన్హత్ కరకొయిని, కరకొయిని, మే ష్యాత్‍ బోలుకరుస్‍ కతో యేవోడొ మోటో రాజో సొలోమోన్‍ పేర్యోతే లుంగఢా ఆ పూల్‍మా ఛాతే ఏఖాదునింతరబి రంగ్‍ కోయిని కరి బోలుకరుస్‍.
28తూమే అల్పవిష్వాసీ కోయిన్తే అద్మీయే జాడీమా ఆజ్‍ వుటీన్‍ కాల్‍ చుల్లమా భళీజవళు గాఖ్‍ఃనా దేవ్‍ ఏత్రే రంగేలు కర్యుతో తూమ్నా బుజు కేత్రే రంగ్‍ కర్‍నూ.
29సాత్ ఖాసుకీ సాత్ పీసుకీ పీస్యుకీ కరి ఇనటేకె తుమార దిల్మా చిమ్తానకో లేవో ఇనా పీటే నాక్హో నకో.
30ఆ ములక్‍నూ అద్మీయే ఇనటేకె నాఖాస్‍, తూమార భానా యోహాఃరు తూమ్నా జరూరత్‍ కరి మాలం. 31తూమే దేవ్నూ రాజ్యంనా ఢూండో, ఇనకేడే ఆఖారుబి మళ్‍స్యే.
32“న్హాను గల్లో ఢరోనకో తూమ్నా దేవ్నూ రాజ్యం దేవాను తూమార భా న ఇష్టమస్‍.” 33తూమార కనా ఛాతే ఇనా లేఛీన్‍ ధరమ్‍ కరో; గళాకోయిన్తే రఫ్యాని సంఛేవ్‍నా తయార్‍ కర్‍లేవో. తూమారు దవ్లత్నా స్వర్గంమా లపాడో, ఏజ్గా క్హయూ ఛోర్‍బి ఆవ్‍స్యే కోయిని, వూధీయేబి ధర్‍స్యే కోయిని. 34కేజ్గా రఫ్యా రస్‍కీ తూమారు జాన్‍బి ఏజ్గాస్‍ ర్హాస్‍.
సేవకుల్ను సిద్దపాట్టు హువాను
(మత్త 24:37–25:30)
35తూమారు కంభర్నా భాందిలీన్‍, తూమారు దేవ్ను ఆగ్‍నా ఇమ్మస్‍ భళ్తుర్హవదే. 36య్హాను విందు ఖావనా గయోతే హమారు మాలిక్‍ కేదె ఆవ్‍స్యే కరి కావల్‍ కాసిర్యూతే దాసుల్‍నితర ర్హవో మాలిక్‍ ఆయిన్‍ తలుపు ట్హోక్సే. 37యో మాలిక్‍ ఆయిన్‍, హోషార్‍తీ ర్హవనూ కీనా దేఖాస్‍కీ యూవ్నే ధన్యుల్‍; యోస్‍ ఆయిన్‍ ఇనా కంభర్నా బాందిలీన్‍ యూవ్నా ఖాణు ఖాడవనా బేక్హాఢీన్‍ యో సేవల్‍ కర్షె కరి తూమారేతి క్హాచీతీ బోలుకరుస్‍.
38బుజు యో బే భజేనా ఆయితోబి, తీన్‍ భజేనా ఆయో తోబి తో వక్హాత్‍ కోన్‍ హోషార్‍తి రహిన్‍ దేఖావస్‍కీ యూవ్నే ధన్యుల్‍. 39ఏక్‍ ఘర్‍నూ మాలీక్‍నా ఇనా ఘర్మా ఛోర్‍ ఆవ్‍స్యే కరి ఆగఢీస్‍ మాలంహూయుతో యో ఛోర్‍ నా ఆవ్‍నూ తిమ్‍ హూషార్‍ హూయిజాస్యే. 40తూమ్నా మాలంకోయిన్తే వోక్హాత్‍ అధ్మీనూ ఛీయ్యోబి ఇమ్మస్‍ ఆవ్‍స్యే, ఇనటేకె తూమే సిద్దంగా ర్హవో కరి బోల్యొ.
విష్వాస్‍ కొయింతె సేవకుడ్‍
41తేదె పేతూరు ప్రభు ఆవాత్‍ హమ్నాస్‍ బోలుకరస్కి, న్హాయితో క్హారవ్నా బోలుకరస్కరీ బోలామా.
42తేదె ప్రభు ఆమ్‍ బోల్యొ, ఏక్‍ ఘర్నో మాలిక్‍ ఫరీన్‍ ఆయో తేదె ఇనుసేవకుల్‍ క్హారవ్నా బరోబర్ను వాక్హాత్‍మా ఖాణు ఖఢవనాటేకె ఇనూ గర్మాకోన్‍ హొషార్తీ, ఛలాక్తి, రైతే అద్మినా దేఖీన్‍ యూవ్నాఫర్‍ అధికారినింతర మ్హేంఛే.
43యో మాలీక్‍ ఫాచూ ఆయిన్‍ దేఖోతేదె క్హయోదాసుడ్‍ యో బోల్యొ తిమ్మస్‍ కర్తూర్హాస్కీ, యో ధన్యుడ్‍ కరి బోల్యొ. 44తేదె యో ఇను ధౌలత్‍ హాఃఛిఫర్‍ ఇనా అధికారి కర్‍స్సెతె క్హాఛి. 45పన్కీ యో దాసుడ్‍ మారో మాలీక్‍ కేదె ఆవ్‍స్యేకరి సోచుకర్తో హుయిన్‍ మాలిక్‍ ఆవనా గ్హను వహాఃత్‍ ఛాకరి యో ఖైన్‍, పీన్‍, దాసీ, దాసుడునా మార్తొర్హయోతో, 46తేదె యో సోచ్యా కొయిన్తేధన్‍, సోచ్యాకొయింతె వహాఃత్‍మా మాలీక్‍ ఆయిన్‍, యో దాసుడ్నా మరై నాఖీన్‍ ఇనా భక్తిహీనుల్‍మా మళైనాక్‍దిస్యే.
47సేవకుడ్‍, మాలీక్నూ దిల్నూ వాత్‍ మాలంరైన్‍సబి ఇనూ కామ్‍ నాకర్యతో యో దాసుడ్నా కెత్రేకి మార్‍ లగ్‍స్యే. 48హూయితోబి మాలంకోయిన్తే తప్పు కరవాళునా కమ్‍ మార్‍ పఢ్‍స్యే. కినా గ్హణు దేస్కీ యూవ్నాకం‍తూస్‍ గ్హణు ఆహ్ః కర్సె, గ్హణు దేవాయ్‍ర్యూతే అద్మీయేకంతూస్‍ ఆనేతిబి గ్హణు ఆహ్ః కరాస్‍.
యేసు లఢాయ్ కరను కారణ్‍
49మే ఆయోతే ఆ జమీన్ఫర్ ఆగ్‍ నాఖానటేకె ఆయో, యో ఆగ్‍ హాంకేస్‍ భళ్‍నూ కరి ఆహ్ః కరుకురుస్‍.
50వుజు మే లేనూతే దుఃఖామ్ను బాప్తిస్మమ్‍ వుజుబి ఛా, యో హూవతోడీ మన ఆమిన్హత్‍ తప్పకొయిని.
51ఆ జమీన్ఫర్ ఆయోతె సమాధానం కరనటేకె ఆయోకరి సోచిలెంకరస్నా? కాహె ఏక్నయేక్‍ అలాదు కరనాటేకె ఆయో. 52హంకేతు ధరీన్‍ ఏక్‍ ఘర్మా ఫాచ్‍జణ రైతో యూవ్నే తీన్జణ ఏక్‍ బాజు రైతో బే జణ ఏక్‍ బాజు; బే జణ ఏక్‍ బాజు ర్హైతొ తీన్జణ ఏక్‍ బాజు ర్హైన్‍ ఇమ్‍ లాఢాయి కర్సె. 53అజు భా ఛియ్యోనా, ఛియ్యో భా న, ఆయా ఛోరినా ఛోరి ఆయానా, హాఃహుః హొవ్నా హొవ్‍ హాఃహుఃతి లఢాయి కర్సె.
అగాఢి జరగజాసెతె
54బుజు యేసు జనం ఖారేతి ఆమ్‍ బోల్యొ, తూమే పడమటతూ మాబ్బు ఆవనూ దేఖ్యాతో యెత్రే యగ్గీస్‍మా పాని వరహ్‍ఃస్యే కరి బోల్‍స్యు. ఇమ్మస్‍ వరఖాస్‍. 55దక్చిణనూ వ్యారో వాగ్యుతో అఖఢ్‍నూ గ్హాను గరామ్ను వ్యారో ఆవ్‍స్యేకరి బోల్‍స్యు ఇమ్మస్‍ హుసె.
56హదేక్‍ కపాఠివాలా! తుమే ఆకాష్‍, జమీన్‍నా దేఖీన్‍ ష్యాత్‍ జరగ్‍స్యేతే బోలస్‍ పన్కీ, ఆ ధన్నూ హఃనద్‍నా మాలం కరూకరకొయిన్నా?
ఏక్ను గలత్‍నా మాప్‍కరొ
57కెహూ న్యాయంకీ తూమేస్‍ మాలంకర్లేవో. 58తుమారు వైరి తుమ్నా అధికారికనా లీన్‍ జావనువోహఃత్‍ తుమే యోజావనూ వాట్ఫరస్‍ ఇనేతి కీమ్బి బోలిన్‍ పరిష్కారించను కోసీష్‍ కరో. న్హైతో యోవైరీ తుమ్నా ధర్మషాస్ర్తం నెయ్యోకనా లీన్‍ జాస్యే, యో నెయ్యో సైనికుడ్నా ధరౌస్యే, యో సైనికుడ్‍ తూమ్నా ఠాణామ ఘలవుస్యే. 59తుమారకనా ఛాతే ఆహాఃరును రఫ్యా హాఃర బాంధతోడీ తుమె బ్హాధర్‍ ఆవ్‍స్యుకోయిని కరి మే తారేతి ఖఛ్చితంగా బోలుకరూస్‍.
Currently Selected:
లూకా 12: NTVII24
Highlight
Share
Copy
Want to have your highlights saved across all your devices? Sign up or sign in
The New Testament in Vagiri Language © The Word for the World International and Vagiri Nawa Jivan Kristi Madadi Telangana, India. 2024
