అపొ 28
28
మెలితె దీవి
1హాఃమె ఛుకైలేవాన బాద్మా యో ద్వీపం మెలితే కరి హామ్నా మాలంహూయు. 2ఎజ్గనూ అద్మియే హామరఫర్‍ ఘణు దయ దేఖాడు. కిమ్కతో తెదె పాని వరహ్ః తూ హూయిన్‍, హమ్నా ఘణు ఠణ్‍ ర్హవమా యూవ్నే ఆగ్‍ బాళిన్, హమ్నా హాఃరవ్‍నా కంధే కర్లీదు. 3తెదె పౌల్‍ థోడా లాక్‍ఢాన ఛూణీన్‍ ఆగ్‍ఫర్‍ నాఖూకరాతో ఏక్ క్హాప్‍ యో ఆగ్నూ ఆంచ్‍నా భార్‍ ఆయిన్‍, ఇనా హాత్‍నా కల్‍డ్యు. 4జనాభో హఃరు యో హాఃప్‍ ఇనా హాత్‍నా ధర్లీన్‍ ఠంగీ ర్హావనూ దేఖిన్‍, “ఆ అద్మి కఛ్చితంగా హంతకుడ్‍ హూసే. యో ధర్యావ్‍మతూ చుఖైన్‍ ఆయోతోబి న్యాయంను దేవతా ఇనా జీవాదిసెకొయిని” కరి ఏక్నా ఏక్ బోల్లీదు. 5హుయుతో పౌల్‍ యో ఝేర్ను హాఃప్‍నా ఆగ్‍మా జఠ్కీనాఖీన్‍ కేయు హానిబి కోహుయుని. 6యూవ్నే హాఃరు ఇనూ ఆంగ్‍తన్‍ పులీజవానుస్‍కీ, నైతో యో హఃడాల్‍ కరి పడీ మర్జానూస్‍కీ హూసే కరి దేక్తూర్హయు. ఘణా వోహఃత్‍ హూవానా బాద్‍మాబి ఇనా కాయినా హూవానూ దేఖిన్‍ ఇవ్ను అభిప్రాయ్ భద్‍లాయిలీన్‍, “ఆ ఏక్ దేవ్‍” కరి బోలానిక్యు.
7పోప్లి కరి యో ద్వీపంమా ముఖ్య అద్మి. ఇనా యో ప్రాంతంమా ఘణు జమీనే ఛా. యో హామ్నా కంధేకర్లీన్‍ తీన్‍ ధన్‍ హామారేతి దోస్తితి అతిధ్‍ కర్యో. 8యో వోహఃత్‍మా పోప్లినో భా తావ్‍థీ, ల్హొయినూ పేట్‍చాలానూథీ బాధ పడ్తోహుయిన్‍ హూఃతోథో పౌల్‍ ఇనాకనా జైన్‍ ప్రార్థన కరీన్‍ ఇనాఫర్‍ హాత్‍ మ్హేంధీన్ అసేల్‍ కర్యో. 9ఇమ్‍ హూయుతె ఇనా దేఖీన్‍, యో ద్వీపంమా ఛాతే హాఃరా రోగ్‍ వాళబి ఆయిన్‍ అసేల్‍ హూయా. 10బుజ ఇవ్నే హమ్నా కెత్రూకి మాన్‍ మర్యాధ కరీన్‍, బుజు హామే ఝాజ్‍ ఛడీన్‍ జవాను వోహాఃత్‍ హామ్నా జరూరత్‍ ఛాతే హాఃర రాఛు లాయిన్‍ ఝాజ్‍మా రాఖ్యు.
మెలితె దీవితూ రోమనా జావను
11తీన్‍ మైనానా బాద్మా, హామే యో ద్వీపంమా ఠణ్‍నా ధన్‍ హాఃరా భీరిరూతే ఝాజ్‍మా నిక్యా. యో ఝాజ్‍ అలెగ్జాండ్రియ నంగర్‍నూ. ఇనాఫర్‍ కవులు జోడాకరి హాఃనత్‍ ఛా. 12సూరకూ నంగర్‍నా ఆయిన్‍ ఏజ్గా తీన్‍ ధన్‍ ర్హయా. 13ఏజ్గాతూ ఆష్పిష్‍ ఫరీన్‍ జైన్‍ రేగియునా ఆయిన్‍ ఏజ్గా ఏక్ ధన్‍ ర్హవాదీన్‍ దక్చిణ్‍నూ వాయిరో వాగమా బుజాధన్నే పొతియొలీ హఃయర్‍ గయా. 14ఏజ్గా థోఢా భైయే మళ్యాతేదె యూవ్నే హామారేతి మలిన్‍ హాఃత్‍ ధన్‍ ర్హవో కరి హామ్నా బతిమాలు. ఇనబాద్‍మా రోమ్‍ నంగర్‍నా ఆయా. 15ఏజ్గాతుస్‍ భైయ్యే హమార గూర్చి హాఃమ్జీన్‍ హమార హాఃజే ఏదుర్‍ ఆయా. అప్పియా బజార్‍ తోడీ త్రియొన్‍ సత్రం తోడి ఆయా. ఇవ్నా దేఖీన్‍ పౌల్‍ దేవ్నా కృతజ్ఞత కరీన్‍ హిమ్మత్‍ లాయిలీదో.
రోమ హాఃయర్మా
16హామే రోమ్‍నా గయాతెదె పౌల్‍నా ఇనా కావ్లీ కరుకరాతే సైనికుడ్‍తి మలిన్‍ ప్రత్యేకంగా ర్హవానా అనుమతి మళ్యు.
17తీన్‍ధన్నా బాద్‍ యో ప్రముఖ్‍ యూదుల్‍నా ఇనా కనా బులామంగయో. ఇవ్నే ఆయుతేదె యో భైయ్యే, మే అప్నా ప్రజల్‍నా, పూర్వీకుల్‍నూ ఆచారాల్‍నా ఆడు కాయి నా కర్యుతోబి, యెరూషలేమ్‍థూ మన రోమ్‍ను హాత్మా ధరాయా. 18ఇవ్నే మన పరీక్చించీన్‍ మరామా మరణ్‍నూ తగ్గిన్‍నూ కాయిబి నాదేఖవమా, మన మ్హెందేనుకరి ర్హైగూ, 19పాన్కి యూదుల్‍ ఆఢే బోలమా మే రోమనురాజొ హాఃమే బోల్లీస్‍ కరి బోలమా హూయు థూ. ఏత్రేస్‍ గాని మార అద్మీఫర్‍ ఇంజామ్‍ నాక్నూ కరి మాత్రం కాహే. 20ఆ వాత్‍నా టేకెస్‍ మే తుమ్నా బులాయో. ఇష్రాయేల్‍ ప్రజల్‍నూ నిరిక్చణ్‍నా టేకెస్‍ మే ఆ ఖంకల్‍తి భందైరోస్‍ కరి ఇవ్నేతి బోల్యొ.
21ఇనహాఃజే ఇవ్నే, “యూదయతు తూమారు వాతేను ఉత్తర్‍ ఆయుకోయిని, ఆజ్గా ఆయుతే యూదు భైయ్యేమా ఏక్‍జణుబి తూమారు బారెమా ఖర్రాబ్‍ వాత్‍ బోల్యకోయిని కోన్‍బి బోల్లిదుబి కోయిని. 22హూయుతోబి ఆ విషయంమా తూమరు అభిప్రాయ్ తూమార మ్హోఢాతీస్‍ హాఃమ్జునూ కరి ఛీయ్యే. ఆ మతభేద్‍నూ హాఃజే హాఃరు జోగోబి వ్యతిరేక్‍ నితర ఛాకరీ హమ్నా మాలం” కరి బోల్యు.
23యో ఏక్ ధన్నే ఏర్పాట్‍ కరీన్‍, యో ఛాతే జోగో హాఃరు జణు ఆయు. వ్వాణేతూ ధరీన్‍ హాఃమీ హాఃమ్‍ తోడీ యో దేవ్‍నూ రాజ్యంన టేకె పూరా సాక్చ్యం దేతోహుయిన్‍, మోషే ధర్మషాస్త్రథూ, ప్రవక్తల్‍మథూ నూ సంగతుల్‍నా యూవ్నా దేఖాడ్‍తో హుయిన్‍, యేసునా హాఃజే ఖూల్లా కరీన్‍ బోల్తో హుయిన్‍, యూవ్నా ఒప్పావ్‍తో ర్హయో. 24యో బోల్యోతే సంగతుల్‍నా థోడు జణు నమ్యు, థోడు జణు నమ్యు కోయిని. 25యూవ్నామా భేదం హుయిజవమా, పౌల్‍ ఆఖరిమా యూవ్నేతి ఏక్ వాత్‍ బోల్యొ. యో ష్యాత్‍ కతో, పవిత్రాత్మ యెషయాతి ప్రవక్త తూమారు పితరుల్‍తి బోల్యోతే వాత్‍
26ఇవ్నే హాఃమాజ్‍సే పన్కీ అర్ధం కర్‍సే కోయిని.
దేక్‍సే పన్కి గ్రహీంచే కోయిని కరి ఆ అద్మీయేతి బోల్‍.
27ఆ అద్మీయే ఢోలాతి ధేఖీన్‍, ఖాన్‍తి హాఃజీన్‍,
పూరా దీల్‍తి అర్ధం కరీన్‍ మార మ్హణీ ఫరీన్‍,
మారేతి అష్యల్‍ నాహుయిన్‍,
ఇవ్నూ దిల్ ఘట్‍ హుయిగు.
ఇవ్నే కాయిబి హాఃమాజ్‍ కోయిని,
ఇవ్ను ఢోలా మూఛీరాఖ్యస్‍ కరి
28ఇనహాఃజే దేవ్‍తీ హూయుతే ఆ బఛ్చాడ యూదులు కాహెతె ఇవ్నా కనా ఛల్‍జౌంగ్రస్‍ కరి తుమె మాలంకర్‍లీసు. ఇవ్నే ఇనా ఒప్పిలీసే ఆ వాత్‍ హాఃజుతే ఇవ్నే హాఃరు ఛలీగయు. 29#28:29 పౌల్‍ అమ్‍ బోల్‍ను బద్మా యూదున్నా మిందీన్‍ ఇవ్నాఇవ్నా బీచ్మా లాఢయే హుయు ఆ వాక్యం మూలం గ్రంధమా లీదు
30పౌల్‍ పురా బే వరహ్ః బాడ్‍గునా ఘర్‍మా ర్హైన్‍, ఇనా కనా ఆవావళు హాఃరనా ఆదరిస్తోర్హయో. 31కెహూ ఆడుస్‍ కోయినితిమ్‍ పురా హీమ్మతి దేవ్ను రాజ్యంనా హాఃజే ప్రచార్‍ కర్తోహుయిన్‍, ప్రభూహుయోతే యేసు క్రీస్తునూ వాతేనా బోధిస్తో ర్హయో.
Currently Selected:
అపొ 28: NTVII24
Highlight
Share
Copy
Want to have your highlights saved across all your devices? Sign up or sign in
The New Testament in Vagiri Language © The Word for the World International and Vagiri Nawa Jivan Kristi Madadi Telangana, India. 2024
